IKIBIRIRAHO, Ukraine: Igitero rutura ca misire za ‘ballistique’ c’Uburusiya kuri Kyiv cahitanye abantu 14, abandi 22 barakomereka

Amakuru y'ikibiriraho

Bernard Bankukira

1. Iminota 49 irahezeInfantino yatumyeko inama y’urwego nshingwabikorwa rwa FIFA mu gihe hari abamusaba gutanga imihoho

   Umukuru w’ishirahamwe mpuzamakungu rijejwe umupira w’amaguru kw’isi, FIFA, Gianni Infantino, yatumyeko inama y’abagize urwego nshingwabikorwa rw’iri shirahamwe, yiteze kubera muri Maroc ku mugoroba wo kuri uno wa gatatu.

   Hari haciye uwundi musi umwe Infantino aneguwe bikomeye cane hamwe n’umugambi wiwe wamaze gufutwa, wo kugurisha imitahe mu Gikombe c’Isi ku banyamitahe.

   Mu bamuneguye bikomeye harimwo Arsène Wenger, umukuru w’igisata ca FIFA kijejwe iterambere ry’umupira w’amaguru kw’isi yose.

   Wenger, yigeze kuba umumenyereza w’umurwi wa Arsenal wo mu gisagara ca Londres mu Bwongereza, yaravuzwe mw’ibaruwa Ishirahamwe ry’Umupira w’Amaguru i Bulaya (UEFA) ryarungikiye FIFA, rigabisha ko rishobora kwitwarira FIFA mu butungane.

   Wenger yatangaje ku mugaragaro ko atigeze agira uruhara na rumwe muri uwo mugambi wiyamirijwe bikomeye, kandi ko ingingo yo kuwufuta yari nkenerwa cane.

   Uwo mugambi wahagaritswe utarashirwa mu ngiro watumye haba abasaba ko Gianni Infantino, atanga imihoho mu mabanga yiwe.

   Umunyamabanga Mukuru wa FIFA, Mattias Grafström, na we nyene ari mu bantu batangaje ku mugaragaro ko batemera uwo mugambi.

   Ibi vyatumye bamwe batangura gusaba ko Infantino yotanga imihoho mu mabanga yiwe.

   Infantino ari mu gitsure gikomeye kubera uno mugambi wiwe vyabaye ngombwa ko ahagarika wo kugurisha imitahe mu Gikombe c’Isi no mu yandi mahiganwa y’umupira w’amaguru.

   Ikinyamakuru The New York Post kivuga ko yasavye Perezida Donald Trump wa Amerika ko yomushigikira, ariko Ubushikiranganji bwa Amerika bujejwe imigenderanire n’amakungu bwarahakanye amakuru yavuga ko Infantino yari yategekanije inama na Marco Rubio.

   Ayandi makuru ushobora gusoma:

   FIFA yaretse gahunda yari yateje impaka y'ishoramari mu gikombe cy'isi

   Igikombe c'isi ca 2030 kizokinirwa ku migabane itatu no mu bihugu bitandatu

2. Haciye isaha 1Igipande c’ikigendajuru ca SpaceX kiri ku muvuduko udasanzwe citezwe gusekana n’Ukwezi

   Igipande c’ikigendajuru c’ikompanyi SpaceX cataye inzira yaco kikaba kimaze igihe kizunguruka mu kirere ku muvuduko w’ibirometero vyababa 2,43 ku musegonda (hafi ibirometero 8.700 kw’isaha) citezwe kugongana n’Ukwezi.

   Ni igice co hejuru c’ikigendajuru co mu bwoko bwa Falcon 9, kingana n’inzu y’amagorofa atanu, gipima nibura 4.000kg.

   Nk’uko ikigo c’Abanyamerika kijejwe ivy’ikirere n’ubushakashatsi bwo mu kirere (NASA) kibivuga, ibi biza kuba hafi isaha zibiri n’iminota 35 (8h35) mu masaha ya Gitega na Kigali.

   Abahinga bavuga ko ibi bitaza kuboneka n’amaso asanzwe ku bari kw’Isi, ariko ko abafise ubuhinga budasanzwe bw’indeberakure (télescope) bashobora kubona imishwarara iva ku Kwezi.

