Abubuwan da ke faruwa a Najeriya da sauran sassan duniya 24/06/2026

Rahoto kai-tsaye

Daga Aisha Babangida da Muslim Muhammad Yusuf

1. Sa'o'i 6 da suka wuceƳan bindiga sun kashe babban limami a jihar Sokoto

   Ƴan bindiga sun kai hari ƙauyen Kuda-Kuda da ke ƙaramar hukumar Goronyo a jihar Sokoto da ke arewa maso yammacin Najeriya, inda suka kashe babban limamin ƙauyen Liman Audu tare da wasu mutane uku.

   Mazauna ƙauyen sun ce baya ga mutane uku da aka kashe Yahaya Hasanu, Zahara Mu'azu da Ibrahim Dayyabu, an kuma yi garkuwa da wasu ƴan garin mutum shida.

   Kamar yadda Daily Trust ta ruwaito, lamarin ya faru ne da misalin ƙarfe 12:58 na daren jiya Talata, inda maharan suka shafe kusan sa’o’i biyu suna harbe-harbe, tare da sace dabbobi da kuma tilasta wa mazauna ƙauyen tserewa daga garin.

   Wani mazaunin ƙauyen ya ce: “Muna salla da dare lokacin da muka fara jin harbi daga ko’ina. Mun tayar da iyalanmu daga bacci muka gudu bayan ƙauye domin tsira da rayukanmu.”

   Rahotanni sun ce maharan sun shiga gida-gida suna sace mutane, musamman matan masu aure, yayin da suka kuma kashe wasu bayan sun ki bin su daji.

   “Bayan sun kashe limamin, sun ci gaba da harbe wasu matasa da suka ki bin su zuwa daji.”

   Mazauna yankin sun ce wannan hari shi ne karo na 11 da aka kai wa ƙauyen.

   Sai dai har yanzu babu wata sanarwa daga hukumomin jihar.

2. Sa'o'i 7 da suka wuceTamowa na ci gaba da kashe jarirai a jihar Kebbi - MSF

   Ƙungiyar likitoci ta Médecins Sans Frontières ta ce ana ci gaba da samun ƙaruwar yaran da ke fama da rashin abinci mai gina jiki a jihar Kebbi da ke yankin Arewa maso Yammacin Najeriya.

   Ta ce cutar Tamowa na haifar da barazana ga rayuwar yara ƙanana a jihar da ma yankin arewa maso yammacin ƙasar.

   A wani bayani da MSF ta fitar, ƙungiyar ta ce ta lura ana samun ƙaruwar masu fama da matsanancin rashin abinci mai gina jiki tsakanin 2024 zuwa 2025, kuma hakan ya tilasta mata sauya dabarun agaji domin magance matsalar tun kafin ta kai matakin da zai iya kashe rayuwa da dama.

   MSF ta kuma bayyana cewa a jihar Kebbi, alƙaluman UNICEF sun nuna cewa ana rasa kusan yara 30 cikin 100 ƴan ƙasa da shekara biyar a kowace rana da ke da alaƙa da tamowa, kuma kusan rabin mace-macen na faruwa ne a jihar Kebbi.

   "Rashin abinci mai gina jiki ya yi tsanani matuƙa a jihar Kebbi kuma yana daga cikin manyan abubuwan da ke haddasa mutuwar jarirarai da ƙananan yara ƴan ƙasa da shekara biyar,” in ji shugaban MSF a Najeriya, Stuart Alexander Zimble.

   “Abin takaici ne ganin yaran da a baya suke da matsakaicin tamowa yanzu abin ya ƙara tsanani kuma hakan barazana ce ga rayuwarsu.”

   Ta ƙara da cewa ƙarancin rigakafi da yawaitar cutar zazzabin cizon sauro na daga cikin abubuwan da ke ƙara ta’azzara lamarin.

   Ƙungiyar ta ce sakamakon haka ne ta fara amfani da wani shiri na abinci mai gina jiki mai suna Tom Brown domin taimakawa yara da ke fama da tamowa.

3. Sa'o'i 7 da suka wuceSakataren Tsaron Amurka ya gana da Sarkin Kuwait kan batun Iran

   Sakataren Harkokin Wajen Amurka, Marco Rubio, ya gana da Sarkin Kuwait, Sheikh Meshaal Al-Ahmad Al-Jaber Al-Sabah, a wani bangare na rangadin da yake yi a yankin Gulf.

