لائیو, ہم نہیں چاہتے ایران کے پاس جوہری ہتھیار ہوں اور چاہتے ہیں کہ آبنائے ہرمز کھلی رہے: ٹرمپ

لائیو کوریج

1. 52 منٹ قبلپاکستان کی چین کی مارکیٹ میں ’پانڈا بانڈ‘ کے اجرا سے 25 کروڑ ڈالر کا سرمایہ حاصل کرنے میں کامیابی, سارہ حسن، صحافی

   پاکستان نے پہلی مرتبہ چین کی مارکیٹ میں بانڈ کے اجرا سے 25 کروڑ ڈالر کا سرمایہ حاصل کی ہے۔ چین کی کیپٹل مارکیٹ میں جاری کیے گئے پانڈا بانڈ کی مدت تین سال ہے اور اس رقم پر پاکستان ڈھائی فیصد شرح سود ادا کرے گا۔

   اس قبل پاکستان گذشتہ کئی برسوں سے یورپی بانڈ مارکیٹ میں باقاعدگی سے یورو بانڈ اور اسلامی بانڈ مارکیٹ میں سکوک بانڈ جاری کرتے رہا ہے لیکن چین کی سرمائے کی مارکیٹ میں پاکستان نے پہلی مرتبہ پانڈا بانڈ جاری کیے ہیں۔

   پاکستان کے وزیر خزانہ کے مشیر خرم شہزاد کا کہنا ہے کہ چین کی کیپٹل مارکیٹ میں پاکستان نے پہلی مرتبہ مقامی کرنسی یعنی آر این بی میں بانڈ جاری کیے ہیں۔

   سوشل میڈیا سائٹ ایکس پر جاری اپنے بیان میں خرم شہزاد نے بتایا کہ پانڈا بانڈ کی مالیت مقامی کرنسی میں ایک ارب 75 کروڑ آر این بی ہے جس کی مالیت ڈھائی کروڑ ڈالر بنتی ہے۔

   انھوں نے بتایا کہ چینی سرمایہ کاروں نے پاکستان کے پانڈا بانڈ میں غیر معمولی دلچسپی لی اور ڈھائی کروڑ ڈالر کے بانڈ کی خریداری کے لیے ایک ارب 26 کروڑ ڈالر مالیت کی بولیاں یا پیشکش موصول ہوئیں۔

   خرم شہزاد کے مطابق طلب سے زیادہ بولیاں موصول ہونا پاکستان کے معاشی استحکام، مالیاتی ڈسیپلن پر چین کے سرمایہ کاروں کے اعتماد کو ظاہر کرتا ہے۔

   یاد رہے کہ رواں مالی سال کے دوران پاکستان نے چین کی مارکیٹ میں پانڈا بانڈ کے اجرا کا اعلان کیا اور حکومت کا کہنا تھا کہ پاکستان چین کی کیپٹل مارکیٹ میں انٹری سے عالمی کیپٹل مارکیٹس میں اپنی نمائندگی کو بڑھانا چاہتا ہے۔

   حکومتیں بانڈ کیوں جاری کرتی ہیں؟

   بین الااقوامی معشیت میں مختلف ممالک ایک دوسرے کی سرمائے کی مارکیٹس میں بانڈ جاری کرے کے رقم ادھار لیتے ہیں۔

   بانڈز کے اجرا کے ذریعے یہ رقم تین پانچ یا دس سال سمیت مختلف مدت کے لیے ادھار لی جاتی ہے اور اس پر شرح سود ادا کیا جاتا ہے۔

   مقررہ مدت مکمل ہونے پر یہ ادھار لی گئی رقم واپس کر دی جاتی ہے۔

   مالیاتی ماہرین کا کہنا ہے کہ بانڈ کے اجرا مقاصد محض قرض یا ادھار لینا نہیں ہے بلکہ اس کے ذریعے ممالک ایک عالمی کیپٹل مارکیٹ میں اپنی نمائندگی کو ظاہر کرتے ہیں۔

