అబార్షన్ చేస్తే ఆ తరువాత మళ్లీ పిల్లలు పుట్టరా? గర్భ నిరోధక మాత్రలు, గర్భస్రావం మాత్రలు రెండూ ఒకటేనా

"డాక్టర్ దగ్గరకు వెళ్లాల్సిన అవసరం ఏముంది? ఫార్మసీలో మాత్రలు దొరుకుతున్నాయి కదా"

ఈ ఆలోచనతో గర్భస్రావం చేసుకోవడానికి కొందరు మహిళలు తమ స్నేహితులు, సోషల్ మీడియా, ఇంటర్నెట్ లేదా ఫార్మసీ సలహాల ఆధారంగా మందులు తీసుకుంటున్నారు. మరికొందరికి గర్భనిరోధక మాత్రలు, ఎమర్జెన్సీ కాంట్రసెప్టివ్ మాత్రలు, గర్భస్రావం (మెడికల్ అబార్షన్) మాత్రలు.. ఇవన్నీ ఒకటే అనే అపోహ ఉంది.

కానీ ఇవన్నీ పూర్తిగా వేర్వేరు.

ఒక మాత్ర గర్భం రాకుండా నిరోధిస్తుంది. మరొకటి అత్యవసర పరిస్థితిలో గర్భధారణ అవకాశాన్ని తగ్గిస్తుంది. ఇంకొకటి ఇప్పటికే ఏర్పడిన గర్భాన్ని వైద్య పద్ధతిలో తొలగించడానికి ఉపయోగిస్తారు.

ఈ తేడా తెలియకపోవడం వల్ల తప్పు మందు తీసుకోవడం, గర్భధారణ కాలాన్ని తప్పుగా అంచనా వేయడం, ఎక్టోపిక్ ప్రెగ్నెన్సీని (గర్భ సంచి బయట పిండం ఏర్పడటం) గుర్తించకపోవడం, అధిక రక్తస్రావాన్ని నిర్లక్ష్యం చేయడం వంటి వాటి వల్ల సమస్యలు రావచ్చు. అందుకే దీనిపై భయం కాకుండా సరైన అవగాహన అవసరం.

గర్భ నిరోధక మాత్రలు, గర్భస్రావం మాత్రలు.. ఈ రెండూ ఒకటి కాదు.

మరి ఏ మాత్ర ఎప్పుడు వేసుకోవాలి? వీటితో సైడ్ ఎఫెక్ట్స్ ఉంటాయా?

ఇంట్లోనే గర్భస్రావం చేసుకోవడం ఎప్పుడు సురక్షితం? ఎప్పుడు ప్రమాదం?

ఒక చిన్న కథ... కానీ చాలా ముఖ్యమైన సందేశం

26 ఏళ్ల మహిళకు నెలసరి రావడం ఆలస్యమైంది.

కొన్ని వారాల క్రితం రక్షణలేని లైంగిక చర్య జరిగింది.

"గర్భం రాకుండా ఉండటానికి ఒక ఎమర్జెన్సీ పిల్ వేసుకున్నాను కాబట్టి గర్భం ఉండదు" అని ఆమె అనుకున్నారు.

కొన్ని రోజుల తర్వాత కూడా నెలసరి రాకపోవడంతో ఒక స్నేహితురాలు మరో టాబ్లెట్ సూచించారు. ఫార్మసీలో కూడా మరో మందు తీసుకున్నారు.

ఆ మందులు తీసుకున్న తర్వాత రక్తస్రావం మొదలైనప్పటికీ, కడుపునొప్పి తీవ్రంగా ఉంది.

అయినా సరే.. మొదట తీసుకున్న మాత్ర పనిచేస్తోందనుకుని ఇంట్లోనే ఉండిపోయారు.

కొన్ని గంటల తర్వాత తల తిరగడం, బలహీనత, మూర్ఛ వచ్చే పరిస్థితి ఏర్పడింది.

ఆసుపత్రికి తీసుకెళ్లగా ఎక్టోపిక్ ప్రెగ్నెన్సీ ఉన్నట్లు తేలింది.

ఇక్కడ అసలు సమస్య "టాబ్లెట్ పనిచేయలేదా?" అనేది కాదు. గర్భం ఎక్కడ ఏర్పడిందో తెలియకుండా మందులు తీసుకోవడం.. అది ప్రమాదం.

అందుకే గర్భస్రావం విషయంలో టాబ్లెట్ పేరు" కంటే ముందుగా... గర్భం ఉందా? ఎంతకాలమైంది? గర్భం గర్భాశయంలో ఉందా? ట్యూబుల్లో ఉందా? మహిళ ఆరోగ్య పరిస్థితి ఎలా ఉంది? అనే ప్రశ్నలకు సమాధానం అవసరం.

