لائیو, ایران پر امریکہ کے مزید حملے، متحدہ عرب امارات کا دو بحری جہازوں پر ایرانی حملوں کے نتیجے میں ایک انڈین شہری کی ہلاکت کا اعلان

لائیو کوریج

1. 19 منٹ قبلپاسداران انقلاب کا بحرین میں امریکی اڈے پر جوابی کارروائی کا دعویٰ، شہری پرسکون رہیں، بحرین کی وزارت داخلہ کی اپیل

   منگل کی صبح پاسداران انقلاب نے اپنے بیان میں 24 گھنٹوں میں ہونے والے امریکی حملوں کے جواب میں بحرین میں موجود امریکی اڈے الجفیر کے سیٹلائٹ مواصلاتی مرکز اور امریکی افواج کی رہائش گاہ کو میزائلوں اور ڈرونز سے نشانہ بنانے کا دعویٰ کیا ہے۔

   یاد رہے اس سے قبل منگل کی صبح آبنائے ہرمز میں دو آئل ٹینکروں کو بھی نشانہ بنایا گیا، جسے ممکنہ طور پر پاسداران انقلاب کی اب تک کی اہم ترین کارروائی قرار دیا جا رہا ہے۔ متحدہ عرب امارات اور بحرین کے مطابق اس واقعے میں ایک شخص ہلاک جبکہ کم از کم آٹھ افراد زخمی ہوئے ہیں۔

   پاسداران انقلاب کے قریب سمجھی جانے والی تسنیم خبر رساں ایجنسی نے کویت پر حملوں اور بحرین کے دارالحکومت منامہ میں دھوئیں کے بادل دکھائی دینے کی بھی اطلاع دی ہے۔

   بحرین میں خطرے کے سائرن

   دوسری جانب بحرین میں ایرانی حملوں کے تناظر میں خطرے کے سائرن بجا دیے گئے اور شہریوں اور رہائشیوں سے پرسکون رہنے اور قریبی محفوظ مقام پر جانے کی اپیل کی ہے۔

   بحرین کی وزارت داخلہ نے سوشل پلیٹ فارم ایکس پر اپنے بیان کہا کہ ’ہم شہریوں اور رہائشیوں سے اپیل کرتے ہیں کہ وہ پرسکون رہیں، قریبی محفوظ مقام پر جائیں اور سرکاری چینلز کے ذریعے خبروں پر نظر رکھیں۔‘

2. 57 منٹ قبلکئی ماہ کے وقفے کے بعد ایرانی پارلیمان کے اجلاس کا انعقاد

   ایرانی پارلیمان کی خبر رساں ایجنسی خانہ ملت کے مطابق کئی ماہ کے وقفے کے بعد نائب سپیکر حامد رضا حاجی بابائی کی صدارت میں ایرانی پارلیمان کے ’عوامی اجلاس‘ کا انعقاد کیا گیا۔

   بی بی سی فارسی کی خبر کے مطابق 250 سے زائد ارکان نے اجلاس کے دوران اسلامی جمہوریہ ایران کے سابق رہبراعلیٰ علی خامنہ ای، جنگ میں ہلاک ہونے والے فوجی کمانڈروں اور سیاسی شخصیات کے قاتلوں سے انتقام لینے کے حق میں نعرے لگائے۔

   پارلیمان نے یہ بھی فیصلہ کیا کہ ہنگامی یا غیرمعمولی حالات میں پارلیمانی اجلاس بہارستان کے باہر بھی منعقد کیے جا سکیں گے۔

   کئی ماہ کے وقفے کے بعد غیر معمولی وقت پر عوامی اجلاس کے انعقاد نے میڈیا اور عوامی حلقوں میں خاصی توجہ حاصل کی۔

   بی بی سی فارسی کے مطابق اجلاس میں جو غیر معمولی بات تھی وہ ایران کے نئے رہبر مجتبیٰ خامنہ ای کی تصویر کی تنصیب اور سپیکر محمد باقر قالیباف کی ایوان میں عدم موجودگی تھی۔

   اجلاس سے قبل ارکان نے یادگار پر حاضری دے کر سابق رہبر اعلیٰ علی خامنہ ای اور جنگ میں ہلاک ہونے والی شخصیات کو خراجِ عقیدت پیش کیا جہاں سیاسی اور عسکری شخصیات کی تصاویر کے ساتھ جنگ میں ہلاک ہونے والے بعض بچوں کی تصاویر بھی آویزاں تھیں۔