   سنئیر صحافی مہتاب حیدر کا کہنا ہے کہ چین ایک بڑی مارکیٹ ہے اور پاکستان انٹرنینشل بانڈ مارکیٹ میں اپنے آپ کو مزید فروغ دینا چاہتا ہے۔

   انھوں نے بتایا کہ چین کی مارکیٹ میں بانڈا کا اجرا ایک مشکل اور پیچیدہ مرحلہ تھا کیونکہ اُن کی شرائط کافی زیادہ تھیں اسی لیے پانڈا بانڈ کے اجرا میں تاخیر بھی ہوئی۔

   مہتاب حیدر کے مطابق چین کی مارکیٹ میں وافر سرمایہ موجود ہے اور پاکستان چاہتا ہے کہ مختلف مراحل میں چین کی مارکیٹ میں ایک ارب ڈالر تک کے بانڈ جاری کیے جائیں۔

   انھوں نے کہا کہ انٹرنیشل مارکیٹ میں یور اور سکوک بانڈ کے اجرا کے بعد اب چین کی مارکیٹ میں پانڈا بانڈ کے اجرا سے پاکستان نے اپنے مالیاتی انسٹرومنٹس کے ایونیوز کو بڑھایا ہے۔

2. ایک گھنٹہ قبلشی جن پنگ کی ٹرمپ سے ملاقات کا دوسرا دن، ہم اب تک کیا جانتے ہیں

   • چینی صدر شی جن پنگ نے امریکی صدر ٹرمپ کو چین کی اعلیٰ قیادت کے لیے اہم سمجھے جانے والے ونگ نان ہائی کا دورہ کروایا۔ بیجنگ میں ٹرمپ کے آخری دن کا یہ اہم ترین پروگرام تھا، جس کے بعد وہ وائٹ ہاؤس واپس روانہ ہوں گے۔
   • دورے کے بعد مشترکہ پریس کانفرنس میں امریکی صدر ٹرمپ نے کہا کہ ان کی شی جن پنگ کے ساتھ تجارت، ایران اور بہت سے دیگر امور پر بات چیت ہوئی۔
   • ایران کے بارے میں بات کرتے ہوئے ٹرمپ نے کہا کہ ’ہم نہیں چاہتے کہ ایران کے پاس جوہری ہتھیار ہوں اور ہم چاہتے ہیں کہ آبنائے کھلی رہے۔‘
   • شی جن پنگ نے کہا کہ دونوں رہنماؤں کے درمیان ایک نیا دوطرفہ تعلق قائم ہوا ہے اور انھوں نےچینی گلابوں کے بیج ٹرمپ کو تحفتاً بھیجنے کا اعلان بھی کیا۔
   • ان کی ملاقات سے چند گھنٹے قبل فاکس نیوز نے ٹرمپ کا ایک انٹرویو نشر کیا جس میں انھوں نے کہا کہ شی جن پنگ نے وعدہ کیا ہے کہ چین ایران کو فوجی ساز و سامان فراہم نہیں کرے گا۔
   • ٹرمپ کے مطابق لیکن اسی وقت صدر شی نے کہا کہ وہ وہاں سے بہت سا تیل خریدتے ہیں اور وہ اسے جاری رکھنا چاہتے ہیں۔
   • اسی انٹرویو میں ٹرمپ نے یہ بھی کہا کہ چین نے امریکہ سے تیل اور بوئنگ کے 200 طیارے خریدنے پر اتفاق کیا ہے۔
   • ٹرمپ نے کہا کہ تجارتی مذاکرات ’پچھلی بار سے بہتر‘ رہے۔

3. ایک گھنٹہ قبلچین کی مشرق وسطیٰ میں تنازعات کے خاتمے اور دیرپا امن کے قیام میں تعمیری کردار ادا کرنے کی یقین دہانی, لورا بیکر، بی بی سی