   Kandi nta ngorane canke akaga vyitezwe, haba no kw’Isi, abahinga babona ko ari akaryo kadasanzwe ko kwiga no gutahura neza ibiba igihe ikintu kinini kigonze Ukwezi.

3. Haciye amasaha 2Umugabo afise inkoho yafatiwe hafi y’ikibuga ca golf ca Trump imbere y’urugendo rw'uno muperezida

   Abategetsi bo mu ntara ya California bafashe umugabo yabonetse hafi y’ikibuga ca golf ca Perezida Donald Trump wa Reta Zunze Ubumwe za Amerika mu karere ka Los Angeles, imbere y’urugendo rw’uno mukuru w’igihugu aho yategerezwa kwitaba ikoraniro ryo kwegeranya uburyo.

   Abajejwe amatohoza bavuga ko Jeanine John Taele w’imyaka 38 yasanganwe inkoho ntoya (pistolet) n’amasasu atemewe n’amategeko ku Kibuga ca Golf ca Trump kiri ahitwa Rancho Palos Verdes.

   Nk’uko igipolisi ca Los Angeles cabitangaje, uwo mugabo “yabonywe azunguruka muri ico kibuga ca golf afata amafoto n’amavidewo kandi asa n’uwariko arakurikirana ingene integuro z’umutekano zariko ziragenda”.

   Yafashwe ku mugoroba wo ku wa Mungu. Trump yari mu rugendo muri California aho yategerezwa kwitaba ibirori vyo kwegeranya intererano y’umugambwe w’Abarepubulikani vyabaye ejo ku wa kabiri.

   Taele arapfunzwe yagirizwa ivyaha vyo kwitwaza ikirwanisho gicira umuriro yanyegeje no gutunga amasasu abujijwe n’amategeko.

   Nk’uko Maison Blanche/White House (ibiro vy’umukuru w’igihugu) yabivuze, Trump yari yitezwe gushikiriza ijambo rinenga buramatari wa California Gavin Newsom, uwo benshi babona ko ashobora kwiyamamariza ikibanza c’umukuru w’igihugu mu matora yo mu 2028, inyuma y’ikiringo kigira kabiri ca Trump kizoba kirangiye.

   Ku wa gatatu, Trump yari ategekanijwe kuja i Las Vegas gushikiriza ijambo muri kimwe mu bibanza bikinirwamwo urusimbi (casino).

   Izo ngendo ziriko ziba mu gihe ibikorwa vya poritike vyashushe imbere y’amatora yo hagati ya manda ategekanijwe muri Munyonyo (11).

   Uno mugabo yahagaritswe inyuma y’uko abajejwe umutekano bari bambaye impuzu zisanzwe bamenyesheje abategetsi b’aho hantu ko hari umuntu ateye amakenga.

   Igihe abapolisi bamuhagarika, basanze yari ariko araronderwa n’igipolisi co mu gisagara ca El Segundo kiri ku birometero 25 mu buraruko bwa Rancho Palos Verdes, ku bijanye n’icaha c’ubusuma.

   Muri iyi myaka ya vuba, Trump amaze guhakwa kwicwa incuro zitatu.

   Abategetsi ntibaravuga nimba uno mugabo yafatiwe i Rancho Palos Verdes yari afise umugambi wo kugirira nabi Trump, kandi nta vyaha nk’ibi yari bwagirizwe.

   Ayandi makuru ushobora gusoma:

   'The Beast': Menya impamvu bikomeye kwangiza imodoka ya Perezida wa Amerika n'igitero cy'ibisasu

   Igiceri kidasanzwe cya zahabu kiriho Trump cyemejwe n'akanama ka leta

4. Haciye amasaha 3Ukraine: Igitero rutura ca misire za ‘ballistique’ c’Uburusiya kuri Kyiv cahitanye abantu 14, abandi 22 barakomereka

   Uburusiya bwagavye igitero kuri Ukraine bukoresheje ibisasu vya misire za ballisque n’indege zitajamwo abadereva (drone), gihitana abantu 14, abandi 22 barakomereka, muri kimwe mu bitero rutikizabantu kuri Kyiv uno mwaka.

