တိုက်ရိုက်ထုတ်လွှင့်မှု, ငဝန်မြစ်ရေကာတာကျိုးတဲ့ 'လေးမျက်နှာ'မှာ ရေထပ်တက်လို့အရေးပေါ် အကူအညီလိုအပ်နေ

တိုက်ရိုက် ထုတ်လွှင့်ချက်

1. လွန်ခဲ့သော ၃ မိနစ် ကဒေါ်အောင်ဆန်းစုကြည်ကို ICRC ဌာ‌နေကိုယ်စားလှယ်နဲ့ ပေးတွေ့တယ်လို့ နေပြည်တော်ထုတ်ပြ

   

   ဓာတ်ပုံ ရင်းမြစ်, ထုတ်ပြန်ချက်

   ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) က မြန်မာနိုင်ငံဆိုင်ရာဌာ‌နေကိုယ်စားလှယ် Mr. Arnaude de Baqque က သွားရောက်တွေ့ဆုံခဲ့တယ်ဆိုပြီး နေပြည်တော်က ဒီကနေ့ သြဂုတ် ၃ ရက်မှာ သတင်းထုတ်ပြန်ပါတယ်။

   '' ဒီနေ့မနက်တွေ့တာဖြစ်ပါတယ်''လို့ သတင်းထုတ်ပြန်ရေးအဖွဲ့ဝင်တစ်ဦး‌က ပြောပါတယ်။

   အဲဒီတွေ့ဆုံမှုသတင်းဓာတ်ပုံနဲ့ အတူ ဇွန် ၁၉ ရက် မွေးနေ့က အမှတ်တရ ဓာတ်ပုံနှစ်ပုံပါ ပူးတွဲပြီး ထုတ်ပြန်တာကိုလည်း တွေ့ရပါတယ်။ အပြည်ပြည်ဆိုင်ရာ ကြက်ခြေနီကော်မတီ (ICRC) ကတော့ ဒီတွေ့ဆုံမှုနဲ့ပတ်သက်ပြီး သတင်းထုတ်ပြန်တာမတွေ့ရသေးပေမဲ့ ဘီဘီစီကိုအတည်ပြုပြောပါတယ်။

   ဇွန် ၁၉ ရက်က မွေးနေ့ ဓာတ်ပုံနဲ့ပတ်သက်လို့တော့ ဘီဘီစီက သီးခြားအတည်ပြုနိုင်တာမရှိသေးပါဘူး။

   တဖက်မှာလည်း အာဆီယံနဲ့ မြန်မာ့အရေးအထူးသံ ဖိလစ်ပိုင်နိုင်ငံခြားရေးဝန်ကြီး လာဇရိုက ဒေါ်အောင်ဆန်းစုကြည်နဲ့ သီးခြားတွေ့ဆုံခွင့်တောင်းထားသလို နေပြည်တော်ရဲ့ အာဆီယံအစည်းအဝေးတွေပြန်တက်နိုင်ရေးဟာ ဒေါ်အောင်ဆန်းစုကြည်လွတ်မြောက်ရေးနဲ့ သက်ဆိုင်တယ်လို့ပြောနေကြတာဖြစ်ပါတယ်။

2. လွန်ခဲ့သော ၂၉ မိနစ် ကရေမကြီးခင်နဲ့ ‌ရေကျချိန်လုပ်ရမယ့်အချက်တွေ

   

   ဓာတ်ပုံ ရင်းမြစ်, Getty Images

   မြန်မာမှာ နှစ်စဥ်နှစ်တိုင်း ရေကြီးတာမျိုးက ကြုံရတတ်ကြပေမဲ့ ရာသီဥတုပြောင်းလဲမှုက မိုးတွေ ပိုကြီးလာစေပြီး ရေဘေးကြုံရနိုင်တဲ့ အန္တရာယ်က ပိုများလာပါတယ်။ ဒါကြောင့်လည်း အခုနောက်ပိုင်းကာလတွေမှာ ရေကြီးမှုတွေကို တစ်နှစ်တည်းမှာပဲ အကြိမ်ကြိမ်ကြုံတွေ့ရတာမျိုးတွေ ရှိလာပါတယ်။