   چین کا کہنا ہے کہ وہ مشرق وسطیٰ میں تنازعات کے خاتمے کے لیے ’بھرپور‘ کوششیں کر رہا ہے اور اسے امید ہے کہ وہ ’امن مذاکرات کی مزید حمایت کرتے ہوئے دیرپا امن کے قیام میں تعمیری کردار ادا کرے گا۔‘

   چین کے سرکاری میڈیا کی جانب سے جاری یہ بیان ایسے وقت میں سامنے آیا ہے جب امریکی صدر ٹرمپ نے فاکس نیوز کو بتایا کہ وہ ایران کے ساتھ کسی ممکنہ امن معاہدے تک پہنچنے کے معاملے میں ’زیادہ صبر نہیں کریں گے۔‘

   امریکی صدر نے یہ بھی کہا کہ چینی صدر شی جن پنگ نے تجویز دی تھی کہ وہ ایران کو کسی معاہدے تک پہنچنے میں مدد فراہم کر سکتے ہیں۔

   یاد رہے کہ بیجنگ کو تہران کا قریبی اتحادی سمجھا جاتا ہے اور چین ایرانی تیل کا سب سے بڑا خریدار ہونے کے ساتھ اس کا سب سے بڑا تجارتی شراکت دار بھی ہے۔

   ٹرمپ انتظامیہ کو امید تھی کہ شی جن پنگ تہران کو مذاکرات کی میز پر لانے کے لیے اپنے اقتصادی اور سیاسی اثر و رسوخ کو استعمال کریں گے۔

   چین کے بیان میں کہا گیا کہ یہ تنازع ’کبھی نہیں ہونا چاہیے تھا‘ اور ’اس کے جاری رہنے کی کوئی وجہ نہیں ہے‘ تاہم اس بیان میں براہ راست امریکہ پر تنقید سے گریز کیا گیا۔

   معاشی طور پر اس جنگ نے چینی صنعت پر دباؤ ڈالا ہے کیونکہ تیل سے متعلق مصنوعات کی قیمتوں میں اضافہ ہوا ہے لیکن سفارتی اور سیاسی سطح پر اسے شی جن پنگ کے لیے ایک موقع کے طور پر بھی دیکھا جا رہا ہے،جہاں وہ ایک ایسے امریکی صدر کا سامنا کر رہے ہیں جو جنگ کے باعث کمزور ہوا ہے۔

   اس کے برعکس، شی جن پنگ ایک امن کے حامی رہنما کے طور پر سامنے آ سکتے ہیں جو اس بات کی علامت ہے کہ چین نہ صرف عالمی معیشت میں مرکزی کردار رکھتا ہے بلکہ تیزی سے عالمی طاقت کے طور پر بھی اپنی حیثیت مضبوط کر رہا ہے۔

4. ایک گھنٹہ قبلصدر ٹرمپ اور صدر شی کے درمیان ملاقات کی تصویری جھلکیاں

   ابھی جبکہ امریکی صدر ٹرمپ اور چینی صدر شی کی ملاقات کے بعد میڈیا سے گفتگو کا کچھ حصہ خبروں میں آ چکا ہے اور باقی تفصیل بھی عنقریب سامنے آئے گی، اس دوران ہم آپ کے لیے دونوں رہنماؤں کی ملاقات کے حوالے سے تازہ تصاویر پیش کر رہے ہیں۔

   دونوں رہنماؤں نے آج صبح اپنی بات چیت سے قبل ژونگ نان ہائی کے احاطے میں چہل قدمی کی جو چین کی مرکزی قیادت کے لیے اہم مقام ہے۔

5. 2 گھنٹے قبلبریکنگ, امریکہ کے ساتھ ’نیا دو طرفہ تعلق‘ قائم کیا ہے: چینی صدر شی جن پنگ

