TOOS, Iran oo sheegtay inay xirtay marinka Hormuz waxayna ku eedaysay Maraykanka iyo Israel inay jabiyeen heshiiskii xabad joojinta.

Tebin toos ah

1. 7 Saacadood ka horIran oo xirtay marinta Hurmuz

   

   Xigashada Sawirka, Reuters

   Ciidamada Badda ee Ilaalada Kacaanka Iran ayaa sheegay in marinka Hormuz uu ka xiran yahay dhammaan maraakiibta, sababo la xiriira xadgudubyada xabad joojinta ee Mareykanka iyo Israa'iil.

   Ciidanka badda ayaa digniin adag u diray dhammaan maraakiibta, "Ha u dhowaan marin-biyoodka Hormuz, haddii kale, ammaankiinna waa la carqaladayn doonaa."

   Waxay ku soo beegmaysaa iyadoo Israa’iil iyo Xisbullah ay labaduba midba midka kale ku eedeeyeen inuu jabiyay xabbad joojin cusub

2. 20 Juunyo 2026Sirdoonka Iran oo dad cusub xiray gobolka Ilam

   Hay'adda sirdoonka Iran ayaa ku dhawaaqday in saddex qof lagu xiray gobolka Ilam oo lala xiriirinayo mudaaharaadyadii bishii Janaayo ee sanadkii hore.

   Sida ay sheegtay hay'addu, shaqsiyaadkan waxaa lagu eedeynaaa "Hogaaminta", "burburin iyo gubasho hanti dadweyne iyo goobo kale," iyo "toogasho".

   Wasaarada sirdoonka ayaa sidoo kale sheegtay in 14 qof oo kale ay ku soo qab qabteen isla gobolkaasi, waxayna ku sifeysay in ay ka tirsan yihiin kooxaha qaswadayaasha wadooyinka, waxayna sheegtay in ay ilaalinayeen fulinta awaamiirta cadawga inta uu socdo dagaalka.

   Dhanka kale, Nasser Atbati, oo ah madaxa cadaaladda ee galbeedka Asarbayjan, ayaa sheegay in tan iyo markii ay bilowdeen weerarada Mareykanka iyo Israa’iil ay ku hayaan Iran, ugu yaraan 480 qof ayaa loo xiray eedeymo la xiriira dagaal.

   Waxa uu sheegay in sidoo kale 10 qof lagu xukumay eedeymo ah inay "basaasiin u ahaayeen Mossad."

   Xarigan ayaa imaanaya iyadoo hay’adaha xuquuqul insaanka ay sheegeen inay sare u kaceen howlgallada ka dhanka ah dadka dhaleeceeya iyo dibadbaxayaasha ee Iran ka dib markii ay bilowdeen isku dhacyada militari.

   Amnesty International ayaa sheegtay in tan iyo markii ay bilowdeen weerarrada Mareykanka iyo Israa’iil ay ku hayaan Iran, ugu yaraan 44 qof lagu fuliyay dil, in ka badan 6,000 oo kalena la xiray.

3. 20 Juunyo 2026Iran oo sheegtay in si buuxda loogu soo celinayo hantiteedii la xayiray

   Mohammad Jafar Ghaempanah, oo ah madaxweyne ku xigeenka fulinta Iran, ayaa sheegay in iyada oo laga duulayo heshiiska isfahamka ee u dhexeeya Iran iyo Maraykanka, in hantida Iran ee la xayiray "si buuxda loo sii deyn doono."

   Waxa uu sheegay in wadarta hantida Iran ee la sii dayn doono ay u badan tahay 25 bilyan oo doolar.

   Wareysi uu siiyay IRNA ayuu Mr. Ghaempanah ku sheegay in safarka Mohammad Baqer Qalibaf, guddoomiyaha baarlamaanka Iran, oo ay weheliyaan kooxda wadahadalka Iran ee Qatar lagu go'aamiyay sida iyo qaabka loo sii deynayo hantida Iran.

