IKIBIRIRAHO, Intambara yo muri Irani: Ubwato bw’Ubwongereza bwatewe igisasu mu Muhora wa Hormuz

Amakuru y'ikibiriraho

Bernard Bankukira

1. Iminota 52 irahezeAbahuza bariyamiriza Israel ku gitero cayo cahitanye abantu 18 muri Gaza

   Qatar, Misiri na Turukiya, ibihugu bihagarariye amasezerano yo guhagarika intambara muri Gaza, biriyamiriza Israel inyuma y’ibitero bishasha bivugwa ko vyahitanye n'imiburiburi abantu 18 muri ako karere.

   Ntibiramenyekana neza nimba abishwe bari abarwanyi canke abasivire.

   Abahuza bavuga ko ivyo bitero vya Israel bije guhonyanga amasezerano y’agahengwe.

   Hamas igenzura igice c'inkombe yo mu burengero bwa Gaza, mu gihe umushikiranganji wa Israel ajejwe kwivuna abansi, Israel Katz, avuga ko ingabo ziwe ubu zigenzura hagati ya 60 na 70 kw'ijana vy'ubutaka bwa Gaza, mu mugambi wo gusambura imihora yo mu kuzimu ikoreshwa na Hamas.

   Ku wa Mungu, yavuze ko ingabo za Israel zidashobora kuva muri Gaza imbere y'uko Hamas yemera gushira hasi ibirwanisho.

   Hamas yo ivuga ko ibitero vya Israel bitegerezwa kubanza guhagarara imbere y'uko itangura gushira hasi canke gukuraho ibirwanisho vyayo.

2. Haciye isaha 1Umuriro wazuye ibisasu vyo mu Ntambara ya Kabiri y’Isi vyari bihambwe mu kuzimu mu Bufaransa

   Imiriro y’icaduka iriko iratema itongora mu bumanuko bushira uburengero bw’Ubufaransa yazuye ibisasu vyo mu ntambara ya Kabiri y’Isi yose vyahambwe mu kuzimu mu kigwati cari cimuwemwo abakibamwo.

   Abanyagihugu bo mu gisagara ca Le Porge baramaze gusubira mu ngo zabo inyuma y'aho abahinga mu gutegura ibisasu bamariye iminsi myinshi begeranya ibisasu bishika amajana ane, birimwo ibisasu vya muzinga n’ibindi vyo gusambura ibimodoka vy'intambara bitamenwa n’amasasu asanzwe.

   Umukuru w'igisagara ca Le Porge, Martial Zaninetti, yavuze ko ubushuhe bwinshi n'ubukomezi bw’uno muriro vyatumye bimwe muri ibi bisasu biturika, kimwe muri vyo kigatoboranya n’inzu.

   Abahinga bavuga ko ibi biturika vyari uruvangatirane rw’ibisasu vy'Abadagi n'ivy’Abafaransa.

   Umuriro wari ugize imisi uriko uranzaganya mu ntara ya Gironde ubu waramaze kuzimwa inyuma yo kurigita akarere Kangana na kirometero kwadarato 420 mu kiringo c’imisi yababa cumi.

3. Haciye amasaha 2Ukraine Vs Uburusiya: Buramatari wa Leningrad avuga ko amadrone yateye inyubakwa z'ububiko

   Amakuru ava mu Burusiya avuga ko ibigo bitari bike vy’ububiko no gukwiragiza ibidandazwa hamwe n’ivy’igitoro, vyatewe n’indege zitajamwo abadereva (drones) mw’ijoro ryakeye.

   Inyubakwa y’ububiko imwe yononywe n’amadrone i Krasny Bor, hafi ya Saint Petersburg, igisagara ca kabiri kinini mu Burusiya.

   Buramatari w’intara ya Leningrad, Alexander Drozdenko, yavuze ku mbuga ngurukanabumenyi ko ama drones 17 yarasiwe mu kirere.

   Avuga kandi ko umuntu umwe yakomeretse.

   Ntiyavuze izina ry’ikigo catewe, ariko amafoto yakwiragijwe ku mbuga nyagiro asa n’ayerekana umwotsi uduga uvuye ku bubiko bw’ikigo Wildberries, ikompanyi y’ubudandaji yo mu Burusiya ikorera ku mbuga ngurukanabumenyi.

   Hafashwe kandi n’ingingo zo kugabanya uruja n’uruza rw’indege ku kibuga c'indege gikuru ca Saint Petersburg.

   Ayandi makuru ku ntambara y'Uburusiya na Ukraine:

   Intambara 'ku bisagara no ku mato y'igitoro' hagati y'Uburusiya na Ukraine izoherera he?

   Akaga ka misire za 'ballistique': Uburusiya bushobora kumara igihe kingana gute kibirasa kuri Kyiv?

   Kuki Ukraine iburira ko misire zo gutangira ibitero ziriko zirayiherana?

   Mushobora gukurikira ayandi makuru yacu kuri: YouTube kuri BBC News Gahuza

4. Haciye amasaha 2Intambara yo muri Irani: Ubwato bw’Ubwongereza bwatewe igisasu mu Muhora wa Hormuz

   Ikigo c’Ubwongereza gicungera umutekano wo mu mazi kivuga ko ubwato bw’imizigo bwatewe “n’igisasu kitazwi” mu Muhora wa Hormuz.

   Iki kigo kivuga ko ibi vyabereye hafi y’inkombe za Oman, kandi ko biriko birakorwako amatohoza, ariko nta makuru aramvuye gitanga ku vyoba vyononekaye canke nimba hari abakomeretse.

   Ibi bibaye mu gihe Reta Zunze Ubumwe za Amerika na Irani ziriko zitanga amakuru avuguruzanya ku bijanye n’uko vyoba biri mu biganiro.

   Ku wa mbere, Perezida Donald Trump yashimitse avuga ko ibiganiro biriko biraba “ubu nyene”.

   Yabwiye abanyamakuru muri Maison Blanche/White house (ibiro vy’umukuru wa Amerika) ati: “Ibiganiro biriko birabandanya muri uno mwanya, kandi aya ni yo mahirwe yabo ya nyuma yo gutera igikumu ku rwandiko rwiza”.

   Yavuze ko Irani iravye nabi ishobora “gucibwa umutwe” kiretse yemeye amasezerano arimwo kwugurura Umuhora wa Hormuz kugira ngo amato ashobore kuwukoresha ata ngorane, hamwe no guheba umugambi wa nikleyere.

   Perezida Trump yemeje ko ivyo biganiro biriko biraba “bisabwe” na Tehran (ubutegetsi bwa Irani), kandi ko bihagarariwe na Arabiya Sawudite, Emira Zunze Ubumwe z’Abarabu (UAE), hamwe na Qatar.

   Imbere y’aho, Irani yari yahakanye ko iri mu biganiro bitaziguye na Amerika.

   Yavuze ko Tehran iriko ivugana gusa na Oman ku bijanye n’ingene Umuhora wa Hormuz wosubira kwuguruzwa igihe gito kugira ngo amato y’ubudandaji ashobore kurengana.

   Ayandi makuru ushobora gusoma:

   Trump avuga ko agiye kureka ibitero kuri Iran niba amasezerano agezweho 'byihuse'

   Igituma Iran iriko yishira mu kaga kubera umuhora wa Hormuz

   Mushobora gukurikira ayandi makuru yacu kuri: YouTube kuri BBC News Gahuza

5. Haciye amasaha 2Mwaramutse neza!

   Ikaze kuri BBC Gahuzamiryango, aho tubashikiriza amakuru yo mu karere no mu makungu mu buryo bw'aka kanya.