   صدر شی جن پنگ نے امریکی صدر ٹرمپ کے ساتھ مشترکہ خطاب کے دوران چینی صدر نے کہا کہ دونوں رہنماؤں نے ایک ’نیا دو طرفہ تعلق‘ قائم کیا ہے جو انتہائی تعمیری ہے۔

   صدر شی نے اسے ایک سنگ میل بھی قرار دیا۔

   تاہم جب ان کا انگریزی مترجم اس بیان کا ترجمہ کر رہا تھا تو صحافیوں کو کمرے سے باہر جانے کا کہہ دیا گیا اور براہ راست نشریات ختم کر دی گئیں۔

   اس سے قبل خطاب کے آغاز میں صدر شی نے کہا ہے کہ وہ امریکی صدر ٹرمپ کو بطور تحفہ چینی گلابوں کے بیج بھیجیں گے۔

   صدر ٹرمپ کے ہمراہ خطاب میں چینی صدر شی نے ژونگ نان ہائی کمپلیکس نے سب سے پہلے اس جگہ کی تاریخی اہمیت پر بات کی اور کہا کہ ’یہ جگہ کبھی شاہی باغ کا حصہ ہوا کرتی تھی، اس کمپلیکس کی بہت تاریخی حیثیت ہے۔‘

   چینی صدرنے مزید بتایا کہ چہل قدمی کے دوران جس درخت کو انھوں نے دیکھا وہ 490 سال پرانا تھا۔ اسی دوران چینی صدر نے کہا کہ وہ باغ میں دیکھے گئے چینی گلابوں کے بیج ٹرمپ کو تحفے کے طور پر بھیجیں گے۔

   اس پر ٹرمپ نے کہا کہ ’مجھے یہ بہت پسند آیا، یہ بہت اچھا ہے۔‘

6. 2 گھنٹے قبلبریکنگ, ہم نہیں چاہتے کہ ’ان‘ کے پاس جوہری ہتھیار ہوں، چاہتے ہیں کہ آبنائے ہرمز کھلی رہے: ٹرمپ

   امریکی صدر ٹرمپ نے چینی صدر شی جن پنگ کے ہمراہ ژونگ نان ہائی میں میڈیا سے گفتگو کے دوران کہا ہے کہ چینی صدر کے ساتھ بات چیت میں تجارت، ایران اور بہت سے دیگر امور‘ شامل تھے۔

   صدر ٹرمپ نے گفتگو کا آغاز کرتے ہوئے کہا کہ ’ہم نے کئی مختلف مسائل حل کیے جنہیں دوسرے لوگ حل نہیں کر سکتے تھے۔‘

   ایران کے بارے میں بات کرتے ہوئے انھوں نے کہا کہ ’ہم نہیں چاہتے کہ ان کے پاس جوہری ہتھیار ہوں۔‘ اور ’ہم چاہتے ہیں کہ آبنائے کھلی رہے۔‘

   اس کے بعد انھوں نے شی جن پنگ کا شکریہ ادا کرتے ہوئے کہا کہ بیجنگ آنا ان کے لیے اعزاز ہے۔ ٹرمپ نے کہا کہ شی جن پنگ سے 24 ستمبر کو دوبارہ ملاقات ہو گی جب وہ امریکہ کا دورہ کریں گے۔

   ٹرمپ کے مطابق انھیں امید ہے کہ شی امریکہ سے اسی طرح متاثر ہوں گے جیسے وہ اس بار چین سے ہوئے ہیں۔

7. 3 گھنٹے قبلچین کا ایران تنازع کا ’ فوری حل تلاش کرنے‘ پر زور ، چینی وزارت خارجہ

   چین کی وزارتِ خارجہ نے ایران سے متعلق جاری تنازع کے حوالے سے کہا ہے کہ اس کا فوری حل تلاش کیا جانا چاہیے۔

