Haleellaa lamaffaa Huutiin buufata xiyyaaraa Riyaad iratti gaggeesseen namni tokko du'ee, 11 madaa'an

Haguuggii Tamsaasa Kallattii

1. 12 Onkololeessa 2026Turkii, Paakistaan, Masirii fi Sa'udiin haleellaa Huutii balaaleffatan

   

   Madda suuraa, Reuters

   Turkii, Paakistaan, Masirii fi Sa'ud Arabiyaan haleellaan Huutiin buufata xiyyaaraa idiladdunyaa Riyaad irratti raawwate ''madaala kamiinuu fudhatama hin qabu'' jechuun balaaleffatan.

   Hidhattoonni Huutii haleellaa buufata xiyyaarichaa irratti raawwataniin namoota 13 ajjeesuu fi 300 kan caalan madeessuu erga ibsanii guyyaa tokko booda aangawoonni Sa'uudii haleellaa gara biraan namni tokko du'uu fi hedduun madaa'uu ibsan.

   Gareen Galoo Galaanaa keessatti qindoomina qaban fi R4 jechuun waamaman tarkaanfii barbaachisuun Sa'uudii bira akka dhaabbatan waadaa seenaniiru.

   Biyyattiin tarkaanfii haleellaa ofirraa qolachuu taasistu hunda keessatti akka bira dhaabbatan ibsan.

   Akkasumas yaaddoon nageenyaa fi haleellaan naannawasaanii keessatti akka hin mudanne ittisuurratti akka wal bira dhaabbatan ibsaniiru.

   Gareen kun ibsa waloo baasaniin ''garechi haleellaawwan raawwataa jiraniin rakkoo uumamu akkasumas haleellaa haaloo ba'uu sababa kanaan mudachuun nageenyaa fi tasgabbii naannawa kanaa fi idiladdunyaa miidhuu danda'uuf garee Huutii itti gaafatamaa godheera,'' jedhe.

   Kanaafuu Huutiin haleellaa raawwataa jiru irraa hatattamaa of qusachuu qaba jedhe.

   Biyyi miseensa NATO Turkii fi biyyi meeshaa waraanaa nukilaraa hidhatte Paakistaan Hagayya darbe Sa'uudii Arabiyaa waliin tumsa waraanaa uummataniiru.

   Akkaataa tumsa kanaan haleellaan miseensa tokkorratti raawwatame akka haleellaa miseensa hundarratti raawwatameetti ilaalama.

   Kanarratti hundaa'uun tarkaanfiinis fudhatama.

   Biyyoonni kunneen torban darbe keessa wayita haleellaan Huutii hammaate humna waloo Sa'uudii keessaa qaban bobbaasuun tarkaanfii akka fudhatan ibsanii turan.

2. 12 Onkololeessa 2026Wayita hidhattoonni Huutii buufata xiyyaaraa Sa'uudii Arabiyaa haleelan viidiyoo mul'isu

   Haleellaa lamaffaa Huutiin guyyaa lama keessatti buufata xiyyaaraa idil-addunyaa magaalaa guddoo Sa'ud Arabiyaa, Riyaad irratti gaggeesseen namni tokko ajjeefamee, 11 ammoo madaa'uu isaanii aanga'oonni himan.

   Dubbi-himaan waraanaa Sa'udii akka jedhetti, dhukaasni kun Dilabata Buufata Xiyyaaraa Idil-addunyaa King Kaalid kan rukkute yoo ta'u, galmawwan buufata xiyyaarichaa tokko abiddi akka qabatu godheera.

   Badii buufata xiyyaaraa kanarra qaqqabe viidiyoo mul'isu.

3. 12 Onkololeessa 2026Neppaalitti ammas lolaan tasaa mudatee gamoowwan hedduurra bahe

   

   Madda suuraa, Getty Images

   Neppaalitti lolaa tasa osoo hin eegamiin mudatee gamoowwannnirra baheen namoonni shan bakki buuteen isaanii dhabameera.

   Aanga'oonni Neppaal akka jedhanitti, erga lolaan tasaa kun mudatee kaasee namoota bakki bu'an dhabame kana dhimmee barbaadaa jira.

   Lolaan kun kan mudate wayita daa'immanii fi hawaasni kabaja ayyaana guddaa Neppaal keessatti beekamu, Dashain, kabajachuuf qophiitti jiranittidha.

   Lolaa konyaa Gorkhaa jedhamu keessatti mudate kanaan namoonni 50 baraaramuu aanga'oonni himaniiru.

