တိုက်ရိုက်ထုတ်လွှင့်မှု, ကန့်ကွက်မှုတွေနဲ့ ဦးမင်းအောင်လှိုင်ရဲ့ ထိုင်းခရီးစဉ် စတင်

တိုက်ရိုက် ထုတ်လွှင့်ချက်

1. လွန်ခဲ့သော ၄၇ မိနစ် ကငဝန်မြစ်ရေကာတာ ကျိုးပေါက်မှု မပြင်နိုင်သေးရင် လေးမျက်နှာရေဘေး ပိုဆိုးလာနိုင်

   ငဝန်မြစ်ရေကာတာရဲ့ အတွင်းတာဘောင်ကျိုးပေါက်လို့ ဧရာဝတီတိုင်းထဲက လေးမျက်နှာတစ်မြို့လုံး အဆိုးဆုံးရေဖုံးလွှမ်းမှုဖြစ်နေတာ ရက်သတ္တပတ် ၁ ပတ် ရှိလာပါပြီ။

   ဒါပေမဲ့ တာကျိုးပေါက်တဲ့နေရာကို လုံးဝမပြင်ဆင်နိုင်သေးလို့ ရေကျဖို့ နှောင့်နှေးခက်ခဲနေတယ်လို့ တာဘောင်ပြင်ဆင်ရေးလုပ်ငန်းထဲပါဝင်နေတဲ့ အမည်မဖော်လိုတဲ့ အဆင်မြင့်ဝန်ထမ်းတစ်ဦးနဲ့ ဒေသခံအချို့က ဩဂုတ် ၅ ရက်မှာ ဘီဘီစီကို ပြောပါတယ်။

   လက်ရှိမှာ ရေကာတာရဲ့ အပြင်တာဘောင်ကလည်း နိမ့်ဆင်းလာနေသလို ငဝန်မြစ်ရေကလည်း အလုံးအရင်းနဲ့ ဆက်စီးဝင်နေတာကြောင့် တာဘောင် ထပ်မကျိုးဖို့အရေး အားစိုက်ဖြေရှင်းဖို့ကြိုးပမ်းနေကြရပါတယ်။

   ရေကြီးမှုကလည်း လေးမျက်နှာမြို့နယ်တင်မက ငါးသိုင်းချောင်း၊ ရေကြည်နဲ့ ကျုံပျော်မြို့နယ်တွေအထိ ပျံ့နှံ့လာနေပါတယ်။ ဒါကြောင့် ဒေသခံတွေ ဘေးလွတ်ရာကို စတင်ပြောင်းရွှေ့နေကြရပြီလို့ အဲဒီဒေသမှာ နေထိုင်တဲ့ ဒေသခံ သုံးဦးထက်မနည်းက ဘီဘီစီကို ပြောပါတယ်။

   ငဝန်မြစ်ရေကာတာရဲ့ အတွင်းတာဘောင် ဘာကြောင့် ကျိုးပေါက်ခဲ့တာလဲ။ ကျိုးသွားတဲ့ တာဘောင်ကို ပြန်ပြင်ဆင်မှုအချိန်ကြာလာတာနဲ့ အမျှ လေးမျက်နှာနဲ့ အနီးတဝိုက်က ဒေသတွေ ဘာတွေဆက်ကြုံရနိုင်လဲ။

   ဆောင်းပါးအပြည့်အစုံကို ဒီလင့်ခ်ကို နှိပ်ပြီး ဆက်လက်ဖတ်ရှုနိုင်ပါတယ်။

2. လွန်ခဲ့သော တစ်နာရီ ကတာချီလိတ်မှာ တရုတ် ၄၁ ဦးကိုဖမ်းဆီး

   ထိုင်း-မြန်မာနယ်စပ် တာချီလိတ်မြို့နယ်ထဲမှာ တရားမဝင် နယ်စပ်ဖြတ်ကျော် ဝင်ရောက်နေတဲ့ တရုတ် နိုင်ငံသား ၄၁ ဦးကို ဖမ်းဆီးလိုက်တယ်လို့ နေပြည်တော်က ဒီနေ့မှာ သတင်းထုတ်ပြန်ပါတယ်။

   တာချီလိတ်မြို့နယ် မိုင်းဖုန်း (ခ) အုပ်စု ဝှေလေလန်ပူးပေါင်းစစ်ဆေးရေးဂိတ်အနီးက ရှောင်ကွင်းလမ်းကို စစ်ဆေးခဲ့ရာကနေ တရုတ် ၂ ဦးကို စတင်ဖမ်းမိခဲ့တာလို့ ထုတ်ပြန်ချက်ကဆိုပါတယ်။

