Abubuwan da ke faruwa a Najeriya da sassan duniya 18/10/2026

Rahoto kai-tsaye

Isiyaku Muhammed

1. 18 Oktoba 2026An sake arangama tsakanin masu zanga-zanga da 'yan sanda a Albania

   Masu zanga-zangar adawa da gwamnati a ƙasar Albania sun sake rikici da ‘yan sandan kwantar da tarzoma a babban birnin ƙasar, Tirana, a rana ta shida a jere ta zanga-zangar.

   Bayan da jami’an tsaro suka rufe hanyoyin shiga ofishin Firaminista, masu zanga-zangar sun kai hari kan hedkwatar jam’iyyar Socialist Party mai mulki, kafin daga bisani su yi arangama da ‘yan sanda.

   Wakilin BBC ya bayyana cewa hayakin mai sa hawaye ya mamaye sararin samaniyar birnin, yayin da tarzomar ta ƙara ƙamari bayan wani saƙo mai cike da ƙalubale daga shugaban gwamnatin Albania, Edi Rama.

   Rama ya ce ba zai yi murabus ba, duk da matsin lambar da yake fuskanta.

   Ya kuma yi gargaɗin cewa ci gaba da zanga-zangar kan matsalolin da suka haɗa da ƙarancin ingancin ilimi, tsadar rayuwa da kuma zarge-zargen cin hanci da rashawa na iya yin illa ga ƙoƙarin Albania na shiga Tarayyar Turai.

   Sai dai duk da haka, Firaministan ya bayyana cewa har yanzu yana shirye ya tattauna da masu zanga-zangar domin neman mafita ga rikicin.

   Zanga-zangar na ci gaba da jawo hankalin jama'a a Albania, yayin da ake ci gaba da nuna rashin gamsuwa da halin tattalin arziki da yadda gwamnati ke gudanar da mulki.

2. 18 Oktoba 2026Muna kira ga Iran ta daina tsoma baki a harkokin cikin gidanmu - Lebanon

   Ministan Harkokin Wajen Lebanon, Youssef Raji, ya yi kira ga Iran da ƙawayenta da su daina kai hare-hare kan ƙasashen membobin Majalisar Haɗin Kan Ƙasashen Larabawa na Tekun Fasha da kuma Jordan.

   A wani saƙo da ya wallafa a shafin X, Raji ya ce a jawabinsa na taron ministocin ƙasashen mambobin Ƙungiyar Ƙasashen Musulmi (OIC), ya yi kira ga:

   "Iran da ƙungiyoyin da take marawa baya da su dakatar da hare-haren da suke kai wa ƙasashen Tekun Fasha da Jordan, sannan kuma su daina tsoma baki a harkokin cikin gidan Lebanon."

   Ya kuma bayyana cewa "Matuƙar makamai suna wajen ikon gwamnati, ba za a samu cikakken ikon ƙasa ba. Haka kuma, muddin ana yanke muhimman shawarwari a wajen cibiyoyin gwamnati, ba za a samu zaman lafiya da kwanciyar hankali ba."

   Ministan ya sake jaddada goyon bayan Lebanon ga Kudurin Kwamitin Sulhu na Majalisar Ɗinkin Duniya mai lamba 1701, yana mai cewa wannan ita ce hanyar da za ta kai ga cikakken janyewar Isra’ila daga ƙasar Lebanon da kuma tabbatar da cewa makamai sun kasance ƙarƙashin ikon gwamnati kaɗai.

   A gefe guda kuma, Ministan Harkokin Wajen Iran, Abbas Araqchi, ya bayyana cewa ya yi ganawa da Youssef Raji.

   Da yake magana kan tattaunawar, Araqchi ya ce "Mun yi ganawa cikin mutuntawa da girmamawa, amma kuma cikin cikakkiyar faɗin gaskiya da bayyana ra'ayi kai tsaye. Muna da sabanin ra'ayi da dama da gwamnatin Lebanon ta yanzu."

3. 18 Oktoba 2026Iran ta sanar da ziyarar Sergei Lavrov zuwa Tehran

   Mai magana da yawun Ma’aikatar Harkokin Wajen Iran, Esmail Baghaei, ya sanar da cewa Ministan Harkokin Wajen Rasha, Sergei Lavrov, zai kai ziyara birnin Tehran a ranar Litinin.