ఈ మాత్రల గురించి మూడు విషయాలు

1. గర్భనిరోధక మాత్రలు - గర్భం రాకుండా నిరోధించడానికి ఉపయోగిస్తారు. ఇవి మహిళలు క్రమం తప్పకుండా తీసుకునే కాంట్రసెప్టివ్ పిల్స్.

ఇవి ప్రధానంగా రెండు రకాలుంటాయి:

- కంబైన్డ్ ఓరల్ కాంట్రసెప్టివ్ పిల్స్ (COCs) — ఇందులో ఈస్ట్రోజెన్, ప్రొజెస్టిన్ ఉంటాయి.

- ప్రోజెస్టిన్ ఓన్లీ పిల్స్ (POPs) — ఇందులో ప్రొజెస్టిన్ మాత్రమే ఉంటుంది.

ఇవి ప్రధానంగా అండోత్సర్గాన్ని అడ్డుకోవడం, గర్భాశయ ముఖద్వారంలోని మ్యూకస్‌ను మారుస్తూ స్పెర్మ్‌కు అడ్డంకి కల్పించడం వంటి విధానాల ద్వారా గర్భధారణ అవకాశాన్ని తగ్గిస్తాయి.

డబ్ల్యూహెచ్ఓ ప్రకారం.. సరైన విధంగా ఉపయోగించినప్పుడు ఓరల్ కాంట్రసెప్టివ్ పిల్స్ చాలా ప్రభావవంతమైన గర్భనిరోధక పద్ధతులు.

అయితే అన్ని మాత్రలూ అందరికీ సరిపోక పోవచ్చు. మహిళ ఆరోగ్య పరిస్థితి, ఇతర మందులు, రక్తం గడ్డకట్టే సమస్యల వంటి అంశాలను పరిగణనలోకి తీసుకోవాలి.

ఇప్పటికే ఏర్పడిన గర్భాన్ని తొలగించడానికి గర్భనిరోధక మాత్రలు ఉపయోగపడవు.

2. అత్యవసర గర్భనిరోధక మాత్రలు - రక్షణలేని లైంగిక చర్య తర్వాత గర్భధారణ అవకాశాన్ని తగ్గించడానికి ఇవి ఉపయోగిస్తారు.

ఇవి ప్రధానంగా అండం విడుదలను ఆలస్యం చేయడం లేదా నిరోధించడం ద్వారా పనిచేస్తాయి. లైంగిక చర్య తర్వాత వీలైనంత త్వరగా ఉపయోగిస్తే ఇవి ఎక్కువ ప్రభావవంతంగా ఉంటాయి.

ఎమర్జెన్సీ కాంట్రసెప్టివ్ పిల్స్ ఇప్పటికే ఏర్పడిన గర్భాన్ని తొలగించవు అని డబ్ల్యూహెచ్ఓ స్పష్టంగా చెబుతోంది.

అవి గర్భస్రావాన్ని ప్రేరేపించవు.

3. వైద్యపరమైన గర్భస్రావ మాత్రలు (మెడికల్ అబార్షన్ పిల్స్) - ఇప్పటికే ఏర్పడిన గర్భాన్ని వైద్యపద్ధతిలో తొలగించడానికి ఇవి ఉపయోగిస్తారు.

ఈ మూడు మందులను ఒకదానికొకటి ప్రత్యామ్నాయంగా భావించడం తప్పు.

మరి వైద్యపరమైన గర్భస్రావ మాత్రలు ప్రమాదకరమా?

సరైన పరిస్థితుల్లో, సరైన గర్భధారణ కాలానికి సరిపోయే, డబ్ల్యూహెచ్ఓ సూచించిన పద్ధతిని ఉపయోగిస్తే వైద్యపరమైన గర్భస్రావం సాధారణంగా సురక్షితమైన వైద్యపద్ధతి.

అంటే "అబార్షన్ మాత్రలు ప్రమాదకరం" అనడం కూడా తప్పు.

అదే సమయంలో "ఎవరైనా, ఎప్పుడైనా, ఏ పరిస్థితిలోనైనా ఫార్మసీ నుంచి మాత్రలు కొనుక్కొని తీసుకుంటే సరిపోతుంది" అనడం కూడా తప్పు.

సురక్షితమైన వైద్యపద్ధతి, తెలియకుండా మందులు తీసుకోవడం మధ్య చాలా తేడా ఉంది.