   ဒီ တရုတ် ၂ ဦးကို စစ်မေးရာကနေ ဝမ်ပုံကျေးရွာအနီးတဝိုက် နေရာ ၂ ခုမှာ ခိုအောင်းနေတဲ့ နောက်ထပ် တရုတ်နိုင်ငံသား ၃၉ ဦးကို ဖမ်းမိခဲ့တာလို့သိရပါတယ်။

   မြေပြင်အခြေအနေသိတဲ့ သတင်းရင်းမြစ်တစ်ဦးကတော့ ဝမ်ပုံကျေးရွာအနီးက နေရာ ၂ ခုမှာ တရုတ်နိုင်ငံသားတချို့ ၂၀၂၅ နှစ်ဝက်ကတည်းက ပြောင်းရွှေ့လာကြတာဖြစ်ပြီး ကျားဖြန့် တရားမဝင် အွန်လိုင်းလောင်းကစားလုပ်ငန်းတွေ လုပ်ကိုင်နေကြတာလို့ ဘီဘီစီကို ပြောပါတယ်။

   နေပြည်တော်ကတော့ နိုင်ငံထဲမှာ အွန်လိုင်းလိမ်လည်(ကျားဖြန့်)နဲ့ လောင်းကစားမှုလုပ်ငန်းတွေ အခြေမချနိုင်အောင် တရားမဝင် ပြည်ပနိုင်ငံသားတွေ နိုင်ငံထဲ ဝင်မလာနိုင်အောင် တင်းကြပ်ဆောင်ရွက်နေတယ်လို့ဆိုပါတယ်။

   ဒါပေမဲ့ ရှမ်းပြည်နယ်ထဲမှာတော့ တရားမဝင်နယ်စပ်ဖြတ်ကျော်တာနဲ့ ကျားဖြန့်လုပ်ကိုင်နေတဲ့ တရုတ်နိုင်ငံသားတွေကို ဆက်တိုက်ဖမ်းမိနေတာဖြစ်ပါတယ်။

   လက်ရှိမှာ ဖမ်းထားတဲ့ တရုတ် ၄၁ ဦးကို ၁၉၄၇ ခုနှစ် မြန်မာနိုင်ငံ လူဝင်မှုကြီးကြပ်ရေး (လတ်တလောပြဋ္ဌာန်းချက်များ) အက်ဥပဒေပုဒ်မ ၃(၁)/ ၁၃(၁) နဲ့ အရေးယူတာတွေ ဆက်လုပ်မယ်လို့ နေပြည်တော်က ကြေညာပါတယ်။

   အဲဒီ ပုဒ်မအရ ခွင့်ပြုထားတဲ့ သက်တမ်းကုန်ဆုံးပြီးနောက် တရားမဝင် ဆက်နေထိုင်ခဲ့တဲ့အတွက် အမြင့်ဆုံးထောင်ဒဏ် ၅ နှစ်အထိ ချမှတ်နိုင်ပြီး ပြစ်ဒဏ်ကျခံရပြီးနောက်မှာလည်း ပြည်နှင်ဒဏ်ပေးတာတွေ လုပ်နိုင်ပါတယ်။

3. လွန်ခဲ့သော တစ်နာရီ ကလေးမျက်နှာမှာ လူငယ်တစ်ဦး ရေစီးနဲ့ မျောပါသေဆုံး

   ဧရာဝတီတိုင်း၊ လေးမျက်နှာမြို့နယ် အိုင်သပြုကျေးရွာ အောင်မင်္ဂလာရပ်ကွက်မှာ လူငယ်အမျိုးသားတစ်ဦး ရေစီးနဲ့မျောပါနစ်မြုပ်ပြီး သေဆုံးသွားတယ်လို့ ကယ်ဆယ်ရေးဆောင်ရွက်နေသူတချို့က ဘီဘီစီကိုပြောပါတယ်။

   ဒီရေဘေးအတွင်း သေဆုံးသူ ၂ ဦးရှိလာပြီဖြစ်ပြီး နောက်တစ်ဦးက‌တော့ အမှတ် ၃ ရပ်ကွက်မှာနေထိုင်တဲ့ သက်ကြီးပိုင်းတစ်ဦး ရေစတက်လာတဲ့အချိန် ဘေးလွတ်ရာကို မရွှေ့ဘဲ နေအိမ်ထဲ ကျန်ရစ်ခဲ့ရာကနေ သေဆုံးခဲ့တာဖြစ်ပါတယ်။

