లైవ్ , అమెరికా: మధ్యంతర ఎన్నికల ఫలితాలు అంగీకరిస్తున్నట్టు డోనల్డ్ ట్రంప్ ప్రకటన

లైవ్ కవరేజీ

1. 33 నిమిషాలు క్రితంఅమెరికా మధ్యంతర ఎన్నికల ఫలితాలు అంగీకరిస్తున్నట్టు డోనల్డ్ ట్రంప్ ప్రకటన

   రిపబ్లికన్ పార్టీకి కంచుకోటలుగా ఉండే కొన్ని నియోజకవర్గాలలో డెమోక్రటిక్ అభ్యర్థులు విజయం సాధించిన తర్వాత, అధ్యక్షుడు డోనల్డ్ ట్రంప్ న్యూయార్క్ టైమ్స్‌తో మాట్లాడారు.

   న్యూయార్క్ టైమ్స్‌కు ఇచ్చిన ఆ ఇంటర్వ్యూలో.. మధ్యంతర ఎన్నికల ఫలితాలను పూర్తిగా అంగీకరించడానికి తాను సిద్ధంగా ఉన్నానని ట్రంప్ చెప్పారు.

   ప్రతిపక్షంతో కలిసి పనిచేయడం గురించి కూడా మాట్లాడారు.

   "అవును, ఈ ఫలితాలను అంగీకరించడానికి నేను పూర్తిగా సిద్ధంగా ఉన్నాను" అని ట్రంప్ అన్నారు.

   " వారితో కలిసి పనిచేయడానికి ఎదురుచూస్తున్నాం," అని చెప్పారు.

   " కలిసి బహుశా ఒక మార్గాన్ని కనుగొనగలం," అని ట్రంప్ అన్నారు.

   అయితే, కొంతసేపటి క్రితం ట్రంప్ తన సోషల్ మీడియా హ్యాండిల్ 'ట్రూత్ సోషల్'లో 'వీటో' అని రాసి ఉన్న ఒక టోపీ ఫోటోను షేర్ చేశారు. .

   సెనేట్, హౌస్‌లో తన మెజారిటీని కోల్పోయిన తర్వాత కూడా ట్రంప్ తన అధ్యక్ష అధికారాలన్నింటినీ వినియోగిస్తానని సూచిస్తూ, ఆయన గతంలో బీబీసీ యూఎస్ వార్తా భాగస్వామి అయిన సీబీఎస్‌తో చెప్పారు.

   

   ఫొటో సోర్స్, Getty Images

2. 47 నిమిషాలు క్రితంవిరాట్, రోహిత్, గిల్‌కు కొత్త జెర్సీ

   

   ఫొటో సోర్స్, @BCCI

   ఆక్లాండ్‌లో న్యూజిలాండ్‌తో జరిగిన మొదటి వన్డే మ్యాచ్‌కు ముందు భారత క్రికెట్ జట్టు, ఆ దేశపు రగ్బీ దిగ్గజం కెవెన్ మీలాముతో సమావేశమైందని బీసీసీఐ పేర్కొంది.

   ఈ సమావేశంలో, భారత కెప్టెన్ శుభ్‌మన్ గిల్, సీనియర్ బ్యాటర్లు రోహిత్ శర్మ, విరాట్ కోహ్లీకి మీలాము రగ్బీ జెర్సీలను బహుకరించారు.

   "ఆట ప్రారంభానికి ముందు కెప్టెన్ శుభ్‌మన్ గిల్, విరాట్ కోహ్లీ, రోహిత్ శర్మలు న్యూజిలాండ్ రగ్బీ దిగ్గజం కెవెన్ మీలామును కలిశారు. ఈ సందర్భంగా ఆయన వారికి ప్రత్యేకంగా రూపొందించిన రగ్బీ జెర్సీలు అందించారు" అని బీసీసీఐ తన 'ఎక్స్' ఖాతాలో పేర్కొంది.

   ఆక్లాండ్‌లో జరిగిన ఈ మొదటి వన్డేలో, టాస్ గెలిచిన భారత కెప్టెన్ శుభ్‌మన్ గిల్ మొదట బౌలింగ్ ఎంచుకున్నారు. 38 ఓవర్లు ముగిసే సరికి 9 వికెట్లు కోల్పోయి 181 పరుగులు మాత్రమే చేసింది. అర్షదీప్ నాలుగు వికెట్లు తీయగా, అన్షుల్ కాంబోజ్, గుర్నూర్ బ్రార్ చెరో రెండు వికెట్లు తీసుకున్నారు.

