Ukraine: Abategetsi bavuga ko ibitero by'Uburusiya kuri Kyiv byishe abantu nibura icyenda

Abategetsi bo muri Ukraine bavuze ko abantu nibura icyenda biciwe mu bitero bya misile zo mu bwoko bwa 'ballistic' Uburusiya bwagabye ku murwa mukuru Kyiv.

Abandi bantu 28 bakomerekeye muri icyo gitero ku murwa mukuru wa Ukraine cyo mu gitondo cyo ku wa gatandatu, nkuko byatangajwe n'ikigo cy'igihugu gishinzwe ubutabazi bwihuse.

Mu bihe bya vuba aha bishize, Uburusiya bwakajije umurego mu bitero bya misile zo mu bwoko bwa 'ballistic' bugaba kuri Kyiv, bituma Perezida wa Ukraine Volodymyr Zelensky avuga ko intwaro zo gusama misile zicyenewe byihutirwa.

Ibyo bitero bibaye nyuma y'iminsi ibiri igicyekwa ko ari igisasu cya misile cyo mu bwoko bwa 'cruise' cy'Uburusiya kiguye muri Pologne (Poland), ubwo Uburusiya bwagabaga igitero henshi muri Ukraine cyishe abantu nibura umunani, barimo batandatu bo mu muryango umwe.

Iki gitero kibaye nyuma yuko Zelensky ahuye na Perezida w'Amerika Donald Trump i Washington DC muri iki cyumweru, aho yari yagiye kumushishikariza guha Ukraine uruhushya rwo gukora misile za Patriot z'Amerika zo gusama ibisasu.

Ku wa gatanu, ubwo yari abajijwe kuri izo misile ari mu nama n'abaminisitiri yabereye ahantu ho kuruhukira hitwa Camp David, muri leta ya Maryland muri Amerika, Trump yavuze ko Amerika itemeye ko Ukraine yubaka (ikora) izo misile za Patriot ariko ko ibiganiro bigikomeje.

Yavuze ko Amerika igomba "kwitonda cyane ku kureka umuntu ngo azikore".

Mu gushimangira impungenge zo gutanga izo ntwaro zikataje z'Amerika, Trump yavuze ko ari "intambwe ikomeye".

Aya magambo mashya ya Trump ajyanye na misile za Patriot ayavuze nyuma y'ibyumweru avuze ko yiteguye guha Ukraine uburenganzira bwo kuzikora.

Mu gihe Uburusiya bwakajije ibitero byo mu kirere, Ukraine irimo gushiranwa na misile za Patriot, izi zikaba ari yo ntwaro yonyine mu zo Ukraine itunze ifite ubushobozi bwo guhanura misile za 'ballistic'.

Trump yagize ati: "Sintekereza ko ibi byazigera bibaho na rimwe, ariko, urabizi, bariya bantu uhaye ririya koranabuhanga, umunsi umwe bashobora kuguhindukirana."

Mu butumwa yatangaje ku rubuga nkoranyambaga rwa X ku wa gatanu, Zelensky yavuze ko yakomereje kuri iyo nama yagiranye na Trump, akagirana ikiganiro "cyiza" cyo kuri telefone na Visi Perezida w'Amerika JD Vance.

Zelensky yanditse ati: "Mu gihe ibitero byo mu kirere by'Uburusiya ku gihugu cyacu bikomeje ubudacogora, ubwirinzi bw'ikirere – by'umwihariko Patriots zo gusama misile za 'ballistic' – bukomeje kuba ikintu cyihutirwa."

Ku ruhande rwayo, muri aya mezi ya vuba Ukraine na yo yakajije umurego mu bitero byayo byo kwihorera.