   အမည်မဖော်လိုတဲ့ ဒေသဆိုင်ရာ အဆင့်မြင့်အရာရှိတစ်ဦးကတော့ ရေစီးနဲ့ မျောပါဆုံးတဲ့ ဩဂုတ် ၅ ရက်မှာ အလောင်းကို ဆယ်ယူရရှိထားတယ်လို့ ဘီဘီစီကို ဒီနေ့ ဩဂုတ် ၆ ရက်မှာပြောပါတယ်။

   “အိုင်သပြုမှာ ရေစီးသန်နေတဲ့ တစ်နေရာရှိတယ်။ အဲဒီနေရာကနေပဲ ရေနဲ့ပါသွားတာဖြစ်နိုင်တယ်။ ကျန်တဲ့နေရာက အဲဒီလောက် မဆိုးဘူး” လို့ သူက ဖြည့်‌ပြောပါတယ်။

   သေဆုံးသူ လူငယ်ဟာ အသက် ၂၀ ကျော်အရွယ်ဖြစ်ပြီး ငါးသိုင်းချောင်းဇာတိဖြစ်တယ်လို့ ဝိုင်းဝန်းကယ်ဆယ်ခဲ့ကြတဲ့ အဖွဲ့ထဲက မြန်မာနိုင်ငံ လူမှုကယ်ဆယ်ရေးအဖွဲ့ - မန္တလေးတိုင်းဒေသကြီး ကော်မတီက သတင်းထုတ်ပြန်ထားပါတယ်။

   ထုတ်ပြန်ချက်မှာတော့ အဲဒီလူငယ်ကို ရေစီးနဲ့ မျောပါသွားတာကိုတွေ့တဲ့သူတချို့က ကယ်ဆယ်ရေးအဖွဲ့တွေကို သတင်းပေးခဲ့ပြီးနောက် ကယ်ဆယ်ရေးအဖွဲ့တချို့က ရှာဖွေခဲ့ကြပေမယ့် ရေစီးကသန်တာကြောင့် အသက်မမီလိုက်တာလို့ ဒီအခြေအနေကို သိတဲ့သူတစ်ဦးက ဆိုပါတယ်။

   “အိုင်သပြုမှာ သူ့အမျိုးတွေရှိတယ်။ အမျိုးတွေဆီကို ထမင်းထုပ်လာဝေရင်းဖြစ်တာ”လို့ သူက ဖြည့်ပြောပါတယ်။ ဒီအခြေအနေပြီးတဲ့နောက် မီးသတ်တပ်ဖွဲ့ရဲ့ အရာရှိတစ်ဦးကတော့ ကယ်ဆယ်ရေးအဖွဲ့တွေကို ကယ်ဆယ်ရေးလုပ်ရာမှာ အသက်ကယ်အင်္ကျီတွေကို မဖြစ်မနေ ဝတ်ဆင်ကြဖို့ လိုအပ်တယ်လို့ တိုက်တွန်းပါတယ်။

   “ရေစီးကသန်တယ်။ ရေကူးတတ်လည်း ဘာမဆိုဖြစ်သွားနိုင်တယ်” လို့ သူက ထပ်ပြောပါတယ်။ လက်ရှိ လေးမျက်နှာမှာ ကျိုးပေါက်သွားတဲ့ ငဝန်မြစ်ရေကာတာ ဘောင်ကို မြေဖို့ပြင်ဆင်တာတွေ လုပ်နေဆဲဖြစ်ပြီး ပြင်ဆင်လို့မပြီးသေးဘူးလို့ ဒီအခြေအနေကိုသိတဲ့ ဘီဘီစီသတင်းရင်းမြစ်က ပြောပါတယ်။

   အရပ်ဘက် ကယ်ဆယ်ရေးအဖွဲ့တွေအနေနဲ့လည်း အန္တရာယ်ရှိတဲ့နေရာတွေကိုသွားမယ်ဆိုရင် မီးသတ်နဲ့ အာဏာပိုင်အဖွဲ့တွေကို အသိပေး အကြောင်းကြားပြီး လိုအပ်ရင် အကူအညီပေးဖို့အတွက် ပြောနိုင်တယ်လို့ သူက ဆိုပါတယ်။