   Ziyarar na zuwa ne yayin da Amurka ke ƙoƙarin kwantar da hankalin ƙawayenta na kusa a yankin, waɗanda rikicin baya-bayan nan ya shafa, tare da bayyana musu fahimtar juna da aka samu tsakanin Washington da Tehran.

   Wasu ƙasashen yankin na Gulf na nuna damuwa cewa fahimtar juna da aka cimma ba ta taɓo batutuwan da suka shafe su ba, musamman game da shirin makamai masu linzami na Iran da kuma ƙungiyoyin da Tehran ke marawa baya a yankin.

   Kafin ganawar tasa da Sarkin Kuwait, Mista Rubio ya halarci bikin daga tutar Amurka a ofishin jakadancin ƙasar da aka sake buɗewa bayan rufe shi sakamakon yakin.

   Bayan ganawar, Mista Rubio ya bayyana cewa ''Kuwait muhimmiyar abokiyar hulɗa ce da ba za a iya maye gurbinta ba wajen tabbatar da tsaro da zaman lafiya a yankin'', yana mai cewa ''Amurka na ɗokin ƙara ƙarfafa haɗin gwiwa da dangantakarta da Kuwait.''

   Daga Kuwait, Mista Rubio zai wuce ƙasar Bahrain domin ci gaba da tattaunawa da shugabannin yankin.

4. Sa'o'i 8 da suka wuceMajalisar Dattawan Najeriya ta amince da ƙudurin kafa ƴansandan jihohi

   Majalisar Dattawan Najeriya ta amince da ƙudirin gyaran kundin tsarin mulki da ke neman samar da rundunar ƴansandan jihohi a faɗin ƙasar.

   Wannan na zuwa ne bayan shafe shekaru ana tafka muhawara kan matakan da ake son ɗauka domin magance matsalolin rashin tsaro a ƙasar.

   Jaridar Punch ta ruwaito cewa, an amince da ƙudurin ne bayan Sanatoci sun yi nazari kan tanade-tanaden ƙudirin, inda fiye da kashi biyu bisa uku na mambobin majalisar suka kaɗa ƙuri'ar amincewa da shi.

   Shugaban Majalisar Dattawan, Godswill Akpabio, ne ya sanar da amincewa da ƙudirin bayan samun goyon bayan mafi rinjayen sanatoci a zaman majalisar na ranar Laraba.

   Daya daga cikin muhimman tanade-tanaden ƙudirin shi ne bai wa gwamnonin jihohi ikon naɗa kwamishinonin ƴansanda na jihohinsu, amma sai bayan majalisun dokokin jihohin sun tantance kuma sun amince da su.

   Wasu gwamnoni da manyan jami'an gwamnatin tarayya sun halarci zaman majalisar a lokacin da aka yi muhawara kan ƙudirin.

5. Sa'o'i 9 da suka wuceAmurka ta ce ta samar da allurar rigakafin cutar Ebola

   Jami’an Amurka sun ce ƙasar ta samar da alluran rigakafin cutar Ebola na gwaji, yayin da take ci gaba da yaɗuwa a Jamhuriyar Demokradiyyar Kongo.

   Hukumar lafiya ta duniya ta ce ana kan jigilar maganin, wanda kamfanin Mapp Biopharmaceutical ya samar, daga Amurkar don gwaje-gwaje a asibiti.

   "Ana samar da maganin rigakafin daga sanadaran garkuwa daga cutar da aka diba daga jikin wanda suka kamu da ita amma suka warke a shekarar 2014. Kuma bayan an gama hada shi, hukumar lafiya ta duniya za ta yi gwajinsa," in ji wakiliyar BBC.

   A baya Washington ta ce za a yi amfani da maganin ne kan ƴan Amurka kawai.

   A halin yanzu babu wasu alluran rigakafi ko magunguna da aka amince da su domin maganin cutar Ebola nau'in Bundibugyo wanda shi ne ya ɓulla a yanzu har ya kashe mutane sama da 250 tare da kama wasu fiye da 1000.

6. Sa'o'i 9 da suka wuceJami’an hukumar IAEA za su ziyarci tashoshin nukiliyar Iran – MDD

   Shugaban hukumar da ke sa ido kan makamashin nukiliya ta duniya ya ce za ta gudanar da bincike a Iran a ƙarƙashin yarjejeniyar zaman lafiya ta farko da ƙasar ta ƙulla da Amurka.