   چین کے سرکاری میڈیا کے مطابق بیجنگ میں پریس بریفنگ کے دوران چینی وزارتِ خارجہ کے ترجمان نے صحافیوں کو بتایا کہ ایران سے متعلق تنازع ’کبھی ہونا ہی نہیں چاہیے تھا‘ اور ’اسے جاری رکھنے کی کوئی وجہ نہیں ہے۔‘

   چینی ترجمان کے مطابق اس تنازع کا جلد از جلد حل تلاش کرنا نہ صرف امریکہ اور ایران بلکہ خطے کے ممالک اور پوری دنیا کے لیے فائدہ مند ہے۔

   یاد رہے کہ امریکی صدر ٹرمپ اورچینی صدر شی جن پنگ کی دوبارہ ملاقات ژونگ نان ہائی میں جاری ہے جو چینی قیادت کے لیے ایک انتہائی محفوظ کمپلیکس سمجھا جاتا ہے۔

   وائٹ ہاؤس کے ایک میڈیا رپورٹ کے مطابق یہاں صرف محدود تعداد میں صحافیوں کو اس کمپلیکس میں داخلے کی اجازت دی گئی۔

   رپورٹ میں یہ بھی کہا گیا کہ صدارتی قافلے کی آمد کے لیے سڑکیں خالی کر دی گئی تھیں اور راہگیر اس منظر کو اپنے موبائل فونز پر ریکارڈ بھی کرتے رہے۔

   چینی سرکاری میڈیا کے مطابق ترجمان نے صحافیوں کو بتایا کہ اگرچہ امریکی صدر ٹرمپ اور چینی صدر شی جن پنگ نے ’دونوں ممالک اور دنیا سے متعلق اہم امور پر تفصیلی تبادلہ خیال کیا‘ اور متعدد اموور پر اتفاقِ رائے ہوا تاہم مخصوص موضوعات کی تفصیل فراہم نہیں کی جا سکتیں۔

   ترجمان کے مطابق دونوں رہنماؤں نے ’ایک دوسرے کے خدشات کو مناسب طریقے سے نمٹانے پر اہم اتفاق‘ کیا اور عالمی اور علاقائی امور پر تعاون بڑھانے پر بھی رضامندی ظاہر کی۔

8. 3 گھنٹے قبلڈالر کے مقابلے میں انڈین روپے کی قدر میں جمعرات کو ریکارڈ کمی

   انڈیا کا روپیہ جمعرات کو تاریخی کم ترین سطح پر آنے سے فی ڈالر 95.09 انڈین روپے پر آ گیا ہے جب کہ تیل کی بڑھتی قیمتیں اور غیر ملکی سرمایہ میں کمی کے باعث معیشت پر دباؤ بڑھنے کی اطلاعات بھی ہیں۔

   جمعرات کو انڈیا کا روپیہ ڈالر کے مقابلے میں مزید 0.2 فیصد کم ہو کر 95.9 تک گر گیا، جو اس سے ایک روز قبل قائم ہونے والی کم ترین سطح 95.79 سے بھی نیچے ہے۔

   بعد ازاں روپے کی قدر میں بہت معمولی بہتری اس وقت دیکھی گئی جب بلومبرگ نیوز نے رپورٹ کیا کہ انڈیا غیر ملکی سرمایہ کاروں کے بانڈز پر ٹیکس میں کمی پر غور کر رہا ہے۔

   خبر رساں ادارے روئٹرز کے مطابق پالیسی ساز زرمبادلہ کے زخائر کو مضبوط بنانے اور روپے پر دباؤ کم کرنے کے لیے ڈالر کی آمد بڑھانے کے طریقے زیرِ غور رکھے ہوئے ہیں۔ 2026 کے دوران اب تک روپے کو ایشیا میں بدترین کارکردگی دکھانے والی کرنسی قرار دیا جا رہا ہے۔

   روئٹرز کے مطابق ایران جنگ کے آغاز کے بعد روپے کی قدر میں تیزی سے کمی آئی، جس کے بعد حکام کو مختلف اقدامات کرنا پڑے۔

