အမေရိကန်အနေနဲ့
မြန်မာမှာရှိတဲ့ အဖွဲ့အစည်းအားလုံးနဲ့ ဆက်ဆံ ပြောဆိုနေပြီး အမေရိကန်ရဲ့
အကျိုးစီးပွားကို ရှေ့ဆက် ဖော်ဆောင်နေတယ်လို့ အမေရိကန်နိုင်ငံခြားရေး ဝန်ကြီးဌာနက
ဘီဘီစီကို ပြောပါတယ်။
နေပြည်တော်ကို
အမေရိကန် အစိုးရ ကိုယ်စားလှယ်အဖွဲ့ လေယာဉ်နဲ့ အဝင်အထွက် လုပ်ခဲ့တာနဲ့ ပတ်သက်ပြီး
ဘီဘီစီက မေးမြန်းတာကို အမေရိကန် နိုင်ငံခြားရေးဝန်ကြီးဌာနရဲ့ သတင်းမီဒီယာဌာနက
နိုင်ငံခြားရေးရုံး ပြောရေးဆိုခွင့်ရှိသူတစ်ဦးရဲ့ ပြောကြားချက်ကို ကိုးကားပြီး
တုံ့ပြန်တာ ဖြစ်ပါတယ်။
အမေရိကန်ပြည်ထောင်စုဟာ
မြန်မာနိုင်ငံမှာ ၁၉၄၇ ခုနှစ်ကတည်းက သံတမန်ရေးအရ ကိုယ်စားပြုမှု ထားရှိခဲ့တာမှာ၊
အခု မျက်မှောက်ကာလမှာလည်း အမေရိကန်ရဲ့ အကျိုးစီးပွားတွေနဲ့ သက်ဆိုင်တဲ့
ကိစ္စရပ်တွေကို နေပြည်တော်က အာဏာပိုင်တွေနဲ့ ပုံမှန် ဆက်သွယ်
ဆွေးနွေးလေ့ရှိတယ်လို့ ဆိုပါတယ်။
အဲဒီလို ဆက်ဆံရေးတွေထဲက
တစ်စိတ်တစ်ပိုင်းအနေနဲ့ အမေရိကန်အစိုးရ တာဝန်ရှိသူတွေပါဝင်တဲ့
ကိုယ်စားလှယ်အဖွဲ့တစ်ဖွဲ့ဟာ စက်တင်ဘာ ၁၅ ရက်နေ့မှာ နေပြည်တော်ကို သွားရောက်ခဲ့ပြီး
မြန်မာအာဏာပိုင်တွေနဲ့ တွေ့ဆုံဆွေးနွေးခဲ့တာ ဖြစ်ကြောင်း အမေရိကန်
နိုင်ငံခြားရေးဌာနက ဘီဘီစီကို အတည်ပြုပါတယ်။
အဲဒီ
ခရီးစဉ် တွေ့ဆုံမှုတွေအတွင်းမှာ အမေရိကန်နိုင်ငံသား အဒမ် ကာစတီယို - Adam
Castillo ကို ဖမ်းဆီး ထိန်းသိမ်းထားရာကနေ
ပြန်လွှတ်ပေးရေး အမေရိကန်ကိုယ်စားလှယ်အဖွဲ့ရဲ့ ဆွေးနွေးမှုတွေ အထမြောက်ခဲ့တယ်လို့
ဆိုပါတယ်။
မြန်မာနိုင်ငံဆိုင်ရာ
အမေရိကန်ကုန်သည်ကြီးများ အသင်းကို ဦးဆောင်ခဲ့သူ မစ္စတာ ကာစတီယိုဟာ
အသင်းဖွဲ့စည်းပုံပါ စည်းမျဉ်း ကန့်သတ်ချက်တွေကို ဖောက်ဖျက်တဲ့အတွက် အမှုဖွင့်
ထိန်းသိမ်းထားတာကနေ၊ နှစ်နိုင်ငံ သံတမန်ဆက်ဆံမှုမှာ မိတ်ဝတ်မပျက်အောင် ရှေးရှုပြီး
ပြည်နှင်ဒဏ်ပေး ပြန်လွှတ်လိုက်တယ်လို့ နေပြည်တော်ဘက်ကလည်း ထုတ်ပြန်ထားပါတယ်။
အမေရိကန်
