David Brooks: O frwydro canser i frwydro am le yng Nghwpan y Byd

Roedd David Brooks ymhlith miloedd o aelodau'r Wal Goch oedd wedi ymgynnull yng Nghwpan y Byd yn Qatar yn 2022 - ond doedd y wên wrth wisgo crys y tîm cenedlaethol ddim yn adrodd y stori gyflawn.

Y bwriad i Brooks, oedd yn chwarae yn Uwch Gynghrair Lloegr dros Bournemouth ar y pryd - ac sydd yno hyd heddiw - oedd bod yng nghanol y cyfan gyda gweddill y garfan wrth i Gymru gyrraedd Cwpan y Byd am y tro cyntaf mewn 64 o flynyddoedd.

Ond roedd cael diagnosis o ganser flwyddyn ynghynt wedi tarfu ar ei yrfa broffesiynol ar adeg mor dyngedfennol.

Wrth gefnogi o'r eisteddle, roedd Brooks ar y trywydd cywir ac wedi gwella o Hodgkin Lymphoma Cyfnod 2 erbyn i dîm Rob Page gamu ar y cae yn Doha.

Ond roedd y straen gorfforol o frwydro yn erbyn y salwch difrifol a misoedd o driniaeth cemotherapi wedi ei lethu, ac wedi amddifadu'r chwaraewr o gynrychioli ei wlad ar y llwyfan mwyaf.

Pedair blynedd yn ddiweddarach ac mae Cymru eto'n anelu am le yn y rowndiau terfynol.

Ond mae her y gemau ail gyfle yn ymddangos yn ddibwys bron i rywun sydd wedi profi cymaint yn barod.

Yn ôl Tom Lockyer, ffrind agos i Brooks ac aelod o'r garfan aeth i Qatar, byddai'r profiad hwnnw yn Doha wedi bod yn rhyfedd ac yn chwerw felys.

"Byddai David byth wedi dangos y peth, ond doedd gwylio'r gemau a pheidio bod allan ar y cae gyda ni ddim yn brofiad braf iddo fe," meddai.

"Ond dwi'n gwybod sut mae o wedi cymryd ysbrydoliaeth o hynny.

"Dwi ddim yn credu bod e'n cael digon o glod am ba mor dda yw e fel chwaraewr, neu'r lefelau mae o wedi cyrraedd ar ôl popeth sydd wedi digwydd."

Mae'n dair blynedd ers i Brooks gamu'n ôl ar y cae ar ôl ei driniaeth - a hynny i gymeradwyaeth y dorf yn erbyn Aston Villa.

Fe ddilynodd cyfnod ar fenthyg i Southampton cyn iddo adennill ei le gyda Bournemouth, a sicrhau cytundeb newydd pedair blynedd o hyd gyda'r clwb.

Un arall sy'n llawn edmygedd o'r hyn y mae Brooks wedi'i gyflawni ydy Chris Mepham, a chwaraeodd gydag ef i Bournemouth yn ogystal â Chymru.

"Wrth edrych ar David nawr, dydy o ddim yn edrych fel chwaraewr sydd wedi bod ar yr ymylon am mor hir," meddai.

"Mae safon ei chwarae yn gyson bob wythnos, sy'n anhygoel pan 'da chi'n meddwl am y peth.

"Doedd neb yn cwestiynu ei dalent. Yr unig amheuaeth o bosib oedd am ei ffitrwydd, ond mae'r ystadegau'n dangos ei fod yn rhedeg mwy rŵan nag erioed."

Dywedodd un o'i gyd-chwaraewyr eraill i Bournemouth a Chymru, Kieffer Moore, ei fod hefyd wedi'i ryfeddu dros ymateb Brooks i gyfnod mor dywyll.

"Mae o'n parhau i fynd o nerth i nerth, sy'n rhyfeddol o ystyried yr hyn mae o wedi bod drwyddo yn gorfforol ac yn feddyliol," meddai.

Ond i'r rhai sy'n adnabod Brooks orau, does dim syndod ei fod wedi brwydro'n ôl o'i salwch.

"Mae e wastad wedi bod yn gymeriad penderfynol," meddai Lockyer.

"Ond mae e hefyd yn berson sydd ddim yn cymryd pethau'n rhy ddifrifol.

"Y prif beth i Brooksy oedd cael cyfle i chwarae eto, ac mae e wedi gwneud hynny.

"Ro'n i'n teimlo drosto yn Doha ac yn gallu gweld y rhwystredigaeth tu ôl i'w wên.

"Roedd cyrraedd Cwpan y Byd yn freuddwyd, a byddai'n anhygoel gallu gwneud hynny gyda fe yn y garfan.

"Dwi'n gwybod chwaraewr mor dda yw e, ac mae'n haeddu'r cyfle i ddangos ei dalent i'r byd i gyd."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.