ስፔን 60 ሺህ ስደተኞች ወደ ግዛቷ ለመግባታቸው ሕገ ወጥ አዘዋዋሪዎችን ተጠያቂ አደረገች

የስፔን ጠቅላይ ሚኒስትር 60 ሺህ የሚሆኑ ስደተኞች ከሞሮኮ አገራቸው ከሰሜን አፍሪካ ጋር ወደምትዋሰንበት ሴኡታ ከገቡ በኋላ ሕገ ወጥ አዘዋዋሪ ቡድኖችን ወቀሱ።

የአገሪቷ መገናኛ ብዙኃን እንደዘገቡት ስደተኞቹ ወደ አገሪቱ ለመግባት በሚሞክሩበት ጊዜ ቢያንስ 57 ሰዎች ሞተዋል።

ጠቅላይ ሚኒስትር ፔድሮ ሳንቼዝ ክስተቱን " የስፔን የግዛት አንድነት ጥሰት" ያሉት ሲሆን ጣሊያንም ከማድሪፍ ጋር ያላትን እና በአውሮፓ ኅብረት አባል አገራት ውስጥ መንቀሳቀስ የሚያስችለውን ሸንገን ቪዛ በማገድ ምላሽ ሰጥታለች።

ክስተቱ ያጋጠመው የስፔን ጠቅላይ ፍርድ ቤት ወደ ሴኡታ ወይም ወደ ሌላኛዋ የስፔን ግዛት ሜሊላ ለመግባት ሲሞክሩ በባሕር ላይ የቆሙ ስደተኞችን በአስቸኳይ ወደ ሞሮኮ መመለስ እንደማይቻል ውሳኔ ካሳለፈ በኋላ ነው።

እስከ አርብ ዕለት ምሽት ድረስ ከ48 ሺህ በላይ ሰዎች በፈቃደኝነት ወደ ሞሮኮ መመለሳቸውን የስፔን ባለሥልጣናት ተናግረዋል።

እየተመለሰ እንደሆነ የገለፀ አንድ ግለሰብም ለሮይተርስ የዜና ወኪል ሲናገር "ሁኔታው ጥሩ አይደለም፣ ምንም ደስ አይልም። እዚህ ሰዎች እየሞቱ ነው። እስካሁን ካልመጣችሁ፤ አትምጡ፣ አታድርጉት፤ እባካችሁ ልማጸናችሁ" ብሏል።

በሰሜናዊ አፍሪካ ባሕር ዳርቻ ላይ የምትገኘው ሴኡታ ከስፔን በጂብራተር ወሽመጥ ምክንያት ተነጥላ የምትገኝ ናት።

ለረዥም ጊዜም አውሮፓ መግባት ለሚፈልጉ ስደተኞች ዋና ትኩረት ሆና ቆይታለች።

በተለይ በበጋ ወራት ወቅት በማኅበራዊ ሚዲያ የተደራጁ ቡድኖች ሴኡታ ለመግባት ብዙ ጊዜ ጥረት ያደርጋሉ።

ከሞሮኮ ጋር የሚዋሰኑት ሴኡታ እና ሌላኛው የስፔን መሻገሪያ ሜሊላ በሁለቱ አገራት መካከል ያለው ዲፕሎማሲያዊ ግንኙነት ዋነኛ ጉዳይ ሆነው ቆይተዋል።

ከቅርብ ጊዜ ወዲህ ወደ ግዛቶቹ የሚገቡ ስደተኞች ቁጥር እየጨመረ በመምጣቱ የአካባቢዎቹ ባለሥልጣናት የማድሪድን እርዳታ ጠይቀው ነበር።

ሆኖም ሐሙስ ዕለት የድንበር መቆጣጠሪያው ጥሰው በርካቶች ካለፉ በኋላ ትርምስ ተፈጥሯል።

ቤተሰቦቿን ለመጠየቅ ሴኡታ ከተማ የምትገኘው ክርመን ጎንዛሌዝ ብርሙድዝ፣ ባለፉት ቀናት " በጣም የተጨናነቀ እንደነበር" ለቢቢሲ ተናግራለች።

ቪክተር ኦርቲዝ የተባለ ሌላ ነዋሪም እንዲህ ዓይነት ሁኔታ " ከዚህ በፊት አይቶ እንደማያውቅ በመግለጽ፤ ከተማዋን " በየትኛውም አደባባይ እና መንገዶች በዋናነት ምግብ በሚፈልጉ ስደተኞች የታጨቀች" ሲል ገልጿታል። በስጋት ምክንያት ከቤት አለመውጣታቸውንም ተናግሯል።

