Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
RD Congo: Mutamba wabaye Minisitiri w'ubutabera yakatiwe imyaka 10 y'imirimo y'agahato kubera kunyereza imari ya leta
- Umwanditsi, Emery Makumeno
- Igikorwa, BBC Afurika i Kinshasa
- Yatangajwe
- Igihe co gusoma: iminota 3
Urukiko rusesa imanza muri Repubulika ya Demokarasi ya Congo (DRC) rwakatiye Constant Mutamba wahoze ari Minisitiri w'ubutabera igihano cyo kumara imyaka 10 akora imirimo y'agahato (idahemberwa), nyuma yo gusanga ahamwa n'icyaha muri ruswa nyinshi ifitanye isano n'ibivugwa ko ari ikoreshwa nabi ry'imari ya leta.
Mutamba, utarigeze yitabira amaburanisha kugeza ageze ku musozo, yahakanye ayo maburanisha asobanura ko urwo rubanza ari igikorwa gishingiye ku mpamvu za politike cyakozwe n'abatavuga rumwe na we.
Iyi dosiye ishingiye kuri miliyoni zigera kuri 20 z'amadolari y'Amerika – ni ukuvuga miliyari hafi 30 uzivunje mu mafaranga y'u Rwanda – bivugwa ko zanyerejwe, zari zigenewe kujya mu kigega cy'indishyi ku bagizweho ingaruka n'ibikorwa binyuranyije n'amategeko bya Uganda muri DRC, ikigega kizwi mu Gifaransa nka 'Fonds spécial de réparation et d'indemnisation des victimes des activités illicites de l'Ouganda en République démocratique du Congo' (FRIVAO).
Ibyo bikorwa ni ibyo Uganda yakoze mu ntambara zabaye mu burasirazuba bwa DRC kuva mu 1998 kugeza mu 2003.
Urukiko kandi rwakatiye Chançard Bolukola, wahoze ari umuhuzabikorwa w'agateganyo w'ikigega FRIVAO, waregwaga hamwe na Mutamba, igihano cyo kumara imyaka irindwi akora imirimo y'agahato.
Kubera ko uru rubanza rwaburanishijwe n'urukiko rusesa imanza, rwakoze nk'urukiko rw'ibanze ndetse nk'urukiko rwa nyuma, uwo mwanzuro w'urukiko ni ntakuka kandi ntushobora kujuririrwa.
Icyo cyemezo cy'urukiko cyiyongereye ku bindi bibazo byo mu bucamanza by'uwo wahoze ari Minisitiri w'ubutabera. Muri Nzeri (9) mu mwaka wa 2025, Mutamba yakatiwe kumara imyaka itatu akora imirimo y'agahato, mu yindi dosiye ijyanye no kunyereza imari ya leta.
Constant Mutamba yabaye Minisitiri w'ubutabera wa DRC kuva ku itariki ya 12 Kamena (6) mu mwaka wa 2024 kugeza ku itariki ya 18 Kamena mu mwaka wa 2025. Yanabaye umukandida mu matora ya perezida yo ku itariki ya 20 Ukuboza (12) mu mwaka wa 2023, aho yari ahagarariye ishyaka DYPRO (Dynamique Progressiste Révolutionnaire).
