تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کرېکټ: افغانستان نیپال ته په شپږو وېکټو لویه ماته ورکړه
- Author, نورګل شفق
- دنده, بيبيسي پښتو
- د لوستلو وخت: ۳ دقیقې
د کرېکټ ۱۹ کلنو اسیا جام سیالیو په نننۍ لوبه کې کوربه افغان لوبډلې نیپال ته په شپږو وېکټو په داسې حال کې لویه ماته ورکړه چې لا د لوبې ۱۳۹ نور توپونه هم پاتې وو. د افغانستان د زلموټو لوبډلې په ۲۶ اوور کې د نیپال ټاکل شوی ۱۲۵ منډې هدف پوره کړ او لوبه یې راټوله کړه.
د متحده عربي اماراتو په دوبۍ کې د نن چهارشنبې (لیندۍ ۲۶/دسمبر ۱۷) لوبې پچه افغانستان وګټله خو خپلې سیالې نېپالۍ لوبډلې ته یې د توپوهنې یا بېټېنګ بلنه ورکړه.
نیپال ټاکلي ۵۰ اوورونه پوره و نه شول لوبولی، لوبغاړي یې یو په بل پسې ژر ژر وسوځېدل او په ۴۶ اوور کې یې ټول لوبغاړي په ۱۲۴ منډو وسوځېدل. افغان لوبډلې ته یې ۱۲۵ منډې هدف وټاکه.
تر ټولو ډېرې منډې دلشاد علي وکړې چې ۳۲ وې، چندن رام ۲۷ او ابیشېک تېواري ۲۰ منډې جوړې کړې.
د افغانستان تر ۱۹ کلنۍ د کم عمره لوبډلې له لخوا زیت الله شاهین د نيپال درې لوبغاړي وسوځول، عبدالعزیز خان، نصرت الله نورستاني او واحدالله ځدراڼ دوه-دوه وېکټې واخیستې او سلام خان هم یو لوبغاړی وسوځاوه.
د افغانستان پاڼۍ څنګه وه؟
د افغانستان د کم عمره یا د زلموټو لوبډلې د سر توپوهونکي عثمان سعادت د ۲۸ او فیصل شینوازده د ۱۳ منډو له جوړولو وروسته وسوځېدل.
خو عزیر الله نیازی د توپوهنې په برخه کې نن ښه وځلېد. ده پنځوسیزه یا نیمه سلیزه ووهله او ټولټال یې ۶۱ منډې جوړې کړې.
محبوب الله خان او عزیز الله میاخېل دواړو ۱۱-۱۱ رنزونه کړي وو او د لوبې ۲۶ اوور روان و چې د نیپال ټاکل شوی هدف پوره شو او افغانستان د نننۍ لوبې ګټونکی شو.
زیت الله شاهین د ښې توپاچونې له کبله د نننۍ لوبې غوره لوبغاړی ونومول شو.
د افغانستان په کوربهتوب په متحده عربي اماراتو کې په روانو دغو لوبو کې دا د افغانستان درېیمه او وروستۍ لوبه وه. تر دې وړاندې یې خپله لومړۍ لوبه بنګلهدېش ته په درو وېکټو او دویمه لوبه یې سريلنکا ته په دوو وېکټو بایللې وه.
د همدې لوبو په یوه بله سیالۍ کې نن د بنګلهدېش ۱۹ کلنو سريلنکا ته د ۳۹ منډو په توپير ماته ورکړه.
بنګلهدېش په ۴۶ اوورونو کې ۲۲۵ منډې جوړې وې خو په بدل کې یې سريلنکا د ټولو لوبغاړو په سوځېدو سره ایله ۱۸۶ رنزونه وکړای شول او لوبه یې وبایلله.
د (ایسيسي) یا د کرېکټ نړیوالې شورا د پنځو دایمي غړو افغانستان، هند، پاکستان، بنګلهدېش او سريلنکا ترڅنګ په دغو سیالیو کې نیپال، مالیزیا او متحده عرب امارات هم برخه لري.
د بنګلهدېش له ۱۹ کلنو کم عمره لوبډله سږ کال د خپلې اتلولۍ دفاع کوي. دې لوبډلې د ۲۰۲۳ کال د ځوانانو اسیا جام هم ګټلی و.
