TOOS, Madaxweynayaasha Ruushka iyo Imaaraadka Carabta oo ka wadahadlay dagaalka Iiraan, halka wasiir Pakistani ah gaaray Tehran

Tebin toos ah

1. 2 Daqiiqadood ka horNin gaari ku jiirsiiyay dad lugeynayay dalka Talyaaniga oo dhaawacay siddeed qof

   

   Xigashada Sawirka, Reuters

   Nin ayaa gaarigiisa ku jiirsiiyay dad lugeynayay magaalada Modena ee waqooyiga Talyaaniga Sabtidii, isagoo dhaawacay siddeed qof, afar qof ayaa halis ah, sida ay sheegeen mas'uuliyiintu.

   Waxa ku jiray haweeney labada lugood laga jaray.

   Ka dib markii gaarigu uu istaagay dukaan daaqadiis , darawalkii ayaa soo baxay isagoo midi wata oo dhaawacay qof jidka marayay oo eryaday, ka hor inta aan la qaban tuhmanaha.

   Eedeysanaha, oo 31 jir ah, ayay mas'uuliyiintu ku sheegeen inuu yahay muwaadin Talyaani ah oo asal ahaan ka soo jeeda Morocco.

   Ra'iisul Wasaaraha Talyaaniga Giorgia Meloni oo baajisay safar ay ku tagi lahayd Qubrus isla markaana ku tilmaamay dhacdada "mid aad u daran", ayaa maantay booqatay dadkii dhaawacmay iyadoo ay la socdaan Madaxweyne Sergio Mattarella.

   Waxay sidoo kale la kulantay Luca Signorelli, oo ahaa qofkii soo farageliyay, waxayna uga mahadcelisay ficilladiisa.

   "Waxa ka dhigaya qofka caadiga ah geesinimo waa waqtiga uu wadnuhu doorto inuu sameeyo wanaag, xitaa marka ay taasi ku lug leedahay khatar," ayay ku qortay X, waxayna baahisay sawir ay is marxabeynayaan.

   Dhacdadu waxay dhacday abbaare 16:30 (14:30 GMT), markii gaariga oo xawaare sare ku socday uu ku dhacay dadkii lugeynayay ee ku sugnaa Via Emilia oo ku taal meel u dhow kaniisadda caanka ah ee Modena, koonfur-bari ee Milan.

2. 3 Saacadood ka horKuuriyada Koonfureed oo dalbatay mowqifka Iran ee weerarka lagu qaaday markabkeeda oo marayay marinka Hormuz

   Kuuriyada Koonfureed ayaa ka codsatay Iran inay caddeyso mowqifkeeda ku aaddan weerarkii dhawaan lagu qaaday mid ka mid ah maraakiibteeda xamuulka ah neel u dhow marin biyoodka Hormuz.

   Sida laga soo xigtay Wasaaradda Arrimaha Dibadda ee Kuuriyada Koonfureed, Wasiirka Arrimaha Dibadda Cho Hyun ayaa khadka taleefanka kula hadlay dhiggiisa Iran, Seoul iyo Tehran waxay sii wadi doonaan xiriirkooda iyo wada tashigooda si loo xaqiijiyo ammaanka marin biyoodka Hormuz.

   Sarkaal u hadlay Kuuriyada Koonfureed ayaa horay u sheegay in ay aad u yar tahay suurtagalnimada in weerarka uu fuliyo dal aan Iran ahayn.

   Sida laga soo xigtay saraakiisha Seoul, markabka xamuulka ah ee HMM Namo waxaa ku dhacay "laba madfac oo aan la aqoonsan" May 4-teedii.

   Weerarka ayaa waxyeello u geystay markabka wuxuuna dab qabadsiiyay qolka matoorka.

   Markabkan ayaa ku safrayay calanka Panama, waxaana gacanta ku haysa shirkadda maraakiibta ee Kuuriyada Koonfureed ee HMM.

   Wasaaradda arrimaha dibadda ee Kuuriyada Koonfureed ayaa ku dhawaaqday Jimcihii May 15, in ay u qaaday markabka xamuulka ah ee waxyeelladu gaartay dalkeeda.