   یاد رہے کہ انڈیا میں بھی ایران جنگ کے باعث خام تیل اور گیس کی قیمتوں میں نمایاں اضافہ ہوا ہے، جس سے سپلائی متاثر ہوئی ہے۔

   اس صورتِ حال سے انڈیا میں معاشی ترقی کی رفتار سست ہونے اور مہنگائی بڑھنے کا خدشہ ظاہر کیا جا رہا ہے۔ انڈیا اپنی تیل کی ضرورت کا تقریباً 90 فیصد اور گیس کا تقریباً 50 فیصد درآمد کرتا ہے۔

   خبر رساں ادارے روئٹرز نے ماہرین کا حوالہ دیتے ہوئے لکھا ہے کہ انڈیا کو مسلسل تیسرے سال ادائیگیوں کے توازن کے خسارے کا سامنا ہے جس کے باعث روپے کی کمزوری کے خدشات برقرار ہیں، اگرچہ مرکزی بینک مداخلت کے ذریعے اتار چڑھاؤ کو محدود رکھنے کی کوشش کر رہا ہے۔

   وزیر اعظم نریندر مودی اس سے قبل شہریوں پر زور دے چکے ہیں کہ وہ زرمبادلہ کے ذخائر کے تحفظ میں کردار ادا کریں۔ وفاقی حکومت نے قیمتی دھاتوں کی درآمد پر محصولات بھی بڑھا دیے ہیں۔

   دوسری جانب روئٹرز کا کہنا ہے کہ انڈیا کے سرکاری اعداد و شمار کے مطابق اپریل میں مہنگائی ساڑھے تین سال کی بلند ترین سطح پر پہنچ گئی ہے جو توانائی کے بحران کے معاشی اثرات کی ابتدائی علامات میں سے ایک ہے۔

9. 4 گھنٹے قبلچین بھی نہیں چاہتا کہ ایران جوہری ہتھیار بنائے: صدر ٹرمپ کا دعویٰ

   امریکہ کے صدر ڈونلڈ ٹرمپ نے دعویٰ کیا ہے کہ چین نہیں چاہتا کہ ایران جوہری ہتھیار بنائے۔

   فاکس نیوز کو دیے گئے انٹرویو میں امریکی صدر نے ایران جنگ پر اظہارِ خیال کرتے ہوئے کہا کہ اُنھوں نے چینی ہم منصب کو بتایا ہے کہ دراصل امریکہ اس معاملے میں چین کی ’مدد‘ کر رہا ہے، کیونکہ میرا خیال ہے کہ چین بھی نہیں چاہتا کہ ایران جوہری ہتھیار بنائے۔

   امریکی صدر نے ایک بار پھر دعویٰ کیا کہ صدر شی نے ایران کو ہتھیار فراہم نہ کرنے کا عہد کیا ہے اور یہ ایک ’بہت بڑی بات‘ ہے۔

   امریکہ کے صدر کا کہنا تھا کہ چین ایران سے بہت سا تیل خریدتا ہے اور وہ یہ خریداری جاری رکھنا چاہتے ہیں۔

10. 4 گھنٹے قبلجب میں نے عہدہ سنبھالا تو چین امریکہ سے بہت فائدہ اُٹھا رہا تھا، لیکن اب میرے صدر شی سے اچھے تعلقات ہیں: صدر ٹرمپ

    امریکہ کے صدر ڈونلڈ ٹرمپ نے کہا ہے کہ چین پہلے امریکہ سے فائدہ اُٹھا رہا تھا، لیکن اب اُن کے صدر شی کے ساتھ بہت اچھے تعلقات ہیں۔

    چینی صدر سے پہلی ملاقات کے بعد فاکس نیوز کو دیے گئے پہلے سے ریکارڈ شدہ انٹرویو میں امریکی صدر کا مزید کہنا تھا کہ اُنھوں نے ایسے وقت میں عہدہ سنبھالا جب چین امریکہ سے فائدہ اُٹھا رہا تھا۔

