Kaduna govment react to gunmen killing for community wia attackers kpai about 30 pipo

Di Kaduna State govment don condemn di attack for Naridon village in Kauru local govment wey claim di lives of at least 30 pipo on Monday.

For one statement by di Kaduna State Commissioner for Information, Ahmed Maiyaki, Govnor Uba Sani say e receive di news of di attack "wit deep sorrow", and e don direct security agencies "to intensify operations to apprehend di perpetrators and bring dem to justice".

Govnor Uba also direct di Kaduna State Emergency Management Agency (KADSEMA) to provide immediate relief and humanitarian support to affected families, while e beg residents of di community to "remain calm, vigilant and law-abiding, and to support security agencies with credible information".

Dis reaction dey come more dan 24 hours afta gunmen attack Naridon, Christian community for Southern Kaduna, around 12 midnight for di early hours of Monday, 27 July 2026.

Dem enta from house to house, burning houses, destroying property and shooting pipo, including women and children.

Community members tell BBC News Pidgin say as at dis Tuesday, no govment official, weda from di State or from kauru local govment area don visit dia area to commiserate wit dem.

One Catholic Priest wey dey serve for St Kizito Outstation, Naridon, tell our tori pipo say dem neva also see di KADSEMA officials wey di govnor tok say im don direct to provide relief materials to di villagers.

Meanwhile, di villagers also tok say di govment statement no dey accurate to tok say Naridon village "na border community between Kaduna State and Ganawuri for Riyom Local Government Area of Plateau State".

One of di village leaders, Ibrahim John tell tori pipo say dem dey surrounded by many villages for Kaduna State.

"Pari community dey across di river, and Kuyanbana and Kongor villages also dey adjacent to us and across di river. (So) Wia dem get di Plateau border tori from?" e ask.

Gunmen kpai 30 pipo including children for midnight attack for Kaduna Southern community

Na at least 30 pipo, including about seven children, bin kpai as gunmen attack Chawai community for Kauru local govment area of Kaduna State, for early dis Monday morning.

One catholic priest wey dey work for di community tell BBC Pidgin say dis no be di first time wey dem go face attack like dis inside dis 2026.

Fr Mark Bisan na di Parish Priest of St Monica Catholic Church, Ikulu Pari, wey dey service St Kizito outstation Naridon wia di attack hapun, and e describe di attackers as Fulani.

Di attack start around 12 midnight as pipo start to dey hear gunshots anyhow and di attackers kick open pipo doors and kpai dem wia dem dey sleep, Fr Bisan tok.

Priest narrate how di attack happun

One army checkpoint dey close to di community wia di attack hapun and according to di priest, dem suppose hear di gunshots.

"But even wen di community pipo call dem for phone, dem tok say dem dey come but na until 7am dis morning bifor dem arrive," Fr Bissan tok.

"Dis community bin no get any wahala wit Fulani herdsmen so we no fit tell why di attack hapun. Na quiet community wia di pipo dey conduct dia business in peace."

One family lose about five children for di attack. Di priest tok say dem don deposit 28 bodies for Zango mortuary, but di family of two of di victims don bury dia own pipo.

Fr Bissan tok say e believe dis na targeted attacks against di majorly Christian community.

"Last month, I bury nine of my parishioners (for Ikulupari), and dis one na di third of attacks like dis for our community dis year alone," e tok.

"Afta each attack, we no go hear anytin from di govment, wen di state govment or d local govment come, dem no go tok to us. Di military no go tok to us. Di community go just bury dia dead and kontinue as if notin hapun."

"My parish don dey attacked many times. Dem bin kidnap my predecessor for di parish two years ago and later release am, but dem kill di pesin wey bin dey live wit am.

"Since I resume here, dem don attack di parish at least two times. Na God dey save me say I no dey house, but dem destroy my house and damage plenty tins for di parish."

Di BBC don contact Di tok-tok pesin of di Kaduna Police Command and di State govment, but dem neva respond.

BBC News Pidgin see fotos of dis Monday attack, fotos of di deadibodi of children and women wey community pipo cover wit fresh leaves.

Di pictures dey too graphic to publish.

Di southern part of Kaduna State na one of di areas wey don witness violent attacks by armed attackers for di northern region of Nigeria ova di years.

Similar attacks dey also hapun for States like Plateau, Benue and Nasarawa.

Many bin believe say di cause of dis crisis na misunderstanding betwin farmers and herders, but as time dey go on, di issue don dey bicom more and more religious mata.

Di Nigeria govment bin don deny allegations by di US President Donald Trump say dem dey allow di genocide of Christians for di kontri.

Some pictures of dis recent attack