   Madaxweyne ku xigeenka fulinta ee Iran, waxa uu tilmaamay in harka dagaalka ee dalka laga qaado ay hoos u dhigayso culaysyada dhaqaale ee haysta dadka, waxaanu intaa ku daray: “Hantida Iran ee la sii daayo waa in loo adeegsadaa horumarinta kaabayaasha dhaqaalaha, sida waddooyinka, iyo garoomada diyaaradaha waxay dadka siin doonaan daryeel iyo raaxaysi.

   Goor sii horreysay, madaxweynaha Mareykanka Donald Trump ayaa sheegay in hantida Iiraan ee la xayiray intii uu socday dagaalka ay tahay in dalka lagu soo celiyo.

   Waxa uu yiri “Lacagtayagii maaha, lacagtani waa lacagtoodii oo waanu xayirnay, waxa ay ila tahay in mar uun aanu soo celino”.

4. 20 Juunyo 2026Wasiirka Arrimaha Gudaha Pakistan oo gaaray magaalada Mashhad ee Iran

   

   Xigashada Sawirka, IRNA

   Wasiirka arrimaha gudaha Pakistan Mohsin Naqvi ayaa saaka gaaray magaalada Mashhad.

   IRNA oo soo xiganaysa ilo-wareedka gobolka Khrasan Razavi ayaa sheegtay in uu marka hore booqan doono goobta Imaam Reza ka dibna uu u dhoofi doono magaalada Tehran si uu ula hadlo mas’uuliyiinta.

   Sida ay sheegayaan wararka, Wasiirka Arrimaha Gudaha Pakistan ayaa lagu wadaa in inta uu safarkan ku jiro uu madaxda Iran kala hadlo dib u soo celinta wadahadalka tooska ah ee u dhaxeeya Mareykanka iyo Iran ee ka dhacaya Switzerland.

   Esmail Baghaei, oo ah afhayeenka wasaaradda arrimaha dibadda ee Iran, ayaa sidoo kale sheegay in booqashada wasiirka arrimaha gudaha Pakistan ay tahay sii wadida dadaallada uu waddanku ka wado wadahadallada Iran iyo Mareykanka.

5. 20 Juunyo 2026Afhayeenka Wasiirada Arrimaha Dibadda Iran oo ka falceliyay hadalka Wasiirka Arrimaha Dibadda ee Faransiiska

   

   Xigashada Sawirka, Getty Images

   Esmail Baghaei, oo ah afhayeenka wasaaradda arrimaha dibadda Iran, ayaa ka fal celiyay hadalkii shalay ka soo yeeray wasiirka arrimaha dibadda Faransiiska Jean-Noël Barrot.

   Qoraal uu ku daabacay barta X, Mr. Baghaei wuxuu u arkay "munafaqnimo" inay tahay mid ka mid ah astaamaha caanka ah ee dhaqanka siyaasadeed ee Faransiiska.

   Isaga oo tixraacaya qoraalka munaafaqiinta (Tartuffe) ee uu qoray qoraagii caanka ahaa ee Faransiiska ahaa Moliere, waxa uu qoray, “Munaafiqnimadu waa wax wanaagsan oo curfi noqotay”.

   Afhayeenka wasaaradda arrimaha dibadda ee Iran ayaa aamusnaanta Faransiiska ku tilmaamay dagaalka Mareykanka iyo Israa’iil ay kula jiraan Iran “mid ay doorteen”.

   Shalay, Wasiirka Arrimaha Dibadda ee Faransiiska ayaa sheegay in dunidu aysan hilmaamin "xasuuqii" dibad baxayaasha Iran bishii Janaayo, wuxuuna sheegay in dadka Iran ay yihiin " khasaarihii ugu weynaa ee dagaalka iyo cawaaqibkiisa."

6. 20 Juunyo 2026Laba qarax oo dilay todoba qof oo shacab ah

   

   Xigashada Sawirka, Al-Alam

   Labo qarax oo ka dhacay wadada dhinaceeda waqooyi galbeed ee Pakistan ayaa waxaa ku dhintay 7 qof oo rayid ah.

   Booliska gobolka Khyber Pakhtunkhwa ayaa sheegay in qaraxa koowaad lala beegsaday gaari, waxaana qaraxa labaad uu burburiyay gaari kale iyada oo dhaawacyada loo qaaday isbitaalka.