   2027 వన్డే ప్రపంచ కప్‌ను లక్ష్యంగా పెట్టుకున్న భారత్, ఈ ఐదు మ్యాచ్‌ల సిరీస్‌ను ఈడెన్ పార్క్‌లో ప్రారంభించింది.

   ఈ సిరీస్‌తో రోహిత్ శర్మ, విరాట్ కోహ్లీ తిరిగి వన్డే ఫార్మాట్‌లోకి అడుగుపెట్టారు. న్యూజిలాండ్‌లో వన్డేల్లో భారత్ చివరిసారిగా ఫిబ్రవరి 2019లో విజయం సాధించింది. ఆ తర్వాత జరిగిన రెండు సిరీస్‌లలో భారత్ వరుసగా 3-0, 1-0 తేడాతో ఓటమిని చవిచూసింది (రెండవ పర్యటనలో రెండు మ్యాచ్‌లు వర్షం కారణంగా రద్దయ్యాయి).

3. 49 నిమిషాలు క్రితం“నేను బరిలో ఉండుంటేనా...” అమెరికా మధ్యంతర ఎన్నికలపై ట్రంప్ స్పందన

   

   ఫొటో సోర్స్, Getty Images

   రిపబ్లికన్ పార్టీకి ప్రతికూల ఫలితాలు వస్తున్న వేళ డోనల్ట్ ట్రంప్ తన సోషల్ మీడియా వేదిక 'ట్రూత్ సోషల్'లో స్పందించారు.

   "నేను ఎన్నికల బరిలో లేను. ఒకవేళ నేను ఉండి ఉంటే, మనం భారీ మెజారిటీతో గెలిచేవాళ్లం" అని ట్రంప్ రాసుకొచ్చారు.

   ఈ ఎన్నికల్లో తాను అభ్యర్థిని కాదని, ఒకవేళ బరిలో ఉండి ఉంటే ఫలితాలు వేరుగా ఉండవని, తన పార్టీ భారీ మెజారిటీతో గెలిచి ఉండేదని ఆ పోస్ట్‌లో ట్రంప్ పేర్కొన్నారు.

   మధ్యంతర ఎన్నికల్లో రిపబ్లికన్ అభ్యర్థుల ఓటమికి వారే కారణమని, తనకు సంబంధం లేదని అర్థం వచ్చేలా ట్రంప్ చేసిన ప్రకటన ఉందని విశ్లేషకులు చెబుతున్నారు.

4. ఒక గంట క్రితంహైదరాబాద్‌లో ‘7 కోట్ల రూపాయల’ ఫేక్ కరెన్సీ స్వాధీనం

   

   ఫొటో సోర్స్, ANI Screen Grab

   హైదరాబాద్ శివారు ప్రాంతంలో నకిలీ కరెన్సీ ముఠాను పోలీసులు పట్టుకున్నారు. వారి నుంచి ‘7 కోట్ల రూపాయల’ ఫేక్ నోట్లను స్వాధీనం చేసుకున్నారు.

   అబ్దుల్లాపూర్‌మెట్ పోలీసులు, షాద్‌నగర్ ఎస్‌ఓటి కలిసి ఈ రాకెట్‌ను పట్టుకున్నాయి.

   పోలీసులు నలుగురు నిందితులను అరెస్టు చేసి, మొత్తం రూ. 6.78 కోట్ల నకిలీ రూ. 500 కరెన్సీ నోట్లు స్వాధీనం చేసుకున్నారు.

   జాతీయ రహదారి -65పై పోలీసులు నవంబర్ 1న తనిఖీలు చేపట్టారు. ఒక కారును ఆపి తనిఖీలు చేస్తే అసలు గుట్టు బయటపడింది. మడుపోజు కరుణాకర్, చిన్నొల్ల మాణిక్య రెడ్డి, చెరుకుపెల్లి రత్నాకర్ రెడ్డి, కరణం అజయ్ కుమార్‌ను అరెస్టు చేశారు.

   ఈ రాకెట్‌లో ప్రమేయం ఉన్న ఇతర వ్యక్తులను గుర్తించేందుకు తదుపరి దర్యాప్తు కొనసాగుతోందని పోలీస్ కమిషనర్ డాక్టర్ తరుణ్ జోషి చెప్పారు.

5. 2 గంటలు క్రితంఏడు విమానాలకు బాంబు బెదిరింపులు, యూరప్ వ్యాప్తంగా కలకలం

   

   ఫొటో సోర్స్, Getty Images

   యూరప్ వ్యాప్తంగా 7 విమానాలకు బాంబు బెదిరింపులు వచ్చాయి. దీంతో భద్రతా సిబ్బంది తనిఖీలు చేపట్టారు. వీటిలో రెండు యూకే నుంచి బయలుదేరాయి.

