You’re viewing a text-only version of this website that uses less data. View the main version of the website including all images and videos.
ਆਈਪੀਐੱਲ: ਪੰਜਾਬ ਕਿੰਗਜ਼ ਪਲੇਅ ਆਫ਼ ਤੱਕ ਕਿਵੇਂ ਪਹੁੰਚ ਸਕਦਾ ਹੈ, ਹੋਰ ਟੀਮਾਂ ਦੇ ਕੀ ਚਾਂਸ ਹਨ
ਪੰਜਾਬ ਕਿੰਗਜ਼ ਦੀ ਆਰਸੀਬੀ ਖਿਲਾਫ਼ ਛੇਵੀਂ ਹਾਰ ਨੇ ਉਨ੍ਹਾਂ ਦੇ ਪਲੇਆਫ ਤੱਕ ਪਹੁੰਚਣ ਦੀਆਂ ਉਮੀਦਾਂ ਭਾਵੇਂ ਘੱਟ ਕੀਤੀਆਂ ਹਨ ਪਰ ਅਜੇ ਵੀ ਹਾਲਾਤ ਅਜਿਹੇ ਬਣ ਸਕਦੇ ਹਨ ਜਿਸ ਵਿੱਚ ਪੰਜਾਬ ਪਲੇਆਫ ਤੱਕ ਪਹੁੰਚ ਸਕਦੀ ਹੈ।
ਐਤਵਾਰ ਨੂੰ ਧਰਮਸ਼ਾਲਾ ਵਿੱਚ ਪੰਜਾਬ ਕਿੰਗਜ਼ ਉੱਤੇ ਇੱਕ ਸ਼ਾਨਦਾਰ ਜਿੱਤ ਦੇ ਨਾਲ, ਰਾਇਲ ਚੈਲੇਂਜਰਜ਼ ਬੰਗਲੁਰੂ ਆਈਪੀਐਲ 2026 ਵਿੱਚ ਪਲੇਆਫ ਵਿੱਚ ਥਾਂ ਬਣਾਉਣ ਵਾਲੀ ਪਹਿਲੀ ਟੀਮ ਬਣ ਗਈ।
ਇੱਕ ਦਿਨ ਬਾਅਦ, ਸਨਰਾਈਜ਼ਰਜ਼ ਹੈਦਰਾਬਾਦ ਅਤੇ ਗੁਜਰਾਤ ਟਾਈਟਨਜ਼ ਨੇ ਵੀ ਚੇਪੌਕ ਵਿੱਚ ਚੇਨਈ ਸੁਪਰ ਕਿੰਗਜ਼ ਉੱਤੇ ਹੈਦਰਾਬਾਦ ਦੀ ਜਿੱਤ ਤੋਂ ਬਾਅਦ ਆਪਣੀ ਥਾਂ ਪੱਕੀ ਕਰ ਲਈ ਹੈ।
ਮੁੰਬਈ ਇੰਡੀਅਨਜ਼ ਅਤੇ ਲਖਨਊ ਸੁਪਰ ਜਾਇੰਟਸ ਪਲੇਆਫ ਦੀ ਰੇਸ ਵਿੱਚੋਂ ਬਾਹਰ ਹੋ ਗਏ ਹਨ।
ਲੀਗ-ਪੜਾਅ ਦੇ ਸੱਤ ਮੈਚ ਅਜੇ ਬਾਕੀ ਹਨ, ਪੰਜ ਟੀਮਾਂ ਆਖਰੀ ਪਲੇਆਫ ਸਥਾਨ ਲਈ ਦੌੜ ਵਿੱਚ ਹਨ। ਆਓ ਜਾਣਦੇ ਹਾਂ ਕਿ ਪੰਜਾਬ ਕਿੰਗਜ਼ ਸਮੇਤ ਕਿਹੜੀ ਟੀਮ ਦੇ ਪਲੇਆਫ ਵਿੱਚ ਪਹੁੰਚਣ ਦੇ ਕਿੰਨੇ ਮੌਕੇ ਹਨ।