   Babban daraktan hukumar kula da makamashin nukiliya ta ƙasa da ƙasa (IAEA) Rafael Grossi ya shaidawa manema labarai a Japan cewa, "Lallai za a gudanar da binciken. "Za mu yi aiki kan tsare-tsaren yadda za a bi da kuma lokutan da za a yi gudanar da binciken - nan ba da jimawa ba."

   Yarjejeniyar da aka rattabawa hannu a makon da ya gabata ta bayyana a fili cewa za a gudanar da aikin narkar da sinadarin uranium da Iran ke da shi a ƙarƙashin kulawar hukumar ta IAEA.

   Sai dai mataimakin ministan harkokin wajen na Iran ya ce ba za a fayyace abibn da zai faru da shirin nukiliyar ƙasar ne a tattaunawar yarjejeniyar ƙarshe da Amurka.

   Kalaman Grossi na zuwa ne a daidai lokacin da sakataren harkokin wajen Amurka Marco Rubio ke ziyara a ƙasashen yankin Gulf domin tattaunawa kan yarjejeniyar Amurka da Iran.

   A ranar Laraba ya gana da shugaban Haɗaɗɗiyar Daular Larabawa Mohamed bin Zayed Al Nahyan, kuma ana sa ran zai je ƙasashen Kuwait da Bahrain.

7. Sa'o'i 9 da suka wuceAbin da ya sa na ƙalubalanci Davido - Rarara

   Bayan taƙaddamar da ta kaure tsakaninsu, fitaccen mawaƙin Hausa Dauda Kahutu Rarara ya ce kishin ƙasarsa ne ya sa ya yi wa Davido martani. Rarara ya kuma ce matakan ɗaukaka daban-daban ne.

8. Sa'o'i 9 da suka wuceIran ta shaida min ba za ta karɓi ko sisi daga jiragen da ke bi ta Mashigar Hormuz ba - Trump

   Shugaban Amurka, Donald Trump, ya ce Iran ta sanar da Amurka cewa ba za ta karɓi kuɗi daga jiragen ruwa da ke bi ta Mashigar Hormuz ba.

   Ya kuma yi gargaɗin cewa idan wannan bayanin ba gaskiya ba ne, to za a dakatar da tattaunawar da ake yi tsakanin ƙasashen biyu nan take.

   A wani saƙo da ya wallafa a shafinsa na Truth Social, Trump ya ce: "Iran ta sanar da Amurka cewa, sabanin rahotannin da wasu kafafen yaɗa labarai ke yaɗawa, ba za a caje ko karɓi wani kuɗi daga jiragen da ke wucewa ta Mashigar Hormuz ba."

   Trump ya ƙara da cewa Amurka ba ta bai wa Iran kuɗi ko sakin kadarorinta da aka sanya wa takunkumi ba.

   Sai dai ya ce za a saki wani ɓangare na kuɗaɗen Iran da ke ƙarƙashin ikon Amurka domin sayen masara da alkama da waken soya da sauran kayan abinci daga manoman Amurka.

   "Iran na cikin matsanancin buƙatar abinci, kuma za mu sayo musu wannan abinci ne kai tsaye daga Amurka," in ji Trump.

   Sakataren Harkokin Wajen Amurka, Marco Rubio, ya ce Mashigar Hormuz hanya ce ta ruwan ƙasa da ƙasa, kuma babu wata ƙasa da ke da ikon sanya kuɗin wucewa ta irin wannan hanya.

   Sai dai Iran ta dage cewa Mashigar Hormuz ba hanyar ruwan ƙasa da ƙasa ba ce, wani yanki ne na ruwan yankinta da kuma na Oman.

9. 24 Yuni 2026An kuɓutar ƴar Faranasa da mijinta ya tsareta na tsawon shekara 12

   Ƴan sanda a Pakistan sun kama wani mutum da ake zargin ya tsare matarsa ​​da ƴaƴansa a gida tare da cin zarafinsu fiye da shekaru goma.

   Matarsa, ƴar asalin ƙasar Faransa mai suna Sylvie Yasmina, ta yi iƙirarin cewa mutumin yana cin zarafin iyalinsa ta hanyoyi daban-daban “a kowace rana” tare da bayyana shi a matsayin “mai mugun hali” kamar yadda ƴan sandan yankin suka shaida wa BBC Urdu.

