Uwepo wa Hamza bin Laden katika video mpya ya Al-Qaeda unamaanisha nini?

Al-Qaeda imetoa video ya dakika 52 na sekunde 36 yenye mtindo wa makala, kuadhimisha miaka 25 tangu mashambulizi ya Septemba 11, 2001 nchini Marekani. Video hiyo ina picha za Hamza bin Laden, mwana wa Osama bin Laden, ambazo inaonekana hazijawahi kuwekwa hadharani.

Rais wa Marekani Donald Trump alitangaza wakati wa muhula wake wa kwanza madarakani, mwaka 2019, kwamba Hamza bin Laden, mwana wa Osama bin Laden na mmoja wa watu muhimu katika Al-Qaeda, alikuwa ameuawa katika shambulio la Marekani. Hata hivyo, Washington haikueleza lini, wapi au katika mazingira gani Hamza aliuawa.

Lakini sasa, katika video mpya ya propaganda ya Al-Qaeda, Hamza bin Laden anaonekana akitoa ujumbe moja kwa moja mbele ya kamera. Jambo hilo limeibua tena mjadala katika mitandao ya wanajihadi kuhusu uwezekano kwamba bado yuko hai.

Video hiyo ya dakika 52, yenye kichwa "Miaka 25 baada ya Mashambulizi ya 9/11," ilitolewa na Al-Sahab, chombo cha habari cha Al-Qaeda, kupitia Rocket Chat na Telegram. Video hiyo ndefu imepewa jina "Sehemu ya Kwanza" na inamalizika kwa maneno "Itaendelea, Mungu akipenda," jambo linaloashiria kuwa huenda sehemu nyingine za mfululizo huo zikatolewa baadaye.

Video hiyo inaangazia kwa kiasi kikubwa simulizi la muda mrefu la Al-Qaeda kuhusu athari za mashambulizi ya Septemba 11 kwa Marekani na harakati za kijihadi duniani, ikitumia picha za zamani pamoja na jumbe za viongozi wa zamani wa ngazi za juu wa Al-Qaeda, akiwemo Osama bin Laden na Ayman al-Zawahiri.

Kama ilivyo kwa video nyingine za Al-Qaeda zenye mtindo wa makala, video hii iliyotolewa Septemba 10, 2026, inatumia kwa kuchagua kauli za watu wa Magharibi na maafisa wa serikali ili kuunda taswira kwamba misimamo ya kundi hilo inaungwa mkono au kuthibitishwa na vyanzo vya nje.

Miongoni mwa wanaoonekana kwa kiasi kikubwa ni Michael Scheuer, aliyekuwa afisa wa CIA na aliyewahi kuongoza kitengo kilichohusika na kumtafuta Osama bin Laden.

Video hiyo ya propaganda inadai kuwa baada ya mashambulizi ya Septemba 11, mabadiliko makubwa yalitokea nchini Marekani na makundi ya kijihadi yakaenea katika maeneo mbalimbali duniani.

Ni muhimu kufahamu kwamba Hamza bin Laden alikuwa akishiriki kikamilifu katika shughuli za Al-Qaeda za kutoa propaganda kati ya mwaka 2015 na 2018, akitoa jumbe za vitisho dhidi ya nchi za Magharibi na walengwa wengine kwa niaba ya kundi hilo. Hata hivyo, hakuwahi kuonekana moja kwa moja katika video wakati huo. Jumbe zake kwa kawaida zilitolewa kwa maandishi au sauti, na baadhi ya video zilitumia picha zake za zamani alipokuwa mtoto.

Ni nini kinaonekana katika picha adimu za Hamza bin Laden?

Kwa mujibu wa wataalamu wanaofuatilia shughuli za makundi ya kijihadi, huenda jambo la kuvutia zaidi katika video hii mpya ya Al-Qaeda likawa uwepo wa Hamza bin Laden.

Marekani ilitangaza mwaka 2019 kwamba ilimuua Hamza bin Laden katika operesheni ya kukabiliana na ugaidi katika eneo la mpakani kati ya Afghanistan na Pakistan. Hata hivyo, wakati huo na katika miaka iliyofuata, haikutoa maelezo kuhusu lini na wapi hasa aliuawa.

Hapo awali Al-Qaeda iliwahi kutoa jumbe za sauti za Hamza bin Laden na kumuonyesha kwa muda mfupi katika video za zamani zilizorekodiwa kwenye mikusanyiko ya wanajihadi na harusi yake. Lakini katika makala hii mpya, kwa mara ya kwanza, Hamza bin Laden — au mtu anayetambulishwa katika video hiyo kama Hamza bin Laden — anaonekana wazi mbele ya kamera akitoa ujumbe moja kwa moja.