ਪੰਜਾਬ ਕਿੰਗਜ਼
ਪੰਜਾਬ ਕਿੰਗਜ਼ ਦਾ ਆਖਰੀ ਲੀਗ ਮੈਚ ਲਖਨਊ ਸੁਪਰ ਜਾਈਂਟਸ ਨਾਲ ਹੈ। ਐੱਲਐੱਸਜੀ ਦੇ ਖਿਲਾਫ ਇੱਕ ਮੈਚ ਬਾਕੀ ਹੋਣ ਕਰਕੇ, ਪੰਜਾਬ ਕਿੰਗਜ਼ ਸਿਰਫ 15 ਅੰਕਾਂ ਤੱਕ ਹੀ ਪਹੁੰਚ ਸਕਦੇ ਹਨ।
ਪੰਜਾਬ ਕਿੰਗਜ਼ ਅੱਗੇ ਤੱਕ ਜਾਣ ਲਈ ਹੁਣ ਹੋਰ ਨਤੀਜਿਆਂ 'ਤੇ ਨਿਰਭਰ ਕਰਦੇ ਹਨ। ਰਾਜਸਥਾਨ ਰੌਇਲਜ਼ ਤੇ ਕੋਲਕਾਤਾ ਨਾਈਟਰਾਈਡਰਜ਼ ਅਜੇ ਵੀ 15 ਜਾਂ ਇਸ ਤੋਂ ਵੱਧ ਅੰਕਾਂ 'ਤੇ ਸਮਾਪਤ ਕਰਨ ਦੇ ਸਮਰੱਥ ਹਨ।
ਪੰਜਾਬ ਕਿੰਗਜ਼ ਲਈ ਕੀ ਜ਼ਰੂਰੀ ਹੈ:
ਪੰਜਾਬ ਨੂੰ ਆਪਣਾ ਆਖਰੀ ਮੈਚ ਲਖਨਊ ਦੇ ਖਿਲਾਫ਼ ਹਰ ਹਾਲ ਵਿੱਚ ਜਿੱਤਣਾ ਪਵੇਗਾ। ਇਸ ਦੇ ਨਾਲ ਹੀ ਨੈੱਟ ਰਨ ਰੇਟ ਵੀ ਮਜ਼ਬੂਤ ਰੱਖਣਾ ਪਵੇਗਾ।
ਜੇਕਰ ਰਾਜਸਥਾਨ ਰੌਇਲਜ਼ ਇੱਕ ਗੇਮ ਹਾਰ ਜਾਂਦਾ ਹੈ, ਅਤੇ ਕੇਕੇਆਰ ਘੱਟੋ-ਘੱਟ ਇੱਕ ਗੇਮ ਹਾਰਦਾ ਹੈ, ਜਾਂ 15-ਪੁਆਇੰਟ ਉੱਤੇ ਟਾਈ ਹੋਣ ਦੀ ਸੂਰਤ ਵਿੱਚ ਪੰਜਾਬ ਕਿੰਗਜ਼ ਕੇਕੇਆਰ ਨੂੰ ਨੈੱਟ ਰਨ ਰੇਟ 'ਤੇ ਪਛਾੜ ਦਿੰਦੇ ਹਨ ਤਾਂ ਵੀ ਉਨ੍ਹਾਂ ਦੇ ਚਾਂਸ ਬਣਦੇ ਹਨ।
ਰਾਇਲ ਚੈਲੇਂਜਰਜ਼ ਬੰਗਲੁਰੂ (ਕੁਆਲੀਫਾਈਡ)
ਰੌਇਲ ਚੈਲੇਂਜਰਜ਼ ਬੰਗਲੁਰੂ ਪਹਿਲਾਂ ਹੀ ਪਲੇਆਫ ਲਈ ਕੁਆਲੀਫਾਈ ਕਰ ਚੁੱਕਿਆ ਹੈ। ਬਸ ਆਰਸੀਬੀ ਦੀ ਸਿਖਰਲੇ ਦੋ ਸਥਾਨਾਂ ਲਈ ਪੁਸ਼ਟੀ ਹੋ ਜਾਵੇਗੀ ਜੇ,
- ਸੀਐਸਕੇ ਨੇ ਵੀਰਵਾਰ (21 ਮਈ) ਨੂੰ ਗੁਜਰਾਤ ਟਾਈਟਨਜ਼ ਨੂੰ ਹਰਾਇਆ ਜਾਂ
- ਆਰਸੀਬੀ ਨੇ ਸ਼ੁੱਕਰਵਾਰ (22 ਮਈ) ਨੂੰ ਸਨਰਾਇਜ਼ਰਜ਼ ਹੈਦਰਾਬਾਦ ਨੂੰ ਹਰਾਇਆ।