   Ɗaya daga cikin ƴaƴansu ya yi nasarar lallabawa ya kai rahoto ga ƴan sanda, lamarin da ya haifar da farmaki kan gidansu da ke Bara, wani gari mai nisa a lardin Khyber Pakhtunkhwa mai cike da tsaunuka.

   ‘Yan sanda sun gano Yasmina da ƴaƴanta guda biyar a cikin wani ɗan ƙaƙanin ɗaki da ya dagargaje da raunuka a jikinsu.

   An kai Yasmina da ƴaƴanta zuwa gidan kula da mata da ke Peshawar. Suna shirin komawa Faransa, in ji ƴan sanda.

10. 24 Yuni 2026Ukraine ta kai hari kan tashoshin wutar lantarki a Crimea

    Wani hari da jiragen saman Ukraine suka kai kan yankin Crimea da Rasha ta mamaye ya haifar da katsewar wutar lantarki a babban birninsa, Sevastopol, in ji gwamnan da Moscow ta naɗa Mikhail Razvozhayev.

    Ukraine ta ce jiragenta marasa matuƙa sun kai hari a babban tashar wutar lantarki a birnin a cikin dare a ranar Talata.

    Razvozhayev ya yi gargaɗin cewa wasu yankuna za su kasance cikin dudhu har zuwa yammacin Laraba.

    Kyiv dai na ci gaba da kai hare-hare kan tashoshin wutar lantarki a yankunan da Rasha ke riƙe da su domin lalata hanyoyin da Rasha ke samun kuɗaɗen shiga da kuma ƙoƙarin tilasta wa shugaba Putin ya zauna kan teburin tattaunawa.

    Birnin Sevastopol mai tashar jiragen ruwa muhimmin birni ne da ke taimakawa tattalin arziki yankin.

11. 24 Yuni 2026Iran ta ce ba za ta sanya haraji kan jiragen ruwa da ke wucewa ta mashigar Hormuz ba - Trump

    Donald Trump ya ce Iran ta tabbatar wa Amurka cewa ba za ta ɗora wani haraji kan jiragen ruwa da ke wucewa ta mashigar Hormuz ba.

    Shugaban na Amurka ya kuma rubuta a shafinsa na dandalin Truth Social cewa: “Iran ta sanar da Amurka cewa, saɓanin rahotanni masu tayar da hankali a kafafen yaɗa labaran ƙarya, ‘ba za a karɓi kuɗaɗen haraji ko na inshora ko duk wani nau'in kuɗaɗe daga jiragen ruwa da ke wucewa da mashigar Hormuz ba. Idan wannan bayanin ƙarya ne, to lallai tattaunawar za ta ƙare nan take.''

    Bayan tattaunawar farko da Amurka a Switzerland, Iran ta ce an sako kaddarorinta da aka daskarar tare da musanta sayen kayayyakin amfanin gona daga Amurka.

    Bisa fahimtar da aka yi tsakanin Iran da Amurka, Iran ba za ta karɓi wani kudade na jigilar jiragen ruwa na tsawon kwanaki 60 ba.

    Iran ta ce bayan wannan lokaci, bisa yarjejeniyar da aka ƙulla da Oman, za ta biya kuɗin zirga-zirgar da tabbatar da tsaro, da kuma kare muhalli.

12. 24 Yuni 2026Katsewar wutar lantarki ta addabi Faransa yayin da a ke fama da matsanancin zafi

    Dubban gidaje sun faɗa cikin matsalar rashin wutar lantarki a yammacin Faransa, yayin da ke fama da tsananin zafi a ƙashen Turai.

    Kimanin gidaje 68,000 ne lamarin ya shafa a Brittany, inda da wuya a dawo da wutar lantarki gaba ɗaya har zuwa daren Laraba, in ji hukumomi.

    Ƙasar ta fuskanci tsananin zafi da aka daɗe ba a gani ba daga daren Litinin zuwa wayewar garin Talata, inda matsakaicin zafin yanayi ya kai 29.9C a duk faɗin ƙasar, a cewar masu hasashen yanayi.

    Zafin ya bazu zuwa wasu sassa na yammacin Turai a ranar Laraba, inda aka yi gargaɗin fuskantar yanayi mai tsanani a wasu sassan ƙasar Netherlands.

    Ya zuwa yanzu, Faransa, Spain da Italiya ne suka fi fama da tsananin zafin.