   Baghaei ya bayyana cewa ziyarar na gudana ne a cikin tsarin ci gaba da tattaunawa da shawarwari tsakanin Tehran da Moscow, domin bibiyar aiwatar da yarjejeniyoyin da ƙasashen biyu suka cimma, da kuma tattauna sabbin abubuwan da ke faruwa a matakan yanki da na duniya.

   Ya ce:"Wannan tafiya tana gudana ne a cikin tsarin ci gaba da tuntuɓar juna tsakanin Tehran da Moscow, da nufin bin diddigin aiwatar da yarjejeniyoyin ƙasashen biyu, tare da yin shawarwari kan abubuwan da ke faruwa a yankin da kuma duniya baki ɗaya."

   Ana kallon ziyarar Lavrov a matsayin wani ɓangare na ƙoƙarin Iran da Rasha na ƙarfafa haɗin gwiwarsu a fannoni daban-daban, musamman a harkokin siyasa, tattalin arziki da batutuwan tsaro na yanki.

4. 18 Oktoba 2026Netanyahu na da cikakken goyon bayana - Trump

   Shugaban Amurka, Donald Trump, ya bayyana Firaministan Isra’ila, Benjamin Netanyahu, a shafinsa na Truth Social a matsayin “jarumin yaƙi” kuma “abokin hulɗa mafi ƙarfi a yaƙi da Jamhuriyar Musulunci ta Iran.”

   Trump ya rubuta cewa Iran ta shafe shekaru 51 tana furta kalaman “Mutuwa ga Isra’ila, Mutuwa ga Amurka”, yana mai zargin Tehran da yi wa Amurka da Isra’ila barazana a tsawon lokaci.

   Ya ci gaba da cewa:“Lokaci ne kawai ake jira kafin Iran ta aiwatar da waɗannan kalamai masu hatsari. Amma an lalata ƙarfinta ta fuskar soja da tattalin arziki cikin tsari. Idan ba ta sauya halayenta cikin gaggawa ba, za mu murƙushe ta gaba ɗaya nan ba da daɗewa ba.”

   Trump ya kuma yi nuni da cewa jagorancin Netanyahu yana da muhimmanci ga Isra’ila da Amurka, inda ya ce “Idan Isra’ila ba ta da shugaban da ya dace, wato wanin Bibi (Netanyahu), Amurka za ta iya tilasta wa kanta ta fuskanci Iran ita kaɗai, kuma ba ni da sha’awar hakan.”

   Shugaban na Amurka ya yaba wa Netanyahu kan yadda ya ci gaba da ƙara ƙarfi duk da fuskantar matsin lamba daga masu adawa da shi.

   “Wannan shi ne irin abokin hulɗar da Amurka ke tsammani daga Isra’ila,” in ji Trump.

   Ya kuma bayyana cikakken goyon bayansa ga Netanyahu, yana cewa “Bibi ba ya zagin kowa.”

   Kalaman Trump na zuwa ne yayin da Isra’ila ke shirin gudanar da zaɓe a ranar Talata, inda Netanyahu ke fuskantar matsin lamba daga jam’iyyun adawa da masu sukar gwamnatinsa.

5. 18 Oktoba 2026EU ta yi Allah-wadai da harin da Isra'ilawa suka kai wa jami’an diflomasiyyar Turai

   Tarayyar Turai (EU) ta yi kakkausar suka kan harin da wasu Isra’ilawa suka kai wa jami’an diflomasiyyar Turai a Yankin Yammacin Kogin Jordan da Isra’ila ke mamaye da shi.

   A cikin wata sanarwa, Hukumar Kula da Harkokin Wajen Tarayyar Turai ta ce: “Tarayyar Turai ta yi Allah-wadai da hare-haren baya-bayan nan da 'yan kama waje zauna suka kai a Yammacin Kogin Jordan, ciki har da hare-haren da aka kai wa jami’an diflomasiyyar Turai.”

   Sanarwar ta jaddada muhimmancin hukunta masu hannu a ayyukan tashin hankali tare da dakile ci gaba da kai hare-hare da cin zarafin Falasɗinawa da kuma ‘yan jarida, musamman a lokacin girbin zaitun.