   ရေမတက်ခင်နဲ့ရေတက်ပြီး အချိန်တွေက အရေးကြီးသလို ရေကျသွားချိန်မှာ ဆောင်ရန် ရှောင်ရန်တွေကလည်းအထူးသတိထားလုပ်ဆောင်ရမှာဖြစ်ပါတယ်။

   ရေမကြီးခင်နဲ့ ‌ရေကျချိန်လုပ်ရမယ့်အချက်တွေကို ဒီလင်ခ့် မှာ ဖတ်ရှုနိုင်ပါတယ်။

3. လွန်ခဲ့သော ၃၂ မိနစ် ကရုတ်တရက် ရေကြီးမှုတွေဘာ့ကြောင့် ဖြစ်တာလဲ

   ရေကြီးမှု အမျိုးအစားတွေ အများအပြားရှိပေမဲ့ အန္တရာယ်ရှိတဲ့ ရေကြီးမှုမျိုးကတော့ မိနစ်ပိုင်း၊ နာရီပိုင်းအတွင်း အလျင်အမြန် ရေမြင့်တက်လာတတ်တဲ့ "ရုတ်တရက် ရေကြီးမှုမျိုး" ဖြစ်ပါတယ်။

   ဒီရေကြီးမှုမျိုးက မိုးသည်းထန်စွာ ရွာသွန်းရာကနေ ဖြစ်တတ်လေ့ရှိပြီး အဆောက်အအုံတွေ ထိခိုက်ပြိုပျက်နိုင်လောက်အောင် အားပြင်းနိုင်ပါတယ်။

   မိုးခေါင်နေရာကနေ အကြီးအကျယ် မိုးသည်းထန်လာတာမျိုးလို ရာသီဥတု ထူးကဲမှုတွေကြောင့် ရာသီဥတု ပြောင်းလဲလာမှုကို ပိုဆိုးဝါးလာစေပြီး ရုတ်တရက် ရေကြီးမှုမျိုးတွေ မကြာခဏ ဖြစ်လာစေပါတယ်။

   ဒီတော့ ရုတ်တရက် ရေကြီးလာခဲ့ရင် ဘယ်လို လွတ်မြောက်အောင် လုပ်နိုင်မှာလဲဆိုတာ ဒီလင်ခ့် မှာ ဖတ်နိုင်ပါပြီ။

4. လွန်ခဲ့သော တစ်နာရီ ကငဝန်မြစ် ရေကာတာကျိုးတဲ့ 'လေးမျက်နှာ'မှာ ရေထပ်တက်လို့ အရေးပေါ် အကူအညီလိုအပ်နေ, ရေဘေးသင့်သူတွေကို ရှာဖွေရေးနဲ့ ကယ်ဆယ်ရွှေ့ပြောင်းပေးရေးတွေဆက်လုပ်

   

   ဓာတ်ပုံ ရင်းမြစ်, H Rescue

   ငဝန်မြစ်ရေကာတာပေါက်လို့ လူထောင်ချီ ရေဘေးသင့်နေတဲ့ ဧရာဝတီတိုင်း၊ လေးမျက်နှာမှာ မြစ်ရေ တဖြည်းဖြည်းထပ်တက်လာနေလို့ အရေးပေါ် အကူအညီတွေ ဆက်လိုအပ်နေတယ်လို့ မြေပြင်မှာ အကူအညီပေးရေးလုပ်နေသူတချို့ကပြောပါတယ်။

   “ရေတွေက တဖြည်းဖြည်း ထပ်တက်လာတယ်။ လက်ရှိ စားနပ်ရိက္ခာ၊ ဆေးဝါးအကူအညီတွေ လိုအပ်နေတယ်” လို့ အကူအညီပေးရေးလုပ်နေသူ တစ်ဦးက ပြောပါတယ်။