   Muri iki gitero cabaye inyuma y’isaha zitandatu muri iri joro ryakeye, umukuru w’ubutegetsi bwa gisirikare bwa Kyiv, Timur Tkachenko, yavuze ko “umwansi yasubiye kugaba igitero gikomeye cane ku ntara ya Kyiv”.

   Inzamba zo kugabisha zamaze ikiringo kirenga isaha igihe ibisasu vya misire za “ballistique” vyariko birakoragurikira kuri iki gisagara n’imicungararo yaco. Ubutegetsi bwa gisirikare bwa Kyiv buvuga ko ibi bitero vyononye inyubakwa z’uburaro hamwe n’iz’ububiko.

   Tkachenko yavuze ko abantu icenda bishwe mu karere ka Boryspil, bane bicirwa mu karere ka Bucha, mu gihe umuntu umwe yiciwe mu karere ka Fastiv.

   Gushika ubu, ntaco Uburusiya buravuga kuri iki gitero.

   Umukuru w’igisagara ca Kyiv, Vitali Klitschko, yavuze ko hari ubwoba ko hari abantu bamwe bashobora kuba bakizibiriwe munsi y’ibihomoka mu bitero vyagabwe hagati mu gisagara.

   Yanditse ku rubuga rwa Telegram ko abantu bane mu bakomeretse bababaye cane.

   “Umwansi yasubiriye gutera n’ibigirankana abasivire n’ibikorwa remezo vya gisivire”, ni ko ubuyobozi bwa gisirikare bwa Kyiv bwavuze.

   Kuva muri izi ndwi za vuba, Uburusiya bwarongereje akariro mu bitero vyabwo kuri Kyiv.

   Ukraine isaba ibihugu biyishigikiye ko vyoyironsa izindi misile zo mu bwoko bwa Patriot zihingurwa na Amerika kugira ishobore kwivuna ibisasu vya misire za balistique z’Uburusiya.

   Ibi bitero kuri Kyiv bije mu gihe Ukraine nayo yongereje akariro mu bitero vyayo ku bikorwa remezo vya gisivire mu Burusiya, harimwo n’ibigo ntanganguvu.

   Bimwe mu bibangamiwe n’ibi bitero vya Ukraine ni inyubakwa z’ububiko bw’ikompanyi y’Uburusiya Wildberries idandariza ku mbuga ngurukanabumenyi. Ku wa kabiri mu gitondo, abantu batanu barishwe abandi 10 barakomereka mu ntara ya Moscou, mu bitero vya vuba vyabagwe kuri ubu bubiko bwa Wildberries.

   Umusi umwe imbere y’aho, abategetsi b’Uburusiya bavuze ko abantu indwi bishwe, abandi 58 barakomereka mu gitero c’ama-drone ku mweha usanzwe wakira ingenzi nyinshi mu ntara ya Krasnodar mu bumanuko bw’Uburusiya.

   Hagati aho, Ukraine yarakajwe na videwo yerekana drone y’Uburusiya iriko yiruka ku mugabo asanzwe yidandariza imboga mu ntara ya Kherson, ivuga ko ari akamaramaza kubona ingene amadrone y’Uburusiya yiruka ku nzirakarengane z’abasivire.

   Uno mugabo yarokotse ico gitero cari kigabwe kuri we ariko akaba yakomerekejwe n’ibirombora vy’ikibombe carekuwe n’iyo drone yariko iramuhiga.

   Impande zompi zirahakana ko ata basivire zitera n’ibigirankana.

   Ayandi makuru ushobora gusoma:Intambara 'ku bisagara no ku mato y'igitoro' hagati y'Uburusiya na Ukraine izoherera he?

   Akaga ka misire za 'ballistique': Uburusiya bushobora kumara igihe kingana gute kibirasa kuri Kyiv?

   Ukraine: Intambara 'yatumye ntwitira abandi' ngo mbone amafaranga ariko itegeko rishya 'rishobora kumpagarika'

   Mushobora gukurikira ayandi makuru yacu kuri: YouTube kuri BBC News Gahuza

5. Haciye amasaha 3Mwaramutse neza!

   Ikaze kuri BBC Gahuzamiryango, aho tubashikiriza amakuru yo mu karere no mu makungu mu buryo bw'aka kanya.