3. ایک گھنٹہ قبلایران آبنائے ہرمز کا محافظ ہے اور ہمیشہ رہے گا: عباس عراقچی

   ایرانی وزیر خارجہ عباس عراقچی نے کہا ہے کہ ایران ہمیشہ سے آبنائے ہرمز کا محافظ رہا ہے اور ہمیشہ رہے گا۔ انھوں نے یہ دعویٰ بھی کیا کہ ایران (ٹول لینے میں) منصفانہ رویہ اختیار کرے گا۔

   ایرانی وزیر خارجہ کا یہ بیان امریکی صدر کے اس بیان کے بعد سامنے آیا ہے جس میں ٹرمپ نے اعلان کیا تھا کہ وہ ایران کے خلاف بحری ناکہ بندی دوبارہ شروع کریں گے اور آبنائے ہرمز سے گزرنے والی تمام کھیپوں پر 20 فیصد ٹیرف عائد کریں گے۔

   عباس عراقچی نے ٹرمپ کے بیان کے جواب میں ایکس پر اپنے پیغام میں لکھا کہ ’امریکی صدر بالکل درست کہتے ہیں۔ جو بھی آبنائے ہرمز سے گزرنے والے تجارتی جہازوں کو محفوظ اور پُرامن گزرگاہ فراہم کرتا ہے اسے اس خدمت کا معاوضہ ملنا چاہیے۔‘

   ساتھ ہی انھوں نے دعویٰ کیا کہ ’ہم اس معاملے میں منصفانہ رویہ اختیار کریں گے کیونکہ 20 فیصد (فیس) بہت زیادہ ہے۔‘

4. 2 گھنٹے قبلامریکی فوج نے ایرانی فوجی اہداف پر حملوں کی تازہ لہر مکمل کر لی: سینٹکام

   امریکی سینٹرل کمانڈ نے اعلان کیا ہے کہ اس نے 13 جولائی کو ایران کے خلاف حالیہ حملوں کی لہر مکمل کر لی ہے۔

   سماجی رابطے کی ویب سائٹ ایکس پر موجود بیان میں سینٹکام نے دعویٰ کیا گیا کہ پانچ گھنٹے پر مشتمل اس مشن کے دوران، امریکی افواج نے کامیابی کے ساتھ فوجی اہداف کو نشانہ بنایا۔

   سینٹکام کے مطابق اس مشن کے دوران، امریکی افواج نے ایران میں فوجی اہداف کو کامیابی کے ساتھ نشانہ بنایا جن میں بوشہر، چاہ بہار، جاسک، کنارک، ابو موسیٰ اور بندر عباس شامل ہیں، تاکہ تجارتی جہازرانی پر حملہ کرنے کی ایران کی صلاحیت کو مزید کمزور بنایا جا سکے۔

   سینٹکام کے مطابق امریکی افواج نے ایرانی ساحلی دفاعی نظام، میزائل اور ڈرون تنصیبات، اور بحری صلاحیتوں کے خلاف درست نشانہ لگانے والے ہتھیار استعمال کیے۔

   سینٹکام کے مطابق اس وقت مشرقِ وسطیٰ میں 50 ہزار سے زیادہ امریکی فوجی اہلکار تعینات ہیں۔ امریکی افواج چوکس، مہلک اور ہر وقت تیار ہیں۔

5. 2 گھنٹے قبلخلیج فارس میں دو بحری جہازوں پر ایران کے حملوں میں ایک انڈین شہری ہلاک، آٹھ زخمی ہو گئے: متحدہ عرب امارات

   متحدہ عرب امارات نے رپورٹ کیا ہے کہ ایران نے خلیج فارس میں دو بحری جہازوں پر حملہ کیا ہے۔

   متحدہ عرب امارات کی وزارتِ دفاع نے اعلان کیا کہ دو آئل ٹینکر، مومباسا اور باہیا، آبنائے ہرمز کے جنوبی راستے میں اور عمان کی علاقائی سمندری حدود میں ایران کے دو کروز میزائلوں کا نشانہ بنے ہیں۔

