වත්කම් හා බැරකම් ප්‍රකාශ භාර දීමේ අවසන් දිනය ජූනි 30: ඔබ දැනගත යුතු ම කරුණු 6ක්

වත්කම් සහ බැරකම් ප්‍රකාශ අල්ලස් හෝ දූෂණ චෝදනා විමර්ශන කොමිෂන් සභාවට භාර දීමේ අවසන් දිනය ලෙස ජූනි 30 දිනය ප්‍රකාශයට පත් කර ඇති අතර, ඒ අනුව එම ප්‍රකාශ භාර දිය යුතු පිරිස් එදිනට පෙර ඒවා එම කොමිෂන් සභාවේ මධ්‍යගත ඉලෙක්ට්‍රොනික පද්ධතිය හරහා යොමු කළ යුතු ය.

2023 දූෂණ විරෝධී පනත හඳුන්වා දීමෙන් පසුව වත්කම් හා බැරකම් ප්‍රකාශ ලබා දිය යුතු අයගේ පරාසය පුළුල් කරන ලදී.

1. වත්කම් හා බැරකම් ප්‍රකාශ ලබා දිය යුතු අය කවුද?

මෙලෙස වත්කම් සහ බැරකම් ප්‍රකාශ ලබා දිය යුතු පිරිස් සම්බන්ධයෙන් 2023 අංක 9 දරන දූෂණ විරෝධී පනතේ 80 වැනි වගන්තියේ දක්වා තිබේ.

එම පිරිස් පහත පරිදි වේ.

මෙයට තවත් විශාල ලැයිස්තුවක් ඇතුළත් වන අතර ඔවුන් සියල්ලන් ම සිය වත්කම් සහ බැරකම් ප්‍රකාශ ඉදිරිපත් කිරීම සිදු කළ යුතු ය.

2. ලබා දිය යුතු තොරතුරු මොනවා ද?

මීට පෙර අයැදුම් පත්‍රයක් පුරවා අල්ලස් හෝ දූෂණ චෝදනා විමර්ශන කොමිෂන් සභාවට වත්කම් හා බැරකම් ප්‍රකාශ ලබා දුන්න ද මේ වසරේ සිට සියලු දෙනා එම ප්‍රකාශ මධ්‍යගත ඉලෙක්ට්‍රොනික පද්ධතිය හරහා ලබා දීම සිදු කළ යුතු ය.

මෙම මධ්‍යගත ඉලෙක්ට්‍රොනික පද්ධතිය නිර්මාණය කර ඇත්තේ 2023 අංක 09 දරන දූෂණ විරෝධී පනත ප්‍රකාරව යි.

මෙහි පළමුව ගිණුමක් සාදාගත යුතු අතර, ඉන්පසුව වත්කම් හා බැරකම් ප්‍රකාශ කිරීම සිදු කළ යුතු පුද්ගලයා සහ ආවරණය වන තැනැත්තන්ගේ තොරතුරු පද්ධතිය වෙත ඇතුළත් කළ යුතු ය.

ඒවා පහත පරිදි වේ.

ආදායම

නිශ්චල දේපළ

වාහන

අභරණ සහ වෙනත් වටිනා භාණ්ඩ

පේටන්ට් බලපත්‍ර, ප්‍රකාශන හිමිකම් ආදිය වැනි වාණිජකරණය කළ හැකි වත්කම්

මූල්‍ය වත්කම්

ආයෝජන සහ ආයතනික අභිලාෂයන්

වියදම්

වගකීම්

සාරාංශය සහ දිව්රුම් ප්‍රකාශය

3. ජනතාවට තොරතුරු දැන ගැනීමට හැකියාව ඇත්තේ කෙසේ ද?

මෙලෙස අල්ලස් හෝ දූෂණ චෝදනා විමර්ශන කොමිෂන් සභාව වෙත ලබා දෙන වත්කම් සහ බැරකම් ප්‍රකාශ https://ads.ciaboc.lk වෙබ් අඩවියේ පල කෙරෙන අතර ඒවා මහජනතාවට පරිශීලනය කළ හැකි ය.