   A ƙarshe, Tarayyar Turai ta yi kira ga Isra’ila da ta mutunta dokokin ƙasa da ƙasa da haƙƙin bil’adama gaba ɗaya, tare da dakatar da gina matsugunan Yahudawa a yankunan da ake takaddama a kansu.

   A ranar Asabar, shaidu sun ce wasu Isra’ilawa sun kai hari kan ayarin motocin jami’an diflomasiyyar Turai a Yammacin Kogin Jordan da aka mamaye, sannan suka kai hari kan magajin garin wani birni na Faransa wanda ke ziyarar yankin.

   A gefe guda kuma, Sakataren Harkokin Wajen Amurka, Marco Rubio, ya yi gargadin a ranar Juma’a game da yiyuwar barkewar wata babbar matsala a Yammacin Kogin Jordan bayan wani ɗan jaridar mai daukar hoto ɗan Amurka ya samu raunuka sakamakon wani hari na tashin hankali.

   Lamarin ya kara nuna damuwar ƙasashen duniya kan ƙaruwar tashin hankali a Yammacin Kogin Jordan, inda hare-hare tsakanin isra’ilawa 'yan kama waje zauna da Falasɗinawa ke ci gaba da tayar da hankali a yankin.

6. 18 Oktoba 2026Majalisar Dokokin Masar ta ɗage kaɗa ƙuri'ar baiwa Saudiyya tallafin soji

   Wasu ‘yan majalisar dokokin Masar guda biyu sun shaida wa AFP cewa an ɗage kaɗa ƙuri’ar da za ta yanke hukunci kan buƙatar Shugaba Abdel Fattah al-Sisi na neman izinin ba da tallafin soji ga Saudiyya.

   An dakatar da tattaunawar a zaman yau, sannan aka ɗage batun zuwa gobe Litinin, 19 ga Oktoba.

   Wani ɗan majalisar Masar ya bayyana cewa an tsawaita zaman ne domin bai wa dukkan ‘yan majalisar damar yin tsokaci da bayyana ra’ayoyinsu kan batun.

   A jiya, Al-Sisi ya roƙi ‘yan majalisar su amince da goyon bayan Saudiyya idan ta nemi taimako wajen fuskantar hare-haren da mayakan Houthi ke kaiwa.

   Ya ce: “Na san cewa irin wannan mataki yana buƙatar amincewar majalisar dokokin Masar, saboda haka na nemi a kira taron gaggawa domin a ba mu ikon daukar mataki idan Saudiyya ta nemi hakan.”

   Masar ta shiga kawancen sojin da Saudiyya ke jagoranta a Yemen tun shekarar 2015, amma rawar da ta taka ta fi mayar da hankali ne wajen kare hanyoyin jiragen ruwa a Tekun Bahar Maliya, maimakon shiga yaƙi kai tsaye a fagen daga.

   Wasu jiga-jigan kungiyar Houthi sun yi gargadin cewa kada Masar ta tsoma baki a yaƙin tana goyon bayan Saudiyya, suna masu cewa irin wannan shiga tsakani zai amfanar da Isra’ila ne a ƙarshe.

   Sai dai ba su yi wata barazana kai tsaye ba. Maimakon haka, sun tunatar da Masar game da tsoma bakinta a yaƙin Yemen a shekarun 1960, wanda ya haddasa asarar rayuka masu yawa ga sojojin Masar.

7. 18 Oktoba 2026Gobara ta yi ajalin mutum bakwai a sansanin sojin Canada

   Jami’an agajin gaggawa na ci gaba da aiki bayan wata mummunar fashewa da gobara da suka auku a wani yanki na sansanin sojin Kanada da ke lardin Alberta.

   Kafofin yaɗa labarai na cikin gida sun ruwaito cewa aƙalla mutum bakwai sun mutu, yayin da wasu da dama suka jikkata sakamakon lamarin.

   Rahotanni sun ce yayin wani atisayen harbi da harsasai na gaske a Sansanin Sojin Kanada na Wainwright wato Canadian Forces Base Wainwright, an bugi wani bututun iskar gas ko kuma rijiyar gas, lamarin da ya haddasa wata gobara mai ƙarfi wadda ta bazu cikin sauri sakamakon iska mai ƙarfi.