   سوشل میڈیا ویب سائٹ ایکس پر جاری بیان کے مطابق حملے کے نتیجے میں آئل ٹینکر مومباسا کے عملے کا ایک رکن، جو انڈین شہری تھا، ہلاک ہو گیا جبکہ مزید آٹھ افراد زخمی ہوئے ہیں، جن میں سے چار کی حالت تشویشناک بتائی گئی ہے۔

   زخمی ہونے والے چھ افراد کا تعلق انڈیا اور دو کا یوکرین سے ہے۔

   متحدہ عرب امارات کی وزارتِ دفاع نے اسے ’کھلا حملہ‘ قرار دیتے ہوئے کہا ہے کہ یہ اقدام بین الاقوامی قانون کی سنگین خلاف ورزی ہے اور خطے کے امن و استحکام کو خطرے میں ڈالتا ہے۔

   پاسداران انقلاب نے بعد میں ٹیلیگرام پر جاری ایک بیان میں حملوں کی تصدیق کرتے ہوئے دعویٰ کیا کہ دو ٹینکروں نے ایران کے خطرے سے متعلق انتباہات کو نظرانداز کیا اور اپنے نیویگیشن سسٹمز بند کر دیے اور بارودی سرنگوں والے راستے سے گزرنے کی کوشش کی۔

   آئی آر جی سی نے کہا کہ اس نے خلاف ورزی کرنے والے ٹینکروں کو نشانہ بنا کر انھیں ناکارہ بنا دیا۔

   بیان میں مزید کہا گیا کہ ’دشمن کے ساتھ تعاون کا نتیجہ صرف پچھتاوا، نقصان اور آبنائے ہرمز کی بحالی میں تاخیر کی صورت میں نکلے گا، جبکہ اس سے دنیا میں توانائی کا بحران بھی پیدا ہوگا۔‘

6. 3 گھنٹے قبلابوظہبی میں امریکی سفارت خانے اور دبئی میں امریکی قونصل خانے نے خدمات عارضی طور پر معطل کر دیں

   ابوظہبی میں امریکی سفارت خانے اور دبئی میں قونصل خانے نے اعلان کیا ہے کہ خطے کی سکیورٹی صورتحال کے باعث 13 سے 15 جولائی (موجودہ ہفتے کے پیر، منگل اور بدھ) کے دوران تمام قونصلر خدمات منسوخ کر دی گئی ہیں۔

   اعلان میں کہا گیا ہے کہ ان تاریخوں کے دوران جن شہریوں کو ملاقات کا وقت دیا گیا تھا، وہ نہ آئیں اور نئے وقت سے انھیں بعد میں آگاہ کر دیا جائے گا۔

   یہ اعلان ایسے وقت میں سامنے آیا ہے جب گذشتہ چند دنوں کے دوران ایران اور امریکہ کے درمیان فوجی کشیدگی میں شدت آئی ہے۔

7. 3 گھنٹے قبلامریکی فوج کا ایران پر مزید حملوں کا دعویٰ

   امریکی فوج کی مرکزی کمان سینٹ کام نے ایران پر مزید حملوں کا دعویٰ کیا ہے۔

   سوشل میڈیا ویب سائٹ ایکس پر جاری بیان میں سینٹ کام نے کہا کہ یہ حملے ’کمانڈر اِن چیف‘ (یعنی امریکی صدر ڈونلڈ ٹرمپ) کی ہدایت پر کیے گئے۔

   سینٹکام کے بیان میں مزید کہا گیا کہ یہ حملے ایرانی افواج کو بھرپور طور پر کمزور کریں گے اور آبنائے ہرمز میں بے گناہ شہریوں اور تجارتی جہاز رانی پر حملہ کرنے کی ان کی صلاحیت کو کمزور کریں گے۔

8. 9 گھنٹے قبلٹرمپ جمعرات کو قوم سے خطاب کریں گے، موضوع کا اعلان نہیں کیا گیا

   امریکی صدر ڈونلڈ ٹرمپ نے اعلان کیا ہے کہ وہ جمعرات کو ’قوم سے خطاب‘ کریں گے، تاہم انھوں نے یہ نہیں بتایا کہ یہ خطاب کس موضوع پر ہوگا۔

   اپنے سوشل میڈیا پلیٹ فارم ٹروتھ سوشل پر ایک پوسٹ میں انھوں نے کہا کہ وہ رات 9 بجے مشرقی امریکی وقت (برطانوی وقت کے مطابق رات 2 بجے) خطاب کریں گے۔