Anaonekana katika video hiyo katika vipande vitatu tofauti, ambavyo vyote vinaonekana kuchukuliwa kutoka katika rekodi moja.

Sehemu kubwa ya kauli zake katika video hiyo inahusu simulizi, madai na wito wa jumla wa jihad, bila kutaja tukio lolote maalumu ambalo lingeweza kusaidia kubaini ujumbe huo ulirekodiwa lini. Kwa hiyo, haijulikani video hiyo ilirekodiwa wakati gani au iwapo Al-Qaeda inaamini kwamba Hamza bin Laden yuko hai au amefariki.

Katika mojawapo ya vipande hivyo, picha na matukio ya hivi karibuni pia yanaonyeshwa sambamba na hotuba ya Hamza bin Laden, ikiwemo shambulio la Hamas dhidi ya Israel la Oktoba 7, 2023, na kurejea kwa Taliban madarakani nchini Afghanistan mwezi Agosti 2021.

Ingawa Hamza bin Laden mwenyewe hataji matukio hayo katika video, namna yalivyowasilishwa inaweza kuleta taswira kwamba ujumbe wake ulirekodiwa katika kipindi cha hivi karibuni, huenda hata baada ya kutangazwa kwa kifo chake mwaka 2019.

Jambo jingine linalovutia ni kwamba video hiyo inamtaja kama "Mujahid Sheikh Hamza bin Laden" pekee. Jina lake halijaambatanishwa na viambishi vinavyotumiwa mara kwa mara katika duru za wanajihadi kuonyesha iwapo mtu yuko hai au amefariki — yaani "Hafizahullah", linalotumiwa kwa watu walio hai, au "Rahmatullah", linalotumiwa kwa waliofariki. Wachunguzi wanasema hali hii ya kutokuwa wazi huenda ikawa ya makusudi.

Ni muhimu pia kufahamu kwamba kuna hali kama hiyo ya kutokuwa na uhakika kuhusu Ayman al-Zawahiri, aliyekuwa kiongozi wa Al-Qaeda. Marekani ilisema aliuawa katika shambulio la ndege zisizo na rubani mjini Kabul mwezi Julai 2022. Video mpya pia haisemi wazi iwapo yeye yuko hai au amefariki inapomtaja.

Ingawa Al-Qaeda haikutoa taarifa rasmi kuhusu al-Zawahiri baada ya Marekani kudai kwamba aliuawa, kwa muda mrefu kumekuwa na mtazamo miongoni mwa wafuasi wa kundi hilo kwamba kweli aliuawa.

Video hiyo pia haitoi dalili wazi kuhusu hali ya Saif al-Adl, anayeaminika kuwa kiongozi wa sasa wa Al-Qaeda. Anatajwa kama "Sheikh" pekee na sehemu za maandishi yake ya zamani zimenukuliwa. Hata hivyo, video hiyo haitaji kwamba yeye ndiye kiongozi wa shirika hilo, wala haitoi taarifa kuhusu alipo kwa sasa.

Uwepo wa Hamza bin Laden katika video hiyo umevutia kwa kiasi kikubwa wataalamu wa usalama na wachambuzi, huku baadhi yao wakisema huenda picha hizo zikawa ishara kwamba bado yuko hai.

Baadhi ya wachunguzi wamebaini kwamba Hamza bin Laden anaonekana akiwa amevaa kilemba cheupe, huku nyuma yake kukiwa na ukuta wa udongo — vitu vinavyofanana na video zilizowahi kuhusishwa na makundi ya kijihadi yaliyokuwa yakifanya shughuli nchini Afghanistan. Wanasema inawezekana alikuwa Afghanistan wakati ujumbe huo uliporekodiwa.

Kwa upande mwingine, hakujawa na mwitikio mkubwa kwa video hiyo au kuonekana kwa Hamza bin Laden miongoni mwa duru za wanajihadi. Wachunguzi wanasema huenda sababu yake ni kupungua kwa kiasi kikubwa kwa idadi ya wafuasi wa Al-Qaeda mtandaoni katika miaka miwili iliyopita.

Hamid al-Qawsi, mchunguzi anayejulikana wa harakati za kijihadi ambaye anajieleza kama mtafiti na anajulikana kuwa na huruma kwa Al-Qaeda, pia alielekeza kipaumbele kwenye uwepo wa Hamza bin Laden na Ayman al-Zawahiri katika video hiyo. Alisema haijulikani kutokana na maudhui ya video iwapo mmoja wao yuko hai au amefariki.

