காணாமல் போன தோழியைத் தேடி கண்டம் விட்டு கண்டம் 17,000 கிமீ பயணித்த பெண் - காத்திருந்த அதிர்ச்சி

கிட்டத்தட்ட மூன்று ஆண்டுகளாக, ஜஸ்டின் "அதே கேள்விகளுடன் விழித்தெழுந்து, அதே கேள்விகளுடன் தூங்கச் சென்றார்". இந்த ஆண்டு இறுதியாக தனது சிறுவயதுத் தோழியான செலின் க்ரேமருக்கு என்ன நடந்தது என்பது குறித்த சில பதில்களை அவர் பெற்றார்.

"செலின் எப்போதும் என் நினைவிலேயே இருந்தாள், அவள் அந்த (காட்டிற்குள்) தான் இருக்கிறாள் என்றால் - எங்களால் ஏன் அவளைக் கண்டுபிடிக்க முடியவில்லை என்று நான் எப்போதும் யோசித்துக்கொண்டே இருந்தேன்" என்று அந்த 33 வயதான ஸ்கூபா பயிற்சியாளர் கூறுகிறார்.

பெல்ஜியம் நாட்டைச் சேர்ந்த செலின் க்ரேமர், கடைசியாக 2023 ஜூன் 17 அன்று ஆஸ்திரேலியத் தீவான டாஸ்மேனியாவின் வடமேற்கில் உள்ள வாராட்டா என்ற நகரில் உயிருடன் காணப்பட்டார்.

அழகிய இடமான பிலோசபர்ஸ் நீர்வீழ்ச்சியை நோக்கி ஒரு மழைக்காட்டில் அவர் நடைபயணம் மேற்கண்டிருந்தார். இரண்டு வாரங்களாக அவர் தனது நண்பர்கள் மற்றும் குடும்பத்தினரைத் தொடர்புகொள்ளத் தவறியதை அடுத்து, அவர்கள் அதிகாரிகளிடம் சென்றனர்.

நீர்வீழ்ச்சிக்குச் செல்லும் பாதையின் தொடக்கத்தில் செலினின் காரை போலீசார் கண்டுபிடித்தனர்.

டிரோன்கள், ஹெலிகாப்டர்கள் மற்றும் தரை குழுக்களைப் பயன்படுத்தி விரிவான தரை மற்றும் வான்வழித் தேடல்கள் பல மாதங்களுக்குத் தொடர்ந்தன, ஆனால் எதையும் கண்டுபிடிக்க முடியவில்லை.

'செலின் என் உடலின் ஒரு பகுதி'

செலினைக் கண்டுபிடிப்பதற்கான ஜஸ்டினின் உந்துதல் எப்போதும் மூன்று தசாப்தங்களுக்கும் மேலாக நீடித்த அவர்களின் நட்பே ஆகும்.

"அவள் உண்மையிலேயே என்றென்றும் என் சிறந்த தோழியாக இருந்திருக்கிறாள். என் குடும்பத்தில் ஒரு பகுதி, ஒருவேளை என் உடலின் ஒரு பகுதி" என்று அவர் பிபிசியிடம் கூறுகிறார்.

கிழக்கு பெல்ஜியத்தில் உள்ள ஒரு சிறிய கிராமமான ட்ராசென்ஸ்டரில், ஜஸ்டினின் தாய் கற்பித்த நர்சரிப் பள்ளியில் இருவரும் சந்தித்தனர். அவர்களின் சிறுவயது காலம் வெளிப்புற செயல்பாடுகளும், உலகைச் சுற்றிப் பார்க்கும் கனவுகளும் நிறைந்திருந்தது.

"(மிகச்) சிறிய வயதிலிருந்தே நாங்கள் ஒன்றாக குதிரையேற்றம், பனிச்சறுக்கு மற்றும் நடனம் என பல நடவடிக்கைகளைச் செய்தோம்" என்று ஜஸ்டின் விளக்குகிறார். "நாங்கள் எப்போதும் பயணம் செய்யவும், வெயிலில் வாழவும், கடினமாக உழைக்கவும் விரும்பினோம்."

செலின் காணாமல் போய்விட்டார் என்று கூறப்பட்டபோது, 10,000 மைல்களுக்கும் (17,000 கி.மீ) அதிகமான தூரம் பயணம் செய்து தனது தோழியைக் கண்டுபிடிக்க விமான டிக்கெட்டைப் பதிவு செய்வதே ஜஸ்டினுக்கு ஒரே சரியான முடிவாக இருந்தது.

