Ko cin hantar dabba na taimaka wa warkar da ciwon hanta?

Mutane da dama sukan ji ana cewa: "Cin hanta na taimaka wa ƙaruwar jini", musamman ga mata masu juna biyu ko kuma mutanen da ke fama da raunin garkuwar jiki.

Wannan ne ya sa mutane da yawa ke son cin hantar akuya ko ta kaji.

Sai dai tambayar ita ce: shin hakan gaskiya ne? Shin cin hantar kaji ko ta akuya na iya taimakawa wajen rage matsalolin da ke da alaƙa da ƙarancin jini a jikin mutum?

A wannan fanni, Cibiyar Lafiya ta Ƙasa ta Amurka (NIH) ta ce hantar kaji da ta akuya, kamar yadda ake samu a hantar sa da alade, na ɗauke da sinadarai masu amfani ga jiki da suka haɗa da bitamin, baƙin ƙarfe (iron), sinadarin protein da sauran abubuwan gina jiki.

Sai dai a gefe guda, yawan bitamin A a jiki ba abu ne mai kyau ga mata masu juna biyu ba.

Hukumar Kula da Lafiya ta Birtaniya (NHS) ta ce mata masu juna biyu su guji cin hanta da yawa, saboda yawan bitamin A da ke cikinta na iya yin illa ga jaririn da ke cikin mahaifa.

"Nama ko hantar kaji da ta akuya waɗanda ake samu cikin sauƙi na ɗauke da sinadarai masu amfani ga jiki. Alal misali, suna ƙunshe da sinadarin iron na nau'in heme, wanda jiki ke sha cikin sauƙi. Wannan na taimakawa wajen inganta samar da jini da kuma kare mutum daga matsalar ƙarancin jini," in ji Dakta Prashant Arun, ƙwararren likita kan cutar sukari.

Ya kuma ce bitamin B12 na da matuƙar muhimmanci wajen samar da jajayen ƙwayoyin jini, da tallafa wa lafiyar tsarin jijiyoyin jiki, da bunƙasa aikin ƙwaƙwalwa da kuma ƙarfafa tunani.

A cewar Prashant Arun, hantar dabbobi na ɗauke da sinadarin protein mai inganci, wanda ke taka muhimmiyar rawa wajen gyaran tsokoki da suka samu rauni, tare da taimakawa jiki ya farfaɗo bayan kamuwa da rashin lafiya.

Yana da kyau a bai wa yara hanta?

Kwararriya a fannin abinci mai gina jiki, Dharini Krishnan, ta ce: "Wake na ɗauke da iron mai yawa, wanda ke taimakawa wajen samar da jini. Saboda haka, ana iya bai wa yara masu shekaru tsakanin biyar zuwa goma kimanin gram 50 na wake da aka dafa sau ɗaya a mako."

Ta kuma ce yara masu shekaru tsakanin shekara 10 zuwa 15 za su iya cin gram 50 zuwa 100 na wake sau ɗaya a mako.

A cewarta, bitamin B12 da ke cikin wasu nau'ikan abinci na da muhimmanci wajen bunƙasa girman yara, amma ya kamata a ba su cikin daidaito ba tare da wuce gona da iri ba.

Dharini Krishnan ta kuma ce: "Ba shi da kyau a soya wake da mai idan za a ba yara, domin zafin soyawa na iya rage wasu sinadarai masu amfani da ke cikinsa. Saboda haka, ya fi dacewa a dafa shi a matsayin miya ko taushe sannan a ba yara."

Ta ƙara da cewa ga manya, cin gram 100 zuwa 200 na wake sau ɗaya a mako ya isa.

A cewar Hukumar Lafiya ta Birtaniya (NHS), hanta na ɗauke da yawan bitamin A, don haka mata masu juna biyu ya kamata su guje wa cin ta da yawa, saboda yawan bitamin A na iya yin illa ga jaririn da ke cikin mahaifa.

Adadin bitamin A da ake ba da shawarar mutum ya samu a kullum shi ne microgram 700 ga maza da microgram 600 ga mata.

Wasu bincike sun nuna cewa shan kimanin microgram 1,500 na bitamin A a kullum na tsawon shekaru na iya yin tasiri ga ƙasusuwa, tare da ƙara yiwuwar karayar ƙashi yayin da mutum ke tsufa.

Wannan na da muhimmanci musamman ga tsofaffi, musamman mata waɗanda ke cikin haɗarin kamuwa da cutar raunin ƙashi (osteoporosis).

A cewar Dakta Prashant Arun, "Ya fi dacewa mutanen da ke fama da yawan sinadarin cholesterol a jini su guji cin hanta. Haka kuma, bai dace a ba yara masu ƙasa da shekara biyu ba. Mutanen da ke da matsalar rashin jituwa da wasu nau'ikan abinci (allergy) su ma ya kamata su kauce mata."

Cin hantar dabbobi na magancewa mutane ciwon hanta

To amma duk da cewa hanta na ɗauke da sinadarai masu amfani ga jiki da dama, har yanzu tambaya na nan: ko cin hantar dabba na iya warkar da hantar ɗan Adam?

Dangane da wannan batu, Dakta Prashant Arun ya ce: "Cin hantar dabba ba ya gyara ko warkar da lalurar da ta samu hantar mutum. Abubuwan da ake yadawa game da hakan ba su da hujjar kimiyya."

Ya kuma ƙara da cewa: "Ba za a iya kallon hakan a matsayin wata hanya ta 'tsarkake jiki' ba, domin hanta ita ce sashen jiki da ke tace gubobi da tsarkake jiki, sannan tana da damar gyara kanta idan ta samu matsala. Ba ta buƙatar wata hanta daban domin taimaka mata yin wannan aiki."

A cewarsa, "Abinci mai gina jiki da aka daidaita, motsa jiki akai-akai da kuma samun isasshen barci su ne manyan abubuwan da ke taimakawa wajen kare lafiyar hanta."

Saboda haka, wani muhimmin bambanci tsakanin hantar dabba da ta ɗan Adam shi ne cewa idan aka riƙa cin hanta da yawa, yawan bitamin A da ke cikinta na iya ƙara wa hantar mutum nauyi tare da shafar lafiyarta.