Bydd yr arholiad hwn yn profi dy sgiliau darllen ac ysgrifennu. Yn Adran A bydd rhaid i ti ateb ystod o gwestiynau yn seiliedig ar destunau darllen. Bydd y darnau darllen yn ddarnau Trafod, Perswâd a Chyfarwyddiadol.

Yn Adran B bydd rhaid i ti ysgrifennu dau ddarn. Gallant fod naill ai’n dasgau trafod neu'n dasgau perswadio.

Mae’r papur yn werth 70 o farciau:

• 30 marc ar gyfer y darllen
• 40 marc ar gyfer y dasg ysgrifennu

Cyfarwyddiadol

Beth yw testun cyfarwyddiadol?

Mae testun cyfarwyddiadol yn:

• disgrifio sut mae rhywbeth yn cael ei wneud drwy restru cyfres o gamau
• dechrau gan ddweud beth yw’r nod neu’r pwrpas
• rhestru’r hyn sydd ei angen
• camau mewn trefn amser
• defnyddio pwyntiau bwled neu rifau
• defnyddio berfau gorchmynnol

Math o ffurfiau ysgrifennu

• Poster
• Rysáit
• Rheolau
• Cyfarwyddiadau

Wrth ddarllen darn cyfarwyddiadol cofia ystyried:

• ffurf - ym mha ffurf mae’r awdur wedi ysgrifennu (erthygl, ymson, portread, llythyr, stori ayyb)?
• cynulleidfa - ar gyfer pwy mae’r awdur wedi ysgrifennu (plant, oedolion, dynion, menywod ayyb)?
• pwrpas – pam mae'r awdur yn ysgrifennu (i berswadio, dadlau, adolygu ayyb)?
• arddull – sut mae’r awdur yn ysgrifennu (ffurfiol, siaradus, difrifol, comig ayyb)?