   Hukumomi ba su fitar da cikakkun bayanai game da abin da ya faru ba zuwa yanzu.

   Asibitoci a Edmonton, babban birnin lardin Alberta, sun ayyana shirin tunkarar bala’i domin kula da yawan marasa lafiyar da aka kai musu bayan hatsarin.

   Ministan Tsaron Kanada, David McGuinty, ya bayyana lamarin a matsayin abin takaici da ban tausayi.

   Hukumomi sun kuma ce an samu nasarar shawo kan gobarar kuma yanzu tana ƙarƙashin iko.

   Babban sansanin na Wainwright na da mazauna sama da mutum dubu ɗaya, ciki har da sojoji da ma’aikatan da ke aiki a wurin.

8. 18 Oktoba 2026Rasha ta kai mana hari kan ɓangaren makamashinmu aƙalla sau 76 - Ukraine

   Shugaban Ukraine, Volodymyr Zelensky, ya zargi Rasha da kai hare-hare a ɓangarorin man fetur da iskar gas na ƙasarsa har sau 76 tun bayan da Donald Trump ya sanar da yarjejeniyar tsagaita kai hare-hare kan cibiyoyin makamashi mako guda da ya gabata.

   A cewar Zelensky, Ukraine ta mutunta yarjejeniyar tsagaita wutar, amma ta koma kai hare-hare bayan kwana uku da Rasha ta ci gaba da sabbin hare-hare.

   A sabon harin da ta kai cikin daren jiya, jirage marasa matuƙa na Ukraine sun kai hari kan wani matatar mai a birnin St Petersburg na Rasha, lamarin da rahotanni suka ce ya yi sanadin mutuwar mutum guda tare da jikkata wasu biyar.

   A nata ɓangaren, Rasha ta ce dakarun kariyar sararin samaniyarta sun harbo fiye da jirage marasa matuƙa 1,000 na Ukraine a sassa daban-daban na ƙasar.

   Sabbin zarge-zargen da hare-haren na nuna yadda rikicin da ke tsakanin Rasha da Ukraine ke ci gaba duk da ƙoƙarin samar da yarjejeniyoyin dakatar da kai hare-hare.

9. 18 Oktoba 2026Ƙasashen Nijar, Mali da Burkina Faso sun amince su yi aiki da ƙasashen ECOWAS

   Ƙasashen Nijar, Mali da Burkina Faso, waɗanda ke ƙarƙashin mulkin sojoji, sun koma tattaunawa da ƙungiyar raya tattalin arzikin ƙasashen yammacin Afirka (ECOWAS) a ranar Asabar, sama da wata 18 bayan sun fice daga ƙungiyar.

   Ɓangarorin biyu sun amince su yi aiki tare domin samar da wani yarjejeniyar haɗin gwiwa.

   Ƙasashen uku, waɗanda sojoji suka ƙwace mulki a tsakaninsu daga shekarar 2020 zuwa 2023, sun fice daga ECOWAS a watan Janairun 2025 bayan sun kafa nasu ƙawancen mai suna Ƙungiyar Kasashen Sahel (Alliance of Sahel States - AES).

   Tun daga watan Janairun 2025 ake gudanar da tattaunawa tsakanin ECOWAS da AES, amma taron ministoci na ranar Asabar shi ne na farko da aka gudanar a hukumance.

   A cikin sanarwar haɗin-gwiwa da suka fitar a yammacin ranar Asabar, ɓangarorin biyu sun yaba da ƴan uwantaka, mutunta juna da kuma buɗe ƙofa ga tattaunawa da aka nuna yayin ganawar.

   Sanarwar ta jaddada muhimmancin ci gaba da kyakkyawar maƙwabtaka, musamman ta fuskar girmama ikon cin gashin kai na kowace ƙasa.

10. 18 Oktoba 2026An kama matar da ta yi yunkurin tafiya Saudiyya da tabar wiwi a Kano

    Jami’an Hukumar Hana Sha da Fataucin Miyagun Ƙwayoyi ta Najeriya (NDLEA) sun kama wata mata mai suna Fatimah Ahmad da tabar wiwi mai nauyin gram 511.75 da aka ɓoye a cikin galan mai, yayin da take shirin tafiya Saudiyya ta filin jirgin saman Malam Aminu Kano.