3. 4 Saacadood ka horNetanyahu oo sheegay in uu maanta Trump taleefoon kula hadli doono

   

   Xigashada Sawirka, Getty Images

   Ra'iisul wasaaraha Israa'iil ayaa sheegay in uu Donald Trump kala hadli doono arrimaha Iran maanta.

   Benjamin Netanyahu ayaa maanta ka sheegay shir gaar ah oo ay dawladda Israa’iil ku lahayd xuska maalinta Qudus:

   "Indhahayagu waxay u furan yihiin Iran, waxaan maanta la hadlayaa saaxiibkeen Madaxweyne Trump, sida aan sameeyo dhowrkii maalmoodba mar, hubaal waxaan maqli doonaa saameynta safarkiisa Shiinaha iyo laga yaabee arrimo kale, waxaa jira fursado badan, waxaana diyaar u nahay xaalad kasta."

4. 4 Saacadood ka horWax ka ogow Tuulada Soomaalida ee UK ee aadka loo booqan jiray 1904

   

   Xigashada Sawirka, Somali Village/Yahya Birt

   Sheekada ku saabsan sida tuulo Soomaali ah ay u noqotay xarunta bandhig weyn oo lagu qabtay Bradford sanadkii 1904 ayaa hadda lagu soo bandhigayaa meel wax yar u jirta halkii markii hore laga dhisay.

   Tuuladaas waxaa muddo lix bilood ah sanadkii 1904 lagu dejiyay 57 rag, dumar iyo carruur Muslimiin Soomaali ah oo laga keenay Somaliland kuna noolaa Lister Park, waxaana booqday tobannaan kun oo qof.

   Iyadoo qayb ka ahayd Bandhiggii Bradford ee 1904, inta badan faa'iidada laga helay Tuulada Soomaalida waxaa loo isticmaalay horumarinta ururinta farshaxanka ee Cartwright Hall ee ku taal Lister Park.

   Bandhigga Weaving Together Industry, Culture and Empire, oo ka furmaya Cartwright Hall 9-ka May, waxaa ku jira waxyaabo qadiimi ah oo la helay, iyo sidoo kale kaarar boosteejo, sawirro iyo filimaan casri ah oo laga sameeyay tuulada iyo bandhigga.

   Dadka howsha wada Yaxya Birt iyo Cabira Xuseen ayaa sheegay in noocyadan kooxaha socdaalka ah ay aad caan uga ahaayeen Yurub iyo Ameerika xilliyadii Victoria iyo Edwardian.

   Halkaan ka sii aqri...

5. 5 Saacadood ka horMarkabka USS Gerald R. Ford ayaa ku laabtay Maraykanka ka dib 326 maalmood oo hawl gal ah

   

   Xigashada Sawirka, EPA

   Wasaaradda Difaaca Mareykanka ayaa xaqiijisay in markabka USS Gerald R. Ford oo la geeyay bariga dhexe ka hor inta uusan bilaaban dagaalka Iran uu dib ugu soo laabtay Mareykanka sabtidii ka dib howlgal qaatay 326 maalmood.

   Tani waxay ahayd hawlgalkii ugu dheeraa ee ay fuliyaan maraakiibta xambaara diyaaradaha Maraykanka tan iyo dagaalkii Vietnam.

   Xoghayaha Difaaca Mareykanka Pete Hegsett ayaa ku sugan magaalada Norfolk ee gobolka Virginia, si uu u soo dhaweeyo markabka ugu weyn ee diyaaradaha xambaara.

   Sida laga soo xigtay militariga Mareykanka, markabka ayaa ka qeyb qaatay howlgalada Mareykanka ee Caribbean-ka, intii uu howlgalka ku jiray, halkaasoo ciidamada Mareykanka ay weerareen doomo looga shakiyay inay ka ganacsanayeen daroogooyinka, oo ay sidoo kale gacanta ku dhigeen markab qaada shidaalka oo cunaqabateyn saarneed, waxaana la xiray hogaamiyihii Venezuela Nicolas Maduro.

   Markabka ayaa markaas loo diray bariga dhexe si uu uga qayb qaato hawlgalada dagaalka ee ka dhanka ah Iran.

   Intii lagu guda jiray howlgalka dheer, dab ayaa ka kacay goobta dharka lagu dhaqdo ee markabka 12-kii Maarso, waxaana ku dhaawacmay labo badmaaxiin ah, waxaana uu burbur xooggan gaarsiiyay ilaa 100 sariirood. Sidoo kale waxaa la sheegay in dhibaato baahsan ay soo wajahday bulaacadaha markabka iyo nidaamka fayadhowrka inta uu badda ku jiray.