ਕੋਈ ਹੋਰ ਟੀਮ 20 ਅੰਕਾਂ ਨਾਲ ਆਰਸੀਬੀ ਦੀ ਬਰਾਬਰੀ ਨਹੀਂ ਕਰ ਸਕਦੀ। ਆਰਸੀਬੀ 18 ਅੰਕਾਂ ਨਾਲ ਚੋਟੀ ਦੇ ਦੋ ਸਥਾਨਾਂ 'ਤੇ ਪਹੁੰਚਣ ਤੋਂ ਖੁੰਝ ਸਕਦੀ ਹੈ ਜੇਕਰ ਗੁਜਰਾਤ ਟਾਈਟਨਜ਼ ਸੀਐਸਕੇ ਨੂੰ ਹਰਾ ਦਿੰਦੀ ਹੈ ਅਤੇ ਨੈੱਟ ਰਨ ਰੇਟ 'ਤੇ ਆਰਸੀਬੀ ਨੂੰ ਪਛਾੜ ਦਿੰਦੀ ਹੈ, ਜੋ ਕਿ ਆਰਸੀਬੀ ਦੇ ਵਿਸ਼ਾਲ ਐਨਆਰਆਰ ਨੂੰ ਦੇਖਦੇ ਹੋਏ ਕਾਫੀ ਮੁਸ਼ਕਲ ਲੱਗ ਰਿਹਾ ਹੈ, ਜੋ ਕਿ ਵਰਤਮਾਨ ਵਿੱਚ 1.065 ਹੈ।
ਗੁਜਰਾਤ ਟਾਈਟਨਸ (ਕੁਆਲੀਫਾਈਡ)
ਗੁਜਰਾਤ ਟਾਈਟਨਜ਼ ਦਾ ਆਖਰੀ ਮੈਚ ਚੇਨੱਈ ਸੁਪਰਕਿੰਗਜ਼ ਨਾਲ ਹੈ। ਸੋਮਵਾਰ ਨੂੰ ਹੈਦਰਾਬਾਦ ਦੇ ਚੇਨਈ ਨੂੰ ਹਰਾਉਣ ਤੋਂ ਬਾਅਦ ਗੁਜਰਾਤ ਟਾਈਟਨਜ਼ ਨੇ ਪਲੇਆਫ ਲਈ ਕੁਆਲੀਫਾਈ ਕਰ ਲਿਆ।
ਹਾਲਾਂਕਿ, ਸਿਖਰਲੇ ਦੋ ਸਥਾਨਾਂ 'ਤੇ ਰਹਿਣਾ ਹੈਦਰਾਬਾਦ ਤੇ ਬੰਗਲੁਰੂ ਦੇ ਨਤੀਜੇ 'ਤੇ ਨਿਰਭਰ ਕਰੇਗਾ; ਜੇਕਰ ਹੈਦਰਬਾਦ ਆਖਰੀ ਗੇਮ ਜਿੱਤਦਾ ਹੈ, ਤਾਂ ਇਸਦਾ ਫੈਸਲਾ ਨੈੱਟ ਰਨ ਰੇਟ ਕਰੇਗਾ।
ਸਨਰਾਈਜ਼ਰਜ਼ ਹੈਦਰਾਬਾਦ (ਕੁਆਲੀਫਾਈਡ)
ਸਨਰਾਈਜ਼ਰਜ਼ ਹੈਦਰਾਬਾਦ ਪਲੇਆਫ ਲਈ ਕੁਆਲੀਫਾਈ ਹੋ ਚੁੱਕਿਆ ਹੈ। ਉਸ ਦਾ ਆਖਰੀ ਮੈਚ ਬੰਗਲੁਰੂ ਦੇ ਨਾਲ ਹੈ। ਚੇਪੌਕ ਵਿਖੇ ਸੀਐਸਕੇ ਉੱਤੇ ਸ਼ਾਨਦਾਰ ਜਿੱਤ ਨੇ ਸਨਰਾਈਜ਼ਰਜ਼ ਹੈਦਰਾਬਾਦ ਦੀ ਜੀਟੀ ਦੇ ਨਾਲ ਪਲੇਆਫ ਵਿੱਚ ਜਗ੍ਹਾ ਪੱਕੀ ਕਰ ਦਿੱਤੀ, ਕਿਉਂਕਿ ਮੌਜੂਦਾ ਹਾਲਾਤਾਂ ਵਿੱਚ ਆਰਆਰ ਹੀ 16 ਅੰਕਾਂ ਤੱਕ ਪਹੁੰਚ ਸਕਦੀ ਹੈ, ਅਤੇ ਸਿਰਫ਼ ਆਰਸੀਬੀ ਕੋਲ ਹੀ ਜ਼ਿਆਦਾ (18 ਅੰਕ) ਹਨ।