   Neppaal ammallee balaa lolaa hamaa daangaa biyyattii gama Tibeetiin jiruun ji'a lama dura lubbuun namoota kumaan lakkaa'aman dabarse, akkasumas manneen kumaan lakkaa'aman mancaasuun bu'uuraaleen misoomaa barbaachisoo balleesserraa guutummaatti hin dandamatiin jirti.

   Neppaal teessuma lafaa gaarreen itti baayyatan kan qabdu yoo ta'u Gaarri Emaaliyaas addunyaarratti hunda caalu tursitoota haawatu achi keessatti argama.

   Biyyattii keessatti gaarreen baayyachuun kun hawwata turiizimii guddaa ta'ullee balaa lolaafi sigiga lafaa hamaa irra deddeebiin biyyattii mudatu tilmaamuun garuu yaaddessaa ta'eera.

4. 12 Onkololeessa 2026Iraan deebii Ameerikaan karoora Ulaa Hormuuz banuuf dhiyeessiteef kennite "gahaa akka hin turre" ibsite

   

   Madda suuraa, Reuters

   Iraan murteessaa kan ta'e Ulaa Hormuuz banuudhaaf haal-dureewwan torba dhiyeessiteef deebii Ameerikaan kennite "gahaa akka hin turre" itti-gaafatamaan tikkaa Iraan Mohisaan Raazee dubbachuu miidyaaleen biyyattii gabaasan.

   Iraan Korri Waliigalaa Dhaabbata Biyyoota Gamtoomanii wayita gaggeeffamaa turetti, Ulaan Hormuuz guyyoota torba keessatti haala ittiin banamuu danda'uu fi sochiiwwan doonii gara haala idileetti deebisuu kan dandeessisa jette karoora dhiyeessitee turte.

   Ameerikaanis boodara karaa jaarummaa Qaataariin deebii kenniteetti.

   Haata'u malee, "deebii isaanii kanaan haal-dureewwan hanga tokko kan fudhatan ta'ulleen kanneen biroo ifa miti," jedheera itti-gaafatamaan tikaa kun.

   Waashingiteen dhimmoota ifa isheef hin ta'iin irratti ibsa gaafachuu qabdi kan jedhe Raazeen, "Ameerikaanotaaf haal-dureewwan torba keenyeerraaf, haal-dureewwan kunneen kabajamuu baannaan Ulaan Hormuuz isaaniif banaa akka hin taanee fi marichis akka itti hin fufne isaaniif ibsineerra," jechuun dubbate.

   Rooyitars dhimmicharratti ibsa argachuuf Waayits Hawus gaafatullee battalatti deebii hin arganne.

   Dhimmoota shan marii US fi Iraan irratti qormaata ta'uu danda'an

   Abdiin marii Ameerikaafi Iraan Netaaniyaahuu yaaddessaa?

5. 12 Onkololeessa 2026Federeeshiniin Kubbaa Miilaa Poorchugaal Ronaaldoo irratti tarkaanfii naamuusaa fudhate

   

   Madda suuraa, Getty Images

   Federeeshiniin Kubbaa Miilaa Poorchugaal (FPF) Kiristaanoo Ronaaldoo irratti tarkaanfii naamusaa fudhachuu Sky Sport gabaaeera.

   FPF ji'a darbe Rondaaldoon kaampii gareen biyyaalessaa biyyattii keessa turan gadhiisee waan deemeef garee sanatti akka hin makamne dhorkee ture.

   Taphataan umuriin isaa waggaa 41 ta'e kun Amballii garee biyyaalessaa Poorchugaal ta'ee osoo jiruu, amala akkasii agarsiisuun isaa namoota hedduu biratti akka qeeqamu isa godheera.

   Ronaaldoon boodarra gocha isaa kanaaf gaabbuun adabamuu malee ar'amuu hin barbaadu jechuun fuula miidiyaaf barreesse.

   Amma akkuma adabamuu naaf mala jedhettis adabbii argateera.

   FPF ibsa baaseen akka jedhetti, "dhorkaan yeroo" Onkoloolessa 9 irraa kaasee taphataa kanarra kaa'amuun dhimmi isaa "ariifachiisaa" akka ta'etti fudhatamee murtoon kennameera.

   Seerri FPF akka ibsutti, taphataan yeroo irraa eegamutti bakka eegamutti hin argamnee fi garee biyyaalessaarraa adda of baase adabbii dhorkamuu ji'a tokkoo hanga ji'a ja'aa, akkasumas adabbii maallaqaatu isa eeggata.