6. 5 Saacadood ka horWeerar lagu qaaday warshadda tamarta nukleyrka ee Imaaraadka

   

   Xigashada Sawirka, Getty Images

   Saraakiisha Abu Dhabi ayaa sheegay in la xakameeyay dab ka dhashay weerar ay diyaarad Drone ah ku qaadday goob dhalisa korontada ee warshadda Nukliyeerka ee Barakah.

   Xafiiska warbaahinta Abu Dhabi ayaa sheegay in aysan jirin cid wax ku noqotay dhacdadan, heerka badqabka shucaacana uusan waxba iska bedelin.

   Sidoo kale hay’adda maamusha Nukliyeerka ee Imaaraadka ayaa warkan xaqiijisay waxayna shaacisay in warshadda korontada ay sii wadi doonto howlaheeda caadiga ah.

   Warshada Korontada Nukliyeerka ee Barakah oo ku taalla gobolka Dhafra ee dalka Imaaraadka Carabta ayaa ah warshaddii ugu horreysay ee tamarta Nukliyeerka ah ee laga dhaliyo dalalka Carabta.

   Hadalka Imaaraatka laguma xusin cidda ka danbeysa weeraradaasi. Iran waxay Imaaraatka u aqoonsan tahay saaxiib firfircoon ee weerarada Maraykanka iyo Israel.

7. 6 Saacadood ka hor12 xaqiiqo oo ku saabsan bulshada sirta ah ee Illuminati

   

   Xigashada Sawirka, Getty Images

   Illuminati waa magaca loo bixiyay bulsho la abuuray 245 sano ka hor.

   Mujtamaca ayaa sannado badan ahaa mawduucyada aragtiyo, iyadoo dadku ku andacoon ayaan inuu yahay urur qarsoodi ah oo hadafkiisu yahay inuu qabsado hoggaanka adduunka.

   Marka laga reebo in ay tahay isha kacaano waaweyn iyo dilal adduunka ka dhacay. Waa ayo Illuminati oo miyay dhab ahaantii maamulayeen adduunka?

   Maxaan ka ognahay mid ka mid ah ururada sirta ah ee ugu xiisaha badan taariikhda.

   1. Ya aasaasay Illuminati?

   Illuminati waxay ahayd bulsho sir ah oo laga aasaasay Bavaria, oo hadda Jarmal ah, taas oo jirtay 1776 ilaa 1785, xubnahoodana waxay isku magacaabaan kuwo toosan.

   Kooxda waxaa aasaasay barafisoor sharciga ku taqaqusay, Adam Weishaupt. Waxa uu rabay in uu kor u qaado waxbarashada garaadka si uu uga hortago sixirka iyo saamaynta jinnigu bulshada ku dhex leeyahay.

   Weishaupt waxa uu rabey in uu wax ka beddelo habka loo maamulo dawladaha Yurub, isaga oo meesha ka saaraya saamaynta diineed ee dawladda iyo in uu adduunku jiho cusub siiyo.

   Waxaa la rumeysan yahay in kulankii ugu horreeyay ee Bavarian Illuminati uu ka dhacay kayn u dhow Ingolstadt May 1, 1776.

   Halkaan ka sii aqri...

8. 6 Saacadood ka horDiyaarad ay ku dhinteen 132 ruux oo la ogaaday in si kutala gal ah shidaalka looga jaray

   

   Xigashada Sawirka, Getty Images

   Diyaarad Boeing 737 ah oo ku dhacday buur ku taalla Shiinaha sanadkii 2022, halkaas oo ay ku dhinteen dhammaan 132 qof ee diyaaradda, ayaa la sheegay in shidaalka laga jaray xilli ay hawada sare ku jirtay, sida lagu sheegay xogta cusub ee ay soo saareen Guddiga Badbaadada Gaadiidka Qaranka ee Mareykanka (NTSB).

   Natiijooyinka ay soo saartay NTSB ayaa sheegaysa in labada dhuumood ee shiidaalka siiya matoorka diyaaradda "la xiray" iyada oo ku socotay joog sare oo ah 8,839m – sida ay muujisay in shilku ahaa mid ula kac ah.

