Aba-Houthi bavuga ko barashe ku murwa mukuru wa Arabie Saoudite bakoresheje misile za 'ballistic'

Intagondwa z'Aba-Houthi zifashwa na Iran zo muri Yemen zivuga ko zagabye ibitero bya misile zo mu bwoko bwa 'ballistic' hamwe n'ibitero by'indege nto z'intambara zitajyamo umupilote (zizwi nka 'drones') ku murwa mukuru Riyadh wa Arabie Saoudite, ndetse no ku bigo by'ingufu by'icyo gihugu biri ku nkombe y'Inyanja Itukura.

Abategetsi bo muri Arabie Saoudite bavuze ko ku wa gatandatu basamye ndetse basenya misile yo mu bwoko bwa 'ballistic' yarashwe kuri Riyadh ariko ntibemeje niba hari ibindi bitero byagabwe cyangwa niba hari abapfuye cyangwa abakomeretse.

Mbere yaho, umwotsi w'umukara wabonetse urimo kuzamuka uva mu bigega by'ibikomoka kuri peteroli biri hafi y'ikibuga mpuzamahanga cy'indege cyo mu murwa mukuru wa Arabie Saoudite, aho ku wa gatandatu ingendo z'indege zahagaze by'agateganyo.

Impuruza zo kuburira ku bitero byo mu kirere zari zavugijwe muri uwo murwa mukuru ku nshuro ya mbere kuva abo Ba-Houthi bafashwa na Iran bongereye ibitero kuri Arabie Saoudite muri Nyakanga (7) uyu mwaka.

Minisiteri y'ububanyi n'amahanga y'Amerika yashishikarije Abanyamerika baba mu karere k'Uburasirazuba bwo Hagati "kuba maso no kwitegura ko ingendo z'indege zishobora kuburizwamo hamwe n'andi mahungabana y'ingendo [ashobora kubaho]".

Mu itangazo yasohoye, iyo minisiteri yagize iti: "Aba-Houthi bafashwa na Iran barwanye na Saudi Arabia [Arabie Saoudite], harimo ibibuga by'indege bya gisivile. Iyi ntambara ya gisirikare ishobora gufata indi ntera mu buryo bwihuse."

Iryo tangazo ryongeyeho ko Abanyamerika "bakwiye kongera gutekereza neza ku ngendo zijya n'izinyura mu karere".

Mu itangazo umuvugizi w'urugaga ruyobowe na Arabie Saoudite yasohoye, yavuze ko ubwirinzi bw'ikirere bwanahagaritse "amagerageza y'umwanzi yo kurasa ku basivile" mu mijyi ya Bish, Taif, Farasan na Yanbu.

Umuvugizi wa gisirikare w'Aba-Houthi Yahya al-Sarea yasohoye itangazo ku mbuga zo kuri murandasi (internet) avuga ko "umubare munini wa misile za 'ballistic' na misile za 'cruise' hamwe na 'drones'" byakoreshejwe mu gutera "ibigo bikomeye" by'i Riyadh n'ibigo bya kompanyi Aramco y'igihugu y'ibikomoka kuri peteroli na gaze by'i Yanbu ku nkombe.

Yongeyeho ko ibyo bitero byari "igisubizo ku magerageza y'ubugizi bwa nabi y'umwanzi Arabie Saoudite" yo kurasa ku murwa mukuru Sanaa wa Yemen, ubu ugenzurwa n'Aba-Houthi.

Mbere, Sarea yari yashinje Arabie Saoudite kugaba ibitero 300 hirya no hino muri Yemen muri iki cyumweru gishize.

Aba-Houthi basanzwe bari mu ntambara na leta ya Yemen yemewe ku rwego mpuzamahanga, ishyigikiwe na Arabie Saoudite.

Mu mezi ya vuba aha ashize, bagabye ibitero inshuro nyinshi ku hantu hanyuranye ho muri Arabie Saoudite, ndetse muri iki cyumweru bavuze ko bahanuye indege y'intambara ya Arabie Saoudite ubwo yari iri mu kirere cya Yemen.

Inkuru itemejwe y'ibiro ntaramakuru AFP, isubiramo amagambo y'abo mu gisirikare bo ku mpande zombi zirwana mu ntambara yo muri Yemen, ivuga ko imirwano hagati y'Aba-Houthi n'ingabo za leta ya Yemen ishyigikiwe na Arabie Saoudite yiciwemo abantu 48 ku wa gatandatu.

Aba-Houthi bavuze ko 31 mu barwanyi babo bishwe, mu gihe abatanze amakuru bo ku ruhande rwa leta ya Yemen bavuze ko uruhande rwabo rwatakaje abasirikare 17, nkuko AFP ibitangaza.

Ku wa gatanu, umuryango mpuzamahanga wita ku bimukira, ukaba ari ishami ry'Umuryango w'Abibumbye, watangaje ko umubare w'abantu bamaze kuva mu byabo muri Yemen bagahungira imbere mu gihugu kubera imirwano yo mu gihe cya vuba aha gishize wageze ku bantu 104,796.