   ဒီနေ့ ဩဂုတ် ၆ ရက် မနက်ပိုင်းအထိ မြို့နယ်အနှံ့မှာ ရေကြီးနေဆဲဖြစ်ပြီး မြို့နယ်အရှေ့ဘက်ခြမ်း တလုတ္ထော်ရွာဘက်မှာတော့ ရေအနည်းငယ်ပြန်ကျတယ်လို့ ကယ်ဆယ်ရေးလုပ်နေသူတချို့က ပြောပါတယ်။

4. လွန်ခဲ့သော ၂ နာရီ ကထိုင်းဝန်ကြီးချုပ်နဲ့ ဦးမင်းအောင်လှိုင် ဘန်ကောက်အစိုးရအိမ်တော်မှာတွေ့ဆုံ, နှစ်နိုင်ငံ ပူးတွဲကြေညာချက်လည်းထုတ်ပြန်ဖို့ရှိ

   ဝေဖန်မှုတွေကြုံနေရတဲ့ နေပြည်တော်သမ္မတဦးမင်းအောင်လှိုင်ရဲ့ နှစ်ရက်တာ ထိုင်းခရီးစဥ် ဒီကနေ့ သြဂုတ် ၆ ရက်မှာ စတင်ပါပြီ။

   ဒီကနေ့ မနက်ပိုင်းမှာတော့ ထိုင်းဝန်ကြီးချုပ် အနုတင် ချန်ကူရာဝီလ်နဲ့ နေပြည်တော်သမ္မတ ဦးမင်းအောင်လှိုင်တို့ ဘန်ကောက်မြို့ အစိုးရအိမ်တော်မှာ တွေ့ဆုံခဲ့ကြပါတယ်။

   ထိုင်းဝန်ကြီးချုပ် နဲ့ အတူ ထိုင်းနိုင်ငံခြားရေးဝန်ကြီး၊ စီးပွား‌ရေးဝန်ကြီးအပါအဝင် ဝန်ကြီးအချို့တက်ရောက်ကြပါတယ်။

   ကနဦးသတင်းတွေအရ နှစ်နိုင်ငံ ပူးတွဲကြေညာချက်လည်းထုတ်ပြန်ဖို့ရှိပြီး အနည်းဆုံးအချက် ၅ ချက်ထက်မနည်း သဘောတူကြဖို့ ရှိနေပါတယ်။

   ထိုင်း-မြန်မာနယ်စပ်တလျှောက် လက်နက်ကိုင်ပဋိပက္ခတွေ မဖြစ်ပွားစေရေး၊ အွန်လိုင်းလိမ်လည်မှုဂိုဏ်းတွေနဲ့ မူးယစ်ဆေးဝါးရောင်းဝယ်ဖောက်ကားမှု တိုက်ဖျက်ရေးမှာ ပူးပေါင်းဆောင်ရွက်မှု တိုးမြှင့်ရေး၊ နယ်စပ်ကုန်သွယ်ရေး ပြန်လည်အသက်ဝင်လာစေရေးတို့ကို အဓိကထား ဆွေးနွေးကြမှာပါ။

   အထူးသဖြင့် နှစ်နိုင်ငံ နယ်စပ်ဖြတ်ကျော် မြစ်ရေညစ်ညမ်းမှု ပြဿနာတွေကို ပူးတွဲဖြေရှင်းနိုင်ဖို့ ပူးတွဲကော်မတီတစ်ရပ် ဖွဲ့စည်းရေးအတွက် လုပ်ငန်းတာဝန် သတ်မှတ်ချက် (Terms of Reference - ToR) ကိုလည်း လက်မှတ်ရေးထိုးဖို့ကြဖို့ရှိနေပါတယ်။

   ဦးမင်းအောင်လှိုင်ရဲ့ ဒီခရီးစဉ်ဟာ သူနဲ့ သူ့အစိုးရကို အာဆီယံနဲ့ ပြန်လည် ထိတွေ့ဆက်ဆံနိုင်ရေးအတွက် ထိုင်းအစိုးရက ကြိုးပမ်းချက်ရဲ့ တစ်စိတ်တစ်ပိုင်းလည်း ဖြစ်ပါတယ်။

