Postairean bho na ciad mòdan gu bhith air an taisbeanadh

Thèid dà phostair bho na ciad Mòdan Nàiseanta Rìoghail san Òban a thaisbeanadh dhan phoball san t-Sultain an dèidh dhaibh a bhith air càradh 's air an ùrachadh.

Tha seo a' tighinn agus am Mòd gu bhith ann an Glaschu san Dàmhair.

'S ann bho na 1890an a tha na postairean agus thèid an taisbeanadh ann an Taigh-tasgaidh Taobh Siar na Gàidhealtachd anns a' Ghearasdan bhon 8mh den t-Sultain - mus tèid an toirt a Ghlaschu airson seachdain a' Mhòid.

'S iad na h-aon shanasan a th' ann, cho fad 's as aithne do dhuine, bho bhliadhnaichean tràth a' mhòid.

Ged a bha an dà phostair air an droch mhilleadh, bha an sgrìobhadh ann an deagh staid agus bha e comasach an tilleadh gu mar a bha iad uaireigin.

Tha am postair as sine a' sanasachd a' chiad Mhòd a chaidh a chumail riamh ann an 1892 - le farpaisean còisir, seinn agus bàrdachd a' nochdadh air.

Tha duaisean air an sanasachd cuideachd 's cothrom aig na seinneadairean eadar 15 tastain agus £8 a bhuannachadh - tha sin co-ionnan ri mu £123 agus £1300 ann an airgead an là an-diugh.

Air a' phostair airson Mòd 1893, chìthear na tachartasan eile a tha gan cumail leithid consairt Gàidhlig agus cuirm còmhla ris an t-seinneadair ainmeil Seònaid NicLachlainn.

Bha ise aithnichte airson a bhith a' seinn air feadh an t-saoghail agus sheinn i dhan Bhanrigh Bhictoria.

'S i an tè-chiùil agus an craoladair, Màiri Anna NicUalraig, a thàinig tarsainn air na seann phostairean nuair a bha i a' rannsachadh beatha Sheònaid.

Bha iad an tasglann an eachdraiche, Bob McCulloch, na dhachaigh san Òban.

Thàinig iad bho Dhùghall MacÌosaig, fear den fheadhainn a stèidhich an Comunn Gàidhealach agus am Mòd Nàiseanta Rìoghail.

'S e an neach-glèidhidh pàipeir, Helen Creasy bho Stùidio Glèidhidh na h-Alba, a rinn an obair thairis air trì mìosan.

Chaidh am pròiseact a stiùireadh le Mairi Anna ann an co-bhanntachd leis a' Chomunn Ghàidhealach agus Taigh-tasgaidh Taobh Siar na Gàidhealtachd.

Fhuaireadh maoineachadh bho Urras Cathrannais Ghòrdain Fhriseil agus bhon phoball.

Thuirt Mairi Anna: "Tha na postairean seo cudromach dha-rìribh ann an eachdraidh nan Gàidheal agus eachdraidh a' Mhòid.

"Tha iad a' coimhead dìreach sgoinneil agus chì thu an t-àite a bhiodh aca san Òban anns na 1890an 's iad a' sanasachd a h-uile càil a bha a' dol aig a' Mhòd."

Thuirt Ceannard a' Chomuinn Ghàidhealaich, Peigi Nic'Illinnein: "Cha bhiodh càil a dh'fhios aig an fheadhainn a chur na ciad Mòdan air dòigh mun dìleab a bhiodh aig an tachartas - a tha fhathast a' toirt dhaoine còmhla airson a' Ghàidhlig, ceòl agus cultair a chomharrachadh 134 bliadhna às dèidh sin."

Thèid am Mòd Nàiseanta Rìoghail a chumail ann an Glaschu bho 9mh - 17mh den Dàmhair.

Bidh na postairean gan taisbeanadh ann an Talla Consairt Rìoghail a' bhaile fad na seachdain agus gheibhear a-steach an asgaidh airson am faicinn.