   اس سے قبل انھوں نے اپریل میں جنگ کے حوالے سے قوم سے خطاب کیا تھا۔

9. 9 گھنٹے قبلایران کے حمایت یافتہ حوثیوں کا سعودی عرب کے ہوائی اڈے کو نشانہ بنانے کا دعویٰ

   یمن میں ایران کے حمایت یافتہ حوثی گروپ نے دعویٰ کیا ہے کہ اس نے سعودی عرب کے ابھا بین الاقوامی ہوائی اڈے کو بیلسٹک میزائلوں اور ڈرونز کے ذریعے نشانہ بنایا ہے۔

   حوثیوں کے ترجمان یحییٰ سریع نے کہا ہے کہ یہ کارروائی ’سعودی جارحیت، جس نے صنعا بین الاقوامی ہوائی اڈے کو نشانہ بنایا‘ کے جواب میں کی گئی ہے۔

   دوسری جانب، یمن میں سعودی قیادت والے اتحاد نے کہا ہے کہ اس کے فضائی دفاعی نظام نے حوثی باغیوں کی جانب سے جنوبی علاقے کی طرف داغے گئے بیلسٹک میزائلوں کا مقابلہ کیا۔

   سعودی عرب نے تاحال اس بارے میں کوئی تبصرہ نہیں کیا ہے۔

   اس سے قبل اطلاعات سامنے آئی تھیں کہ یمن کی فوج نے صنعا کے ہوائی اڈے کے رن وے کو نشانہ بنایا تھا تاکہ ایک ایرانی طیارے کو وہاں اترنے سے روکا جا سکے۔

   حوثیوں نے ان حملوں کا الزام سعودی عرب پر عائد کیا تھا۔

   یمن کی بین الاقوامی طور پر تسلیم شدہ حکومت کو سعودی عرب کی حمایت حاصل ہے، جبکہ حوثیوں کا ملک کے بعض حصوں، بشمول دارالحکومت صنعا پر کنٹرول ہے۔

10. 9 گھنٹے قبلٹرمپ نے کانگرس کو بھیجے خط میں فوجی کارروائیاں دوبارہ شروع ہونے سے آگاہ کیا

    بی بی سی نے تصدیق کی ہے کہ ڈونلڈ ٹرمپ نے باقاعدہ طور پر کانگریس کو اطلاع دی ہے کہ ایران کے خلاف فوجی کارروائیاں دوبارہ شروع کر دی گئی ہیں۔

    10 جولائی کو امریکی صدر نے سینیٹر چک گراسلی کو ایک خط لکھا، جس میں انھوں نے بتایا کہ فوجی سرگرمیاں 7 جولائی سے دوبارہ شروع ہوئی ہیں۔

    خط میں ٹرمپ نے کہا کہ یہ حملے دفاعی نوعیت کے ہیں اور ان کا مقصد ’امریکی شہریوں اور امریکہ کے ملکی و غیرملکی مفادات کا تحفظ‘ کرنا ہے۔

    انھوں نے یہ بھی کہا کہ یہ کارروائیاں ’محدود، متوازن اور پہلے سے منصوبہ بندی کے تحت کی گئی ہیں، اور انھیں اس انداز میں انجام دیا گیا ہے کہ شہری جانی نقصان کو کم سے کم رکھا جا سکے۔‘

    ٹرمپ نے مزید لکھا کہ ’میں یہ رپورٹ کانگریس کو مکمل طور پر آگاہ رکھنے کی اپنی کوششوں کے تحت پیش کر رہا ہوں، جیسا کہ وار پاورز ریزولوشن کے مطابق ضروری ہے۔‘

    اس قرارداد کے تحت صدر پر لازم ہے کہ کسی فوجی حملے کے آغاز کے 48 گھنٹوں کے اندر قانون سازوں کو اس بارے میں آگاہ کریں۔

11. 14 جولائی 2026ناکہ بندی کی بحالی سے قبل جوائنٹ میری ٹائم انفارمیشن سینٹر کی ہدایات

    جوائنٹ میری ٹائم انفارمیشن سینٹر (JMIC) نے منگل سے ایرانی بندرگاہوں پر شروع ہونے والی امریکی بحری ناکہ بندی سے قبل ایک مشاورتی نوٹ جاری کیا ہے۔