அவர்கள் வாழ்க்கையின் இன்ப துன்பங்களை — காதல் முறிவு, பள்ளி, நகரங்கள், நாடுகள் மற்றும் கண்டங்கள் மாறுவது என அனைத்தையும் ஒன்றாக அனுபவித்திருந்தனர், ஆனால் அவர்களின் நட்பு இதற்கெல்லாம் இடையிலும் மாறாத ஒன்றாகவே நீடித்தது.

"ஒருவரையொருவர் பார்த்துக்கொள்வதன் மூலமே எங்களால் ஒருவரையொருவர் புரிந்துகொள்ள முடிந்தது," என்று ஜஸ்டின் கூறுகிறார், "எங்களுக்கிடையில் இருந்த இணைப்பு மிகவும் தீவிரமானதாகவும் அழகாகவும் இருந்தது என்று நான் நினைக்கிறேன்."

அவர்களின் கடைசி வார்த்தைகள்

செலின் பணிபுரியவும் பயணம் செய்யவும் ஜூன் 2022 இல் ஆஸ்திரேலியா புறப்பட்டார். ஜஸ்டின் அக்டோபர் 2023 இல் அவருடன் சேர்ந்து அவரை ஆச்சரியப்படுத்த திட்டமிட்டிருந்தார்.

2023 ஜூன் 13 அன்று, அவர்களின் கடைசி உரையாடலாக மாறிய நிகழ்வில், ஜஸ்டின் செலினுக்கு பிறந்தநாள் வாழ்த்துத் தெரிவித்தார்.

"தான் மிகவும் மகிழ்ச்சியாக இருப்பதாகவும், தான் பயணம் செய்து கொண்டிருப்பதால் இருட்டுவதற்குள் பயணத்தைத் தொடர விரும்புவதாகவும், பின்னர் சிறிது நேரம் கழித்து விரிவாக விளக்குவதாகவும் அவள் எனக்குப் பதிலளித்தாள்," என்று ஜஸ்டின் நினைவுகூர்கிறார். "அவளிடமிருந்து நான் கடைசியாகக் கேட்டது அதுதான்."

"சில நாட்களுக்குப் பிறகு, ஆஸ்திரேலியாவில் உள்ள செலினுடன் சேர என் விமான டிக்கெட்டுகளைப் பதிவு செய்தேன். அதை அவளிடம் சொல்வதற்காக மிகவும் உற்சாகமாக இருந்தேன்."

செலின் சில நாட்களாகப் பதிலளிக்காததால், ஜஸ்டின் ஆஸ்திரேலியாவின் மிகப்பெரிய நகரமான சிட்னியில் இருக்கும் இருவருக்கும் பொதுவான ஒரு நண்பரை அழைத்தார். டாஸ்மேனியாவில் தொலைத் தொடர்பு சிக்னல் இல்லாத பல பகுதிகள் இருப்பதால் பீதியடைய வேண்டாம் என்று அவர் ஜஸ்டினிடம் கூறினார்.

ஆனால் கிட்டத்தட்ட இரண்டு வாரங்களாக செலினிடமிருந்து எந்தச் செய்தியும் வராததால், அவர்கள் காணாமல்போனவர் குறித்த புகாரை பதிவு செய்தனர்.

தேடல்

ஜூலை 2023 இல், ஜஸ்டின் டாஸ்மேனியாவிற்கு வந்து சேர்ந்தார், அங்கு அவர் காவல்துறையின் தேடுதல் முயற்சிகளில் தன்னை இணைத்துக் கொண்டதுடன், உதவிக்காக முடிந்தவரை பலரைத் திரட்டினார்.

"செலினைத் தேட எனக்கு உதவக்கூடிய மனிதர்களைக் கண்டறிவதற்காக, என்னால் முடிந்தவரை பல தொடர்புகளை உருவாக்க நான் முயற்சித்தேன்," என்று அவர் கூறுகிறார்.

இருப்பினும், ஆரம்பக்கட்ட காவல்துறையின் தேடுதல் பணி நீண்ட காலம் நீடிக்கவில்லை. செலின் காணாமல் போனதிலிருந்து கடுமையான வானிலை சூழ்நிலைகளைத் தாங்கி உயிர் பிழைத்திருக்க வாய்ப்பில்லை என்ற மருத்துவ ஆலோசனையைத் தொடர்ந்து, இரண்டு வாரங்களுக்குப் பிறகு அது கைவிடப்பட்டது.