   Shilkan diyaaradeed ayaa ah kii ugu dhimashada badnaa ee ka dhaca dalkaasi muddo tobanaan sano ah, inkastoo sababta shilkan ay ahayd mid aan la qarin karin.

   Shiinaha ayaan weli soo saarin warbixintii ugu dambeysay ee ku saabsan dhacdadan, iyadoo la tixraacayo walaaca amniga qaranka.

   Warbixinta NTSB, oo lagu sii daayay sharciga xorriyadda macluumaadka, ayaa lagu sheegay in xawaaraha matoorka MU5735 uu "hoos u dhacay ka dib markii shidaalka la xiray".

   Halkaan ka sii aqri...

9. 7 Saacadood ka horKenya oo si wayn ugu diyaar garowday xanuunka Ebola

   

   Xigashada Sawirka, Getty Images

   Wasaaradda caafimaadka ee dalka Kenya ayaa soo bandhigtay xog ku saabsan qorshaha dowladda Kenya ay kula dagaalamayso cudurka Ebola.

   Qoraalka, Xoghayaha Joogtada ah ee Caafimaadka, Dr. Patrick Amoth, wuxuu ku yiri; "Kenya ma aysan xaqiijin ama ma diiwaangelin wax kiis ah oo cudurka Ebola ah oo loo yaqaan NON-ZAIRE, laakiin dowladdu waxay si dhow ula socotaa xaaladda gobolka Bariga Afrika, waxayna iskaashi la leedahay wasaaradaha caafimaadka ee ay khuseyso ee dalalka deriska ah."

   Kenya waxa ay sheegtay in xaalada qatarta ah ee wadanku ay haatan tahay mid aad u hooseysa, balse ay dajisay qorshayaal lagu baarayo dadka safarka ah ee maraya dhamaan goobaha marinada, sida xuduudaha, dekeda Mombasa iyo Lamu, iyo garoomada diyaaradaha.

   Ururka Caafimaadka Adduunka (WHO) ayaa ku dhawaaqay in cudurka dilaaga ah ee Ebola uu yahay xaalad degdeg ah oo caafimaad oo bulshadu walaac ka qabto.

   Iyadoo hawlwadeennada caafimaadku ay la tacaalayaan cudurkan 17-aad ee ka dilaacay DRC, ayaa dawladaha deriska ah ee gobolka Bariga Afrika laga codsaday inay sameeyaan taxadar kasta oo lagula soconayo xaaladda caafimaad ee dadka socdaalayaasha ah ee isaga kala goosha xuduudahooda, isla markaana ay u diyaar garoobaan sidii ay adeegyo caafimaad ugu fidin lahaayeen dadka u muuqda inay qabaan calaamadaha cudurka.

10. 7 Saacadood ka horChelsea Xabi Alonso u magacowda tababaraha kooxda

    

    Xigashada Sawirka, Getty Images

    Kooxda Premier League ka dhisan ee Chelsea ayaa u magacawday laacibkii hore ee khadka dhexe ee Liverpool Xavi Alonzo inuu hogaamiyo kooxdeeda.

    Alonzo oo 44 jir ah una dhashay dalka Spain ayaa heshiis saddex sano ah u saxiixay kooxda ka dhisan London, sideed bilood uun ka dib markii uu ka tagay kooxda reer Spain ee Real Madrid oo uu madax ka ahaa.

    Chelsea oo xilli ciyaareedkii 2025/26 la dhibtoonaysay natiijooyin xun ayaa sheegtay inay ku rajo weyn tahay in Alonzo uu wax ka beddelo Stamford Bridge, gaar ahaan ka dib markii uu xilli ciyaareedkan yeeshay laba tababare oo labadooduba ka tagay natiijooyin aan fiicnayn.

    Chelsea ayaa ceyrisay Enzo Maresca iyo Liam Rosenior horraantii xilli ciyaareedkan, iyadoo Calum McFarlane uu markii labaad si ku meel gaar ah u noqday macalin – la filayo inuu sii hayo xilka ilaa dhamaadka xilli ciyaareedka, kaasoo ay u harsan tahay labo kulan.

