Sa'ud Arabiyaa sababa haleellaa Huutii qophiiwwan idil-addunyaa gurguddoo yeroo biraatti dabarsuuf dirqamte

Haguuggii Tamsaasa Kallattii

1. 15 Onkololeessa 2026Namoonni iccitii waraanaa Ameerikaa baasaan rasaasaan rukutamuu qabu jedhe Tiraamp

   

   Madda suuraa, Reuters

   Pirezidaantiin Ameerikaa Doonaald Tiraamp namoonni ykn anga'oonni odeeffannoo dhoksaa karoora hojii waraanaa biyyattii miidiyaaleetti dabarsan adabamuu akka qaban dubbatan.

   Namoonni akkasii rasaasaan rukutamuu qabu jedhan Tiraamp

   Tiraamp yaada kana kan kennan, kutaa biyyaa Arizonaatti, hiriira duula filannoo irratti haasaa taasisan irratti ture.

   Akka Tiraamp jedhutti, yeroo darbe namoonni odeeffannoo dhoksaa karoora waraanaa Ameerikaa miidiyaan tamsaafamuu hordofee, keessumaa haleellaa waraanaa raawwatamuuf jiru dursee saaxilame jedhan.

   Tiraamp haleellaa Ameerikaan Waxabajjii 2025 dhaabbilee niwukilaraa Iraan irratti raawwatte kaasuun, xiyyaaronni waraanaa hojii sana raawwachuuf ka’uu isaanii namni tokko odeeffannoo dhoksaa dabarsuun saaxile jedhan.

   Pirezidaantichi miidiyaalee akka New York Times fi CNN odeeffannoo kana gabaasuu isaaniis qeeqan.

   Namoota odeeffannoo iccitii dabarsan “namoota addunyaa kana irratti tuffataman” jechuun waamanii, adabbii cimaa akka isaan irratti fudhatamus akeekkachiisan

2. 15 Onkololeessa 2026Odeeffannoon waa’ee karoora Ameerikaan Iraan haleeluuf jirtu irratti bahe

   

   Madda suuraa, Reuters

   Humni waraanaa Ameerikaa Iraan irratti haleellaa haaraa raawwachuuf karoora haaraa qopheessuu isaa Rooyitersii fi CNN qondaaltota Ameerikaa hedduu wabeeffachuun gabaaseera.

   Karoora haaraa kana keessatti, bu’uuraalee anniisaa fi iddoowwan gabbisa niwukilaraa Iraan boombiin haleeluuf akka ta'e ibsameera.

   Boombiin guddaa “Haadha Bomboota” (Mother of All Bombs) jedhamee beekamu fayyadamuu akka filannootti ilaalamaa jiraachuu gabaasni kun ibseera.

   Akka gabaasalee miidiyaatti, Pirezidaantiin Ameerikaa Donaald Tiraamp filannoo giddugaleessaa Kongireesii dura yookaan booda, waraanni Iraan irratti akka deebi'ee eegalu ajaja yoo kennan, boombii GBU-43/B jedhamu fayyadamuun filannoowwan ilaalamaa jiran keessaa tokko ta’uu danda’a.

   Bombiin kun boombii niwukilaraa hin taane kan Ameerikaan qabdu keessaa isa guddaa dha.

   Haa ta’u malee, boombichi bu’uuraalee niwukilaraa Iraan lafa jala jiran irratti hammam bu’a qabeessa akka ta’u waanti ifa ta'e hin jiru

   Akka gabaasalee miidiyatti boombiin kun humna diigumsaa guddaa qabaatus, lafa keessa gadi fageenyaan seenuuf kan qophaa’e miti.

   Maddoonni kunneen boombii kana fayyadamuun bu’aa waraanaa caalaa dhiibbaa sammuu guddaa uumuu akka danda’us ibsaniiru.

   Gabaasni kun kan ba’e yeroo Trump waraana Iraan waliin taasifamaa jiru xumuruuf dhiibbaa keessa jiruttidha.

   Haa ta’u malee, Tehiraan fi Waashingitan waliigaltee irra ga’uuf dhihaachaa jiraachuu waanti agarsiisu ifaan hin jiru.

3. 15 Onkololeessa 2026Paakistaanitti baaxiin mana-barumsaa jigee yoo xiqqaate namoonni 34 du'an

   

   Madda suuraa, Reuters

   Paakistaan Peshawaar keessatti baaxiin mana-barumsaa jigee yoo xiqqate namoonni 34 lubbuu dhabuu dubbi-himaan Hospitaala Leedii Riiding Mohaammad Asim BBCtti hime. Namoonni balaa kanaan lubbuu dhaban harki caalan barattoota yoo ta'an, barsiisonnis keessatti argamu.

   Akka dubbi-himaan kun jedhanitti, namoonni 19 biroo kan madaa'an yoo ta'u, isaan keessaa shan haala yaaddessaa keessa jiru.

   Akka Mohaammad Asim jedhutti, ijoolleen hedduu madaa'an mataa isaaniirradha.

   Taatee kana hordofee maatiin hedduun bakka hospitaala kanaatti kan walitti qabaman yoo ta'u, bulchiinsi hospitaalichaas namoota baayyatanii dhufan to'achuuf gargaarsa pooilisii gaafateera.

   Akka dubbi- himaan kun jedhanitti, daa'imman kunneen umuriin isaanii waggaa 6 hanga 12 gidduudha.