13. 24 Yuni 2026Iran ta sake jaddada cewa ba ta da wani shirin ba da damar binciken wuraren nukiliyarta

    Iran ta sake jaddada cewa ba za ta ba Hukumar Kula da Makaman Nukiliya ta Duniya (IAEA) damar binciken wasu wuraren nukiliyarta da suka lalace ba.

    Mataimakin ministan harkokin wajen ƙasar, Kazem Gharibabadi, ya ce ba a yi wata ganawa tsakaninsa da shugaban IAEA, Rafael Grossi, a Switzerland ba, duk da roƙon da aka gabatar.

    Ya kuma ƙara da cewa babu wani shiri na buɗe wuraren da aka kai wa hari ga masu bincike na hukumar.

    Wannan matsayi na Iran ya zo ne bayan shugaban IAEA ya bayyana cewa ana sa ran sake fara bincike a wuraren nukiliyar ƙasa

    Rafael Grossi ya shaida wa manema labarai a Japan cewa yarjejeniyar tsakanin Amurka da Iran ta tanadi cewa ayyukan nukiliya za su kasance karkashin sa ido na hukumar, yana mai jaddada cewa dole ne a gudanar da bincike, ko da yake ba a ƙayyade lokacin da hakan zai faru ba.

    Sai dai Iran ta musanta hakan, tana mai cewa babu wata sabuwar yarjejeniya da ta ɗauka kan batun nukiliya.

    Kakakin ma’aikatar harkokin wajen ƙasar, Esmail Baghaei, ya ce babu doka da ta tilasta wa Iran ba da damar binciken wuraren da hare-haren soji suka lalata.

    A gefe guda, shugaban Amurka Donald Trump da mataimakinsa JD Vance sun ce Iran ta amince da sa mata ido na dogon lokaci kan shirinta na nukiliya, iƙirarin da gwamnatin Tehran ta ƙaryata.

14. 24 Yuni 2026Cutar Ebola ta ɓulla a Faransa

    Faransa ta sanar cewa ta tabbatar da ɓullar cutar Ebola a ƙasar, bayan wani likita da ya dawo daga aikin jin ƙai a Jamhuriyar Dimokuraɗiyyar Congo (DRC) ya kamu da cutar.

    Ma’aikatar lafiyar ƙasar ta ce an garzaya da shi asibiti na musamman cikin gaggawa, kuma yana cikin yanayi mai kyau.

    Wannan shi ne karo na farko da aka tabbatar da cutar Ebola a Turai.

    Duk da haka, wani likitan Amurka da ya kamu da cutar a DRC ya taba samun magani a Jamus.

    Haka kuma, Uganda ta tabbatar da ɓullar cutar, inda aka samu mutane 20 da suka kamu, ciki har da mutum biyu da suka mutu.

    An kuma ce cutar ta sake ɓulla a DR Congo a watan da ya gabata, sai dai masana sun yi hasashen cewa ta fara yaɗuwa tun kafin a sanar da ɓarkewar.

    Sama da mutane 260 ne suka mutu sakamakon cutar a DR Congo yayin da fiye da 1,000 suka kamu da da ita a ƙasar.

    Hukumomin Faransa sun jaddada cewa babu wani haɗarin yaduwar cutar sosai ga jama’a.

    Sun kuma ce suna ci gaba da bin diddigin duk wanda ya yi hulɗa da likitan domin hana yaɗuwar cutar, wadda ke yaɗuwa ta hanyar gumi musamman tsakanin ma’aikatan lafiya.

15. 24 Yuni 2026Oman ta ƙiƙiri hanyar wucewar jiragen ruwa na wucin gadi a mashigar Hormuz

    Oman ta sanar a ranar Talata cewa ta ƙirƙiri wata hanya na wucin gadi a teku domin sauƙaƙa zirga‑zirgar jiragen ruwa da ke wucewa ta mashigar Hormuz.

    Hakan ya biyo bayan haɗin gwiwa da Hukumar Kula da Jiragen Ruwa ta Duniya (IMO) domin tabbatar da tsaro a wannan muhimmiyar hanya ta ruwa.

    Kamfanin dillancin labarai na gwamnatin Oman ya bayyana cewa duk jiragen da ke son wucewa ta mashigar dole ne su bi ƙa’idojin da aka gindaya, tare da yin hulɗa kai tsaye da hukumomin Oman da kuma IMO kafin su shiga sabuwar hanyar da aka ƙirƙiro.

    Sanarwar ta zo ne bayan ziyarar da shugaban majalisar dokokin Iran, Mohammad Baqer Qalibaf, ya kai Oman tare da tawaga ta diflomasiyya.