    Ku dhawaaqista magacaabista Alonzo ayaa ku soo beegantay maalin kadib markii kooxda BLUE ay ku garaacday finalka FA Cup-ka kooxda Manchester City.

    “Chelsea waa mid ka mid ah kooxaha ugu waaweyn adduunka, waana ku faraxsanahay in fursad la ii siiyay inaan noqdo maareeyaha guud ee kooxdan weyn,” ayuu yiri Alonso, isagoo intaas ku daray.

11. 8 Saacadood ka horTaiwan oo ku adkaysatay in ay tahay dal madaxbanaan

    

    Xigashada Sawirka, Reuters

    Taiwan ayaa ku adkeysaneysa inay tahay dal madax banaan, ka dib markii madaxweynaha Mareykanka Donald Trump uu uga digay inay si rasmi ah ugu dhawaaqdo inay ka madax banaan tahay Shiinaha.

    Hadalka Trump ayaa yimid ka dib shir labo maalmood qaatay oo ka dhacay magaalada Beijing,kadibna uu sheegay in uusan “wax go’aan ah ka sameynin labada dhinacba” jasiiradda iskeed isku maamusha – oo Shiinuhu ku andacoonayo in uu ka tirsan yahay dhulkiisa, uusanna meesha ka saarin in uu xoog ku qabsado.

    Kadib wadahadal uu la yeeshay madaxweynaha Shiinaha Xi Jinping, Trump ayaa sidoo kale sheegay in uu dhawaan go’aan ka gaari doono in uu ansixiyo $11bn oo xirmo hub ah oo laga iibinayo Taiwan.

    Maamulka Maraykanku waxa uu raacayaa sharciga si uu Taiwan siiyo hab ay isku difaacdo, laakiin waxa ay marar badan ku qasbanaatay in ay isbahaysigan ku xoojiyaan xiriirka diblomaasiyadeed ee Shiinaha.

    Madaxweynaha Taiwan Lai Ching-te ayaa horay u sheegay in Taiwan aysan u baahneyn in ay ku dhawaaqdo madax-banaani rasmi ah, sababtoo ah waxay mar hore isu aragtay dal madax banaan.

12. 9 Saacadood ka horWHO oo ku dhawaaqday ee xanuunka Ebola ka dilaacay DR Congo uu yahay xaalad degdeg ah oo dunida oo dhan ah

    

    Xigashada Sawirka, Getty Images

    Hay’adda caafimaadka adduunka ee WHO ayaa ku dhawaaqday in cudurka Ebola ee ka dillaacay bariga gobolka Ituri ee dalka DRC uu yahay xaalad degdeg ah oo caafimaad dadweyne oo caalami ah.

    Hay’addu waxa ay intaa ku dartay in cudurkan oo ay ku jiraan ilaa 246 xaaladood oo looga shakisan yahay iyo 80 qof oo la sheegay inay u dhinteen, aanu gaadhin heerkii lagu dhawaaqay inuu yahay masiibo caalami ah.

    Agaasimaha guud ee WHO Tedros Adhanom Ghebreyesus ayaa ka digay in hadda "la hubo la'aan weyn oo ku saabsan tirada dhabta ah ee caabuqyada iyo meelaha uu cudurku ku faafay."

    WHO waxa ay sheegtay in nooca Ebola ee hadda uu ka dhashay fayraska Bundibugyo, kaas oo aan weli loo hayn dawo ama tallaal la oggolaaday.

    Hay’addu waxay sheegtay in ilaa hadda ay jiraan siddeed kiis oo shaybaadh la xaqiijiyey, oo ay weheliyaan kiisas kale oo la tuhunsan yahay iyo dhimasho saddex goobood oo ay ku jiraan Bunia, oo ah caasimadda gobolka Ituri, iyo magaalooyinka dahabka laga soo saaro ee Mongwalu iyo Rwampara.

    WHO ayaa sidoo kale intaa ku dartay in Virus-ku uu ku fiday meel ka baxsan DR Congo, iyadoo laba xaaladood la xaqiijiyay laga soo sheegay dalka Uganda oo jaarka la ah.

    Saraakiisha Uganda ayaa sheegay in nin 59 jir ah oo Khamiistii dhintay laga helay cudurka Ebola.