Alibainisha kwamba video hiyo haitumii maneno yanayotumiwa kwa kawaida kuonyesha iwapo mtu yuko hai au amefariki, sambamba na majina ya watu hao wawili. Kwa maoni yake, jambo hilo linaonyesha kwamba video hiyo ilijaribu kwa makusudi kuweka utata kuhusu hali yao.

Je, uwepo wa Hamza ni uthibitisho wa kifo chake?

Abdul-Sayed, mtafiti anayeishi Sweden anayefuatilia habari na propaganda za Al-Qaeda na makundi mengine ya kijihadi, anaiona video hiyo kama sehemu ya mkakati mpana wa chombo cha habari cha Al-Qaeda, Al-Sahab. Hata hivyo, haoni kuchapishwa kwa picha ambazo hazijawahi kuonekana za Hamza bin Laden na Ayman al-Zawahiri kuwa jambo la kipekee.

Abdul Sayed aliiambia BBC Urdu kwamba baada ya majeshi ya Marekani kuondoka Afghanistan mwaka 2021 na Taliban kurejea madarakani, Al-Sahab ilitoa mfululizo wa video na picha za kihistoria ambazo hazikuwa zimewahi kupatikana hadharani.

Kwa mfano, alitaja video iliyotolewa mwaka 2022 ya Maulana Asim Umar, mwanzilishi na kiongozi wa Al-Qaeda katika Bara Hindi. Asim Umar aliuawa katika shambulio la Marekani nchini Afghanistan mwezi Septemba 2019, lakini katika video hiyo, tofauti na awali, uso wake haukufichwa.

Kwa Abdul Sayed, hiyo ilikuwa uthibitisho wa kwanza usio rasmi wa kifo cha Asim Umar, kwa kuwa Al-Qaeda haikuwahi kuthibitisha rasmi kifo chake.

Ni muhimu kufahamu kwamba hapo awali Al-Qaeda mara nyingi ilikuwa ikitoa picha au video za viongozi wake wakiwa wameonyesha nyuso zao baada ya kuuawa.

Kwa mujibu wa Abdul Sayed, mwaka 2024, Al-Sahab pia ilitoa makala ndefu ambayo kwa mara ya kwanza ilionyesha picha za makamanda waandamizi wa Al-Qaeda waliouawa na majeshi ya Marekani, Afghanistan na Pakistan nchini Afghanistan na Pakistan baada ya mwaka 2001.

Miongoni mwao walikuwa Khalid Habib na Abu Ubaidah al-Masri, makamanda waandamizi wa Al-Qaeda ambao walikuwa na nafasi muhimu katika kuandaa vita vya Taliban nchini Afghanistan na Pakistan baada ya mashambulizi ya Septemba 11 na walichukuliwa kuwa wapangaji wa operesheni za Al-Qaeda duniani. Hata hivyo, picha zao zilichapishwa miaka kadhaa baada ya vifo vyao.

Anaamini kwamba picha za Hamza bin Laden pia zinaweza kutafsiriwa katika muktadha huo.

Kwa mujibu wa Abdul-Sayed, "Kuwekwa kwa picha hizi za wazi za Hamza bin Laden katika video mpya kwa kweli ni uthibitisho wa kifo chake kutoka kwa Al-Qaeda, kwa sababu kama angekuwa hai, Al-Qaeda isingewahi kutoa picha kama hizo katika video kwa sababu za kiusalama."

Ni muhimu kufahamu kwamba Al-Qaeda kwa kawaida huwa makini sana katika kuwaficha makamanda wake walio hai, ikiwa ni pamoja na kutofichua utambulisho na maeneo walipo.

Kwa mujibu wa Ehsanullah Tipu, mwandishi wa habari na mchambuzi wa usalama kutoka Pakistan anayefuatilia shughuli za makundi ya wapiganaji, video hiyo inaendeleza mtindo uleule ambao Al-Qaeda hutumia kutoa maudhui maalumu kila mwaka katika maadhimisho ya mashambulizi ya 9/11.

Anaamini kwamba uwepo wa Hamza bin Laden katika video hiyo huenda ukawa jaribio la kuhamasisha na kutia moyo, lakini "Sidhani kama yuko hai."