   ဧရာဝတီတိုင်း အစိုးရအဖွဲ့ကတော့ ငဝန်မြစ်ရေ ဝင်ရောက်မှုကြောင့် ဩဂုတ်လ ၁ ရက် အထိအချက်အလက်တွေအရ ရပ်ကွက်/ကျေးရွာအုပ်စု ၁၀ ခုက အိမ်ခြေ ၁,၇၀၀ ကျော် ရေနစ်မြုပ်ပြီး လူပေါင်း ၈,၃၀၀ ကျော် ရေဘေးသင့်နေတယ်လို့ ဩဂုတ် ၂ ရက်နေ့မှာ သတင်းထုတ်ပြန်ပါတယ်။

   လက်ရှိ လေးမျက်နှာမြို့မှာ ငဝန်မြစ်ရေကာတာကျိုးပေါက်လို့ မြို့ပေါ် ရပ်ကွက် ၄၅ ခု၊ အနီးအနားက ရွာ ၄၅ ရွာကို ရေဝင်ရောက်မှုတွေ ရှိနေလို့ ကူညီကယ်ဆယ်ရေးတွေ လုပ်ဆောင်နေတယ်လို့ နေပြည်တော်ကထုတ်ပြန်ပါတယ်။

   ငဝန်မြစ်ကို မေးတင်ထားတဲ့ ရေကြည်မြို့နယ်က ရွာတွေမှာလည်း မိုးများနေတာကြောင့် ဒီနေ့မနက်ကစလို့ မြစ်ရေတဖြည်းဖြည်းတက်လာလို့ ဘေးလွတ်ရာကို တိမ်းရှောင်ဖို့ ပြင်ဆင်နေကြတယ်လို့ ငပိဆိပ်ရွာက ဒေသခံတစ်ဦးက ဘီဘီစီကိုပြောပါတယ်။

   “မနေ့က မြစ်ရေ နဲ့ ကုန်းမြေနဲ့ က တပြေးတည်းဖြစ်လာတာ။ အခု တဖြည်းဖြည်းတက်လာတယ်။ ဟိုးအရင်တုန်းကလည်း ဒီလိုဖြစ်ဖူးတယ်။ တစ်ပတ်လောက်ဆိုရင် ရွာတွေအကုန်လုံးရေတွေဝင်ကုန်တော့မှာ။ အခု ပစ္စည်းတွေထည့်ပြီး တစ်နေရာရာပြောင်းမလို့ ပြင်နေတယ်” လို့ သူကပြောပါတယ်။

   ငဝန်မြစ်ဟာ လေးမျက်နှာမြို့နယ်၊ ဟင်္သာတ၊ ရေကြည် နဲ့ ကျုံပျော်မြို့နယ်တွေကို ဖြတ်သန်းစီးဆင်းတာပါ။

   လေးမျက်နှာမြို့နယ်၊ ဂျမ်းကုန်းကျေးရွာအနီးက ငဝန်မြစ်ရေ ကာထားတဲ့တာဟာ အလျား ၅၀ ပေခန့် ကျိုးပေါက်သွားခဲ့တာလို့ မီးသတ်တပ်ဖွဲ့က ဇူလိုင် ၃၀ ရက်ကတည်းက သတင်းထုတ်ပြန်ထားပါတယ်။

   မိုးဇလကတော့ ကပ္ပလီပင်လယ်ပြင် နဲ့ ဘင်္ဂလားပင်လယ်အော်မှာ မုတ်သုံလေ အားကောင်းနေတာကြောင့် ဧရာဝတီတိုင်းဒေသကြီးမှာ ဒီနေ့ကနေ ဩဂုတ်လ ၆ ရက်နေ့အထိ မိုးရွာသွန်းမှုဆက်ရှိနိုင်တယ်လို့ ထုတ်ပြန်ထားပါတယ်။

5. လွန်ခဲ့သော တစ်နာရီ က

   မင်္ဂလာပါ။ ဩဂုတ် ၃ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။