पाकिस्तान हिउँपहिरो : चारवटा 'ट्र्याकर' पत्ता लागे, हराएका नेपाली र अन्य पर्वतारोही को हुन्

पाकिस्तानको 'ब्रोड पीक' हिमाल आरोहणका क्रममा हिउँपहिरोमा परी ख्यातिप्राप्त आरोही निर्मल पुर्जासहित १० जनाको समूह सम्पर्कविहीन भएको छ। उक्त समूहमा अन्य पाँच नेपालीहरू पनि छन्।

नेपालमा जन्मेका तथा भूतपूर्व ब्रिटिश 'रोयल मरीन' समेत रहेका पुर्जाले उक्त अन्तराष्ट्रिय पर्वतारोही समूहको नेतृत्व गरेको बताइएको छ।

पाकिस्तानी पर्वतारोहण अधिकारीहरूका अनुसार काराकोरम पर्वतशृङ्खलामा अवस्थित ८,०४७ मिटर अग्लो ब्रोड पीकमा बिहीवार दिउँसो हिउँपहिरो गएको हो। त्यसयता उक्त टोलीसँग कुनै सम्पर्क हुन सकेको छैन।

पुर्जाको नेतृत्वमा रहेको उक्त समूहमा विभिन्न देशका नागरिक थिए। तीमध्ये एक ओमानी महिला पनि छिन्।

नेपालको पर्यटन विभागले एउटा विज्ञप्ति जारी गर्दै हराइरहेका पर्वतारोहीहरूको उद्धारकार्यमा पाकिस्तान सरकारसँग समन्वय गर्न इस्लामाबादस्थित नेपाली दूतावासलाई निर्देशन दिइएको जनाएको छ।

कसरी हुँदै छ खोजी

पाकिस्तानी अल्पाइन क्लबका महासचिव आयाज शिग्रीका अनुसार ड्रोनहरू र स्थलगत टोलीको सहयोगमा उद्धार अभियान सञ्चालन भइरहेको छ।

उनका अनुसार पाकिस्तानी सेनाले पठाएका हेलिकप्टरहरू अहिले केटूको आधारशिविरमा छन् र घटनास्थलतिर जान लागेका छन्।

शिग्रीले पर्वतारोहीहरूका चारवटा 'ट्र्याकर' सक्रिय रहेको पत्ता लागेको तर ती पर्वतारोहीको अवस्था भने थाहा नभएको बताए। पर्वतारोहीहरूले महत्त्वपूर्ण हिमाल आरोहण गर्दा जीपीएस ट्र्याकिङ उपकरण बोक्ने गरेका छन्।

उनका अनुसार ट्र्याकरहरू रहेको ठाउँ पत्ता लागेको भए पनि तिनमा कुनै हलचल देखिएको छैन।

यसअघि स्थानीय अधिकारीहरूले ६,००० मिटरदेखि ७,००० मिटरसम्मको उचाइमा केही ट्र्याकरहरू भएको पत्ता लागेको बीबीसीलाई बताएका थिए।

शिग्रीका अनुसार चारवटा ट्र्याकरहरू भएको ठाउँमा पुग्न चार घण्टाजति अक्सिजन लिएर हिमाल चढ्नुपर्छ। साँझसम्म कुरा स्पष्ट हुने आशा व्यक्त गर्दै उनले अन्य छ पर्वतारोहीहरू भने कहाँ छन् भन्ने कुरा आफूलाई थाहा नभएको बताए।

यसअघि पाकिस्तानी अल्पाइन क्लबले हराइरहेका पर्वतारोहीहरूलाई उद्धार गर्न सकिने आशा व्यक्त गरेको थियो।

अनुकूल मौसमको प्रतीक्षा

"हामी सम्बन्धित निकायहरूसँग समन्वय गरिरहेका छौँ र मौसम अनुकूल भएमा हेलिकप्टरमार्फत् उद्धारकार्य सञ्चालन गर्ने प्रक्रिया मिलाइरहेका छौँ," 'अल्पाइन क्लब अफ पाकिस्तान'का उपाध्यक्ष करार हैद्रीले बीबीसीसँग भने।

पाकिस्तानी सेनाले खोजी तथा उद्धारकार्यलाई सहयोग पुर्‍याउन उद्धारकर्मीहरू र थप उपकरणहरूसहित दुइटा हेलिकप्टर पठाएको अल्पाइन क्लबले जनाएको छ।

उद्धारकार्यमा परिचालित हेलिकप्टरबाट केही पर्वतारोहीहरू देखिएको खबर आए पनि त्यसको पुष्टि हुन नसकेको नेपाल पर्वतारोहण सङ्घका महासचिव राजेन्द्रबहादुर लामाले शुक्रवार बिहान बीबीसी नेपालीलाई बताए।

