Tinubu report xenophobic attacks for South Africa to African Union, say make dem take action

Nigerian President Bola Tinubu don formally raise concern sake of di xenophobic and Afrophobic attacks against Africans and oda foreign nationals for South Africa bifor di African Union.

Di president wey dey represented by Vice President Kashim Shettima for di 21st Extraordinary Session of di Assembly of di African Union for Luanda, Angola, say di incidents undermine Africa solidarity, unity and peaceful coexistence.

Stanley Nkwocha wey be di Senior Special Assistant to di President on Media and Communications, Office of di Vice President, give di informate on Sunday, 30 August.

E say di president request prompt collective action from di continent leaders, including di placement of dis mata on di agenda for di 40th Ordinary Session of di Assembly wey go happun for January 2027.

"Nigeria wish to express im concern ova di recurring xenophobic and Afrophobic attacks against Africans and oda nationals for South Africa.

"While recognising South Africa sovereign right to enforce im immigration laws and acknowledging im contributions to di continent, Nigeria stress say such attacks undermine African solidarity, unity and peaceful coexistence, and require urgent collective attention.

"Na on dis note Nigeria call on dis August Assembly to place di mata on di agenda of di upcoming 40th Ordinary Session of di AU Assembly, scheduled for January 2027, for consideration and appropriate action," e tok.

President Tinubu call for stronger continental efforts to combat xenophobia and Afrophobia.

E say dialogue, preventive diplomacy, and collective action remain essential to preserve African unity.

"On di wider security situation across di continent, Nigeria back di adoption of di Luanda Action Plan as a practical roadmap for strengthening conflict prevention, and argue say preventing conflicts dey cheaper and more sustainable dan managing dem afta dem erupt," Nkwocha tok.

BBC News Pidgin bin report say sixty-seven Nigerians return from South Africa under one privately funded repatriation programme.

Di group arrive for Murtala Muhammed International Airport for Lagos for di evening of Wednesday, 26 August, through one South African Airways flight and na officials of di National Emergency Management Agency (Nema) and di National Commission for Refugees, Migrants and Internally Displaced Persons (NCFRMI), receive dem.

According to di NCFRMI, di returnees na 30 adults, 36 children and one infant.

Dis dey come just about one week afta anoda 83 pipo bin also come back to Nigeria from South Africa on 18 August.