   Kooxda xagjirka ah ee Tehreek-e-Taliban Pakistan ayaa dhaqdhaqaaq ka wada gobolka, balse ilaa hadda ma jirto koox sheegatay mas’uuliyadda weerarradan.

   Pakistan ayaa marar badan ku eedaysay Afgaanistaan ​​in ay gabaad siiso dagaalyahanada ka faa’iidaysta xuduudka labada dal si ay weeraro uga geystaan.

7. 20 Juunyo 2026Axios: Araqchi oo la filayo inuu u safro Switzerland maanta

   

   Xigashada Sawirka, .

   Shabakadda Axios ayaa sheegtay, iyadoo soo xiganeysa ilo xog ogaal ah, in wasiirka arrimaha dibadda Iran Cabbaas Araqchi uu qorsheynayo inuu u safro dalka Switzerland maalinta Sabtida, inkastoo aan weli la dhameystirin jadwalka oo laga yaabo inuu isbedelo.

   Axios ayaa hore u sheegtay in ergeyga Aqalka Cad Steve Whittaker uu ku sii jeedo Switzerland, iyo in sarkaal kale oo ka tirsan maamulka Mareykanka, Jared Kushner, uu isna dalkaas ku sugan yahay.

   Waxaa la filayaa in wareegii koowaad ee wadahadalka heshiiska suurtagalka ah ee u dhexeeya Iran iyo Maraykanka uu ka dhici doono magaalada Bürgenstock ee dalka Switzerland, balse taariikhda rasmiga ah weli lama shaacin.

   Axios ayaa wariyay, isagoo soo xiganaya ilo ku sugan mid ka mid ah dalalka dhexdhexaadinta ah, in Cabbaas Araqchi uu u sheegay dhowr ka mid ah raga dhiggiisa Jimcihii in xabbad joojinta Lubnaan ay tahay "arrin go'aamineysa" mowqifka Iran iyo mid go'aamindoonta wadahadalka Iran iyo Mareykanka.

   Ilaha kale ee ka socda wadamada dhexdhexaadinta ayaa sidoo kale Axios u sheegay in saraakiisha Iran ay ku nuuxnuuxsadeen inay doonayaan inay hubiyaan in xabad joojin u dhaxaysa Israel iyo Xisbullah ee Lubnaan la sameeyo ka hor intaysan u safrin Switzerland.

8. 20 Juunyo 2026Shan qof ayaa ku dhintay weerarrada joogtada ah ee Israa'iil ay ku hayso Lubnaan inkastoo heshiis xabbad joojin ah la gaaray

   

   Xigashada Sawirka, EPA

   Wararka ka imaanaya koonfurta Lubnaan ayaa sheegaya in ugu yaraan shan qof ay ku dhinteen duqeymo cusub oo ay fuliyeen diyaaradaha Israel, inkastoo Israa’iil ay Jimcihii ku dhawaaqday xabbad joojin ay la gashay Xisbullahda Lubnaan.

   Wakaaladda wararka ee Lubnaan ayaa sheegtay in diyaaradaha dagaalka ee Israa’iil iyo kuwa aan duuliyaha lahayn ay weerarro is-xig-xiga ka fuliyeen deegaanka Nabatieh, oo ay ku burburiyeen dhismayaal la deggan yahay iyo guryo. Isla markaana ay madaafiicda ciidamada Israa’iil ku garaaceen goobtaasi.

   Joojinta rasaasta ay isweydaarsanayeen Israa’iil iyo Xisbullah ayaa qayb muhiim ah ka ahayd heshiiskii Iran iyo Mareykanka ee lagu soo afjarayay dagaalka.

   Shalay, wasiirka amniga qaranka Israa’iil Itamar Ben-Giver waxa uu yiri, “Dhammaan Lubnaan waa in ay gubataa,” ka dib markii ciidammada Israa’iil ay ku dhawaaqeen in afar ka mid ah askartooda ay ku dileen Lubnaan.

   Arrintan ayaa ku soo beegantay iyadoo lagu soo waramayo in ergayga Maraykanka Steve Whittaker uu ku wajahan yahay dalka Switzerland si uu uga qayb galo wada-hadallada ugu horreeya ee uu la yeelanayo Iran si heshiis looga gaadho barnaamijka Nukliyeerka ee Tehran.