    چینی صدر کے ساتھ تعلقات میں بہتری کے سوال پر صدر ٹرمپ کا کہنا تھا کہ میرا خیال ہے کہ چینی رہنما ’ایک گرم جوش‘ انسان ہیں۔

    صدر ٹرمپ کا مزید کہنا تھا کہ ’وہ (چینی صدر) سنجیدہ اور کام پر توجہ دینے والے شخص ہیں اور آپ کے ساتھ کوئی کھیل نہیں کھیلتے یہ ایک اچھی بات ہے۔‘

    چینی صدر کی تعریف کرتے ہوئے ان کا کہنا تھا کہ ’اگر آپ ہالی وڈ فلم میں صدر شی کا کردار ادا کرنے کے لیے کسی اداکار کو تلاش کرنے کی کوشش کریں تو آپ کو اُن جیسا کوئی شخص نہیں ملے گا۔‘

    امریکی صدر کا مزید کہنا تھا کہ ’وہ (صدر شی) بہت طویل قامت ہیں، بہت لمبے ہیں اور اس ملک (چین) میں آپ کو عام طور چھوٹے قد کے لوگ ہوتے ہیں۔‘

11. 4 گھنٹے قبلچینی صدر نے 200 بوئنگ طیارے خریدنے کا وعدہ کیا ہے: صدر ٹرمپ کا دعویٰ

    امریکہ کے صدر ٹرمپ کا کہنا تھا کہ چینی صدر نے امریکہ سے 200 بوئنگ طیارے خریدے کا بھی وعدہ کیا ہے۔

    فاکس نیوز کو دیے گئے انٹرویو میں امریکی صدر کا کہنا تھا کہ صدر شی نے 200 بوئنگ جیٹ طیارے خریدنے پر رضا مندی ظاہر کی ہے اور یہ اُن کے ’عزم‘ کا اظہار ہے۔

    امریکی صدر کا مزید کہنا تھا کہ 200 بڑے جہازوں کی خریداری کا مطلب بہت ساری نوکریاں، بوئنگ کو 150 کا آرڈر درکار تھا، اُنھیں 200 کا مل گیا۔

    اس سے قبل اس خریداری کے معاملے پر امریکی وزیر خارجہ مارکو روبیو نے نشریاتی ادارے سی این بی سی کو بتایا تھا کہ اُنھیں اُمید ہے کہ بیجنگ بہت جلد بوئنگ طیاروں کی خریداری کا پہلا آرڈر دے گا۔

12. 5 گھنٹے قبلچینی صدر نے کہا وہ ایران کو عسکری ساز و سامان نہیں دیں گے: صدر ٹرمپ

    امریکی صدر ڈونلڈ ٹرمپ کا کہنا ہے کہ ان کی چینی صدر شی جن پنگ سے ملاقات کے دوران بیجنگ کی تہران کی ’حمایت‘ پر بھی گفتگو ہوئی ہے۔

    ایک انٹرویو کے دوران فوکس نیوز کے میزبان سے ان سے سوال کہ کیا چینی صدر کے ساتھ ملاقات میں اس ’حمایت‘ سے متعلق بات ہوئی ہے، تو ٹرمپ نے کہا: ’آپ حمایت کہہ رہے ہیں۔۔۔ وہ (چین) ہمارے ساتھ جنگ تو نہیں لڑ رہا۔‘

    امریکی صدر نے دعویٰ کیا کہ صدر شی جن پنگ نے انھیں بتایا کہ چین ایران کو ’عسکری ساز و سامان نہیں دے گا‘ اور ٹرمپ کے مطابق ’یہ ایک بڑا بیان ہے۔‘

    صدر ٹرمپ کا مزید کہنا تھا کہ انھیں چینی صدر نے بتایا کہ بیجنگ ایران سے ’تیل خریدتا ہے اور وہ ایسا کرتے رہنا چاہیں گے۔‘