ਜੇਕਰ ਸਨਰਾਈਜ਼ਰਜ਼ ਹੈਦਰਾਬਾਦ ਬੰਗਲੁਰੂ ਤੋਂ ਹਾਰ ਜਾਂਦਾ ਹੈ, ਤਾਂ ਉਹ ਅਜੇ ਵੀ ਚੋਟੀ ਦੇ ਦੋ ਵਿੱਚ ਜਗ੍ਹਾ ਬਣਾ ਸਕਦੇ ਹਨ ਜੇਕਰ ਗੁਜਰਾਤ ਚੇਨਈ ਤੋਂ ਹਾਰ ਜਾਂਦਾ ਹੈ।
ਇਸ ਨਾਲ ਹੈਦਰਾਬਾਦ ਅਤੇ ਗੁਜਰਾਤ ਦੇ 16 ਅੰਕ ਰਹਿ ਜਾਣਗੇ, ਰਾਜਸਥਾਨ ਵੀ ਆਪਣੇ ਆਖਰੀ ਦੋ ਜਿੱਤ ਕੇ ਉੱਥੇ ਪਹੁੰਚਣ ਦੇ ਯੋਗ ਹੋਵੇਗਾ। NRR ਦੂਜੇ ਸਥਾਨ ਦਾ ਫੈਸਲਾ ਕਰੇਗਾ, ਅਤੇ ਵਰਤਮਾਨ ਵਿੱਚ, ਗੁਜਰਾਤ ਨੂੰ ਇਹਨਾਂ ਤਿੰਨ ਟੀਮਾਂ ਵਿੱਚੋਂ NRR 'ਤੇ ਥੋੜ੍ਹੀ ਜਿਹੀ ਬੜ੍ਹਤ ਹੈ।
ਰਾਜਸਥਾਨ ਰਾਇਲਜ਼
ਰਾਜਸਥਾਨ ਰੌਇਲਜ਼ ਦੇ ਦੋ ਮੈਚ ਲਖਨਊ ਤੇ ਮੁੰਬਈ ਇੰਡੀਅਨਜ਼ ਦੇ ਨਾਲ ਹਨ।
ਆਰਆਰ ਨੇ ਆਪਣੇ ਪਿਛਲੇ ਅੱਠ ਮੈਚਾਂ ਵਿੱਚੋਂ ਛੇ ਹਾਰੇ ਹਨ। ਪਰ ਉਨ੍ਹਾਂ ਦੀ ਪਲੇਆਫ ਕਿਸਮਤ ਉਨ੍ਹਾਂ ਦੇ ਆਪਣੇ ਹੱਥਾਂ ਵਿੱਚ ਹੈ। ਉਨ੍ਹਾਂ ਦੇ ਬਾਹਰ ਹੋਈਆਂ ਟੀਮਾਂ (ਐਲਐਸਜੀ ਅਤੇ ਐਮਆਈ) ਵਿਰੁੱਧ ਦੋ ਮੈਚ ਬਾਕੀ ਹਨ। ਜੇਕਰ ਉਹ ਦੋਵੇਂ ਜਿੱਤ ਜਾਂਦੇ ਹਨ ਅਤੇ 16 ਅੰਕ ਪ੍ਰਾਪਤ ਕਰ ਲੈਂਦੇ ਹਨ, ਤਾਂ ਇਹ ਕੁਆਲੀਫਾਈ ਕਰਨ ਲਈ ਕਾਫ਼ੀ ਹੋਵੇਗਾ। ਆਰਆਰ 14 ਅੰਕਾਂ ਨਾਲ ਵੀ ਅੱਗੇ ਵਧ ਸਕਦਾ ਹੈ ਜੇਕਰ ਕਈ ਹੋਰ ਨਤੀਜੇ ਉਨ੍ਹਾਂ ਦੇ ਹੱਕ ਵਿੱਚ ਆਉਂਦੇ ਹਨ।
ਚੇਨਈ ਸੁਪਰ ਕਿੰਗਜ਼
ਚੇਨਈ ਸੁਪਰ ਕਿੰਗਜ਼ ਦਾ ਆਖਰੀ ਮੈਚ ਗੁਜਰਾਤ ਟਾਈਟਨਜ਼ ਦੇ ਖਿਲਾਫ ਹੈ। ਹੈਦਰਾਬਾਦ ਤੋਂ ਮਿਲੀ ਹਾਰ ਨਾਲ ਚੇਨਈ ਸਿਰਫ਼ 12 ਅੰਕਾਂ ਨਾਲ ਛੇਵੇਂ ਸਥਾਨ 'ਤੇ ਰਹਿ ਗਿਆ।