   Pirezidantiin Federeeshinii Kubbaa Miilaa Poorchugaal Pedroo Pirooyenk gaazexaa Poorchugaalitti akkas jechuun dubbate: "Yeroo itti tasgabbaa'uun barbaachisudha. Hundi keenyayyu mariidhaaf bakka keenya qabannee jirra."

   "Amballii keenya deebisuudhaaf fedhii cimaatu jira. Adeemsi naamusaa sirriinis ni jiraata," jedhe.

   Kiristaanoo Roonaaldoo jaalallee isaa yeroo dheeraa Joorjinaa fuudhe

   Kiristaanoo Roonaaldoo Tiraamp biratti maaliif Joorjiinaa haadha warraakoo jechuu hin barbaanne?

6. 12 Onkololeessa 2026Haleellaa lamaffaa Huutiin buufata xiyyaaraa Riyaad irratti gaggeesseen namni tokko du'ee, 11 madaa'an

   

   Madda suuraa, Reuters

   Haleellaa lamaffaa Huutiin guyyaa lama keessatti buufata xiyyaaraa idil-addunyaa magaalaa guddoo Sa'ud Arabiyaa, Riyaad irratti gaggeesseen namni tokko ajjeefamee, 11 ammoo madaa'uu isaanii aanga'oonni himan.

   Dubbi-himaan waraanaa Sa'udii akka jedhetti, dhukaasni kun Dilabata Buufata Xiyyaaraa Idil-addunyaa King Kaalid kan rukkute yoo ta'u, galmawwan buufata xiyyaarichaa tokko abiddi akka qabatu godheera.

   Abbaan Taayitaa Sivil Aveeshinii Sa'ud Arabiyaa ibsa fuula X irratti baaseen, jiraataa Paakistaan namni ta'e tokko haleellaa kanaa aajjeefameera jedheera.

   Haleellaan kun kan buufatuma xiyyaaraa idil-addunyaa King Kaaliid kanarratti gaggeeffamee yoo xiqqaate namoota 13 galaafatee, 308 madeesseen guyyaa tokkoon booda raawwatame.

   Huutiin Yaman keessa jiru haleellaa kana duuba jiraachuun himuun, daandiiwwan qilleensaa fi imaltoonni buufatawwan xiyyaaraa fi qilleensa Sa'ud Arabiyaa akka hin fayyadamne akeekkachiiseera.

   Gareen kun buufata xiyyaaraa kanarratti xiyyeeffatanii kan haleelaan meeshaalee waraanaa warra akka balastik misaa'el, Kiruuz misaa'eliifi dirooniiwwan fayyadamuun ta'uu dubbatu.

   Hidhattoonni kunneen dhaabbuileen boba'aa fi buufata xiyyaaraa gama baha Sa'ud Arabiyaa jiru, Damaam haleelkuu isaanii dubbi-himaan Huutii Birgaader Jeneraal Yahayyaa Saaree dubbateera.

   Gareen kun "Sa'ud Arabiyaa keessa gadi fagaatee oppereeshinii darban cimsee" akka itti fufu dhaadachuun warra magaalota qulqulluu ta'an Makkaa fi Madiinaa keessa jiran irraa kan hafe buufataaleen xiyyaaraa Sa'udii hunduu irratti ni xiyyeeffatamu jedheera.

   Huutiin sababiin Sa'ud Arabiyaa irratti xiyyeffatuuf wal waraansa Yaman keessatti humnoota mootummaa waan deeggartuuf, akkasumas haleellaa qilleensaa buufata xiyyaaraa Sanaa keessa jirurratti raawwatteef jedha.

   Odeeffannoo dbalataa dhimma kanarratti:

   Haleellaa buufata xiyyaaraa Riyaad irratti gaggeeffameen namoonni 12 ajjeefamanii, 300 madaa'an

   Hidhattoonni Huutii Yaman keessaa eenyu?

7. 12 Onkololeessa 2026ASHAMAA!

   Odeeffannoo toora tamsaasa kallattiin isin biraan geenyu eegalleerra.

   Haleellaa lamaffaa Huutiin buufata xiyyaaraa Riyaad iratti gaggeesseen namni tokko du'ee, 11 madaa'uu,

   Maqalee dirqamee keessaa ba'eetti waggaa tokkoofi wallakkaa booda kan deebiye Obbo Getaachoo Raddaa waan jedhe,

   Bidiruun Jibuutii irraa gara Yaman imalaa turte dhidhimuun namoonni 139 dhumuu isaanii UN gabaasuu isaa,

   Waliigalteewwan nagaa Afrikaa shan waraana dhaabuu hanqatan kan jedhaniifi odeessaalee karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.

   DHIYAADHAA!