Abantu batatu bishwe n'igisasu cyaturikiye kuri resitora i Moscow – ibivugwa n'ibitangazamakuru bya leta

Abantu nibura batatu bishwe naho abandi 21 barakomereka nyuma yuko igiturika cyakorewe mu rugo giturikirijwe kuri resitora y'Abataliyani yo mu murwa mukuru Moscow, nkuko byatangajwe n'ibitangazamakuru bya leta y'Uburusiya, mu gusubiramo amakuru byahawe n'abategetsi bashinzwe umutekano.

Iryo turika ryabaye ku wa gatandatu ahagana saa mbili z'ijoro (20:00) ku isaha yaho, ni ukuvuga saa moya z'ijoro (19:00) ku isaha yo mu Rwanda no mu Burundi, mu gace ka Kudrinskaya, kari hafi yo rwagati muri uwo mujyi.

Komite y'igihugu yo kurwanya iterabwoba yavuze ko umugore wari ufite ibiturika yagerageje kwinjira muri iyo resitora (restaurant) ariko agahagarikwa n'ushinzwe uburinzi kuri iyo resitora.

Icyo gikoresho cyaturitse, cyica uwo mugore, uwo ushinzwe uburinzi hamwe n'umuntu wari waje kuri iyo resitora yitwa Balzi Rossi, yari irimo kuberamo igikorwa cy'abantu ku giti cyabo.

Abategetsi ntibavuze uwo bemeza ko yaragambiriwe ariko abatuye i Moscow benshi baracyeka ko hari isano ibyabaye bifitanye n'intambara yo muri Ukraine.

Mu myaka ya vuba aha ishize, abasirikare benshi b'Uburusiya bo ku rwego rwo hejuru biciwe mu murwa mukuru w'Uburusiya no mu nkengero zawo. Uburusiya bwegetse ibyo bitero kuri Ukraine.

Amakuru y'ibanze yavuze ko iryo turika ryabereye mu gikoni cy'iyo resitora ariko nyuma ubuyobozi bwayo bwasohoye itangazo buvuga ko "habaye ikibazo hanze".

Iyo resitora iri muri imwe mu nyubako z'amagorofa maremare cyane zizwi cyane z'i Moscow zo ku gihe cy'ubutegetsi bwa Stalin. Iryo turika ryatumye imihanda ikikije ako gace ifungwa by'igihe gito.

Abanyonzi b'amagare babarirwa muri za mirongo bari bateraniye hafi aho bitegura kuyanyonga kuri uwo mugoroba bakanyura mu mujyi ariko icyo gikorwa cyaburijwemo.

Videwo yatangajwe n'ibiro ntaramakuru RIA bya leta y'Uburusiya yagaragaje abashinzwe umutekano bafite intwaro nyinshi bari aho byabereye, hari hafunzwe ndetse abaturage bakabuzwa kuhagera.