    برطانیہ کے میری ٹائم ٹریڈ آپریشنز نے اس نوٹس کو ایکس پر شیئر کرتے ہوئے کہا ہے کہ خطے میں سمندری سلامتی کے خطرے کی سطح اب بھی شدید ہے۔

    نوٹس میں مزید کہا گیا ہے کہ موجودہ حالات میں ’جان بوجھ کر کی جانے والی مزید دشمنانہ سرگرمیوں‘ کا امکان ہے۔

    بحری جہازوں کے عملے کو خبردار کیا گیا ہے کہ وہ ’بحری افواج کی مسلسل موجودگی، راستوں پر پاسدارانِ انقلاب (IRGC) کی جانب سے بڑھتے ہوئے رابطوں اور نگرانی‘ کی توقع رکھیں، اور یہ بھی امکان ہے کہ حفاظتی اقدامات سختی سے نافذ کیے جائیں گے۔

    انھیں مشورہ دیا گیا ہے کہ ناکہ بندی نافذ کرنے والی فورسز کی ہدایات پر عمل کرنے پر غور کریں، اپنے سفر کے مقصد کو واضح طور پر ظاہر کریں اور کسی بھی غیر معمولی سرگرمی کی اطلاع دیں۔

12. 13 جولائی 2026امریکی ناکہ بندی منگل سے دوبارہ نافذ ہوگی، سینٹ کام

    امریکی سینٹرل کمانڈ (سینٹ کام) نے کہا ہے کہ آبنائے ہرمز کی ناکہ بندی 14 جولائی کو مشرقی امریکی وقت کے مطابق شام 4 بجے (برطانوی وقت رات 9 بجے) دوبارہ شروع کی جائے گی۔

    اس سے قبل ڈونلڈ ٹرمپ نے کہا تھا کہ ناکہ بندی ’فوری طور پر‘ نافذ کی جائے گی۔

    امریکی فوج نے ایکس (سابقہ ٹوئٹر) پر جاری بیان میں کہا ’سینٹ کام کی فورسز ان تمام جہازوں کے خلاف ناکہ بندی نافذ کریں گی جو ایرانی بندرگاہوں یا ساحلی علاقوں کی طرف جا رہے ہوں گے یا وہاں سے آ رہے ہوں گے۔‘

    بیان میں مزید کہا گیا کہ ’امریکی فوج ان تمام جہازوں کے لیے خطے کے سمندری راستوں میں آمد و رفت کی حمایت جاری رکھے گی جو ناکہ بندی کی خلاف ورزی نہیں کر رہے۔‘

    امریکی فوج نے تمام بحری جہازوں کے عملے سے کہا ہے کہ وہ نشریاتی اعلانات پر نظر رکھیں اور خلیجِ عمان اور آبنائے ہرمز کے قریب کام کرتے وقت امریکی بحری افواج سے رابطے میں رہیں۔

13. 13 جولائی 2026ایران کی وزارتِ خارجہ نے یمن کے ہوائی اڈے پر مبینہ حملے کی مذمت کر دی

    ایران کی وزارتِ خارجہ کے ترجمان اسماعیل بقائی نے یمن کے دارالحکومت صنعا کے ہوائی اڈے پر مبینہ حملے کی مذمت کرتے ہوئے اسے ’ہوابازی کے بین الاقوامی قانون کی کھلی خلاف ورزی‘ قرار دیا ہے۔

    اطلاعات کے مطابق، یمن کی مسلح افواج نے آج پہلے ہوائی اڈے کے رن وے کو نشانہ بنایا تاکہ ایک ایرانی طیارے کو وہاں اترنے سے روکا جا سکے۔

    یمن کا دارالحکومت صنعا ایران کے حمایت یافتہ حوثی گروہ کے کنٹرول میں ہے، جبکہ بین الاقوامی سطح پر تسلیم شدہ حکومت، جسے سعودی عرب کی حمایت حاصل ہے، جنوبی یمن کے شہر عدن سے اپنے امور چلاتی ہے۔

    بعد میں حوثی ذرائع ابلاغ نے دعویٰ کیا کہ ایرانی طیارہ اس کے باوجود ہوائی اڈے پر اتر گیا تھا۔