ကိုယ်စားလှယ် အဖွဲ့ရဲ့ မကြေညာတဲ့ တိတ်တဆိတ် နေပြည်တော် ခရီးစဉ်မှာ မစ္စတာ ကာစတီယို
လွတ်မြောက်ရေးထက် ကျော်လွန်ပြီး၊ တခြား န်ုင်ငံရေးဆိုင်ရာ ညှိနှိုင်းမှုတွေ၊
ဝါရှင်တန်နဲ့ နေပြည်တော် ပုံမှန် သံအဆင့်အတန်း ပြန်ထားဖို့လို ကိစ္စတွေကို
ဆွေးနွေးခဲ့တယ်ဆိုတဲ့ သဘောမျိုးကိုတော့ နှစ်ဖက်ပြောဆိုတာတွေထဲမတွေ့ရပါဘူး။
အမေရိကန် နိုင်ငံခြားရေးဌာနရဲ့
ဘီဘီစီကို ဖြေဆိုမှုထဲမှာတော့၊ နေပြည်တော်က အာဏာပိုင်တွေနဲ့
ဆက်သွယ်ဆွေးနွေးမှုတွေမှာ အမေရိကန်ပြည်ထောင်စုအနေနဲ့ အကြမ်းဖက်မှုတွေ ရပ်တန့်ဖို့၊
လူသားချင်းစာနာထောက်ထားမှုဆိုင်ရာ အကူအညီတွေ ဝင်ရောက်ပေးနိုင်ဖို့နဲ့
နိုင်ငံရေးအကျဉ်းသားတွေကို ပြန်လွှတ်ပေးဖို့ လိုအပ်ကြောင်း အမြဲတမ်း
ထည့်သွင်းပြောခဲ့တယ်လို့ ဆိုပါတယ်။
မြန်မာနိုင်ငံမှာ ရေရှည်တည်တံ့တဲ့
ငြိမ်းချမ်းရေး ရရှိနိုင်မယ့် အခြေအနေတွေ ဖန်တီးနိုင်ဖို့အတွက်လည်း ဒီအချက်တွေကို
ဆက်လက် တိုက်တွန်းပြောဆိုသွားမှာ ဖြစ်တယ်လို့လည်း ဆိုပါတယ်။
အမေရိကန်
ကိုယ်စားလှယ် အဖွဲ့ နေပြည်တော် ခရီးစဉ် ပြုလုပ်ခဲ့တဲ့ အချက်ကို ထောက်ပြပြီး
အသွင်ပြောင်း သမ္မတ ဦးမင်းအောင်လှိုင်နဲ့ ဆက်ဆံရေး တံခါးဖွင့်လိုတဲ့ ဝါရှင်တန်ရဲ့
အချက်ပြမှုအဖြစ် စစ်တပ်နဲ့ နီးစပ်သူတချို့က အဓိပ္ပာယ် ဖွင့်ကြပါတယ်။
လက်ရှိအချိန်ထိတော့
၂၀၂၁ စစ်တပ်ရဲ့ တကျော့ပြန် အာဏာသိမ်းမှုနောက်ပိုင်း၊ အမေရိကန်ဟာ တခြား ဒီမိုကရေစီ
အနောက်အုပ်စု နိုင်ငံတွေ နည်းတူ ရန်ကုန်မှာ သံအမတ် အဆင့်အတန်း မထားတော့ပဲ
သံအဆင့်အတန်း လျှော့ချထားပါတယ်။
ဒါ့အပြင်၊ အကျဉ်းသား လွတ်မြောက်ရေး
နေပြည်တော် ခရီးစဉ် ရက်ပိုင်းမှာပဲ မြန်မာဟာ မူးယစ်ဆေးဝါး ထုတ်လုပ်ရာ၊ တင်ပို့ရာ
အဓိက နိုင်ငံ အဖြစ် သမ္မတ ထရမ့် အစိုးရက ဆက်လက် သတ်မှတ်ထားတယ် ဆိုတဲ့ အချက်
ထွက်ပေါ်လာပါတယ်။
မြန်မာပြည်က စစ်အာဏာပိုင်တွေအနေနဲ့
မူးယစ်ဆေးနဲ့ ပတ်သက်တဲ့ စီးပွါးရေးတွေ အပေါ် လုံလောက်အောင် မကိုင်တွယ်ဘူးလို့လည်း
ဆိုထားပါတယ်။