ਉਹ ਅਜੇ ਵੀ 14 ਅੰਕਾਂ ਨਾਲ ਚੌਥੀ ਪਲੇਆਫ ਟੀਮ ਹੋ ਸਕਦੀ ਹੈ। ਇਸਦੇ ਲਈ, ਚੇਨਈ ਨੂੰ ਗੁਜਰਾਤ ਨੂੰ ਹਰਾਉਣਾ ਪਵੇਗਾ ਅਤੇ ਉਮੀਦ ਰੱਖਣੀ ਪੈਣੀ ਕਿ ਰਾਜਸਥਾਨ, ਪੰਜਾਬ ਅਤੇ ਕੋਲਕਾਤਾ ਸਾਰੇ ਹਾਰ ਜਾਣਗੇ ਤਾਂ ਜੋ ਕੋਈ ਵੀ 14 ਜਾਂ ਇਸ ਤੋਂ ਵੱਧ ਅੰਕਾਂ ਤੱਕ ਨਾ ਪਹੁੰਚ ਸਕੇ।
ਫਿਰ ਨੈੱਟ ਰਨ ਰੇਟ ਫੈਸਲਾ ਕਰੇਗਾ ਕਿ ਉਨ੍ਹਾਂ ਅਤੇ ਦਿੱਲੀ ਕੈਪਟਲਜ਼ ਵਿਚਕਾਰ ਆਖਰੀ ਸਥਾਨ ਕੌਣ ਲੈਂਦਾ ਹੈ, ਅਤੇ ਵਰਤਮਾਨ ਵਿੱਚ ਚੇਨਈ ਕੋਲ ਦਿੱਲੀ ਕੈਪੀਟਲਜ਼ ਨਾਲੋਂ ਬਿਹਤਰ ਨੈੱਟ ਰਨਰੇਟ ਹੈ।
ਸੀਐਸਕੇ 14 ਅੰਕਾਂ ਨਾਲ ਅੱਗੇ ਵੱਧ ਸਕਦੀ ਹੈ:
- ਜੇ ਉਹ ਜੀਟੀ ਨੂੰ ਹਰਾਉਂਦੇ ਹਨ ਅਤੇ
- ਰਾਜਸਥਾਨ ਦੋਵੇਂ ਮੈਚ ਹਾਰ ਗਿਆ, ਲਖਨਊ ਨੇ ਪੰਜਾਬ ਨੂੰ ਹਰਾਇਆ, ਅਤੇ ਕੋਲਕਾਤਾ ਨੇ ਦਿੱਲੀ ਕੈਪੀਟਲਜ਼ ਨੂੰ ਹਰਾਇਆ, ਪਰ ਮੁੰਬਈ ਤੋਂ ਹਾਰ ਗਿਆ
ਦਿੱਲੀ ਕੈਪੀਟਲਜ਼
ਦਿੱਲੀ ਕੈਪੀਟਲਜ਼ ਦਾ ਆਖਰੀ ਮੈਚ ਕੋਲਕਾਤਾ ਨਾਲ ਹੈ। ਡੀਸੀ ਦੇ ਮਾੜੇ ਐਨਆਰਆਰ ਦਾ ਮਤਲਬ ਹੈ ਕਿ ਉਨ੍ਹਾਂ ਦਾ ਇੱਕੋ ਇੱਕ ਰਸਤਾ 14 ਅੰਕਾਂ ਤੱਕ ਪਹੁੰਚਣਾ ਹੈ ਅਤੇ ਉਮੀਦ ਰੱਖ ਰਹੇ ਹੋਣਗੇ ਕਿ ਨਤੀਜੇ ਐਨਆਰਆਰ ਦੀ ਲੜਾਈ ਤੋਂ ਬਚਣ ਲਈ ਉਨ੍ਹਾਂ ਦੇ ਹੱਕ ਵਿੱਚ ਹੋਣਗੇ। ਇਸ ਲਈ ਪੀਬੀਕੇਐਸ, ਸੀਐਸਕੇ, ਅਤੇ ਆਰਆਰ ਨੂੰ ਆਪਣੇ ਮੈਚ ਹਾਰਨ ਦੀ ਲੋੜ ਹੈ, ਜਿਸ ਨਾਲ ਆਰਸੀਬੀ, ਜੀਟੀ, ਐਸਆਰਐਚ ਅਤੇ ਡੀਸੀ ਚਾਰ ਕੁਆਲੀਫਾਇਰ ਰਹਿ ਜਾਣਗੇ।