ජනාධිපතිවරයා, අගමැති, කතානායක, අගවිනිසුරු ඇතුළු ඉහළ අධිකරණ විනිසුරුවරුන්, විපක්ෂ නායක, කැබිනට් ඇමතිවරුන් සහ නියෝජ්‍ය ඇමතිවරුන්, පාර්ලිමේන්තු මන්ත්‍රීවරුන්, මහබැංකු අධිපති සහ විදේශීය දූත මණ්ඩලවල ඉහළ නිලධාරීන් ඇතුළු රජයේ ඉහළ තනතුරු දරන අයගේ වත්කම් හා බැරකම් ප්‍රකාශ මෙහි ඇතුළත් කර තිබේ.

4. නියමිත දිනට ලබා නොදුන්නොත් දඬුවම් ලැබෙනවා ද?

අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්, විශ්‍රාමික මහාධිකරණ විනිසුරු රංග දිසානායක පසුගිය දා මාධ්‍යට පැවසුවේ සියලු දෙනා අදාළ දිනය වන විට වත්කම් හා බැරකම් ප්‍රකාශ ලබා දීම සිදු කළ යුතු බවත්, එලෙස නොකරන පිරිස් හට දඩයකට යටත් වීමට සිදුවන බවත් ය.

"ජූනි 30ට පෙර වත්කම් සහ බැරකම් ප්‍රකාශ ඉදිරිපත් කිරීමට නොහැකි වුවහොත් අනිවාර්යයෙන් ම ඔබ දඩ මුදලකට යටත් වෙනවා, සමහර වෙලාවට ඔබට දරාගත නොහැකි තරම් වන දඩ මුදලක් විය හැකි යි, එය තමයි පනතේ ප්‍රතිපාදන," අධ්‍යක්ෂ් ජනරාල් වරයා කියා සිටියේ ය.

වත්කම් හා බැරකම් ප්‍රකාශ මෙම මධ්‍යගත ඉලෙක්ට්‍රොනික් පද්ධතියට තවමත් ලියාපදිංචි වී ඇත්තේ සුළු පිරිසක් බව ද අධ්‍යක්ෂ ජනරාල්වරයා පවසයි.

2023 අංක 09 දරන දූෂණ විරෝධී පනතේ 80.1 වගන්තිය යටතේ සඳහන් කර ඇති සියලු දෙනා මේ අනුව ජූනි 30ට පෙර සිය වත්කම් සහ බැරකම් ප්‍රකාශ ඉදිරිපත් කිරීම කළ යුතු බව ඔහු කියා සිටියේ ය.

"එය ප්‍රමාද වීම මම පෙර කියපු විදිහට දඩයකට හෝ අධිකරණ ක්‍රියාමාර්ගයකට ලක්විය හැකි වෙනවා," අධ්‍යක්ෂ ජනරාල්වරයා පැවසීය.

5. ඇතුළත් කාණ්ඩ පිළිබඳ ඔබ තවමත් නොදැනුවත් ද?

කෙසේවෙතත් අධ්‍යක්ෂ ජනරාල්වරයා කියා සිටියේ තවමත් බොහෝ පිරිස් ඔවුන් වත්කම් සහ බැරකම් ප්‍රකාශ ඉදිරිපත් කළ යුතු බව නොදැන සිටින බව යි.

මේ නිසා පහත සඳහන් අය ද වත්කම් හා බැරකම් ප්‍රකාශ ඉදිරිපත් කළ යුතු බව ඔහු කියා සිටියේ ය.

ඊට අමතව මෙවර නව කාණ්ඩයක් ද ඇතුළත් කර ඇති අතර ඒ අනුව, රේගු ආඥා පනතේ 115 වන වගන්තිය ප්‍රකාරව බලපත්‍රලාභී රේගු අනු නියෝජිතයින් [වාප්පු ලිපිකරුවන්] ද වත්කම් සහ බැරකම් ප්‍රකාශ ඉදිරිපත් කළ යුතු ය.

6. සහයක් අවශ්‍ය ද?

වත්කම් හා බැරකම් ප්‍රකාශ සම්බන්ධයෙන් ඔබට ඇති ඕනෑ ම ගැටලුවක් අල්ලස් හෝ දුෂණ චෝදනා විමර්ශන කොමිෂන් සභාව අමතා විමසීමට හැකි ය.

එහි ක්ෂණික ඇමතුම් අංකය වන 1954 අංකය ඇමතීමෙන් හෝ 0112596360 ඇමතීමෙන් ඔබට අවශ්‍ය විස්තර දැනගැනීමට හැකි ය.