    امریکی صدر کے مطابق صدر شی جن پنگ نے انھیں بتایا کہ چین ’آبنائے ہرمز کو کھلا دیکھنا چاہے گا۔‘

13. 5 گھنٹے قبلگذشتہ روز کی اہم خبروں کا خلاصہ

    • پاسداران انقلاب کے شعبہ تعلقات عامہ نے اب ان اطلاعات کی تصدیق کرتے ہوئے کہا ہے کہ ’ایران کے فیصلے کے ساتھ ہی، متعدد چینی بحری جہازوں کا آبنائے ہرمز کے ایرانی انتظامی پروٹوکول کے مطابق گزرنا ممکن ہو گیا ہے۔‘
    • خلیجِ عمان میں ایک ایسے جہاز کو، جو مبینہ طور پر ’فلوٹنگ آرمری‘ یعنی اسلحہ لے جانے کے طور پر کام کر رہا تھا، ایرانی فوجی اہلکاروں نے ضبط کر لیا ہے۔ یہ بات بحری خطرات پر نظر رکھنے والی کمپنی وینگارڈ نے بتائی ہے۔
    • سینٹ کام کے کمانڈر ایڈمرل بریڈ کوپر نے امریکی سینیٹ میں ایران کے ساتھ جنگ ​​سے متعلق سماعت کے دوران کہا کہ ایران کی اپنے پڑوسیوں اور خطے میں امریکی مفادات کو خطرے میں ڈالنے کی صلاحیت میں نمایاں کمی آئی ہے۔
    • پاکستان کے دفترِ خارجہ نے پاکستان اور انڈیا کے درمیان مبینہ بیک چینل مذاکرات کی خبروں پر لاعلمی کا اظہار کرتے ہوئے کہا ہے کہ وہ اس حوالے سے کوئی تصدیق نہیں کر سکتے۔
    • برطانیہ کے وزیر صحت ویس سٹریٹنگ نے وزیر اعظم سے اختلافات کے بعد اپنی وزارت سے استعفیٰ دے دیا ہے۔ ایکس پر شیئر کیے گئے ایک خط میں انھوں نے کہا کہ انھیں کیئر سٹامر کی قیادت پر ’اعتماد نہیں رہا‘ اور ان کے بقول اب مزید حکومت کا حصہ رہنا ’باعزت اور اصولی رویے کے خلاف‘ ہوگا۔
    • انڈیا کے زیرِ انتظام کشمیر میں منشیات کے مبینہ سمگلروں کے مکانات مسمار کیے جا رہے ہیں اور جائیدادیں سر بمہر کی جا رہی ہیں۔ انڈیا کے زیرِ انتظام کشمیر کے تمام 20 اضلاع میں ’نشہ مُکت جموں و کشمیر‘ یعنی منشیات سے پاک جموں و کشمیر مہم چلائی جا رہی ہے، جس کی قیادت خود لیفٹیننٹ گورنر منوج سنہا کر رہے ہیں۔
    • پاکستان نے آرمی راکٹ فورس کمانڈ کے زیر اہتمام مقامی طور پر تیار کردہ فتح-4 گراؤنڈ لانچڈ کروز میزائل کا ’کامیاب تربیتی تجربہ‘ کیا گیا۔ فوج کے شعبہ تعلقات عامہ یعنی آئی ایس پی آر کے مطابق جدید ایویونکس اور جدید ترین نیویگیشنل نظام سے لیس یہ ہتھیار طویل فاصلے کے اہداف کو انتہائی درستگی کے ساتھ نشانہ بنانے کی صلاحیت رکھتا ہے۔

14. 5 گھنٹے قبل

    بی بی سی اردو کے نئے لائپو پیج میں خوش آمدید گذشتہ روز 14 مئی تک کی خبروں کے لیے یہاں کلک کریں