ਜੇਕਰ ਇਹਨਾਂ ਵਿੱਚੋਂ ਹਰੇਕ ਨਤੀਜੇ ਆਉਂਦੇ ਹਨ ਤਾਂ ਦਿੱਲੀ ਕੈਪੀਟਲਜ਼ NRR ਨੂੰ ਧਿਆਨ ਵਿੱਚ ਰੱਖੇ ਬਿਨਾਂ 14 ਅੰਕਾਂ ਨਾਲ ਕੁਆਲੀਫਾਈ ਕਰੇਗਾ:
- ਜੇਕਰ ਉਹ ਕੇਕੇਆਰ ਨੂੰ ਹਰਾ ਦਿੰਦੇ ਹਨ ਅਤੇ
- ਐਲਐਸਜੀ ਨੇ ਪੀਬੀਕੇਐਸ ਨੂੰ ਹਰਾਇਆ
- ਐਲਐਸਜੀ ਅਤੇ ਐਮਆਈ ਨੇ ਆਰਆਰ ਨੂੰ ਹਰਾਇਆ
- ਜੀਟੀ ਨੇ ਸੀਐਸਕੇ ਨੂੰ ਹਰਾਇਆ
ਕੋਲਕਾਤਾ ਨਾਈਟ ਰਾਈਡਰਜ਼
ਕੋਲਕਾਤਾ ਦੇ ਦੋ ਮੈਚ ਮੁੰਬਈ ਤੇ ਦਿੱਲੀ ਕੈਪੀਟਲਜ਼ ਖਿਲਾਫ ਬਚੇ ਹਨ। ਕੋਲਕਾਤਾ ਆਪਣੇ ਦੋਵੇਂ ਮੈਚ ਜਿੱਤ ਕੇ 15 ਅੰਕਾਂ ਨਾਲ ਅੱਗੇ ਵਧ ਸਕਦਾ ਹੈ ਜੇਕਰ:
- ਜੇਕਰ ਰਾਜਸਥਾਨ ਇੱਕ ਗੇਮ ਹਾਰ ਜਾਂਦਾ ਹੈ ਅਤੇ ਲਖਨਊ ਪੰਜਾਬ ਨੂੰ ਹਰਾਉਂਦਾ ਹੈ।
- ਰਾਜਸਥਾਨ ਆਪਣੇ ਦੋ ਮੈਚਾਂ ਵਿੱਚੋਂ ਇੱਕ ਹਾਰ ਜਾਂਦਾ ਹੈ, ਅਤੇ ਜੇਕਰ ਪੰਜਾਬ ਲਖਨਊ ਨੂੰ ਹਰਾਉਂਦਾ ਹੈ, ਤਾਂ ਅਜਿਹੀ ਸਥਿਤੀ ਵਿੱਚ ਫੈਸਲਾ ਨੈੱਟ ਰਨ ਰੇਟ ਕਰੇਗਾ।
ਜੇਕਰ ਕੇਕੇਆਰ ਡੀਸੀ ਨੂੰ ਹਰਾ ਦਿੰਦਾ ਹੈ ਤਾਂ ਉਹ 13 ਅੰਕਾਂ ਨਾਲ ਅੱਗੇ ਵਧ ਸਕਦਾ ਹੈ ਅਤੇ ਹੇਠ ਲਿਖੇ ਤਿੰਨੋਂ ਨਤੀਜੇ ਉਨ੍ਹਾਂ ਦੇ ਹੱਕ ਵਿੱਚ ਜਾਂਦੇ ਹਨ:
- ਜੀਟੀ ਨੇ ਸੀਐਸਕੇ ਨੂੰ ਹਰਾਇਆ
- ਐਲਐਸਜੀ ਅਤੇ ਐਮਆਈ ਨੇ ਆਰਆਰ ਨੂੰ ਹਰਾਇਆ
- ਪੰਜਾਬ ਲਖਨਊ ਤੋਂ ਹਾਰ ਗਿਆ ਅਤੇ ਨੈੱਟ ਰਨ ਰੇਟ 'ਤੇ ਕੋਲਕਾਤਾ ਤੋਂ ਪਿੱਛੇ ਰਿਹਾ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
