ቀጥታ, ትራምፕ ከኢራን ጋር አዲስ ንግግር ዛሬ እንደሚጀመር ጠቆሙ

በኢራን ላይ ሊፈጸም የነበረ “መጠነ ሰፊ” ጥቃት እንዲቀር ማድረጋቸውን ያስታወቁት የአሜሪካው ፕሬዚዳንት ዶናልድ ትራምፕ፣ ዛሬ ሰኞ አዲስ ንግግር ለመጀመር ከቴህራን ጋር እንደሚቀመጡ ተናገሩ።

ትራምፕ “ጥቃቱ ምን ያህል ሰፊ እንሚሆን ያውቁታል፤ ምክንያቱም ዐይናቸው ስር የሚሆነው እያዩ ነበር” ሲሉ እሁድ ዕለት ለጋዜጠኞች ተናግረዋል። “[ከቴህራን ጋር] በድርድር መልክ እያየተነጋገርን ነው። ነገ [ሰኞ] ከሰዓት በኋላ ይጀምራል።”

ፕሬዝዳንት ይህንን ከማለታቸው አስቀድሞ በትሩዝ ሶሻል ገጻቸው ባሰፈሩት ጽሑፍ፣ የድርድሩ "ማዕቀፎች" ላይ ስምምነት በመደረሱ ኢራን እና የመካከለኛው ምሥራቅ አጋሮች ማንኛውን ጥቃት "እንዲቆም" መጠየቃቸውን ጽፈዋል።

ኢራን ለትራምፕ አስተያየት እስካሁን ምላሽ አልሰጠችም። የአሜሪካው ፕሬዝዳንት ጦርነቱ ሊጠናቀቅ የተቃረበበት ጊዜ እንደቀረበ በተደጋጋሚ የተናገሩ ቢሆንም ጥቃት እና የአጸፋ እርምጃዎች ሲፈጸሙ ቆይተዋል።

ትራምፕ ከጋዜጠኞች ለቀረቡላቸው ጥያቄዎች ምላሽ ሲሰጡ ከቴህራን ጋር ስምምነት የሚደረስበትን የጊዜ ገደብ ከመግለጽ ተቆጥበዋል።

“ሁኔታው እንዴት እንደሚሄድ እናያለን። በፈለግነው ጊዜ እርምጃ ለመውሰድ ዝግጁ ነን… ሰዎችን መግደል አልፈልግም” ብለዋል።

ትራምፕ አክለውም የሳዑዲ አረቢያው አልጋ ወራሽ ልዑል መሐመድ ቢን ሳልማን እንዲሁም የተባበሩት አረብ ኤምሬትስ እና ኳታር ቅዳሜና እሁድ ጥቃት እንዳይፈጸም ጥያቄ አቅርበው እንደነበር ተናግረዋል።

"ሁላችንም ጥቃቱን ለመጀመር ተዘጋጅተን ነበር" ሲሉ የተናገሩት ፕሬዚዳንቱ "አጋሮቻችን ጥቃቱ እንዲዘገይ የጠየቁበት ምክንያት ስምምነት እንዳለ ስለሚያስቡ ነው" ብለዋል። "በሆርሙዝ ላይ ስምምነት አለ፣ እና በኒውክሌር ላይ ስምምነት ይኖራል" ብለዋል።

ትራምፕ ይህንን ይፋ ካደረጉ በኋላ ሰኞ ጠዋት በእስያ ዓለም አቀፍ የነዳጅ ዋጋ ቀንሷል።

የብሬንት ድፍድፍ ነዳጅ በበርሜል በ4.5 በመቶ ቅናሽ አሳይቶ በ83.98 ዶላር ተሸጧል።

ኢራን በአሜሪካ እና እስራኤል ለተከፈተባት ጦርነት ምላሽ ስትሰጥ በወሰደችው እርምጃ የሆርሙዝ ወሽመጥ በመዘጋቱ የዓለም የነዳጅ ዋጋ ከፍተኛ ጭማሪ አስመዝግቧል።

በዓለም ላይ ካለው ድፍድፍ ዘይትና ፈሳሽ የተፈጥሮ ጋዝ ውስጥ 20 በመቶ የሚሆነው የሚመጣው ከባሕረ ሰላጤው አገራት ነው።

የኢራን የዜና ወኪል የሆነው ሜህር፣ ቴህራን አሜሪካ ተጨማሪ ወታደራዊ እርምጃ እንዳትወስድ ጠይቃለች መባሉን አስተባብሏል። አክሎም የትራምፕ ንግግር "አዲስ ውሸት ብቻ ነው" ብሏል።

የኢራን የውጭ ጉዳይ ሚኒስትር አባስ አራግቺ እሁድ ዕለት በሆርሙዝ የባህር ወሽመጥ ላይ ከኦማን ጋር የተደረገው ድርድር "ወደ መጠናቀቁ እየሄደ ነው" ማለታቸውን የኢራን መገናኛ ብዙኃን ዘግበዋል።

የአሜሪካው ፕሬዝዳንት ንግግሩ ሰኞ ዕለት የሚካሄድበትን ቦታም ሆነ ሊሳተፉ የሚችሉ ባለሥልጣናትን እስካሁን ይፋ አላደረጉም።