ఇంట్లో సొంతంగా వైద్యపరమైన గర్భస్రావం జరగడం అంటే అది తప్పనిసరిగా అసురక్షితం అని కూడా కాదు.

డబ్ల్యూహెచ్ఓ 2025 గర్భస్రావ మార్గదర్శకాల ప్రకారం... 12 వారాల కంటే తక్కువ గర్భధారణలో సరైన సమాచారం, నాణ్యమైన మందులు, అవసరమైనప్పుడు శిక్షణ పొందిన ఆరోగ్య కార్యకర్త సహాయం, అవసరమైతే అత్యవసర వైద్య సేవలు అందుబాటులో ఉన్న పరిస్థితిలో వైద్యపరమైన గర్భస్రావాన్ని ఇంట్లోనే మహిళ చేసుకోవచ్చు.

అయితే.. "ఇంట్లో తీసుకోవడం" ఒక్కటే ప్రమాదానికి కారణం కాదు.

కొన్నిసార్లు ట్యూబ్ ఎక్టోపిక్ ప్రెగ్నెన్సీలో ఫాలోపియన్ ట్యూబ్ పగిలిపోయి తీవ్రమైన అంతర్గత రక్తస్రావం జరగవచ్చు.

దీని వలన ఒక వైపు తీవ్రమైన కడుపు నొప్పి, భుజం నొప్పి, తల తిరగడం, మూర్ఛ, తీవ్రమైన బలహీనత వంటి లక్షణాలు ఉండొచ్చు. కాబట్టి ఈ పరిస్థితుల్లో ఇంట్లో మాత్రలు తీసుకుని వేచి ఉండటం ప్రమాదకరం.

కాబట్టి గర్భం ఉందని తెలుసుకోవడం ఒక్కటే సరిపోదు.. గర్భం ఎక్కడ ఉందో కూడా తెలుసుకోవాలి.

గర్భం పూర్తిగా బయటకు రాకపోతే?

మెడికల్ అబార్షన్ తర్వాత కొన్నిసార్లు గర్భ కణజాలం పూర్తిగా బయటకు రాకపోవచ్చు. దీన్ని ఇన్‌కంప్లీట్ అబార్షన్ అంటారు.

దీని వల్ల ఎక్కువ రోజులు రక్తస్రావం అవడం, కడుపులో నొప్పి, ఇన్ఫెక్షన్లు, ఎనీమియా వంటి సమస్యలు రావచ్చు.

అవసరాన్ని బట్టి వైద్యుడి పరిశీలనలో ఉంచి, తగిన చికిత్సా విధానాన్ని సూచించవచ్చు.

అందుకే "రక్తస్రావం మొదలైంది కాబట్టి అబార్షన్ పూర్తయింది" అనే భావనకు రాకూడదు.

"అబార్షన్ మాత్రలు భవిష్యత్తులో పిల్లలు పుట్టకుండా చేస్తాయా?"

సరైన పద్ధతిలో చేసే మెడికల్ అబార్షన్ సాధారణంగా భవిష్యత్తు ఫెర్టిలిటీని నాశనం చేయదు.

మెడికల్ అబార్షన్ తర్వాత ఫెర్టిలిటీ త్వరగా తిరిగి రావచ్చు. కాబట్టి ప్రెగ్నెన్సీ కోరుకోని మహిళలు తదుపరి గర్భనిరోధక పద్ధతి గురించి వెంటనే ఆలోచించాలి.

గర్భనిరోధక మాత్రల సైడ్ ఎఫెక్ట్స్

ఓరల్ కాంట్రసెప్టివ్ పిల్స్ కొంతమంది మహిళల్లో వికారం, తల నొప్పి, తల తిరగడం, రొమ్ము నొప్పి, మూడ్ స్వింగ్స్, నెలసరి సరిగా రాకపోవడం వంటి లక్షణాలకు కారణం కావచ్చు.

చాలా సందర్భాల్లో ఇవి కాలక్రమేణా తగ్గుతాయి.

అయితే కొన్ని పిల్స్‌లో ఈస్ట్రోజెన్ ఉండటం వల్ల కొన్ని అరుదైన, తీవ్రమైన సమస్యలు — ముఖ్యంగా రక్తం గడ్డ కట్టడం, స్ట్రోక్, హార్ట్ అటాక్ వచ్చే ప్రమాదం కొందరిలో పెరగవచ్చు. అందుకే వ్యక్తిగత వైద్య చరిత్ర ఆధారంగా గర్భ నిరోధక విధానాన్ని ఎంపిక చేయాలి.

‘మాత్రలు వేసుకున్న మహిళ చనిపోయింది’.. ఇలాంటి వార్తలను ఎలా అర్థం చేసుకోవాలి?