"என் தோழி ஒருபோதும் கண்டறியப்பட மாட்டாள் என்பதை என்னால் ஏற்றுக்கொள்ள முடியவில்லை. ஏனெனில் நான் துக்கத்தை அனுசரிப்பதற்கும் (அவள் என்னவானாள் என்பதை அறிய வேண்டியிருந்தது), செலினின் குடும்பத்தினருக்கும் அதுவே தேவையாக இருந்தது," என்று அவர் கூறுகிறார்.

ஜஸ்டின் பெல்ஜியத்திற்குத் திரும்பினார், ஆனால் அவரால் தேடுதல் பணியைக் கைவிட முடியவில்லை. ஜனவரி 2024 இல், அவர் டாஸ்மேனியாவிற்கு மீண்டும் சென்றார். அடுத்த ஆறு மாதங்களைத் தனது தோழியின் ஏதேனும் ஒரு அறிகுறியை கண்டுபிடிப்பதற்கான தேடுதலில் கழித்தார்.

ஆனாலும் அவர்களுக்கு எந்தவொரு உறுதியான ஆதாரமும் கிடைக்கவில்லை. தான் "உளவியல் ரீதியாக முற்றிலும் சோர்வடைந்து" மனச்சோர்வின் விளிம்பிற்குச் சென்றுவிட்டதாக ஜஸ்டின் ஒப்புக்கொள்கிறார்.

அவர் தனது நண்பரான கேப்ரியல் ரெமியிடம் பேசினார். கேப்ரியல் தேடுதல் பணியின் தலைமையை ஏற்றுக்கொண்டு, ஆரம்பத்திலிருந்தே தேடுதல் பணியில் ஈடுபட்டிருந்த அனைவரையும் ஒன்றாக இணைத்தார்.

பெல்ஜியத்திற்குத் திரும்புவதற்கு முன், ஜஸ்டின் தனியார் துப்பறிவாளர் கென் கேம்பிளைத் தொடர்பு கொண்டார். அவர் எந்தவொரு கட்டணமும் இன்றி உதவ முன்வந்தார். அவர் பல்வேறு திறன்களைக் கொண்ட ஒரு குழுவை உருவாக்கினார்.

கடந்த ஆண்டு டிசம்பரில், அந்தக் குழு காவல்துறையிலிருந்து சுயாதீனமாக ஒரு புதிய தேடுதல் பணியைத் தொடங்கியது. அது செலினின் மொபைல் போனை கண்டறிய வழிவகுத்தது. இந்தத் திருப்புமுனை தன்னார்வலர்களுடன் இணைந்து செயல்பட காவல்துறையை மீண்டும் உள்ளே கொண்டு வந்தது.

'எங்கள் இருவருக்காகவும் தொடர்ந்து பயணம் செய்வேன்'

இந்தக் கண்டுபிடிப்பு நீண்ட காலமாக சந்தேகிக்கப்பட்டு வந்த ஒரு விஷயத்தை உறுதிப்படுத்துவது போல் அமைந்தது. செலின் அந்த காட்டிலிருந்து வெளியேறவேயில்லை.

ஜனவரியில், முந்தைய தேடுதல் பணிகளில் தன்னார்வலராகப் பங்கேற்ற ஒரு தனி நபர் செலினுக்குச் சொந்தமானது என்று நம்பப்படும் உடல் எச்சங்களை (ஒரு தாடை எலும்பை) கண்டறிந்தார், இது தேடுதல் முயற்சிகளுக்கு ஒரு புதிய உத்வேகத்தை அளித்தது. பிப்ரவரியில் அருகில் உள்ள ஒரு ஆற்றின் அருகே ஐந்து எலும்புகள், இரண்டு பற்கள் மற்றும் கார் சாவிகள் உட்பட கூடுதல் உடல் எச்சங்கள் கண்டெடுக்கப்பட்டன.

செலின் அந்த அடர்ந்த மழைக்காட்டிற்குள் வழிதவறிச் சென்றுவிட்டார் என்று டாஸ்மேனியா காவல்துறை நம்புகிறது. இதில் எந்தவொரு சதிச் செயலையும் அவர்கள் சந்தேகிக்கவில்லை.

"அவர் பிலாசஃபர்ஸ் நீர்வீழ்ச்சிக்கு வாகனத்தை ஓட்டிச் சென்று, தனது காரை நிறுத்திவிட்டு, ஒரு சிறிய நடைப்பயணமாக இருக்க வேண்டும் என்று நினைத்துச் சென்றார் என்று நாங்கள் நம்புகிறோம். துரதிர்ஷ்டவசமாக, அவர் திரும்பவில்லை," என்று மிகச் சமீபத்திய தேடுதல் நடவடிக்கைகளை வழிநடத்திய காவல் ஆய்வாளர் ஆண்ட்ரூ ஹான்சன் கூறினார்.

