'Ntawuzongera kubaza aho Cap-Vert iri ku ikarita' – ikipe itarahabwaga amahirwe itazigera yibagirana mu gikombe cy'isi

Cap-Vert (Cape Verde) ishobora kuba yari igihugu gito cyane kiri mu gikombe cy'isi ariko rwose yarigaragaje cyane.

Ntumbwire Lionel Messi, Cristiano Ronaldo, Erling Haaland na Harry Kane – iki gihugu cyitabiriye iri rushanwa ku nshuro ya mbere ni cyo kiri kuvugwaho cyane.

Umunyezamu wa Cap-Vert Vozinha yakoze ibikorwa by'indashyikirwa byo gukuramo imipira yari yabazwemo ibitego, ubwo iyi kipe yabonaga inota ryayo rya mbere mu gikombe cy'isi nyuma yo kugwa miswi na Espagne 0-0.

Habaye ibyishimo byinshi ubwo iyi kipe yatsindaga ibitego byayo bya mbere mu gikombe cy'isi, ubwo yanganyaga na Uruguay ibitego 2-2.

Hari n'igitego cy'agatangaza cya Sidny Lopes Cabral, ubwo haburaga gato ngo iyi kipe iteze gutungurana kwa mbere gukomeye cyane muri iri rushanwa mu mukino na Argentine. Urugendo rwa Cap-Vert muri iri rushanwa rwari rufite byose.

Ubwo umusifuzi yahuhaga mu ifirimbi asoza igihe cy'inyongera cy'uwo mukino wabereye i Miami muri Amerika, abakinnyi ba the Blue Sharks (bivuze amafi manini y'ubururu) ya Cap-Vert barambaraye mu kibuga, bashenguwe no gutsindwa ibitego 3-2 na Argentine yegukanye igikombe cy'isi cy'ubushize, ariko bashobora kuva muri Amerika bizeye ko bigaruriye imitima ya benshi.

James McFadden, wahoze ari umukinnyi w'ikipe y'igihugu ya Scotland (Écosse), yavugiye kuri BBC Radio 5 Live ati: "Cape Verde yatsinzwe, ariko yatsinze."

"Bagaragaje ubutwari, gushyira hamwe, ubumwe n'imyizerere ihamye mu bo bari bo ndetse n'icyo bashobora gukora.

"Inkuru y'iri rushanwa ni Cape Verde. Kiriya ni cyo [kintu] uba ushaka kubona mu ikipe y'umupira w'amaguru."

Cap-Vert, ituwe n'abaturage barenga gato 500,000, ni igihugu kigizwe n'ibirwa kiri mu burengerazuba bw'Afurika mu nyanja y'Atlantika.

Cap-Vert yaje muri iri rushanwa iri ku mwanya wa 67 ku isi ku rutonde rwa FIFA ariko kunganya imikino itatu yo mu cyiciro cyo mu matsinda – kugwa miswi mu mukino wayo ubanza na Espagne yatsindiye igikombe cy'Uburayi – byatumye yitegurira igikorwa gikomeye cyane cyo kugerageza gutungurana kwa mbere gukomeye cyane kwari kuba kubayeho mu mateka y'igikombe cy'isi.

'Ntawuzongera kubaza aho Cap-Vert iri ku ikarita'

Nubwo yatsinzwe uwo mukino, umutoza Bubista wa Cap-Vert atewe ishema n'uko ikipe ye yitwaye, nyuma yuko haburaga iminota 10 ngo ihatire Argentine kujya mu cyiciro cyo gutera penaliti.

Yagize ati: "Twerekanye ko dushobora kuba turi igihugu gito ariko ko dushobora gukina n'amakipe akomeye cyane ku isi."

"Icyo ni ikintu giteye ishema.

"Twandikiye amateka igihugu cyacu. Bashobora guterwa ishema no kuba bahagarariye igihugu cyacu.

"Gushobora gukina nkuko twakinnye n'ikipe ifite igikombe cy'isi, no kwishyura inshuro ebyiri, ni ikintu kirenze ukwemera."

Myugariro wo hagati Roberto 'Pico' Lopes, usanzwe akinira ikipe ya Shamrock Rovers yo muri Ireland, wakinnye imikino yose ine ya Cap-Vert muri iki gikombe cy'isi, yabwiye BBC Sport ati:

"Kimwe mu bintu byiza cyane kivuye muri iki gikombe cy'isi ni uko nta muntu n'umwe uzongera kubaza aho Cape Verde [Cap-Vert] iri ku ikarita – ibi ubwabyo ni amateka kuri twe. Twishyize ku ikarita.

"Turi igihugu gito ariko cy'imitima minini [ikomeye] ndetse twerekanye igishoboka – kandi niba wizera, ushobora kubigeraho."

'Vozinha yabaga hehe?'

Ifoto ya Vozinha arimo kurira kubera ibyishimo ndetse akazamura hejuru y'umutwe we ibendera rya Cap-Vert atewe ishema no gutuma ikipe ye igwa miswi na Espagne mu mukino ubanza wo mu itsinda, yarahererekanyijwe cyane ku isi – ahita aba icyatwa.

Ariko uko kwamamara kwe ntikwatewe gusa n'iyo foto hamwe n'imbamutima yagaragaje. Uburyo yitwaye mu mikino byaramuzamuye bimugeza ku rwego rw'icyamamare gikomeye.

Uyu mukinnyi w'imyaka 40 nta kipe (club) afite akinira, nyuma yuko kontaro ye irangiye mu ikipe ya Chaves ikina muri shampiyona y'icyiciro cya kabiri muri Portugal.

Ariko Gary Neville, wahoze ari myugariro w'ikipe y'igihugu y'Ubwongereza, atekereza ko nta gihe kizashira uyu munyezamu atabonye ikipe.

Neville yavugiye kuri televiziyo ITV ati: "Vozinha agiye kubona ikipe nziza nyuma y'ibi.

"Mbega igikombe cy'isi. Ikintu cyose akora agikora atuje kandi yatekereje. [Ubundi] Yabaga hehe? Twagakwiye kuba twaramubonye mbere."

Ian Wright, wahoze ari rutahizamu w'ikipe y'igihugu y'Ubwongereza, yongeyeho ko Vozinha yifitemo "imbaraga za gitwari", nyuma y'ukuntu yitwaye mu mukino wa Cap-Vert na Argentine.

Ku mipira umunani yakuyemo i Miami, Vozinha arangije iki gikombe cy'isi cy'uyu mwaka akuyemo imipira 18 yose hamwe, ya gatatu myinshi nyuma y'umunyezamu Eloy Room wa Curaçao (wakuyemo imipira 20) n'umunyezamu Orlando Gill wa Paraguay (wakuyemo imipira 19).