    Dalalka xuduudka la leh DR Congo ayaa u muuqda inay halis sare ugu jiraan inuu sii fido cudurkan, sababo la xiriira socdaalka, ganacsiga iyo isu socodka dalalkaas.

13. 17 Maajo 2026Hadalkii uu yiri wiil Soomaali ah ee soo jiitay madaxweynaha Turkiga uuna sheegay

    

    Xigashada Sawirka, Getty Images

    Madaxwaynaha dalka Turkiga Recep Tayyip Erdoğan ayaa ka hadlay shidaalka lagu wado in dalka Soomaaliya dhawaan qodidiisa laga bilaabo.

    Madxwaynaha oo maanta la hadlayay baarlaamnka Turkiga ayaa muujiyay sida uu ugu faraxsan yahay qorshaha shidaal qodista ee ay Turkiga ka wdaan dalka Soomaaliya.

    Madaxwaynaha dalka Turkiga Recep Tayyip Erdoğan ayaa tusaale u soo qaatay wiil yar oo Soomaali ah oo oo sida uu sheeg ka falceliyay markii uu dhawaan arkay markabka Turkiga ee Shidaal qodista oo taagan xeebaha Soomaaliya.

    "waxaan doonayaa inaan idinla wadaago dareenka walaal dhalinyaro Soomaaliyeed ah oo meel dhow ka arkay markabka Çağrı Bey,wuxuu si toos ah u yiri: "Weli kama soo kaban saamaynta markabka Çağrı Bey. Inaan si dhow u arko waxay ii ahayd waayo-aragnimo aan la ashqaraaray. Sababtoo ah Çağrı Bey wuxuu u ekaa magaalo weyn oo socota. Aad u weyn, aad u cusub, si qurux badanna loo dhisay. Maashaa Allaah. Runtii waa farshaxan la yaab leh." ayuu yiri mr Erdogan.

    Madaxwayne Erdogan ayaa ereyadaas ku tilmaamay sawir qurux badan oo muujinaya awoodda Turkiga.

    Halkan ka sii akhri sheekada

14. 17 Maajo 2026Tirada dhimashada xanuun ka dilaacay dal ay Soomaalidu ka ganacsato oo gaartay sagaashan

    Hay’adda Caafimaadka Adduunka (WHO) ayaa ku dhawaaqday in dillaaca Ebola ee ka socda Jamhuuriyadda Dimuqraadiga ah ee Congo (DRC) uu yahay xaalad degdeg ah oo caafimaad oo caalami ah. Si kastaba ha ahaatee, waxay sheegtay in dillaacani uusan buuxin shuruudaha loo aqoonsado faafitaan caalami ah.

    Ku dhowaad sagaashan qof ayaa ilaa hadda u geeriyooday, khubarada caafimaadkuna waxay ka digeen in nooca fayraskan uu leeyahay heer dhimasho oo aad u sarreeya.

    Wasiirka caafimaadka DRC, Samuel-Roger Kamba, ayaa sheegay in aan la helin tallaal ama daawo gaar ah oo lagu daweeyo.

    Waxa uu intaa ku daray in dad badan oo dhintay aysan raadsan daryeel caafimaad oo rasmi ah, balse ay taa beddelkeeda tageen goobaha cibaadada si ay gargaar u helaan.

15. 17 Maajo 2026Afar waxyaabood oo aad ku ogaan karto inaad qof jeceshahay iyo in kale

    Qof walba weydii jaceylku waa wax aan la fahmi karin, waxaa laga yaabaa inay dadku kugu raacaan taas. Arrintaas waxaa qeyb ka qaata xaqiiqda ah inay caqabad kula soo dersi karto marka qofka aad jeceshahay uusan si kula mid ah kuu dareemin.

    Jaceylka ayaa sidoo kale saameyn ballaaran ku yeelan kara noloshaada sababtoo ah wuu wejiyo badan yahay, waxaana laga yaabaa inaadan durba fahmin nooca jaceyl ee aad dareemeyso.

    Mala garan karaa nooca jaceyl ee aad dareemeyso?

    Jaceylku mar walba isku si maaha, oo siyaabo kala duwan ayuu kugu soo abbaari karaa.

    Mararka qaar, wuxuu maraa marxalado kala duwan.

    Marka ugu horreysa ee aad qof ka hesho, waxaad aalaaba dareentaa farxad iyo jahwareer is barbar socda.