4. 15 Onkololeessa 2026Keeniyaan namni lammaffaa vaayiresii Iboolaan qabame argamuu mirkaneessite

   

   Madda suuraa, AFP via Getty Images

   Keeniyaan daldalaan ka'umsi isaa Dimokiraatik Rippablik Koongoo ta'e erga vaayiresii Iboolaatiin du'e erga mirkanaa'ee guuooya 10 booda nama lamaffaa vaayiresii kanaan qabame argiteetti.

   Namni umuriin isaa waggaa 39 ta'e vaayiresii kanaan qabamuun isaa mirkanaa'e nama vaayiresii kanaan du'e waliin fira dhiyoo yoo ta'u, bakka adda baafamee tursiifamu keessa akka ture Ministeerri Fayyaa Keeniyaa beeksiseera.

   Namoonni lamaan dhibee kanaan qabaman walitti dhufeenya qabaachuu kan ibse miniseerichi, hanga ammaatti vaayiresichi hawaasa keessa tatamsa'uu isaa ragaan agarsiisu akka hin jirres himeera.

   Haata'u malee, hawaasni akka tasgabba'u, garuu of eeggannoo akka taasisu ministeerichi hubachiiseera.

   Namni jalqaba vaayiresii kanaan qabame umuriin isaa waggaa 40 ta'e dhukkubstee hospitaala Naayiroobiitti argamu erga seenee booda ture kan lubbuun isaa darbe.

   Buufata xiyyaaraa irraa simatee gara hospitaalaa kan geesses nama amma vaayiresii Iboolaan qabamuun isaa mirkanaa'e kana ture.

   Namni kun gara Dimokiraatik Rippabliik Koongootti imalee kan ture yoo ta'u, osoo mallattoo hin agarsiisiin karaa Ugaandaan goree Keeniyaa gale.

   Vaayiresiin Iboolaa dhukkubbii uumuuf hanga guyyoota 2 hanga 21 turuu danda'a.

   Kana jechuun namni vaayiresii Iboolaan qabame tokko osoo mallattoo hin agarsiisiin torbanoota baayyeef turuu danda'a jechuudha.

   Kana waan ta'eefis, dursanii dhibee kana adda baafachuun carraan fayyuu akka jiraatuun vaayiresiin kun akka gara namoota birootti hin darbine gargaara.

   Erga namni kun du'ee booda namoonni 128 ta'an isa waliin walitti dhufeenya qaban adda baafamaniiru.

   Erga Kibxataa as namoonni 113 ta'an argamuu isaanii ministeerri fayyaa beeksiseera. Isaan keessaa 108 kan ta'an Keeniyaa keessatti bakka namoota adda baasanii tursiisan keessatti kan argaman yoo ta'u, kanneen hafan ammoo barbaadamaa jiru.

   Dimokiraatik Rippablik Koongoo keessatti bara kana qofa naoonni 4,000 vaayiresii Iboolaatiin du'aniiru.

5. 15 Onkololeessa 2026Sa'ud Arabiyaa sababa haleellaa Huutii qophiiwwan idil-addunyaa gurguddoo yeroo biraatti dabarsuuf dirqamte

   

   Madda suuraa, EPA

   Haleellaa Huutiin buufatawwan xiyyaaraa Sa'ud Arabiyaa irratti gaggeessu yeroo itti fufee jiru kanatti, qophiiwwan idil-addunyaa gurgoddoo biyyattii keessatti gaggeeffamuuf turan haqamaniiru yookaan yeroo biraatti dabarfamaniiru.

   Buufanni Xiyyaaraa Idil-addunyaa Riyaad hanga Saambata dhuftuutti akka cufamu beeksifameera.

   Taphni kilaboota Sa'udii Piroo Liigii Al-Ahly fi kilaba Kiristaanoo Ronaaldoo Al-Nasr gidduutti Kamisa galgala gaggeeffamuuf tures yeroo biraatti akka darbu taasifameera.

   Dorgommiin teennis SIX Kings kan turban dhufu Novaak Jookoovich fi Kaarloos Alkaraaz gaggeeffamuuf karoorfame ammoo gara Muddeetti dabarfameera.

   Konferansii waggaa Investimentii Sa'ud Arabiyaa "Davos of the Desert," jedhamuun beekamu bakka keessummoonni bebbeekamoon irratti argamu jedhamee eegamu torban lama keessatti karaa viidiyoo konferensiitiin akka gaggeeffamu murtaa'eera.

   Kongiresiin Petirooliyeemii Addunyaa har'a xumuramu ammoo osoo hoggantoonni boba'aa gurguddoo irratti hin argamiin hafeera.

   Hidhattoonni Huutii ammallee Buufata Xiyyaaraa Idil-addunyaa Riyaad balastik misaa'eliin irratti xiyyeeffatee akka jiru yeroo himaa jirutti, nageenyi Sa'ud Arabiyaa keessaa haala sodaachisaa keessa jira.

6. 15 Onkololeessa 2026ASHAMAA!

   Akkam jirtu hordoftoota keenyaa?

   Toora kallattiin oduu isin biraangeenyu jalqabneerra.

   MM Abiy fi Ministitti Dhimma Alaa Ameerikaa marii waliin taasisaniin maal kaasan?

   Mallattoollee shan gaa'elli kee diigamuuf akka jiru akeekan,

   Jaalallee waliin waggootaaf jiraatan miindaa isaa hinbeekne, kanneen jedhaniifi odeessaalee biroo karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.

   DHIYAADHAA!