   డబ్లిన్, లిస్బన్ నుంచి బయలుదేరిన రెండు రైనాఎయిర్ విమానాలు రోమ్‌లో ల్యాండ్ చేసి సోదాలు చేశారు. అయితే, ఎటువంటి పేలుడు పదార్థాలు లభించలేదని ఆ నగరంలోని ఫియుమిసినో విమానాశ్రయ వర్గాలు బీబీసీకి తెలిపాయి.

   డబ్లిన్ విమానం దిగే వరకు ఇటాలియన్ వైమానిక దళం దానికి రక్షణగా నిలిచింది. అధికారులు పోలాండ్, స్పెయిన్, బల్గేరియాలోని విమానాల్లో కూడా తనిఖీలు చేపట్టారు.

   ఎలాంటి పేలుడు పదార్థాలు లభించకపోయినప్పటికీ, కావాలనే గగనతల ప్రయాణానికి అంతరాయం కలిగించేందుకు గందరగోళపరిచేందుకు ఇలాంటి ప్రయత్నాలు జరిగాయా అనే కోణంలో దర్యాప్తు సాగుతోంది.

   "దురుద్దేశపూర్వక బూటకపు బెదిరింపులు"గా యూకే ప్రభుత్వం అభివర్ణించింది.

   "ప్రపంచంలోనే అత్యంత పటిష్టమైన విమానయాన భద్రతా వ్యవస్థలలో ఒకటి తమ వద్ద ఉందని, ఇలాంటి దురుద్దేశపూర్వక బూటకపు బెదిరింపులతో పాటు, ఏవైనా ముప్పులను ఎదుర్కొనే శక్తి ఉంది" అని ఒక ప్రకటనలో పేర్కొంది.

   ప్రయాణీకుల విమానాల్లో బాంబు బెదిరింపులు "అంత తరచుగా జరగవని", అందువల్ల తాజా ఘటనలు "అసాధారణమైనవని" విమానయాన భద్రతా నిపుణుడు పాల్ మేసన్ అన్నారు.

6. 3 గంటలు క్రితంఫ్లోరిడాలో రిపబ్లికన్ అభ్యర్థిపై భారత సంతతికి చెందిన పియా దండియా విజయం

   

   ఫొటో సోర్స్, @PiaforCongress

   అమెరికా మధ్యంతర ఎన్నికల ఓట్ల లెక్కింపు కొనసాగుతోంది. కొన్నిచోట్ల ఫలితాలు వస్తున్నాయి.

   డెమోక్రటిక్ పార్టీ అభ్యర్థి, భారత సంతతికి చెందిన పియా దండియా ఫ్లోరిడాలోని 22వ కాంగ్రెస్ నియోజకవర్గం స్థానాన్ని గెలుచుకున్నట్టు ఛానల్ సీబీఎస్ పేర్కొంది. ఆమె రిపబ్లికన్ అభ్యర్థి కేసీ ఆస్కార్‌ను ఓడించారు.

   2026 మధ్యంతర ఎన్నికలకు ముందు ఫ్లోరిడా గవర్నర్ రాన్ డెసాంటిస్ చేపట్టిన కాంగ్రెస్ నియోజకవర్గాల పునర్విభజన ప్రక్రియలో భాగంగా తిరిగి ఏర్పడ్డ ఈ కొత్త నియోజకవర్గంలో దండియా విజయం డెమోక్రటిక్ పార్టీకి దక్కిన ఘనతగా నిలిచింది.

   దండియా గతంలో హార్లెమ్‌లో ఉపాధ్యాయురాలిగా, ఉన్నత పాఠశాల ప్రిన్సిపాల్‌గా పనిచేశారు. ఆమె వైట్ హౌస్ ఫెలోగా కూడా సేవలందించారు. ఆపిల్‌లో కూడా పనిచేశారు.

   ఎన్ఆర్ఐ సంతతి అయిన దండియా పామ్ బీచ్ కౌంటీలో పుట్టి పెరిగారు. తన ప్రచారంలో విద్య, ద్రవ్యోల్బణ సవాళ్లు, ఆర్థిక అవకాశాలను కీలక అంశాలు ప్రస్తావించారు.

   ఆగస్టులో జరిగిన డెమోక్రటిక్ పార్టీ ప్రైమరీ ఎన్నికల్లో దండియా గెలుపొందారు.