కొన్నిసార్లు పత్రికల్లో లేదా సోషల్ మీడియాలో "అబార్షన్ మాత్రలు వేసుకున్న మహిళ మృతి" లాంటి వార్తలు కనిపిస్తుంటాయి.

ఇలాంటి వార్తలు మనల్ని అప్రమత్తం చేయాలి.

మందు తీసుకున్న తర్వాత ఒక మహిళ చనిపోతే దానికి ఆ మాత్రలే కారణమని తేల్చలేం.

వైద్యపరంగా ఇలాంటి ఎన్నో అంశాలను పరిగణించిన తర్వాతే దాన్ని పూర్తిగా అర్థం చేసుకోవచ్చు.

భారత్‌లో చట్టపరమైన అవగాహన

భారత్‌లో మెడికల్ టెర్మినేషన్ ఆఫ్ ప్రెగ్నెన్సీ (MTP) (అమెండ్‌మెంట్స్) యాక్ట్ - 2021 అబార్షన్‌కు సంబంధించిన మార్గదర్శకాలను సూచిస్తోంది.

దీని ప్రకారం కొన్ని నిర్దిష్ట పరిస్థితుల్లో 20 వారాల వరకు టెర్మినేషన్‌కు ఒక రిజిస్టర్డ్ మెడికల్ ప్రాక్టీషనర్ అభిప్రాయం, అలాగే కొన్ని నిర్దేశిత వర్గాల్లో 20–24 వారాల మధ్య ఇద్దరు రిజిస్టర్డ్ మెడికల్ ప్రాక్టీషనర్‌ల అభిప్రాయం అవసరమనే నిబంధనలు ఉన్నాయి. చట్టంలో మరిన్ని ప్రత్యేక పరిస్థితులు, రక్షణ చర్యలు కూడా ఉన్నాయి.

అందువల్ల "అనుకోకుండా గర్భం వస్తే చట్టపరంగా ఏమీ చేయలేం" అనుకోవడం కూడా తప్పు.

అదే సమయంలో "ఏ మాత్రనైనా ఎవరికైనా ఇచ్చి ఇంట్లోనే గర్భాన్ని ముగించవచ్చు" అనుకోవడం కూడా సరైనది కాదు.

చట్టబద్ధమైన, సురక్షితమైన ఆరోగ్య సేవలను పొందడమే కీలకం.

అపోహలు – నిజాలు

అపోహ: "గర్భనిరోధక మాత్రలు, అబార్షన్ మాత్రలు ఒకటే."

నిజం: రెండూ పూర్తిగా వేర్వేరు ప్రయోజనాల కోసం ఉపయోగిస్తారు.

అపోహ: "ఎమర్జెన్సీ పిల్ గర్భాన్ని తొలగిస్తుంది."

నిజం: ఎమర్జెన్సీ పిల్ ఓవులేషన్‌ను ఆలస్యం/నిరోధించడం ద్వారా ప్రెగ్నెన్సీ రాకుండా చేస్తాయి. ఇప్పటికే ఏర్పడిన ప్రెగ్నెన్సీని టెర్మినేట్ చేయవు.

అపోహ: "మెడికల్ అబార్షన్ అంటే ఎప్పుడైనా ప్రమాదమే."

నిజం: సరైన పద్ధతిలో, తగిన హెల్త్ కేర్ సపోర్ట్‌తో మెడికల్ అబార్షన్ చేయడం సురక్షితమైన వైద్యపద్ధతి.

అపోహ: "మాత్ర తీసుకున్న వెంటనే ఎక్కువ రక్తం వస్తే అది ప్రమాదం."

నిజం: మెడికల్ అబార్షన్‌లో రక్తస్రావం సాధారణంగా జరగవచ్చు. అయితే ఎక్కువ రక్తస్రావం జరిగి, తీవ్రమైన కడుపు నొప్పి, తల తిరగడం, జ్వరం వంటి లక్షణాలు వస్తే అత్యవసర వైద్య సహాయం అవసరం.

అపోహ: "ఒకసారి అబార్షన్ చేస్తే ఇక పిల్లలు పుట్టరు."

నిజం: సరైన మెడికల్ అబార్షన్ సాధారణంగా భవిష్యత్తు ఫెర్టిలిటీని దెబ్బతీయదు.

అపోహ: "ఎమర్జెన్సీ పిల్‌ను రెగ్యులర్‌గా గర్భ నిరోధకానికి వాడుకోవచ్చు."