    Halkan ka sii akhri sheekada

16. 17 Maajo 2026Maxaa lagu sheegay ujeedada socdaalka wasiirka arrimaha gudaha Pakistan uu ku gaaray Iiraan

    

    Xigashada Sawirka, Getty Images

    Pakistan ayaa sii wada dadaallada diblomaasiyadeed ee lagu doonayo in lagu fududeeyo wada-xaajoodyada hakadka galay ee u dhexeeya Iran iyo Maraykanka , iyadoo wasiirka arrimaha gudaha ee Pakistan Mohsin Naqvi uu Sabtidii gaaray Tehran, sida ay sheegtay warbaahinta Iiraan.

    Wakaaladda Tasnim News Agency ayaa soo warisay in Naqvi uu “u yimid Jamhuuriyadda Islaamiga ah qayb ka mid ah booqasho rasmi ah oo laba maalmood ah, taas oo ka mid ah dadaallada Pakistan ee fududeynta wada-hadallada iyo horumarinta nabadda gobolka.”

    Wasiirka arrimaha gudaha ee Iiraan Eskandar Momeni ayaa qaabilay dhiggiisa Pakistan, iyadoo booqashadan ay timid maalmo kaddib booqasho uu sameeyay Taliyaha Ciidanka Pakistan Asim Munir, sida ay sheegtay AFP.

    Pakistan ayaa sii wada dadaallada dhexdhexaadinta ee u dhexeeya Maraykanak iyo Iran, kaddib markii ay martigelisay kulamo heer sare ah oo u dhexeeyay wafdiyo ka kala socda labada dal bishii hore.

    Xabbad-joojinta lagu tilmaamay inay tahay “mid jilicsan,” oo bilaabatay 8-da Abriil, ayaa gacan ka geysatay in la xakameeyo xiisaddii ka dhalatay weerarradii ay Maraykanka iyo Israa’iil oo isku dhana ku qaadeen Iiraan 28-kii Febraayo.

    Warbixinnada la xaqiijiyay ayaa muujinaya in Pakistan ay sii wado doorkeeda dhexdhexaadinta, iyadoo wada-hadallada u dhexeeya Washington iyo Tehran ay weli yihiin kuwo adag oo aan si buuxda loo heshiin.

17. 17 Maajo 2026Qiso xanuun badan: Laba arrimood filo hadii aad guursato qof ajanabi ah

    

    Xigashada Sawirka, Getty Images

    Soomaalidu waxay ka mid tahay bulshooyinka aduunka sida wayn u ilaaliya hanaanka guurka iyo isdhexgalka,waxaa jirta sheekooyin badan oo la xidhiidha Guurka.

    Soomaalida dhexdeeda waxaa ku badan haybsooca sida in laysku diido laba qof ee is doortay iyada oo la tixraacayo qoysaska ay lamaanuhu ka soo jeedaan arintan ayaa ah faquuq mudooyin soo jiray.

    Soomaali badan ayaa u qaxday dalka dibadiisa gaar ahaan wadamada reer galbeedka,dhaqanka guurka soomaalidu waxba iskama aysan badalin marka ay timaado guurka ajanabig iyo soomaalida

    Arintan ayaa keentay in ay yaraadaan isdhex galka soomalaida iyo bulshooyinkii ay u tageen.

    Halkan ka sii akhri sheekada

18. 17 Maajo 2026Iiraan oo war ka soo saartay dilka hoggaamiye sare oo ka tirsan Xamaas

    Wasaaradda arrimaha dibadda ee Iiraan ayaa si “xooggan” u cambaareysay dilka Ezzeddine Haddad, oo ahaa taliyaha guud ee Qassam Brigades, iyo sidoo kale xaaskiisa iyo ilmihiisa.

    War-saxaafadeedka wasaaraddu ayaa lagu sheegay: “Ficilkan argagixiso iyo dilalka la midka ah waa qayb ka mid ah qorshaha dembiyeed ee Israa’iil l ee lagu doonayo in si gumeysi ah loogu tirtiro Falastiin.”

    Wasaaradda Arrimaha Dibadda ee Iiraan ayaa sheegtay in 'shaki la'aan, khaarajinta taliyayaasha iska caabinta iyo haldoorka reer Falastiin aysan kaliya carqaladeyn doonin dugsiga iyo dhabbada iska caabinta, laakiin ay sidoo kale dhiirigelin doonto socotada iyo dagaalyahannada ku taagan dhabbada sharafta iyo xorriyadda Falastiin.'"