   దాండియా ప్రత్యర్థి అయిన కేసీ అస్కార్ నేపుల్స్‌కు చెందిన ఒక వ్యాపారవేత్త, మెరైన్ కార్ప్స్ మాజీ సైనికుడు. ప్రచార సమయంలో, ఆయన తనను తాను అధ్యక్షుడు డొనాల్డ్ ట్రంప్, ఆయన ప్రభుత్వ విధానాల మద్దతుదారుగా అభివర్ణించుకున్నారు.

7. 4 గంటలు క్రితంఘోర రైలు ప్రమాదం: స్పెయిన్ రవాణా శాఖ మంత్రి రాజీనామా

   

   ఫొటో సోర్స్, Reuters

   స్పెయిన్‌లో దాదాపు 69 మంది మరణించి, పదుల సంఖ్యలో గాయపడిన రైలు ప్రమాదం జరిగిన ఆరు రోజుల తర్వాత ఆ దేశ రవాణా శాఖ మంత్రి ఆస్కార్ ప్యూంటె రాజీనామా చేశారు.

   రాజధాని మాడ్రిడ్‌కు దక్షిణాన ఉన్న ఉర్దా పట్టణం సమీపంలో గత బుధవారం జరిగిన దుర్ఘటన నేపథ్యంలో ఆయన కాంగ్రెస్‌లో తన నిర్ణయాన్ని ప్రకటించారు.

   "స్పెయిన్ వంటి దేశంలో, ఏడాదిలోపు ఇంతటి తీవ్రత కలిగిన రెండు ప్రమాదాలు జరిగిన తర్వాత ఒక రవాణా శాఖ మంత్రి పదవిలో కొనసాగలేను" అని ఆయన అన్నారు. ఇదే మార్గంలో జనవరిలో జరిగిన రైలు ప్రమాదాన్ని ఆయన గుర్తుచేశారు.

   గత వారం జరిగిన ప్రమాదం ఐరోపా ఆధునిక చరిత్రలో అత్యంత ఘోరమైన రైలు ప్రమాదాలలో ఒకటి కాగా, 2013 తర్వాత స్పెయిన్‌లో జరిగిన అత్యంత ఘోరమైన ప్రమాదం కూడా ఇదే.

8. 4 గంటలు క్రితంఅమెరికా మధ్యంతర ఎన్నికలు: కొన్ని రాష్ట్రాల్లో కొనసాగుతున్న పోలింగ్.. కొన్ని చోట్ల మొదలైన లెక్కింపు

   

   ఫొటో సోర్స్, Getty Images

   అమెరికాలో చాలా రాష్ట్రాల్లో పోల్స్ ముగిశాయి. ఓట్ల లెక్కింపు కూడా మొదలైంది.

   కెంటకీ, ఇండియానా, ఫ్లోరిడా, సౌత్ కరోలినా, వెర్మాంట్, వర్జీనియా, జార్జియా, న్యూ హాంప్‌షైర్, ఒహియో, నార్త్ కరోలినా, వెస్ట్ వర్జీనియాలో ఓటింగ్ ఇంకా కొనసాగుతోంది.

   డెమొక్రటిక్ సెనేటర్ మార్క్ ఆర్. వార్నర్ తన సీటు నిలబెట్టుకుంటారని సీబీఎస్ న్యూస్ అంచనా వేస్తోంది. ఇది ఊహించిన ఫలితమని అంటున్నారు.

   జార్జియా సెనేట్ రేసు డెమొక్రటిక్ అధికారంలో ఉన్న జోన్ ఒసాఫ్‌కు వెళ్తుందని అంచనా ఉంది.

   యూఎస్ ఓటర్ల సర్వేలో ఆర్థిక వ్యవస్థ, ప్రజాస్వామ్య స్థితి ఓటర్లను ప్రధానంగా ప్రభావితం చేసినట్టు తేలింది.

   ఈ ఫలితాలు డెమొక్రాట్లకు కొంత ఊరటనిస్తాయని విశ్లేషకులు అంచనా వేస్తున్నారు.

   అమెరికా అధ్యక్షుడు డొనాల్డ్ ట్రంప్‌ ఫలితాలపై ఆశాజనకంగా ఉన్నారని ఒక అధికారి బీబీసీతో చెప్పారు

9. 4 గంటలు క్రితంగుడ్ మార్నింగ్

   బీబీసీ న్యూస్ తెలుగు లైవ్ పేజీకి స్వాగతం.

   నేను బీబీసీ ప్రతినిధి ఖగేష్, మధ్యాహ్నం 2 గంటల వరకు ముఖ్యమైన అప్‌డేట్స్ మీకు అందిస్తాను.

   నిన్నటి లైవ్ పేజీ కోసం ఈ లింక్‌ను క్లిక్ చేయండి