Maraykanka oo Eritrea ka qaaday Cunaqabateyntii saarnyed, iyada oo ay sii kordheyso xiisadda Baabal Mandab

Maamulka Madaxweyne Donald Trump ayaa ku dhawaaqay in cunaqabatayntii lagu soo rogay Ciidamada Difaaca Eritrea iyo qaar ka mid ah hay'adaha dalkaas la qaaday. Go'aankan ayuu Mareykanku ku dhawaaqay Jimcihii, lasoo dhaafay.

Tallaabadan ayaa ku soo beegmaysa xilli dagaalka Bariga Dhexe uu sii xoogeysanayo, isla markaana indhaha caalamku ay kusii jeedaan dhinaca Badda Cas.

Eritrea waxay leedahay xeeb dheer oo ku taalla Badda Cas, xeebteeduna waxay ka soo horjeeddaa Sacuudiga.

Sida ay sheegeen falanqeeyayaal, xeebta dheer ee dalka iyo halka uu ku yaallo oo ah mid ka mid ah marinnada ugu waaweyn ee maraakiibta ganacsiga ee dunida, Badda Cas, taas ayaana kordhisay muhiimadda istiraatiijiyadeed ee Eritrea.

Falanqeeyayaashu waxay sidoo kale, sheegayaan in tallaabadani ay Mareykanka u furi karto waddo cusub oo uu xiriirka Eritrea kusii wanaajinayo.

Maxaa cunaqabatayn loogu soo rogay Eritrea?

Cunaqabataynta Mareykanka uu saaray Eritrea waxay la xiriirtay ku lug lahaanshaha Eritrea ee dagaalkii laba sano socday ee ka dhacay gobolka Tigray ee waqooyiga Itoobiya, kaas oo bilowday 2020-kii.

Dowladda Mareykanka, xilligii maamulka madaxweynihii hore Joe Biden, ayaa sannadkii 2021 go'aan ka gaartay dagaalka Eritrea iyo Itoobiya. Xilligaas, ciidamada Eritrea waxay taageereen dowladda Itoobiya, waxayna dagaal la galeen ciidamada maamulka gobolka Tigray.

Mareykanka ayaa markaas cunaqabatayn ku soo rogay ciidamada Eritrea iyo saraakiil dowladeed oo dhowr ah, oo uu ku jiray xisbiga talada haya.

Hase yeeshee, hadda Mareykanku wuxuu qaaday qaar ka mid ah cunaqabatayntaas.

Xafiiska Mareykanka u qaabilsan Xakamaynta Hantida Dibadda ayaa sheegay in Mareykanku liiska cunaqabataynta ka saaray Ciidamada Difaaca Eritrea, xisbiga talada haya ee PFDJ, shirkado iyo shaqsiyaad qaarkood.

Dagaalkii Tigray wuxuu istaagay kaddib markii heshiis nabadeed la saxiixay. Hase yeeshee, cunaqabataynta Mareykanka ee hay'adaha qaarkood way sii socotay.

Xitaa kaddib heshiiska, Itoobiya iyo Eritrea ayaa mar kale bilaabay inay isku dhacaan oo ay khilaaf yeeshaan.

Badda Cas iyo muhiimadda Eritrea maanta

Tallaabada Mareykanka ayaa ku soo beegmaysa xilli xaaladda amni ee Bariga Dhexe ay sii noqonayso mid kacsan.

Dagaallada ka socda gobolka iyo xiisadda ka taagan marinka Baab al-Mandab ayaa kordhiyay diiradda lagu saarayo marinnada maraakiibta ee Badda Cas.

Badda Cas waa marin muhiim ah oo ay maraan maraakiibta ganacsiga ee isaga kala goosha Badda Mediterranean-ka iyo Aasiya.

Sidaas darteed, amniga iyo xakamaynta marinnadan badeed waxay saameyn weyn ku leeyihiin ganacsiga caalamiga ah.

Eritrea, dhankeeda, waxay ku taallaa meel istiraatiiji ah oo ku taalla xeebta Badda Cas. Sidaas darteed, falanqeeyayaashu waxay sheegayaan in tallaabada Mareykanku ay noqon karto arrin istiraatiiji ah.