Cymru'n dechrau Pencampwriaeth y Cenhedloedd gyda buddugoliaeth dros Fiji

Enillodd Cymru 39-24 yn erbyn Fiji yn eu gêm agoriadol ym Mhencampwriaeth y Cenhedloedd yn Stadiwm Dinas Caerdydd.

Sgoriodd Jac Morgan ddau gais a chafodd ei enwi'n chwaraewr y gêm wrth i Gymru sicrhau chwe chais yn y fuddugoliaeth.

Roedd Fiji ar y blaen yn gynnar, ond llwyddodd Cymru i droi'r gêm o'u plaid gyda pherfformiad cryf yn yr ail hanner.

Roedd y fuddugoliaeth yn golygu bod tîm Steve Tandy wedi ennill dwy gêm ryngwladol yn olynol am y tro cyntaf ers Cwpan y Byd 2023.

Ar ôl amsugno pwysau cynnar gan Fiji, croesodd Jac Morgan y llinell ddwywaith yn yr hanner cyntaf i gadw Cymru ar delerau cyfartal ar 10-10 erbyn yr egwyl.

Yn yr ail hanner, ychwanegodd Rhys Carre, Josh Adams, Ryan Elias ac Eddie James geisiau pellach i Gymru.

Sgoriodd Pita-Gus Sowakula, Elia Canakaivata a Selestino Ravutaumada geisiau Fiji, gydag Isaiah Armstrong-Ravula yn ychwanegu naw pwynt gyda'i giciau.

Roedd y cyfnod cyn y gêm wedi ei gysgodi gan anghydfod rhwng Undeb Rygbi Cymru a'r chwaraewyr ynghylch ffioedd gemau, a gafodd ei ddatrys ychydig ddyddiau cyn y gic gyntaf.

Er mai Fiji oedd y tîm cartref yn swyddogol, cynhaliwyd y gêm yng Nghaerdydd oherwydd nad oes gan y wlad stadiwm sy'n bodloni gofynion Pencampwriaeth y Cenhedloedd.

Bydd Cymru'n wynebu'r Ariannin a De Affrica yn eu gemau nesaf yn y gystadleuaeth.