    An kama ta ne ranar Juma’a, 16 ga Oktoba, 2026, yayin binciken fasinjojin jirgin Ethiopian Airlines da zai tashi zuwa Jiddah ta Addis Ababa.

    A cewar NDLEA, Fatimah ta ce ɗan uwanta, Abubakar Yahaya, ne ya ba ta galan ɗin, lamarin da ya kai ga kama shi a filin ajiye motocin filin jirgin.

    A wani samame daban a tashar jiragen ruwa ta Apapa da ke Legas, hukumar ta gano kilogram 8,725 na tramadol a matsayin hoda, wanda darajarsa ta kai sama da naira biliyan 6.98 a kasuwar miyagun ƙwayoyi.

    Hukumar ta kuma kama wata tsohuwa mai shekara 85 a Edo tare da ƙwace miyagun ƙwayoyi a wasu samame a jihohin Ondo, Bauchi, Kano, Kaduna da Babban Birnin Tarayya, Abuja.

    NDLEA ta ce samamen na daga cikin ƙoƙarinta na dakile safarar miyagun ƙwayoyi a Najeriya. Waɗanda aka kama ana ɗaukar su a matsayin waɗanda ake zargi har sai an tabbatar da laifinsu a kotu.

11. 18 Oktoba 2026Jirgi mai saukar ungulu ya yi hatsari a Saudiyya

    Ƙawancen sojojin ƙasashen da Saudiyya ke jagoranta ya ce hatsarin wani jirgin sama mai saukar ungulu a yankin Najran ya yi sanadin mutuwar ma’aikatan jirgin biyu.

    Kamfanin dillancin labarai na Reuters ya ruwaito cewa kakakin ƙawancen, Turki al-Maliki, ya bayyana a cikin wata sanarwa ranar Lahadi cewa jirgin saman na Saudiyya ya yi hatsari ne sakamakon matsalar fasaha a yankin Najran, lamarin da ya kashe ma’aikatan jirgin biyu.

    Sanarwar ta kuma ce jirgin ya faɗi ne a wani yanki da ke ƙarƙashin ikon Ma’aikatar Rundunar Tsaron Ƙasa ta Saudiyya.

    Ba a ƙarin bayani kan musabbabin matsalar fasahar da ta jawo hatsarin ba.

12. 18 Oktoba 2026Jirgi mai saukar ungulu ya yi hatsari a Saudiyya

    Ƙawancen sojojin ƙasashen da Saudiyya ke jagoranta ya ce hatsarin wani jirgin sama mai saukar ungulu a yankin Najran ya yi sanadin mutuwar ma’aikatan jirgin biyu.

    Kamfanin dillancin labarai na Reuters ya ruwaito cewa kakakin ƙawancen, Turki al-Maliki, ya bayyana a cikin wata sanarwa ranar Lahadi cewa jirgin saman na Saudiyya ya yi hatsari ne sakamakon matsalar fasaha a yankin Najran, lamarin da ya kashe ma’aikatan jirgin biyu.

    Sanarwar ta kuma ce jirgin ya faɗi ne a wani yanki da ke ƙarƙashin ikon Ma’aikatar Rundunar Tsaron Ƙasa ta Saudiyya.

    Ba a ƙarin bayani kan musabbabin matsalar fasahar da ta jawo hatsarin ba.

13. 18 Oktoba 2026'Hare-haren Saudiyya sun kashe aƙalla mutum 12 a yankin Houthi'

    Kafofin yaɗa labaran ƙungiyar Houthi sun ruwaito a ranar Asabar cewa hare-haren sama da Saudiyya ke jagoranta a Yemen, waɗanda suka fara tun daren jiya, sun kashe aƙalla mutum 12, ciki har da yara uku.

    Kamfanin dillancin labaran Houthi ya bayyana cewa jiragen yaƙin Saudiyya sun kai hari kan abin da ya kira “gidajen fararen hula” a lardin Taiz a ranar Asabar, inda suka kashe mutum tara tare da jikkata wasu 16.

    A cewar kamfanin, har yanzu akwai mutane da dama da ke maƙale a ƙarƙashin baraguzan gine-ginen da suka rushe sakamakon hare-haren.