    اس واقعے کی تفصیلات ابھی واضح نہیں ہیں، لیکن ابتدائی طور پر یہ کئی برسوں سے نسبتاً غیر فعال یمنی حکومت اور حوثیوں کے درمیان تنازع میں ایک اہم اور سنگین کشیدگی کے طور پر دیکھا جا رہا ہے، جیسا کہ ہمارے نامہ نگار نے پہلے رپورٹ کیا تھا۔

14. 13 جولائی 2026ہم آبنائے ہرمز سے گزرنے والے بحری جہازوں پر ٹول وصول کرنے کی مخالفت کرتے ہیں: بین الاقوامی میری ٹائم آرگنائزیشن

    اقوام متحدہ کی ایک ایجنسی انٹرنیشنل میری ٹائم آرگنائزیشن کا کہنا ہے کہ وہ آبی گزرگاہوں سے گزرنے والے بحری جہازوں پر ٹول وصول کرنے کی مخالفت کرتی ہے۔

    اس سے قبل، ڈونلڈ ٹرمپ نے اعلان کیا تھا کہ وہ ایران کے خلاف بحری ناکہ بندی دوبارہ شروع کریں گے اور آبنائے ہرمز سے گزرنے والی تمام کھیپوں پر 20 فیصد ٹیرف عائد کریں گے۔

    ڈونلڈ ٹرمپ کے اعلان کے جواب میں انٹرنیشنل میری ٹائم آرگنائزیشن کے ترجمان نے کہا: ’ہم اس پوسٹ سے آگاہ ہیں اور مزید تفصیلات کا انتظار کر رہے ہیں۔‘

    انھوں نے مزید کہا ’ٹول کے بارے میں ہماری پوزیشن ہمیشہ واضح رہی ہے۔ بین الاقوامی میری ٹائم آرگنائزیشن بین الاقوامی نیویگیشن کے لیے استعمال ہونے والے آبنائے سے گزرنے کے لیے ٹول وصول کرنے کی سختی سے مخالفت کرتی ہے۔ صرف آبنائے سے گزرنے کے لیے لازمی ٹول عائد کرنے کی کوئی قانونی بنیاد نہیں ہے۔‘

15. 13 جولائی 2026ایران کے سپریم لیڈر کہاں ہیں؟, غنچے حبیبی‌زاد، بی بی سی فارسی

    ایران کے سپریم لیڈر مجتبیٰ خامنہ ای مارچ کے آغاز میں اپنے والد کی جگہ یہ عہدہ سنبھالنے کے بعد سے کسی تصدیق شدہ ویڈیو یا تصویر میں نظر نہیں آئے۔

    اطلاعات کے مطابق وہ 28 فروری کو تہران میں ہونے والے اسی حملے میں زخمی ہوئے تھے جس میں ان کے والد علی خامنہ ای مارے گئے تھے۔ یہ حملہ امریکہ اور اسرائیل نے جنگ کے پہلے روز ایران پر کیا تھا۔ تاہم، ایران کی وزارتِ صحت نے ان دعوؤں کو مسترد کیا ہے کہ ان کی چوٹیں شدید تھیں۔

    امریکی صدر ڈونلڈ ٹرمپ نے آج مجتبیٰ خامنہ ای کے بارے میں کہا کہ وہ ’90 فیصد ختم ہو چکے ہیں‘۔

    اب تک، 8 مارچ کے بعد سے مجتبیٰ خامنہ ای سے منسوب کئی تحریری پیغامات سامنے آ چکے ہیں۔ دو روز پہلے جاری ہونے والے تازہ ترین پیغام میں انھوں نے اپنے والد کے قتل کا بدلہ لینے کا عزم ظاہر کیا۔ حالیہ دنوں میں ایرانی حکام نے بھی اسی طرح کے بیانات دیے ہیں۔

    مجتبیٰ خامنہ ای جولائی کے آغاز میں اپنے والد کی یاد میں منعقد ہونے والی ایک ہفتے کی تقریبات کے دوران عوام کے سامنے نہیں آئے، حالانکہ ان کے بھائی ان تقریبات میں شریک ہوئے تھے۔

    ان کی موجودہ جگہ کے بارے میں سوال اب بھی برقرار ہے۔

    تاہم، مجتبیٰ خامنہ ای کے سپریم لیڈر بننے سے پہلے اور بعد میں اسرائیل یہ کہہ چکا ہے کہ وہ انھیں نشانہ بنائے گا، لیکن یہ ابھی واضح نہیں کہ وہ کب، یا آیا کبھی، عوام کے سامنے نظر آئیں گے یا نہیں۔

