Xamaas oo ogolaatay hub ka dhigista: Maxaa ku jira qorshaha Trump ee Golaha Nabadda?

Xamaas oo oggolaatay hub ka dhigista: Maxaa ku jira qorshaha Trump ee Golaha Nabadda?

Madaxweynaha Maraykanka, Donald Trump, ayaa ku dhawaaqay in Golaha Nabadda uu gaaray heshiis ku saabsan hub ka dhigista buuxda ee Xamaas iyo dhammaan kooxaha hubaysan ee ku sugan Marinka Qasa.

Sarkaal sare oo ka tirsan Xamaas ayaa u sheegay BBC-da in dhaqdhaqaaqu uu aqbalay qorshaha Golaha Nabadda ee dhigaya in Qasa gabi ahaanba hubka laga dhigo, isla markaana war rasmi ah dhawaan la soo saari doono.

Dhanka Israa'iil weli wax jawaab ama faallo rasmi ah kama soo bixin.

Trump ayaa sheegay in Israa'iil ay ka bixi doonto Marinka Qasa marka hub ka dhigistu si buuxda u dhammaato, isagoo heshiiska ku tilmaamay "tallaabo muhiim ah oo horseedaysa in ugu dambayn Qasa ay maamusho dowlad cusub oo Falastiini ah."

Wajiga labaad ee qorshaha

Wajiga labaad ee qorshaha xabbad-joojinta Qasa ee Maraykanku dhexdhexaadinayo waxa ku jira:

In Xamaas hubka laga dhigo.

Dib-u-dhiska Marinka Qasa.

Trump ayaa bartiisa Truth Social ku qoray:

"Tani waa marxalad muhiim ah oo ka mid ah hirgelinta qorshaha Trump ee ka kooban 20 qodob. Heshiiska waxaa loo fulin doonaa si taxaddar leh oo heerar kala duwan ah. Marka hub ka dhigistu dhammaato, ciidamada Israa'iil way ka bixi doonaan Qasa, waxaana amniga deegaanka la wareegi doona ciidan caalami ah oo xasilin ah oo la shaqaynaya booliis cusub oo Falastiini ah si loo sugo ammaanka shacabka Qasa iyo deriskeedaba."

Trump waxa kale oo uu u mahadceliyey dalalka dhexdhexaadinta ka qayb qaatay, kuwaas oo kala ah Masar, Qadar, Turkiga.

Shir ka dhacaya Qaahira

Wakaaladda AFP ayaa, iyadoo soo xiganaysa warbaahinta rasmiga ah ee Masar, sheegtay in magaalada Qaahira lagu qaban doono kulan ay isugu imanayaan dhexdhexaadiyeyaasha si looga wada hadlo wajiga labaad ee qorshaha xabbad-joojinta.

Ilo xog-ogaal ah oo ku dhow Xamaas ayaa sheegay in guddiga qaran ee uu dhisay Golaha Nabadda, kaas oo maamuli doona Marinka Qasa, uu noqon doono hay'adda masuulka ka ah kaydinta iyo ilaalinta hubka Xamaas, sida uu dhigayo heshiiska lala galay Israa'iil.

Isla ishaasi waxay sheegtay in guddi caalami ah oo xaqiijin ah uu kormeerayo diiwaangelinta hubka iyo fulinta heshiiska, iyadoo taageero laga helayo ciidanka caalamiga ah ee xasilinta.

Waxa kale oo ay xustay in guddiga qaranku uu noqon doono hay'adda keliya ee xaqa u leh inuu hayo, kaydiyo ama maamulo hub kasta oo yaalla Marinka Qasa, marka la dhammaystiro qodobada toddobaad ilaa tobnaad ee qorshaha.

Hadalka mas'uuliyiinta Xamaas

Sarkaal kale oo Xamaas ka tirsan ayaa sheegay in:

Heshiis laga gaadhay arrinta hubka.

Heshiisna laga gaaray in ciidamada Israa'iil si tartiib tartiib ah uga baxaan Marinka Qasa.

Wuxuu intaa ku daray in Xamaas hadda ay filayso in dhexdhexaadiyeyaasha iyo Golaha Nabaddu ay xaqiijiyaan in Israa'iil u hoggaansanto shuruudaha heshiiska.

Dhanka kale, Ghazi Hamad oo ka tirsan xafiiska siyaasadda Xamaas isla markaana ka mid ah wafdiga wada xaajoodka ayaa yiri:

"Waxaan tanaasul u samaynaynaa dadkeenna iyo shacabka Falastiin ee ku sugan Qasa si looga badbaadiyo dilka iyo barakicinta."

Wuxuu intaa ku daray in:

Arrinta hubku ay ku xidhan tahay bixitaanka ciidamada Israa'iil.

Soo gelitaanka guddiga qaran iyo bilowga dib-u-dhiska.

Waxa uu sheegay in Israa'iil aysan faragelin doonin habka hub ka dhigista, balse guddiga qaranku uu qaban doono hawshaas.