Anasema: "Kuna baadhi ya mambo ambayo hayajajulikana kuhusu yeye, lakini nadhani kuna dalili za kifo chake katika maandishi ya baadhi ya wataalamu wasio rasmi wanaohusishwa na Al-Qaeda, pamoja na nyenzo zilizochapishwa na baadhi ya duru zilizo karibu na kundi hilo."

Ehsanullah Tipu anasema jambo lisilo la kawaida kuhusu Hamza bin Laden ni kwamba Al-Qaeda haijawahi kuthibitisha wala kukanusha waziwazi kifo chake. Anaamini kundi hilo linaonekana kutaka kuendeleza fumbo hilo.

"Ndiyo maana watu wanapoona video ya Hamza bin Laden, wanafikiri kwamba yuko hai," anasema.

Mwandishi huyo wa habari kutoka Pakistan anasema taarifa zinazoaminika kuhusu Hamza bin Laden zinaonyesha kwamba aliuawa mwaka 2018, na kwamba Rais wa Marekani wa wakati huo, Donald Trump, pia alithibitisha kifo chake mwaka 2019. Kwa mujibu wake, ndiyo maana ushahidi unaoashiria kifo cha Hamza bin Laden unaonekana kuwa na uzito zaidi kuliko madai kwamba bado yuko hai.

Kumjumuisha Hamza katika video hii kunaweza kuwa na lengo gani?

Kwa mujibu wa mtafiti Abdul Sayed, mojawapo ya malengo ya kujumuisha picha za Hamza bin Laden katika video hiyo huenda likawa kuwahamasisha kizazi kipya au wafuasi vijana wa Al-Qaeda.

Anaamini pia kwamba hatua hiyo inalenga kuwasilisha ujumbe kwamba Al-Qaeda bado inashikilia fikra za kiitikadi na urithi wa Osama bin Laden, na kwa sababu hiyo, mwanawe anaonyeshwa kama mtu mwenye thamani ya kiishara.

Ehsanullah Tipu pia anakubaliana na Abdul Sayed na anasema lengo la hatua hiyo ni kuhamasisha kizazi kipya na kuwasilisha ujumbe kwamba viongozi wa kundi hilo hawaogopi kifo, kujitoa mhanga, kuuawa au kupoteza watoto wao.

Kwa mujibu wake, wanajaribu kuwapa morali na hamasa watazamaji wao, na hatua hii pia ilichukuliwa kwa lengo hilo.

Anasema mtindo huu una historia ndefu miongoni mwa makundi ya kijihadi. Wanataka kuunda taswira kwamba hawapigani na kuwaua wengine pekee, bali viongozi wao wenyewe pia wanakufa na watoto wao wanauawa. Kwa njia hii, wanajaribu kuonyesha kiwango cha kujitolea walicho nacho ikilinganishwa na majeshi ya kawaida.

"Kwa mtazamo wao, kuna dhana kwamba viongozi wako mbali na wapiganaji wao, hivyo makundi ya kijihadi hutumia propaganda kama hii kujibu dhana hiyo," anasema.

Sarah Harmosh, mtaalamu wa ulinzi na ugaidi na mkurugenzi mtendaji wa H9, anaamini kwamba bila kujali iwapo Hamza yuko hai au la, Al-Qaeda imemtumia kama kiungo cha mawasiliano katika video hiyo.

Aliandika kwenye X kwamba kwa upande mmoja, video hiyo inawasilisha mitazamo ya kiitikadi na kimkakati ya Saif al-Adl, na kwa upande mwingine inaangazia jina na urithi wa kiishara wa familia ya bin Laden. Video hiyo pia inatoa wito wa kupata waajiriwa wapya.

Sarah Harmosh anasema ujumbe huo, uliotolewa katika maadhimisho ya miaka 25 ya mashambulizi ya Septemba 11, 2001, unaonekana kulenga vijana waliozaliwa baada ya mashambulizi hayo.

Anaongeza kwamba video hiyo imepewa jina "Sehemu ya Kwanza," jambo linaloashiria kwamba huenda sehemu nyingine za mfululizo huo zikatolewa.

Saif al-Adl: Utata unaendelea kuhusu hali ya kiongozi anayedhaniwa wa Al-Qaeda

Bado kuna kutokuwa na uhakika kuhusu hali ya Saif al-Adl.

Saif al-Adl ni mwanachama mwandamizi wa Al-Qaeda na inasemekana ameongoza shirika hilo tangu kifo kinachodhaniwa cha Ayman al-Zawahiri mwaka 2022.