የተወሰኑ ሱቆች ክፍት የነበሩ ሲሆን በተፈጠረው መጨናነቅ በኋላ ላይ እንዲዘጉ በፖሊስ እንደተነገራቸው ይኸው ግለሰብ ለቢቢሲ ገልጿል።

የጣሊያን ቀኝ አክራሪ ጠቅላይ ሚኒስትር ጆርጂያ ሜሎኒ በማኅበራዊ ሚዲያ ገጻቸው ባጋሩት ጽሑፍ በሴኡታ ከተማ የታየውን ምሥል " አስደንጋጭ" ያሉት ሲሆን " ቁጥጥር ያልተደረገበት ስደት ለአውሮፓ ደኅነንት ስጋት ነው" ብለዋል።

ይህንንም ተከትሎ አርብ ዕለት ጣሊያን ከስፔን ጋር ያላትን ያላ ቪዛ የሚደረግ እንቅስቃሴ አግዳለች።

ሁለቱ አገራት በየብስ ድንበር ስለማይገናኙ እገዳው ተግባራዊ የሚሆነው በበረራ ወቅት ነው።

የሴኡታ ፕሬዚዳንት ሁዋን ሁሴስ ቪቫስ እንዳሉት የገቡት ስደተኞች የከተማዋን ሕዝብ 70 በመቶ እንደሚሆኑ ተናግረዋል። ከተማዋ 83 ሺህ 600 ሕዝብ እንደሚኖሩባት የቅርብ መረጃዎች ያመለክታሉ።

የስፔን የውስጥ ጉዳይ ሚኒስቴር ግን ከሐሙስ ጠዋት ጀምሮ የገቡትን ስደተኞች ቁጥር ወደ 50 ሺህ ዝቅ አድርገውታል ።

የስደተኞቹን መግባት ተከተሎ ስፔን ወታደሮችን በሴኡታ እና ምሽቱን ከ300 እስከ 400 ስደተኞች እንደገቡባት በተገለፀው በእህት ከተማዋ ሚሊላ አሰማርታለች።

ሳንቼስ አርብ ዕለት ሴኡታን በጎበኙበት ወቅት ሲናገሩ፣ ይህ የተከሰተው በቅርቡ ፍርድ ቤቱ ያሳለፈውን ውሳኔ "በተሳሳተ መንገድ በተረጎሙ በወንጀለኛ ቡድኖች" ምክንያት ነው ብለዋል።

ጨምረውም መንግሥታቸው ከሞሮኮ ጋር የሚዋሰንበትን ድንበር ማጠናከር እንደሚፈለግ እና የሞሮኮ ባለሥልጣናትም በሕገ ወጥ መንገድ የገቡት ስደተኞችን ለመመለስ ትብብር እያደረጉ እንደሆነ ገልጸዋል።

ወደ ሴኡታ ከገቡት ስደተኞች መካከል አብዛኞቹ ወጣቶች ቢሆኑም ሴቶች እና ጨቅላ ሕፃናት ጭምር ይገኙበታል። ባለሥልጣናት እንደተናገሩት ባለፉት 24 ሰዓታት ውስጥ ከገቡት ስደተኞች መካከል 7 ሺህ የሚሆኑት ታዳጊዎች ናቸው።

ስደተኞቹ ሲገቡ የሞሮኮ ድንበር ጠባቂዎች የት እንደነበሩ እስካሁን ግልጽ አይደለም።

ከፍተኛ የሥራ አጥ ቁጥር ያለባት ሞሮኮ ባለፈው ዓመት የተሻለ ዕድልን እና የተሻለ የሕዝብ አገልግሎትን የሚጠይቁ በርካታ የወጣቶች ተቃውሞ አስተናግዳለች።

በተባበሩት መንግሥታት የወጣ እና በቢቢሲ የተረጋገጠ የስደኞች መረጃ፣ እስከ አውሮፓውያኑ ሐምሌ 15 ድረስ ወደ 2 ሺህ 826 ሰዎች ወደ ሴኡታ እንደተሻገሩ እና 181 የሚሆኑ ሜሊላ እንደገቡ አመልክቷል።

ወደ ሁለቱ ግዛቶች የሚገቡ ስደተኞች ቁጥር በቅርብ ዓመታት ውስጥ ከገቡት ጋር ሲነፃፀር ከፍተኛ ነው።

ባለፈው ዓመት 994 ስደተኞች የገቡ ሲሆን ከዚህ ቀደም በነበረው ዓመት ቁጥሩ 476 ነበር። በ2023 የገቡት ስደተኞች ቁጥር ደግሞ 467 ነበር።