16. 13 جولائی 2026ایران کے فوجی اہداف پر حملوں کے بعد ٹرمپ نے امریکی ناکہ بندی دوبارہ نافذ کر دی

    اگر آپ ابھی بی بی سی اردو لے لائیو پیج پر آیے ہیں تو آپ کے لیے اہم خبروں کا خلاصہ:

    • امریکہ کے صدر ڈونلڈ ٹرمپ نے ایرانی بندرگاہوں پر نئی ناکہ بندی کا اعلان کیا ہے، جس کے تحت ’ایران کے جہازوں یا ان کے صارفین‘ کو آبنائے ہرمز سے گزرنے یا وہاں سے نکلنے کی اجازت نہیں ہوگی۔
    • انھوں نے مزید کہا کہ اس مقصد کے لیے امریکہ خطے میں ’حفاظت اور سکیورٹی‘ فراہم کرنے کے تمام اخراجات پورے کرنے کے لیے بھیجے جانے والے تمام مال بردار سامان پر 20 فیصد فیس عائد کرے گا۔
    • یہ پہلی بار نہیں ہے کہ ٹرمپ نے اس اہم بحری گزرگاہ پر ناکہ بندی نافذ کی ہو۔ اپریل میں لگائی گئی ناکہ بندی تین ماہ تک جاری رہی تھی، جس دوران امریکی فوج نے کم از کم نو جہازوں پر فائرنگ کی تھی۔ امریکہ کا کہنا تھا کہ ان جہازوں نے ہدایات پر عمل کرنے سے انکار کیا تھا۔
    • ٹرمپ کا یہ اعلان امریکہ اور ایران کے درمیان رات بھر جاری رہنے والے نئے حملوں کے بعد سامنے آیا۔ امریکی سینٹرل کمانڈ (سینٹ کام) کے مطابق، آبنائے ہرمز میں ایرانی حملوں کے جواب میں کئی اہداف کو نشانہ بنایا گیا، جن میں ایک آبدوز اور جہازوں کی مرمت کی تنصیب بھی شامل تھی۔
    • نئی ناکہ بندی کے جواب میں ایرانی رکنِ پارلیمان ابراہیم رضائی نے کہا ’آبنائے ہرمز کی حفاظت کے لیے ہمیں غیر ملکی کارکنوں کی ضرورت نہیں!‘
    • اس تازہ کشیدگی کے باعث ایک بار پھر آبنائے ہرمز میں بحری آمد و رفت متاثر ہوئی ہے۔ آج دو جہاز مشرق کی جانب خلیجِ عمان کی طرف جاتے ہوئے دکھائی دیے، جبکہ دو دیگر جہازوں نے آبنائے سے نکلنے کی سمت بڑھنے کے بعد اپنی پوزیشن کی معلومات نشر کرنا بند کر دیں۔

17. 13 جولائی 2026ایف بی ائی کے ڈائریکٹر کاش پٹیل کی پاکستانی وزیر داخلہ محسن نقوی سے ملاقات

    ایف بی ائی کے ڈائریکٹر کاش پٹیل نے پاکستانی وزیر داخلہ محسن نقوی کے ساتھ ایک تصویر پوسٹ کرتے ہوئے سوشل میڈیا کی سائٹ ایکس پر کہا ہے کہ امریکہ کی پاکستان کے ساتھ شراکت داری نہایت اہم ہے۔

    انھوں نے لکھا ’پاکستان کے وزیرِ داخلہ محسن نقوی کی ایف بی آئی ہیڈکوارٹرز میں میزبانی ہمارے لیے اعزاز کی بات ہے۔ امریکی مفادات کے تحفظ کے لیے خطے میں ہماری کوششوں میں ان کے تعاون کو ایف بی آئی بہت سراہتی ہے۔‘

    انھوں نے مزید کہا کہ ’اس ملاقات میں دہشت گردی کی مالی معاونت کی روک تھام اور سائبر تحقیقات کے شعبوں میں، ملک کے اندر اور بین الاقوامی سطح پر، وسائل اور خصوصی تربیت کی فراہمی سے متعلق اہم گفتگو ہوئی۔ ہماری شراکت داری نہایت اہم ہے اور ہمیں امید ہے کہ آئندہ بھی مزید کامیابیاں حاصل ہوں گی۔‘