Katika video mpya ya propaganda ya Al-Qaeda, anatajwa kama "Sheikh" pekee na nukuu kadhaa kutoka katika kitabu chake zimetolewa. Kitabu hicho kilichapishwa na Al-Qaeda mwaka 2023, sambamba na maadhimisho ya miaka 22 ya mashambulizi ya 9/11.

Hata hivyo, hakuna dalili katika video hiyo kwamba bado ndiye kiongozi wa Al-Qaeda, wala hakuna taarifa kuhusu alipo.

Uwezekano wa Saif al-Adl kuwa nchini Iran umekuwa suala la mjadala na utata kwa miaka kadhaa.

Ni muhimu kufahamu kwamba Saif al-Adl, aliyekuwa luteni kanali katika Kikosi Maalumu cha Jeshi la Misri, alikuwa mwanachama wa kundi la Egyptian Islamic Jihad kabla ya kwenda Afghanistan na kujiunga na Al-Qaeda.

Baadaye akawa mwanachama wa kamati ya kijeshi ya Al-Qaeda na kujiunga na kikosi cha ulinzi cha Osama bin Laden.

Saif al-Adl yumo katika orodha ya "Most Wanted" ya FBI na anatafutwa na Marekani kwa madai ya kuhusika katika milipuko ya wakati mmoja ya balozi za Marekani mjini Dar es Salaam, Tanzania, na Nairobi, Kenya, mwaka 1998.

Utambulisho wake pia umekuwa suala la mjadala kwa miaka mingi. Kwa kipindi fulani, iliaminika kwamba alikuwa mwanajihadi wa Misri Mohammed Ibrahim Makkawi. Hata hivyo, taarifa zilizofuata, zikiwemo kutoka katika kitabu cha Abu Mohammed al-Masri, kiongozi wa Al-Qaeda, zilidai kwamba Saif al-Adl na Mohammed Makkawi walikuwa watu wawili tofauti.

Kufikia mwaka 2020, Saif al-Adl alikuwa naibu pekee anayejulikana wa Ayman al-Zawahiri ambaye ilisemekana bado alikuwa hai.

Kwa mujibu wa utafiti wa BBC Monitoring, Saif al-Adl anachukuliwa na duru za wanajihadi, wachambuzi na mashirika ya kijasusi kuwa kiongozi asiye rasmi wa Al-Qaeda.

Hata hivyo, shirika hilo halijathibitisha rasmi kifo cha Ayman al-Zawahiri wala kumtangaza kiongozi mpya, hali ambayo imeendeleza maswali kuhusu uongozi mkuu wa Al-Qaeda.

Kwa mujibu wa Abdul-Sayed, maandishi na jumbe za Saif al-Adl zimepata nafasi maalumu katika vyombo rasmi vya habari vya Al-Qaeda tangu kuuawa kwa Ayman al-Zawahiri mwaka 2022.

Kwa mujibu wake, mitazamo ya Saif al-Adl kuhusu masuala muhimu, kama vile vita kati ya Israel na Hamas huko Gaza au mikakati ya kijeshi ya wanajihadi, imekuwa ikichapishwa mara kwa mara.

Anasema kiwango hicho cha kupewa nafasi ni jambo linalovutia kwa sababu hapo awali nafasi kama hiyo katika vyombo vikuu vya habari vya Al-Qaeda ilikuwa ikishikiliwa zaidi na viongozi kama Osama bin Laden na baadaye Ayman al-Zawahiri.

Kwa mujibu wa Abdul-Sayed, video hiyo pia inaangazia kwa kiasi kikubwa mkakati wa kijihadi wa Saif al-Adl.

"Yote haya yanaendeleza dalili zilezile zinazoashiria kwamba huenda akawa amemrithi Ayman al-Zawahiri kama kiongozi wa Al-Qaeda," anasema.

Anasema kwamba ukiangalia historia ya Saif al-Adl ndani ya Al-Qaeda, amekuwa mtu wa siri ambaye, licha ya kuwa mkali na mwenye ushawishi mkubwa, amekuwa akiepuka kuonekana kwenye vyombo vya habari.

Ehsanullah Tipu anasema kwamba kwa upande wa Saif al-Adl, Al-Qaeda bado haijathibitisha rasmi kuuawa kwa Ayman al-Zawahiri mjini Kabul mwezi Julai 2022.

Kwa mujibu wake, sababu kuu ni shinikizo linalowakabili Taliban nchini Afghanistan. Ikiwa Al-Qaeda itakubali kwamba Ayman al-Zawahiri aliuawa, itamaanisha kwamba alikuwa Afghanistan.

