M23 yahakanye kuva mu birindiro ivuga ko irimo 'guhinduranya ingabo' ku rugamba

Umutwe w'inyeshyamba wa AFC/M23 urwanya ubutegetsi bwa Repubulika ya Demokarasi ya Congo (DRC) uvuga ko ibikorwa birimo kugaragara ku mirongo inyuranye yo ku rugamba ari ibisanzwe byo "guhinduranya imitwe y'ingabo", nyuma y'iminsi amakuru yumvikanishije ko urimo kuva muri bimwe mu birindiro byawo.

Ubutumwa umuvugizi wa M23 Lawrence Kanyuka yatangaje ku rubuga nkoranyambaga X mu ijoro ryo ku wa gatandatu bugira buti: "... Ibikorwa birimo kugaragara muri iki gihe ku mirongo inyuranye yo ku rugamba bijyanye gusa n'ihinduranya risanzwe kandi ry'amayeri y'urugamba ry'imitwe y'ingabo" ya M23.

Kanyuka yongeyeho ko M23 igishishikajwe buri gihe no kubahiriza neza "ingamba z'icyizere zo muri gahunda y'amahoro ya Doha" kandi ko yiyemeje "kurinda abaturage b'abasivile, ndetse yiteguye kurandura inkeke iyo ari yo yose kuva aho ituruka".

Nta cyo leta ya DRC yatangaje kuri ibi bishya byatangajwe na M23. Umuvugizi w'ingabo za DRC yabwiye BBC News Gahuzamiryango mu butumwa bwanditse bwo kuri telefone ko nta cyo bari bagira cyo kubivugaho.

M23 itangaje ibi nyuma yuko muri iki cyumweru amakuru amwe yo mu bitangazamakuru byo muri DRC yumvikanishije ko uyu mutwe wari urimo gusubira inyuma uva mu birindiro bimwe byawo byo mu ntara ya Kivu ya Ruguru cyangwa kwimurira ahandi abarwanyi bawo.

Ku wa gatatu, Radio Okapi ikorera muri DRC iterwa inkunga n'Umuryango w'Abibumbye (ONU) yasubiyemo amagambo y'abategetsi n'abaturage ivuga ko bayibwiye ko mu ijoro ryo ku wa mbere rishyira ku wa kabiri, hagaragaye kwimuka kw'abarwanyi ba M23 bava mu bice bimwe byo muri teritwari ya Lubero, mu birindiro bimwe bari bamazemo umwaka urenga.

Ku wa kane, mu nama yayoboye y'akanama k'umutekano wa ONU, Massad Boulos, intumwa nkuru kuri Afurika ya Perezida w'Amerika Donald Trump yongeye gushimangira ubusabe bw'Amerika bwuko u Rwanda rukuraho "ingamba z'ubwirinzi", gukura ingabo zarwo aka kanya ku butaka bwa DRC no kubahiriza ubusugire bwa DRC.

Boulos yanashimangiye ko bicyenewe ko leta ya DRC irandura umutwe wa FDLR "mu bice igenzura", avuga ko izo ntambwe ari ingenzi cyane mu gucyemura "impungenge z'umutekano zenyegeje kutizerana n'umutekano mucye mu karere".

Raporo z'inzobere za ONU, DRC n'ibihugu byinshi byo mu burengerazuba bw'isi bashinja u Rwanda gufasha umutwe w'inyeshyamba wa M23 urwanya ubutegetsi bwa DRC, mu kuwuha imyitozo, abasirikare, ibikoresho n'amategeko.

Leta y'u Rwanda ihakana gufasha M23, ikavuga ko yashyizeho "ingamba z'ubwirinzi", mu gihe ishinja leta ya DRC gukorana no gushyigikira umutwe w'inyeshyamba wa FDLR urwanya leta y'u Rwanda ukorera ku butaka DRC, ibyo DRC na yo ihakana.

Umutwe wa M23 ugenzura ibice byinshi byo mu ntara ya Kivu ya Ruguru no mu ntara ya Kivu y'Epfo, birimo n'imijyi ya Goma na Bukavu.

Boulos yanibukije amasezerano y'amahoro ya Washington yashyizweho umukono mu Kuboza (12) kw'umwaka ushize hagati ya Perezida wa DRC Félix Tshisekedi na Perezida w'u Rwanda Paul Kagame, yahagarariwe na Perezida Trump, avuga ko ari "intambwe y'ingenzi cyane yatewe" igaragaza kwiyemeza kurenga ubushyamirane kw'impande zombi.

Mu butumwa yatangaje ku rubuga X, Boulos yavuze ko yashimangiye uko bimeze ku bantu "babarirwa muri za miliyoni bamaze igihe kirekire cyane barimwe amahoro, umutekano n'amahirwe y'ubukungu".

Intambara mu burasirazuba bwa DRC yongeye kwaduka kuva mu mpera y'umwaka wa 2021 nubwo imaze imyaka hafi 30 ihagarara ikongera ikubura.