18. 13 جولائی 2026آبنائے ہرمز کے تحفظ کے لیے ہمیں غیر ملکیوں کی ضرورت نہیں: ابراہیم رضائی

    امریکی صدر ڈونلڈ ٹرمپ کی جانب سے ایرانی بندرگاہوں کے خلاف نئی ناکہ بندی کے اعلان کے بعد ایران کی قومی سلامتی اور خارجہ پالیسی کمیشن کے ترجمان اور رکنِ پارلیمنٹ ابراہیم رضائی کا بیان سامنے آیا ہے۔

    ٹرمپ کے اس بیان کے جواب میں، جس میں انھوں نے کہا تھا کہ امریکہ آبنائے ہرمز کا کنٹرول سنبھال رہا ہے، ابراہیم رضائی نے سوشل میڈیا پلیٹ فارم ایکس پر لکھا کہ ’آبنائے ہرمز کے تحفظ کے لیے ہمیں غیر ملکیوں کی ضرورت نہیں!‘

    یہ بیان ایسے وقت میں سامنے آیا ہے جب آبنائے ہرمز میں بڑھتی ہوئی کشیدگی کے باعث خطے میں سکیورٹی کی صورتحال مزید پیچیدہ ہوتی جا رہی ہے۔

19. 13 جولائی 2026امریکہ نے ایران میں آبدوز اور بحری جہازوں کے مرمتی مرکز پر حملے کی ویڈیو جاری کر دی

    امریکی سینٹرل کمانڈ (سینٹکام) نے ایک تازہ بیان میں کہا ہے کہ امریکی افواج نے گذشتہ رات ایران میں ایک آبدوز اور بحری جہازوں کی مرمت کے منصب کو نشانہ بنایا ہے۔

    سینٹکام کے مطابق جنوبی ایران میں واقع بندر عباس نیول بیس کی بندرگاہ پر متعدد یک طرفہ حملہ آور ڈرونز استعمال کیے گئے۔ امریکی فوج نے اس کارروائی کی ویڈیو فوٹیج بھی جاری کی ہے۔

    ایکس پر جاری بیان میں سینٹکام نے کہا: ’گزشتہ رات کے حملوں نے تجارتی جہاز رانی پر حملے جاری رکھنے کی ایران کی صلاحیت کو کمزور کر دیا ہے۔‘

    امریکہ اس سے قبل کہہ چکا ہے کہ اس کی فوجی کارروائیاں آبنائے ہرمز میں تجارتی جہازوں پر ایرانی حملوں کے جواب میں کی جا رہی ہیں۔

20. 13 جولائی 2026ٹرمپ نے ایک بار پھر ایرانی بندرگاہوں پر بحری ناکہ بندی نافذ کرنے کا اعلان کر دیا

    امریکی صدر ڈونلڈ ٹرمپ نے ایک بار پھر ایرانی بندرگاہوں پر بحری ناکہ بندی نافذ کرنے کا اعلان کر دیا ہے۔

    ٹروتھ سوشل پر اپنی پوسٹ میں امریکی صدر نے لکھا: ’آبنائے ہرمز کھلی ہے اور ایران کی موجودگی یا عدم موجودگی میں بھی کھلی رہے گی۔‘

    ’ہم ایران کے خلاف ناکہ بندی دوبارہ بحال کر رہے ہیں۔‘

    انھوں نے کہا کہ اس ناکہ بندی کا مقصد ایران کے جہازوں اور اس کے گاہکوں کو آنے جانے سے روکنا ہے، تاہم ’دیگر تمام ممالک آبنائے ہرمز کا منصفانہ اور آزادانہ استعمال کر سکیں گے۔‘

    امریکی صدر نے دعویٰ کیا کہ ’آج کے بعد امریکہ کو ’آبنائے ہرمز کا محافظ‘ کے نام سے جانا جائے گا۔‘

    تاہم ٹرمپ نے یہ بھی کہا کہ ایک ’انتہائی غیر مستحکم حصے میں سلامتی اور تحفظ‘ فراہم کرنے کے تمام اخراجات کو پورا کرنے کے لیے امریکہ کو تمام کارگو پر ’20 فیصد‘ ادائیگی کی جائے گی۔

    ’اس عمل اور اس کے نظام کی تشکیل فوری طور پر شروع کی جائے گی۔‘