उनका अनुसार उद्धारकार्यमा नेपाली पर्वतारोहण सङ्घले पाकिस्तानी अल्पाइन क्लबसँग समन्वय गरिरहेको छ।

"केटूमा रहेका हाम्रा केही शेर्पा साथीहरू उद्धारका लागि त्यसतर्फ जाँदै छन्," उनले भने।

काराकोरम पर्वतशृङ्खलामा रहेका केटू र ब्रोड पीक झन्डै आठ किलोमिटरको दूरीमा अवस्थित छन्।

टोलीमा को-को थिए

अल्पाइन क्लबले सम्पर्कविहीन भएका पुर्जा र अन्य नौ पर्वतारोहीको नाम सार्वजनिक गरेको छ।

यो समूहको नेतृत्व गरेका पुर्जा सन् २०१९ मा विश्वका ८,००० मिटरभन्दा अग्ला सबै १४ वटा हिमाल करिब ६.५ महिनामै आरोहण गरेर चर्चामा आएका थिए।

ब्रोड पीकबारे हामीलाई के थाहा छ

ब्रोड पीकलाई विश्वको बाह्रौँ अग्लो हिमाल हो। यसको चुचुरो समुद्र सतहबाट ८,०४७ मिटरको उचाइमा छ।

ब्रोड पीक पर्वतारोहणका लागि निकै चुनौतीपूर्ण हिमाल मानिन्छ।

यो हिमाल चढ्न प्रयोग गरिँदै आएको मोहोडा अस्वाभाविक रूपमा लामो भएकाले यसलाई 'ब्रोड पीक' भनिएको हो। यो झन्डै दुई किलोमिटर लामो छ।

निर्मल पुर्जाले सन् २०१९ मा ब्रोड पीकसहित "डेथ जोन" भएका १४ हिमालको आरोहण साढे छ महिनाभित्र गरेका थिए।

सन् २०२२ मा ब्रोड पीकको नाममा नेटफ्लिक्समा एउटा चलचित्र पनि बनेको थियो। त्यसको कथावस्तुमा एक पोलिश पर्वतारोहीले हिउँदमा पहिलो पटक यो हिमाल चढ्न गरेको प्रयास थियो।

सुरुमा ब्रोड पीक चढ्ने निर्मल पुर्जाको 'योजना थिएन'

ब्रोड पीकको पर्वतारोहण अभियान सुरु गर्नुअघि सोमवार सामाजिक सञ्जालको प्ल्याट्फर्म 'एक्स'मा निर्मल पुर्जाले एउटा पोस्ट गरेको देखिन्छ। त्यसमा उनले सुरुमा ब्रोड पीक आरोहण गर्ने आफ्नो योजना नरहेको उल्लेख गरेका छन्।

"सुरुमा जी-टू मात्र आरोहण गर्ने योजना थियो," उनले लेखेका छन्।

तर पाकिस्तानको भ्रमण थाल्नुअघि उनलाई फेरि ब्रोड पीक चढे आफू "बिनाअक्सिजन विश्वका १४ वटै ८,००० मिटरभन्दा अग्ला हिमाल दुई पटक आरोहण गर्ने पहिलो व्यक्ति" बन्न केबल चोयू हिमाल मात्र बाँकी रहन्छ भन्ने लाग्यो।

"यो पूर्वनिर्धारित योजना थिएन," पुर्जाले लेखेका छन्। "तर अवसरहरू चिच्याएर आउँदैनन्, तिनले सुस्तरी ती व्यक्तिहरूलाई सङ्केत गर्छन् जो पहिलेदेखि नै चुपचाप काम गरिरहेका हुन्छन्।"

"ब्रोड पीक, म सुरक्षित रूपमा माथि पुगेर फर्किन पाऊँ भन्नुबाहेक म अरू केही माग्दिनँ। म कुनै पनि हिमाललाई सामान्य रूपमा लिन्नँ," उनले लेखेका छन्।

पुर्जा सन् २००३ मा ब्रिटिश सेनामा प्रवेश गरेका थिए र सन् २००९ मा 'रोयल मरीन' बनेका थिए।

सन् २०१२ मा सगरमाथा आधारशिविरको पदयात्राबाट उनको पर्वतारोहण यात्रा सुरु भएको थियो।

त्यस क्रममा पूर्वनिर्धारित योजनानुसार "आधार शिविरबाट फर्कने सोच परिवर्तन गर्दै" उनले सगरमाथा आरोहण गर्ने निधो गरेका थिए।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।