నిజం: ఎమర్జెన్సీ పిల్ అత్యవసర పరిస్థితుల కోసం ఉద్దేశించినది. తరచుగా అవసరమవుతుంటే రెగ్యులర్ గర్భ నిరోధక విధానం గురించి కౌన్సెలింగ్ తీసుకోవడం మంచిది.

అపోహ: "ఫార్మసీలో దొరికే మాత్రలే కాబట్టి డాక్టర్ అవసరం లేదు."

నిజం: మందు అందుబాటులో ఉండటం, అది మీకు సురక్షితంగా ఉండటం.. ఈ రెండూ వేర్వేరు విషయాలు.

మహిళలు గుర్తుంచుకోవాల్సిన "5 ప్రశ్నలు"

ఏదైనా గర్భస్రావ మందు తీసుకునే ముందు మహిళ తనకు తాను ఈ ఐదు ప్రశ్నలు వేసుకోవాలి:

1. నిజంగా ప్రెగ్నెన్సీ ఉందా?

2. ప్రెగ్నెన్సీ వచ్చి ఎంతకాలమైంది?

3. ప్రెగ్నెన్సీ గర్భాశయంలోనే ఉందా - దీనిపై ఏమైనా అనుమానం ఉందా?

4. నాకు ఏదైనా మెడికల్ కండిషన్ లేదా కాంట్రా ఇండికేషన్ ఉందా?

5. సమస్య వస్తే వెంటనే ఎక్కడ వైద్య సేవలు పొందగలను?

ఈ ఐదు ప్రశ్నలకు సమాధానాలు తెలియకపోతే.. స్వయంగా మందులు తీసుకోవడం కంటే ముందుగా హెల్త్ కేర్ ప్రొవైడర్‌ను సంప్రదించడం మంచిది.

అనుకోని గర్భధారణ గురించి చాలా మంది మహిళలు భయపడటానికి ఒక కారణం సామాజిక ఒత్తిడి, తమ ప్రైవసీపై ఆందోళన.

దీని వల్ల కొందరు వైద్యుడిని సంప్రదించకుండా స్నేహితుల సలహా, సోషల్ మీడియా వీడియోలు, ఫార్మసీ సలహాలు, పాత ప్రిస్క్రిప్షన్ ఆధారంగా మందులు తీసుకుంటారు.

కానీ ఆరోగ్య సమస్యను దాచడం కంటే నమ్మకమైన హెల్త్ కేర్ ప్రొవైడర్‌తో గోప్యంగా మాట్లాడటం సురక్షితమైన మార్గం.

కుటుంబ సభ్యులు ఏం చేయాలి?

ఇలాంటి పరిస్థితిలో మహిళను భయపెట్టడం, అవమానించడం, నిందించడం సమస్యను మరింత తీవ్రం చేస్తుంది.

"ఎందుకు ఇలా జరిగింది?" అని ప్రశ్నించడంకంటే "ఇప్పుడు నీకు సురక్షితంగా ఉండేందుకు ఏం చేయాలి?" అని అడగడం ముఖ్యం.

అత్యవసర పరిస్థితి వచ్చినప్పుడు వెంటనే ఆసుపత్రికి తీసుకెళ్లాలి.

గర్భనిరోధక మాత్రలు మహిళలకు గర్భధారణను ప్రణాళికాబద్ధంగా చేసుకునే స్వేచ్ఛను ఇస్తాయి.

అనుకోని పరిస్థితుల్లో ప్రెగ్నెన్సీ రిస్క్‌ను తగ్గించడానికి ఎమర్జెన్సీ కాంట్రసెప్షన్ ఉపయోగపడుతుంది.

మెడికల్ అబార్షన్ పిల్స్ ఇప్పటికే ఏర్పడిన గర్భాన్ని వైద్యపద్ధతిలో ముగించడానికి ఉపయోగించే ముఖ్యమైన వైద్య సాధనాలు.

కానీ ఈ మూడూ ఒకటే కావు.

గుర్తుంచుకోండి...

"గర్భం రాకుండా చేసే మాత్ర వేరు...

గర్భం వచ్చిన తర్వాత ఉపయోగించే మాత్ర వేరు...

అత్యవసర గర్భనిరోధక మాత్ర మరొకటి..."

పేర్లు దగ్గరగా ఉన్నా, పని మాత్రం పూర్తిగా వేరు.

(గమనిక: రచయిత ఓ డాక్టర్. వైద్యపరమైన విధానాలు, చికిత్సలపై అవగాహన కల్పించడమే ఈ ఆర్టికల్ ఉద్దేశం. ఆరోగ్యపరమైన ఏ నిర్ణయమైనా డాక్టర్‌ను సంప్రదించి మాత్రమే తీసుకోగలరు)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)