"போன் தரவு, அதேபோல் அது கண்டுபிடிக்கப்பட்ட இடம், வெளிச்சம் மங்கும்போது செலின் தனது மொபைலில் உள்ள ஒரு செயலியைப் பயன்படுத்தி, தனது காரை அடைய பிலாசபர் நீர்வீழ்ச்சி பாதையை விட்டு வெளியேறி குறுக்கு வழியை தேர்ந்தெடுக்க முடிவு செய்திருக்கலாம் என்ற எங்கள் கோட்பாட்டை ஆதரிக்கிறது" என்று ஹான்சன் கூறினார். "

"அவர் தனது மொபைலை தவறவிட்டு, அது இல்லாமல் பயணத்தைத் தொடர்ந்து, அடர்ந்த பகுதியில் திசைதிரும்பியிருக்கலாம் என்று நாங்கள் சந்தேகிக்கிறோம்," என்று அவர் மேலும் கூறினார்.

மரண விசாரணை அதிகாரி அதிகாரப்பூர்வ அடையாளச் சான்றளித்த பிறகு, அவரது பகுதியளவு உடல் எச்சங்கள் குடும்பத்தினரிடம் ஒப்படைக்கப்பட்டு, மே மாதத்தில் பெல்ஜியத்தில் செலின் உடல் அடக்கம் செய்யப்பட்டது.

"அது ஒரு மிகக் கடினமான ஆனால் அவசியமான தருணமாக இருந்தது. செலின் மரணத்தின் யதார்த்தத்தை இறுதியாக ஏற்றுக்கொள்வதற்கு அது எங்களுக்கு உதவியது என்று நான் நினைக்கிறேன். இது எனது துக்கத்தை அனுசரிக்கும் செயல்முறையின் ஒரு முக்கியமான படியாக இருந்துள்ளது," என்று ஜஸ்டின் கூறுகிறார்.

செலினின் இறுதிச் சடங்கிற்குப் பிந்தைய மாதங்களில், தான் பலவிதமான உணர்ச்சிகளை எதிர்கொண்டதாக ஜஸ்டின் கூறுகிறார். ஆனால் அவர் அனைத்து தன்னார்வலர்களுக்கும் தனது நன்றியைத் தெரிவித்துக் கொள்கிறார்.

"பத்திரிகைகளில் சில பெயர்கள் மட்டுமே வெளியிடப்பட்டுள்ளன, ஆனால் இன்னும் பலர் இதில் பங்கேற்றுள்ளனர்.அவர்கள் அனைவரும் பல்வேறு திறன்களைக் கொண்ட மிக முக்கியமானவர்கள் என்று நான் நினைக்கிறேன்," என்று அவர் கூறுகிறார்.

செலினின் மரணம் மற்ற மலையேறுபவர்கள் மற்றும் பயணிகள் பாதுகாப்பாக இருப்பதற்கும், தொடர்பில் இருப்பதற்கும் கூடுதல் நடவடிக்கைகளை எடுப்பதற்கான விழிப்புணர்வை ஏற்படுத்தும் என்று ஜஸ்டின் நம்புகிறார்.

"செலின் உண்மையிலேயே மிகவும் கவனமான, மிகவும் புத்திசாலியான நபர். இப்போது எங்களிடம் உள்ள அனைத்து ஆதாரங்களின் மூலமும், அந்த காட்டிற்குள் உயிர் பிழைக்க அவர் தன்னால் முடிந்த அனைத்தையும் செய்து கொண்டிருந்தார் என்பதை நாங்கள் அறிவோம்," என்று ஜஸ்டின் கூறுகிறார்.

ஜூன் மாதத்தில், செலினின் 34 வது பிறந்தநாளைக் குறிக்கும் வகையில் ஜஸ்டின் ஸ்பெயினிற்குச் சென்றார். அவர்கள் குழந்தைகளாக இருந்தபோது பேசிய படியே இந்த உலகத்தைப் பார்க்க அவர் திட்டமிட்டுள்ளார்.

அவர் செல்லும் இடமெல்லாம், செலினின் மாறாத நினைவூட்டலாக ஒரு இளஞ்சிவப்பு இதய வடிவ கல்லைத் தன்னுடன் எடுத்துச் செல்கிறார்.

"அவளுக்காக, எங்கள் இருவருக்காகவும் நான் நிச்சயமாகத் தொடர்ந்து பயணம் செய்ய விரும்புகிறேன்," என்று அவர் மேலும் கூறுகிறார்.

- இது பிபிசிக்காக கலெக்டிவ் நியூஸ்ரூம் வெளியீடு