ဓာတ်ပုံ ရင်းမြစ်, Getty Images
အမေရိကန်တစ်ဒေါ်လာကို မြန်မာကျပ်ငွေ ၄,၅၀၀ ကျော်ဝန်းကျင် စျေးဆက်ပေါက်နေပြီး ဓာတ်ဆီနဲ့ ရွှေဈေးနှုန်းတွေလည်း အမြင့်စျေးမှာ ဆက်ရှိနေပါတယ်။
အောက်တိုဘာ ၁၆ ရက် မနက်ပိုင်း ငွေလဲဈေးကွက်လုပ်ကိုင်သူတွေရဲ့ ပြောကြားချက်အရ အမေရိကန်တစ်ဒေါ်လာကို ကျပ် ၄,၅၆၀၀ ဝန်းကျင်စျေးဆက်ပေါက်နေပြီး ကျပ်ငွေတန်ဖိုး အနည်းငယ်ပြန်တက်လာတယ်လို့ ဆိုပါတယ်။
'' မြန်မာငွေစျေးကွက်ထဲမှာ အတက်အကျအရမ်းကြမ်းနေတယ်။ဒီမနက်ပိုင်းတော့ စျေးမငြိမ်သေးဘူး။ဒေါ်လာနဲ့ ဘတ်က နည်းနည်းတော့ ကျလာပြီ။ ကျပ်ပြန်တက်လာတယ်။စျေးကွက်မငြိမ်ဘူး'' လို့ တာချီလိတ်က ငွေလဲလုပ်ကိုင်သူ တစ်ဦး ကပြောပါတယ်။
မြဝတီ-မဲဆောက်၊ တာချီလိတ်-မယ်ဆိုင် နယ်စပ်ငွေလဲဈေးကွက်မှာလည်း ထိုင်းဘတ်တစ်ဘတ်ကို မြန်မာကျပ်ငွေ ၁၃၂ ကျပ်ကနေ ၁၃၅ ကျပ်ဝန်းကျင်နဲ့ အရောင်းအဝယ်ဖြစ်နေပြီး မြန်မာကျပ်ငွေတစ်သိန်းကို ထိုင်းဘတ် ၇၅၀ ကနေ ၇၅၅ ဘတ်ဝန်းကျင် ဈေးပေါက်နေပါတယ်။ ဒါပေမဲ့ မနေ့က စျေးကွက်ပေါက်စျေး ငွေလဲနှုန်းထက် အနည်းငယ်ပြန်ကျတယ်လို့ သိရှိရပါတယ်။
'' မြန်မာငွေစျေးကွက်မငြိမ်တဲ့ပြဿနာက မြန်မာတွေကလည်း နည်းနည်းတက်ပြီဆိုတာနဲ့ အတင်းလိုက်ဝယ်တာ အဲဒီတော့ ဒေါ်လာ လက်ကြီးသမားတွေက အမြင့်စျေးကိုဆွဲတင်ထားတာ၊ ဒါပေမဲ့ပုံမှန်ကိုက စျေးကအမြင့်ဆုံးတက်ပြီးရင် ပြန်ကျလာမှာပဲ။ အခု ပြန်ကျတယ်ဆိုတာ ပြည်တွင်းနိုင်ငံရေးနဲ့ ငွေစျေးကွက်မငြိမ်တာလည်းပါတယ်။ ဒါပေမဲ့ လူတွေက မချိန်ဆပဲ စျေးကွက်နောက်လိုက်တာလည်းပါတယ်'' လို့ ပြည်တွင်းက ဟွန်ဒီငွေလဲစျေးကွက်က ငွေလဲလုပ်ကိုင်သူတစ်ဦးကပြောပါတယ်။
ရန်ကုန်မြို့မှာ စက်သုံးဆီတစ်လီတာဈေးနှုန်းတွေက ဓာတ်ဆီ (92) တစ်လီတာကို ၄,၇၀၅ ကျပ်၊ ဓာတ်ဆီ (95) တစ်လီတာကို ၄,၈၅၀ ကျပ်၊ ဒီဇယ်တစ်လီတာကို ၄,၄၈၅ ကျပ်နဲ့ ပရီမီယံဒီဇယ်တစ်လီတာကို ၅,၄၄၀ ကျပ် အသီးသီး ဈေးပေါက်နေပါတယ်။
မန္တလေးအပါအဝင် နယ်မြို့ကြီးတွေမှာတော့ တရားဝင်စက်သုံးဆီဈေးနှုန်းတွေဟာ ရန်ကုန်ဈေးနှုန်းထက် တစ်လီတာကို ကျပ် ၁၀၀ ကျော် ကနေ ၂၀၀ ကျော်အထိ ပိုမိုမြင့်မားနေပါတယ်။