   ထိုင်းအစိုးရရဲ့ ဖိတ်ခေါ်မှုအပေါ် ဝေဖန်တာတွေလည်းရှိနေပါတယ်။ ဦးမင်းအောင်လှိုင်ဟာ အနောက်နိုင်ငံအချို့ရဲ့ အရေးယူပိတ်ဆို့မှု ချမှတ်ခံထားရသူဖြစ်သလို လူသားမျိုးနွယ်အပေါ် ကျူးလွန်တဲ့ စစ်ရာဇဝတ်မှုတွေနဲ့ ပတ်သက်ပြီး အဓိကတာဝန်ခံရမယ့်သူဖြစ်တယ်လို့ ဝေဖန်သူတွေက ထောက်ပြထားပါတယ်။

5. လွန်ခဲ့သော ၃ နာရီ ကကြို့ပင်ကောက်မှာ စစ်တပ်လေကြောင်းဗုံးကြဲလို့ ၆ ဦး ဒဏ်ရာရ

   ပဲခူး၊ ကြို့ပင်ကောက်မြို့နယ်၊ အင်တိုင်းကျေးရွာမှာ စစ်တပ်ရဲ့ လေကြောင်းကနေ ဗုံးကြဲတိုက်ခိုက်မှုကြောင့် ၆ ဦး ဗုံးကျည်ထိမှန် ဒဏ်ရာရသွားတယ်လို့ မြေပြင်သတင်းရင်းမြစ်တစ်ဦးက ပြောပါတယ်။

   ဒဏ်ရာရသူတွေထဲ အသက် ၁ နှစ်နဲ့ ၁၂ နှစ် ကလေးငယ် ၂ ဦးပါဝင် ပါတယ်။ မနေ့ ဩဂုတ် ၅ ရက်မှာ စစ်တပ်က Y-12 လေယာဉ်နဲ့ ဗုံးကြဲတိုက်ခိုက်ခဲ့တာလို့ သူက ဆက်ပြောပါတယ်။ “၁ နှစ်ကလေးက မျက်ခုံးထိတာ၊ ၁၂ နှစ်ကလေးမလေးကတော့ ကျောဘက်နဲ့ ရင်ဝမှာထိလို့ အသက်အန္တရာယ်စိုးရိမ်ရတယ်”လို့ သူက ဆိုပါတယ်။ ‌

   နောက်ထပ် အမျိုးသမီးတစ်ဦးလည်း‌ ‌ကျောကို ဗုံးကျည်ထိမှန်ပြီး ဒဏ်ရာ အတော်ပြင်းထန်တယ်လို့ ဒေသခံ တစ်ဦးက ဆိုပါတယ်။

   အလားတူ အင်တိုင်းရွာထဲက နေအိမ် ၃ လုံးလည်း ပျက်စီးသွားတယ်လို့ သူက ဆက်ပြောပါတယ်။

   အင်တိုင်းရွာဟာ ပဲခူးရိုးမ အခြေမှာရှိတဲ့ရွာဖြစ်ပြီး ကြို့ပင်ကောက်မြို့နဲ့ ၁၀ မိုင်ဝန်းကျင်ဝေးပါတယ်။

   ကြို့ပင်ကောက်မြို့နယ် အရှေ့ခြမ်းကို စစ်တပ်က အင်အား ၃၀၀ ခန့်နဲ့ စစ်ကြောင်း ၃ ကြောင်းခွဲပြီး ဇူလိုင် ပထမအပတ်ကနေ လက်ရှိအချိန်အထိ တစ်လနီးပါးကြာ စစ်ကြောင်းထိုးနေတာလို့ စစ်ရေးသတင်းရင်းမြစ်တစ်ဦးက ပြောပါတယ်။

   ဇူလိုင် တတိယအပတ်တုန်းကလည်း စစ်တပ်နဲ့ တော်လှန်ရေးတပ်တွေကြား တိုက်ပွဲတွေပြင်းထန်ခဲ့ပြီး တိုက်ပွဲအတွင်း လက်နက်ကြီးနဲ့ ဒရုန်းပစ်ခတ်မှုတွေကြောင့် လူ ၃ ဦးထက်မနည်း သေဆုံးထားတယ်လို့ သူက ပြောပါတယ်။

   မြန်မာစစ်တပ်ကတော့ ကြို့ပင်ကောက်မြို့နယ်ထဲက စစ်ရေးအခြေအနေနဲ့ပတ်သက်လို့ ဒီနေ့ ဩဂုတ် ၆ ရက်အထိ သတင်းမထုတ်ပြန်သေးပါဘူး။

6. လွန်ခဲ့သော ၃ နာရီ က

   မင်္ဂလာပါ။ ဩဂုတ် ၆ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။