Hamad waxa kale oo uu caddeeyey in:

Tirakoobka iyo kaydinta hubku aysan bilaaban doonin ilaa wejiga koowaad ee qorshaha la dhammaystiro.

Xamaas aysan qaadi doonin wax tallaabo ah oo la xiriirta hub ka dhigista ka hor inta aysan Israa'iil ka bixin Marinka Qasa.

Wadahadallada Qaahira

Horaantii, wakaaladda Reuters ayaa soo xigatay ilo aan la magacaabin oo sheegay in wada-hadallada ka socda Qaahira ee u dhexeeya dhexdhexaadiyeyaasha iyo hoggaanka Xamaas ay gaareen horumar aan caadi ahayn.

Hase yeeshee, mas'uul Israa'iili ah ayaa sheegay in shuruudaha la soo jeediyey aysan ku filnayn Israa'iil.

Kadib ku dhawaaqistii Trump, wargeyska The Times of Israel ayaa, isagoo soo xiganaya ilo aan la magacaabin, sheegay in heshiiska ay saxiixeen:

Wafdiga wada xaajoodka Xamaas,

Golaha maamulka,

Iyo dalalka dhexdhexaadinaya.

Si kastaba ha ahaatee, warbixintu waxay sheegtay in hay'ad rasmi ah oo Israa'iili ahi ay bayaan ku sheegtay in qorshaha hub ka dhigistu uusan buuxin dalabaadkii Israa'iil.

Warbaahinta Israa'iil ayaa hore u sheegtay in Israa'iil ay ka soo horjeedday heshiiska laga wada hadlayey.

Faahfaahinta qorshaha

BBC-da ayaa heshay nuqul ka mid ah qorshaha, oo ka kooban afar bog, kaas oo qeexaya hannaan marxalado kala duwan leh oo isku xiraya:

Hub ka dhigista Xamaas.

Ka bixitaanka tartiib-tartiib ah ee ciidamada Israa'iil.

Ku wareejinta maamulka Qasa hay'ad cusub oo ku-meel-gaar ah oo Falastiini ah, taas oo ay taageerayaan ciidamo caalami ah oo xasilin ah.

Saraakiisha Maraykanka ayaa sheegay in qorshuhu ku salaysan yahay mabda'a "kalsooni eber", taas oo macnaheedu yahay in dhinacna uusan u gudbi karin marxaladda xigta ilaa dhinaca kale uu fuliyo waajibaadkiisa.

Waxay sidoo kale sheegeen in marka hore hubka laga qaadi doono kooxaha hubaysan ee yaryar, ka hor inta aysan Xamaas bilaabin inay kala furfurto qaab-dhismeedkeeda ciidan, oo ay ku jiraan:

Shabakadaha godadka dhulka hoostiisa mara.

Bakhaarada hubka.

Goobaha lagu soo saaro hubka.

Waxay qireen in hawshaasi ay qaadan doonto waqti dheer.

Marka dhammaan wejiyada qorshuhu dhammaadaan, maamulka cusub ee Falastiin ayaa si buuxda ula wareegi doona maamulka hubka ee Marinka Qasa.

Inkastoo Israa'iil aysan weli si rasmi ah uga hadlin qorshaha, sarkaal Maraykan ah ayaa sheegay in Madaxweyne Trump uu aad uga niyad jabi doono haddii Israa'iil ay diiddo inay ka baxdo Qasa sida uu dhigayo qorshaha 20-ka qodob ka kooban.

Sarkaalku wuxuu carrabka ku adkeeyey inay rumaysan yihiin in Israa'iil ay sii ahaan doonto saaxiib iyo xulafo muhiim ah.

Golaha Nabadda

Bayaan uu Golaha Nabadda soo saaray Jimcihii ayuu heshiiska ku tilmaamay:

"Guul taariikhi ah."

Goluhu wuxuu sheegay:

"Qorshahan wuxuu ka dhigan yahay guul taariikhi ah. Markii ugu horraysay ayay Xamaas si rasmi ah u aqbashay qorshe wax-ku-ool ah oo ay ku wareejinayso dhammaan hubkeeda, taas oo ay xigi doonto bixitaanka ciidamada Israa'iil ee Marinka Qasa."

Goluhu wuxuu intaa ku daray in heshiiskani uu soo afjarayo bilo badan oo wada-hadallo adag iyo dadaallo daacadnimo ku dhisnaa oo lagu hirgelinayey aragtida Madaxweyne Donald J. Trump ee ku saabsan:

Dhisidda maamul cusub.

Sugidda amniga.

Gaarsiinta gargaar bani'aadamnimo.

Dib-u-dhiska Qasa.

Soo kabashada dhaqaalaha.

Ugu dambayn, Golaha Nabaddu wuxuu sheegay inuu hadda diiradda saarayo sidii heshiiskan loo dhaqan gelin lahaa.