ပြည်တွင်းရွှေဈေးကွက်မှာတော့ ၁၆ ပဲရည် အကယ်ဒမီရွှေတစ်ကျပ်သားရဲ့ ပြင်ပဈေးဟာ အောက်တိုဘာ ၁၅ ရက် ညနေပိုင်း ဈေးကွက်ပိတ်ချိန်မှာ ကျပ် ၁၀၃ သိန်းခွဲရှိခဲ့ပါတယ်။
ရန်ကုန်တိုင်းရွှေလုပ်ငန်းရှင်များအသင်းရဲ့ တရားဝင်ရည်ညွှန်းဈေးကတော့ တစ်ကျပ်သားကို ကျပ် ၇၁ သိန်းဖြစ်ပြီး ပြင်ပဈေးကွက်နဲ့ သိသိသာသာ ကွာဟနေပါတယ်။
ကမ္ဘာ့ဈေးကွက်မှာလည်း အောက်တိုဘာ ၁၅ ရက်က ရွှေဈေးဟာ အမေရိကန်ဒေါ်လာ အားပျော့လာမှုနဲ့ အမေရိကန်အစိုးရငွေချေးစာချုပ် အတိုးနှုန်းတွေ ကျဆင်းလာမှုတို့ကြောင့် သုံးရက်ဆက်တိုက် ကျဆင်းခဲ့ပြီးနောက် တစ်အောင်စကို ဒေါ်လာ ၄,၁၅၃ ဝန်းကျင်အထိ ပြန်တက်လာခဲ့ပါတယ်။
ရေနံဈေးကတော့ အရှေ့အလယ်ပိုင်းဒေသ တင်းမာမှုတွေနဲ့ ရေနံထောက်ပံ့မှုအပေါ် စိုးရိမ်မှုတွေကြားမှာ မြင့်မားနေဆဲဖြစ်ပေမဲ့ အောက်တိုဘာ ၁၆ ရက်မှာ အနည်းငယ်ပြန်ကျခဲ့ပါတယ်။
မြန်မာမှာတော့ နိုင်ငံခြားငွေရရှိနိုင်မှု အကန့်အသတ်တွေ၊ ဒေါ်လာဝယ်လိုအားနဲ့ ကျပ်ငွေအပေါ် ယုံကြည်မှုတို့အပါအဝင် ပြည်တွင်းစီးပွားရေးအခြေအနေတွေက ငွေလဲနှုန်းနဲ့ ကုန်ဈေးနှုန်းတွေအပေါ် သက်ရောက်နေပါတယ်။
နေပြည်တော်အစိုးရနဲ့ ဆက်ဆံရေးကောင်းနေတဲ့ ဘယ်လာရုစ်နိုင်ငံရဲ့ ဘဏ်နှစ်ခုကနေ ပို့ကုန်ချေးငွေယူဖို့နဲ့ မြန်မာဗဟိုဘဏ်ဆီက ကျပ် ၂.၁ ထရီလီယံအထိ ချေးယူမယ့်အစီအစဉ်တွေကို အောက်တိုဘာ ၁၄ ရက် နေပြည်တော်လွှတ်တော်မှာ အတည်ပြုလိုက်ပါတယ်။
ဒီအစီအစဉ်တွေကို လွှတ်တော်က အတည်ပြုချိန်မှာ ပြည်တွင်းပြင်ပငွေလဲဈေးကွက်မှာ အမေရိကန်ဒေါ်လာနဲ့ ထိုင်းဘတ်ငွေဈေးတွေ မြင့်တက်နေပြီး ကျပ်ငွေတန်ဖိုး ဆက်တိုက်ကျဆင်းနေတာဖြစ်ပါတယ်။
တဖက်မှာလည်း ကမ္ဘာ့ရွှေဈေးနဲ့ စက်သုံးဆီတင်သွင်းစရိတ်တွေ မြင့်တက်လာတာအပြင် ကျပ်ငွေတန်ဖိုးကျဆင်းမှုကလည်း ပြည်တွင်းရွှေဈေးနဲ့ စက်သုံးဆီဈေးနှုန်းတွေ မြင့်မားနေစေတဲ့ အကြောင်းရင်းတွေထဲမှာ ပါဝင်နေပါတယ်။
ပြည်တွင်စျေးကွက်မှာ အမေရိကန်ဒေါ်လာငွေလဲနှုန်းနဲ့ ရွှေစျေးနှုန်းတက်လာလို့ မြန်မာရွှေနဲ့ငွေလဲစျေးကွက်ထဲ ဖမ်းဆီးမှုတွေရှိနေတယ်လို့လည်း သတင်းတွေထွက်ပေါ် နေပါတယ်။