    Tun da farko, kamfanin ya kuma ruwaito cewa yara uku sun mutu yayin da wasu 17 suka jikkata a hare-haren da Saudiyya ta kai da daddare a lardin Dhamar.

    Kafofin Houthi sun yi zargin cewa an yi amfani da manyan bama-baman gungu, waɗanda aka haramta amfani da su a ƙasashen duniya, wajen kai waɗannan hare-hare.

    A gefe guda kuma, yayin da ake ci gaba da sabon salon hare-haren Houthis, Saudiyya ta sanar a ranar Asabar cewa ta kakkabo jirage marasa matuƙa guda huɗu da ƙungiyar ta harba.

14. 18 Oktoba 2026'Sojoji 8 sun mutu bayan motarsu ta taka nakiya a Borno'

    Wasu majiyoyin tsaro sun shaida wa AFP cewa sojojin Najeriya takwas sun mutu bayan wata motar sintirin soji ta taka nakiya da mayaƙan ƙungiyar ISWAP suka dasa a kusa da iyakar Najeriya da Kamaru.

    Lamarin ya faru ne a ranar Asabar a jihar Borno da ke arewa maso gabashin Najeriya, a daidai lokacin da Babban Hafsan Sojin Ƙasa, Laftanar Janar Waidi Shaibu, ke ziyartar Maiduguri bayan wani hari da aka kai wa sansanin soji kwanaki kaɗan da suka gabata, wanda ya kashe sojoji 15 da kuma mambobin ƙungiyar sa-kai masu yaƙi da masu tayar da ƙayar baya biyar.

    Ko da yake tashe-tashen hankulan ƴan jihadi da suka fara a Najeriya a shekarar 2009 sun ragu idan aka kwatanta da yadda suka yi ƙamari kusan shekara goma da ta gabata, ana ganin hare-haren sun fara ƙaruwa a cikin shekaru biyu da suka gabata.

    A sabon harin, sojojin na duba ayyukan wasu mambobin ƙungiyoyin sa-kai da ke share dazuzzuka da ciyayi a gefen babban titin da ke wajen garin Gamboru, lokacin da motarsu ta taka nakin, wanda ya tarwatse tare da kashe dukkan sojojin takwas da ke cikinta.

    Majiyoyin sun zargi ƙungiyar Islamic State West Africa Province (ISWAP) da kai harin, kasancewar tana da ƙarfi a yankin.

    Mayaƙan jihadi kan yi amfani da dazuzzuka da ciyayi da ke gefen manyan tituna domin ɓuya su kai wa sojoji da matafiya hari ba-zata.

    Wani jami'in soji a yankin ya ce harin ya faru ne a ƙauyen Kinuba, mai tazarar kilomita 25 daga Gamboru, inda ya tabbatar da cewa dukkan sojojin takwas sun mutu nan take a fashewar.

    Ibrahim Liman, wanda ke cikin ƙungiyar sa-kai da ke taimakawa sojoji wajen yaƙi da 'yan ta'adda, shi ma ya tabbatar da adadin waɗanda suka mutu.

    Ya ce an binne abin fashewar ne a kan titin ƙasa kuma an tayar da shi daga nesa ta hanyar wata igiyar fashewa.

    Liman ya kuma ce wani ɗan ƙungiyar sa-kai da ke kula da aikin share ciyayin ya samu raunuka sakamakon gutsattsarin ƙarfen da fashewar ta watsa.

15. 18 Oktoba 2026Amurka ta buƙaci Isra’ila ta dakatar da hare-hare a Yammacin Kogin Jordan

    Sakataren Harkokin Wajen Amurka, Marco Rubio, ya ce Washington ta bukaci Isra’ila ta magance hare-haren da Yahudawa ƴan kama wuri zauna ke kaiwa a yankin Yammacin Kogin Jordan da Isra’ila ke mamaye da shi.

    Rubio ya shaida wa manema labarai cewa hotunan yadda aka doki wata ƴar jaridar Amurka a ranar Juma’a abin damuwa ne, kuma ba su nuna Isra’ila a kyakkyawan yanayi ba.

    Kalaman nasa sun zo ne bayan jakadan Amurka a Isra’ila, Mike Huckabee, ya bayyana harin da aka kai wa Heidi Levin a matsayin “abin kyama da kuma aikin ta’addanci.”