Taliban imekuwa ikisisitiza kwamba Ayman al-Zawahiri hakuwa Afghanistan. Kwa sababu hiyo, Al-Qaeda haijatangaza rasmi kifo chake.

"Ikiwa Al-Qaeda haitathibitisha kifo cha Ayman al-Zawahiri, basi haiwezi kumtangaza rasmi Saif al-Adl kama kiongozi mpya wa Al-Qaeda. Kwa sababu hiyo, waangalizi wa kimataifa na wataalamu wanaofuatilia shughuli za Al-Qaeda wakati mwingine humtaja Saif al-Adl kama kiongozi asiye rasmi wa Al-Qaeda," anasema.

Mkakati wa Al-Qaeda wa kuwaweka Hamza na Saif al-Adl pamoja katika video moja

Kwa mujibu wa Ehsanullah Tipu, Al-Qaeda inajaribu kuonyesha kwamba utamaduni ulioanzishwa na Osama bin Laden, pamoja na urithi na mwendelezo wake, sasa umefikia kwa Saif al-Adl.

"Saif al-Adl anajulikana zaidi kama mtaalamu wa mikakati ya kijeshi ndani ya Al-Qaeda," anasema. "Kwa sababu hiyo, hotuba zake zimekuwa zikilenga zaidi mikakati ya kijeshi na upangaji wa operesheni. Kwa upande wa kiitikadi, hana umaarufu mkubwa kama alionao katika masuala ya kijeshi na kiutendaji."

Kwa mujibu wa Sarah Harmosh, jambo kuu katika video hiyo ni kumwasilisha Saif al-Adl na Hamza bin Laden kama watu wanaokamilishana.

Saif al-Adl, anayechukuliwa kuwa kiongozi wa de facto wa Al-Qaeda, haonekani katika video hiyo, kama ambavyo kawaida hutokea, lakini nukuu kutoka katika kitabu chake ndizo msingi wa hoja inayowasilishwa katika video nzima.

Sarah Harmosh anasema Saif al-Adl anawakilisha mwelekeo wa kimkakati na kiitikadi wa shirika hilo, huku Hamza bin Laden akiwakilisha jina na urithi wa kiishara wa familia ya bin Laden.

Aliandika kwenye X: "Kwa njia hii, tunaweza kusema kwamba itikadi iliyoundwa katika ngazi ya uongozi inawasilishwa kupitia sauti ya mwana wa mwanzilishi wa Al-Qaeda."

Kwa mujibu wa baadhi ya wachunguzi, video hiyo imetolewa wakati ambapo harakati za kijihadi duniani zinajadili kwa ndani kuhusu mustakabali wake.

Mina Lamy, mtaalamu wa masuala ya wanajihadi katika BBC Monitoring, anasema katika miaka ya hivi karibuni kumekuwa na mjadala katika baadhi ya duru za wenye msimamo mkali kuhusu iwapo, badala ya mfumo wa jadi wa "jihad ya kimataifa" wa Al-Qaeda, mifumo ya ndani na ya kiutendaji zaidi kama Taliban au Hayat Tahrir al-Sham nchini Syria inaweza kuwa njia yenye mafanikio zaidi.

Katika mazingira kama hayo, kuwasilishwa kwa pamoja kwa Hamza bin Laden na Saif al-Adl kunaweza pia kuonekana kama jaribio la Al-Qaeda kuangazia utambulisho wake wa kihistoria na mwendelezo wa kiitikadi.

Kwa mujibu wa Ehsanullah Tipu, jambo jingine muhimu ni kwamba hakuna picha au video mpya za Saif al-Adl zilizotolewa katika video hii. Picha zote zilizotumika ni za zamani.

Baadhi zilipigwa akiwa pamoja na Osama bin Laden, huku nyingine zikiwa picha ambazo inadaiwa zilitolewa kutoka Iran kupitia vyanzo vya kijasusi vya Magharibi.

Anasema Al-Qaeda imekuwa ikiwahusisha viongozi wake katika maudhui yake ya vyombo vya habari, lakini kwa upande wa Saif al-Adl, hadi sasa imechukua mtazamo tofauti na kumweka zaidi nyuma ya pazia.

"Sababu moja inaweza kuwa kwamba bado hajateuliwa rasmi kuwa kiongozi wa shirika hilo. Ikiwa uteuzi huo utafanywa rasmi, kuna uwezekano Al-Qaeda pia itamtambulisha hadharani kwa wafuasi wake," aliongeza.