Nigerian pastor chop life imprisonment for sexual assault of three minors, forced abortions

Di Kwara State High Court for Ilorin don convict and sentence Prophet Ajiboye Olayinka to life Imprisonment sake of say im bin get unlawful sexual intercourse wit three minor congregants inside di mission house of one church for Ilorin, Kwara State, wia di defendant be General Overseer.

Prophet Olayinka also chop sentence of 14 years imprisonment for illegal abortions of several pregnancies of im victims, Channels report.

Di defendant bin face eight-count charge bordering on criminal conspiracy, unlawful sexual intercourse wit minors, illegal abortion, and unlawful possession of firearms, contrary to Sections 97, 235, and 283 of di Penal Code, Section 3(1) of di Robbery and Firearms (Special Provisions) Act, 2004, and Section 31(2) of di Kwara State Child Rights Law, 2006.

During di hearing, di prosecution call 12 witnesses and tender exhibits.

Di court bin take evidence of di victims, most especially PW3, PW4, and PW5 wia dem accuse am say e put anointing oil for dia private parts bifor im rape dem for di mission house.

Dem bin also say e give dem Bible make dem swear say dem no go tell anybodi about di rape or else im go kill dem.

For 11 February 2026, di prosecution team bin cross-examine di so called pastor and im witnesses dem bifor di case bin dey adjourned for judgement.

For im verdict, di trial Judge, Honourable Justice H.A. Gegele bin hold say di prosecution don successfully prove di offence of unlawful sexual intercourse wit minors, rape, and illegal abortions ontop di convict head. However, e say dem no establish di offence of bigamy.

Bicos of dat di court bin discharge Prophet Olayinka from di charge of bigamy.

Di court call am "paedophile and philanderer wey di way im dey act suppose dey condemned by all and sundry for society".

Justice Gegele further add say di pump action gun wey dem bin collect from di so called prophet go dey forfeited to di federal govment.

Judgements of sexual abuses cases for Nigeria

For July 2025, anoda pastor, Ndukwe Ogbu chop 53 year prison sentence say im rape im 14-year-old daughter.

Di court bin find di 45 year old so called pastor guilty of three count charges wey include sexual assault, sexual assault by penetration and defilement.

Di judge say di convict no dey remorseful say e rape im own daughter and no even apologise but e dey ask court to temper justice wit mercy, say e get oda children to take care of for house.

For April 2025, Justice Rahman Oshodi jail two men ten years in prison say dem sexually abuse one 16-year-old boy for Lagos.

Similar case happun for December 2024 wen Justice Abiola Soladoye sentence one Mr Kayode Abegunde to life imprisonment say e sleep wit im daughter wey be minor multiple times.