    Ana kai wa Levin harin ne yayin da take bayar da rahoto kan hare-haren da wasu ƴan kama wuri zauna ke kai wa Falasdinawa da ke girbin zaitun.

    A jiya ma, wasu jami’an diflomasiyya daga kasashen Turai da suka kai ziyara yankin Yammacin Kogin Jordan sun fuskanci hari.

16. 18 Oktoba 2026'Sauƙaƙa takukuman Rasha ba laifi ba ne'

    Sakataren harkokin wajen Amurka, Marco Rubio, ya kare matakin da Donald Trump ya dauka na dakatar da kakaba sabbin takunkumi kan Rasha da kuma kasashen da ke sayen man fetur daga Rashan.

    Rubio ya ce an dauki matakin ne domin ba da damar nazarin irin tasirin da kudirin dokar takunkumin da aka amince da shi kwanan nan zai iya yi kan farashin man fetur a duniya.

    Ya shaida wa manema labarai cewa ba yakin da Trump ke yi da Iran ne kadai ke kara tsadar man fetur ba. Matakin dakatar da takunkumin ya janyo suka daga 'yan siyasar manyan jam'iyyun biyu na kasar ciki har da wasu sanatocin jam'iyyar Republican.

    Rubio ya kuma musanta cewa an bayar da umarni daga Fadar White House na rage saurin tsarin sadarwar Starlink da Ukraine ke amfani da shi wajen sarrafa jiragen da ke tare hare-haren jirage marassa matuka. break

17. 18 Oktoba 2026An kama mutum 1,200 kan zanga-zangar tsadar rayuwa a Faransa

    Firaministan Faransa, Sebastien Lecornu, ya ce an kama mutum 1,200 bayan zanga-zangar da aka gudanar a ranar Asabar kan taɓarɓarewar ayyukan gwamnati da tsadar rayuwa ta rikiɗe zuwa tarzoma.

    Lecornu ya ce jami'an tsaro 150 sun jikkata a arangamar, yana mai cewa abin mamaki ne yadda adadin wadanda suka jikkata bai zarce haka ba.

    Magajin garin Paris, Emmanuel Gregoire, ya ce an yi barna sosai a wasu tituna, inda aka fasa shaguna tare da cinnawa motoci wuta.

    A birnin Limoges, gobara ta kone ginin majalisar birnin da aka gina tun karni na 19.

    Fiye da mutum dubu dari biyar ne suka shiga zanga-zangar, wadda ke cikin jerin zanga-zangar nuna fushin jama'a da ke kara kamari kan gwamnatin Shugaba Emmanuel Macron.

18. 18 Oktoba 2026Ba za mu bari Iran ta sake farfaɗo da shirinta na nukiliya ba - Trump

    Shugaban Amurka, Donald Trump, ya sake bayyanawa a ranar Asabar yayin wani jawabin yaƙin neman zaɓe a jihar Kentucky cewa matsalar Iran za ta zo ƙarshe nan ba da jimawa ba, kuma farashin mai zai dawo yadda aka saba.

    Ya kuma ce: "Ba ma son mu riƙa dawowa duk bayan shekara biyu. Muna son mu kammala dukka aikin ne gaba ɗaya."

    Donald Trump ya ƙara da cewa: "Ya kamata a kai wa Iran hari domin tana ƙoƙarin sake ƙera makaman nukiliya."

    Sai dai Iran ta dade tana musanta zargin cewa tana neman mallakar makaman nukiliya.

    Trump ya kuma ce: "Muna bukatar tabbatar da cewa Iran ba ta sake farfaɗo da shirinta na nukiliya ba, kuma wannan ne abin da muke aiki a kai a halin yanzu."

19. 18 Oktoba 2026Buɗewa

    Masu bibiyar shafin BBC Hausa, barkanmu da safiyar yau Lahadi.

    Kamar kullum, yau ma shafin zai kawo muku labaran abubuwan da ke faruwa a Najeriya da Nijar, da yankin Gabas ta Tsakiya da ma duniya bakiɗaya.

    Za kuma ku iya leƙa shafukanmu na sada zumunta kamar Fesbuk da X da Instagram da ma Youtube domin kallon bidiyo da tafka muhawara.

    Da fatan za ku kasance tare da mu.