    Ra'iisul Wasaare Benjamin Netanyahu iyo Wasiirka Gaashaandhigga Israel Katz ayaa bayaan wadajir ah ku sheegay in Ezzedine Haddad uu "mas'uul ka ahaa dilka, afduubka, iyo dhaawicidda kumanaan shacab Israeli ah iyo ciidamada IDF)."

    Aaska Izz al-Din Haddad ayaa Sabtidii lagu dilay magaalada Qasa.

    In kasta oo ay jirto xabbad-joog tan iyo bishii Oktoobar, haddana dawladda Israa'iil waxay sheegaysaa inay weli u leedahay awood ay ku beegsato xubnaha Xamaas.

19. 17 Maajo 2026Kooxda Xisbullah oo war cusub soo saaray

    Kooxda Xisbullah ayaa sheegtay in ay weerareen bartilmaameed ciidan oo ku yaalla waqooyiga Israa’iil, iyadoo xabbad-joojin jilicsan oo u dhexeysay Lebanon iyo Israa’iil ay ku guuldareysatay inay soo afjarto dagaalka billowday 2-dii Maarso.

    Kooxda ay taageerto Iiraan ayaa bayaan ku sheegtay in ciidamadeedu ay bartilmaameedsadeen “xerada Yaara” iyagoo adeegsanaya “koox diyaarado weerar ah oo aan duuliye lahayn.”

    Xisbullah ayaa horey u shaacisay dhowr weerar oo ka dhan ah ciidamada Israa’iil ee ku sugan koonfurta Lebanon, halkaas oo, sida ay kooxdu sheegtay.

20. 16 Maajo 2026Asal ahaan dalka uu ka soo jeedo ninka shilka argagaxa leh ka gaystay Talyaaniga

    

    Xigashada Sawirka, EPA

    Nin ayaa baabuurkiisa jiirsiiyey dad lugeynayay hareeraha wadada magaalada Modena ee waqooyiga Talyaaniga, isagoo dhaawacay siddeed qof, afar kamid ahna dhaawacoodu aad ayuu u culus yahay, sida ay sheegeen masuuliyiintu.

    Dadka dhaawacmay waxaa kamid ah haweeney la sheegay in labada lugood burrbureen..

    Kadib markii gaarigu ku istaagay daaqadda dukaan, darawalkii ayaa kasoo degay isagoo sita mindi, wuxuuna dhaawacay qof waddada marayay oo isku dayay inuu cayrsado, kahor inta aan tuhmanaha la qaban oo la xakamayn.

    Tuhmanaha oo 31 jir ah ayaa masuuliyiintu ku sheegeen inuu yahay muwaadin Talyaani ah oo asal ahaan kasoo jeeda Morocco.

    Ra’iisul Wasaaraha Giorgia Meloni ayaa dhacdadan ku tilmaantay “mid aad u daran.”

    Dhacdadan ayaa dhacday abaaro 16:30 (14:30 GMT), markii gaariga oo ku socday xawaaraha sare uu dadka lugaynayay ku jiiray jidka Via Emilia oo ku dhow kaniisadda caanka ah ee Modena, oo dhanka koonfur-bari ka xigta magaalada Milan.

    "Waxaan arnayn gaariga oo soo dhowaanaya, wuxuuna ku socday dhanka cidhifka wadada," ayuu yiri qof goobjooge ah.

    "Si kedis ah ayuu xawaaraha u kordhiyay, wuxuu ku socday ugu yaraan 100km Saacadii)."

    "Waxaan arnayn dad hawada u duulaya," ayuu goobjoogei u sheegay warbaahinta Talyaaniga.

    Duqa magaalada Modena, Massimo Mezzetti, ayaa sheegay inay u muuqato in darwalku "uu si ula kac ah gaariga u mariyay dhabaddii dadka lugaynayay, isagoo jiiray dhowr qof, ka dibna ku dhacay daaqadda dukaan."

    "Ka dib wuxuu ka soo degay gaarigiisii, wuxuuna la soo baxay mindi," ayuu yiri Mezzetti.