    Hakan kuma ya biyo bayan wata sanarwa ta haɗin gwiwa da Iran da Oman suka fitar, inda suka jaddada ƙudurinsu na tabbatar da cewa mashigar Hormuz za ta ci gaba da kasancewa a buɗe kuma mai aminci ga zirga‑zirgar kasuwanci ta duniya.

    Kasashen biyu sun kuma bayyana cewa za su kafa kwamitin haɗin gwiwa domin duba yadda za a tafiyar da mashigar a nan gaba, da kuma tantance kuɗin ayyukan da ake bayarwa ga jiragen ruwa da suke bi ta mashigar.

    Yadda kawo ƙarshen yaƙin Iran ya fallasa raunin Amurka

    Yadda Iran ke amfani da ƙananan jiragen ruwa wajen gallaza wa Amurka a Mashigar Hormuz

16. 24 Yuni 2026Yadda Majalisar Najeriya za ta fara muhawara kan samar da 'yansandan jihohi

    A ranar Larabar nan ne ake sa ran Majalisar Dattawan Najeriya za ta fara muhawara kan wani gagarumin ƙudirin doka da ke neman samar da rundunonin 'yansandan jihohi, matakin da zai iya haifar da ɗaya daga cikin manyan sauye-sauye a tsarin tsaron ƙasar tun bayan komawarta mulkin dimokuraɗiyya a shekarar 1999.

    Ƙudirin gyaran kundin tsarin mulkin ƙasar, wanda Shugaba Bola Ahmed Tinubu ya aike wa majalisar a ranar Talata, zai bai wa jihohin Najeriya 36 damar kafa tare da tafiyar da rundunonin 'yansandansu, baya ga rundunar 'yan sandan tarayya ta Najeriya.

    Tsawon shekaru da dama, gwamnatin tarayya ce kaɗai ke da ikon kula da harkokin 'yan sanda a Najeriya, inda ake tura jami'ai zuwa sassan ƙasar ƙarƙashin tsari guda da ake gudanarwa daga tarayya.

    Ƙudirin ya sake tayar da muhawarar da aka daɗe ana yi a Najeriya kan ko ya kamata a raba ikon gudanar da harkokin 'yan sanda a ƙasar da ke da sama da mutum miliyan 220, masu bambancin ƙabila, addini da kuma yankuna.

    Karanta cikakken labarin

17. 24 Yuni 2026Meyasa Iran ta dage kan haɗa Hezbollah a yarjejeniya da Amurka?

    Masana na ganin cewa dalilin da ya sa Iran ke dagewa wajen haɗa batun Lebanon da kungiyar Hezbollah cikin yarjejeniyarta da Amurka yana da alaƙa da yadda take kallon tsaron yanki da kuma tasirinta a Gabas ta Tsakiya.

    Duk da cewa an mayar da hankali kan dakatar da rikici tsakanin Iran da Amurka, Tehran na ganin ba za a iya ware Lebanon daga wannan tattaunawa ba.

    A ra’ayinta, Hezbollah wata muhimmiyar kafa ce ta tsaro da kuma tasiri, musamman wajen tinkarar Isra’ila. Saboda haka, Iran na kallon ƙungiyar a matsayin muhimmin abokin kawance wanda ke taka rawa wajen kare muradunta da kuma ƙarfafa matsayinta a yankin.

    Haka kuma Iran na ɗaukar cewa rikice-rikice a yankin na da alaƙa da juna.

    A fahimtarta, ci gaba da yaƙi a Lebanon zai iya yin tasiri kai tsaye kan zaman lafiyarta, don haka tana ganin dole ne a samu warware matsalar a dukkan ɓangarori kafin a kai ga cikakkiyar yarjejeniya.

    Bugu da kari, batun Lebanon ya zama wata dabara ta siyasa a tattaunawa.

    Tehran na amfani da shi a matsayin hanyar matsin lamba domin samun sassauci daga ɓangarorin da take tattaunawa da su, musamman dangane da hare-haren Isra’ila.

    Sai dai wannan tsari na ɗauke da hadari, domin yana iya kawo tsaiko ko ma karya yarjejeniyar gaba daya idan wasu ɓangarori suka ƙi yarda.

    Duk da haka, Iran na ganin cewa kare Hezbollah da tabbatar da zaman lafiya a Lebanon wani bangare ne mai muhimmanci na manufofinta da tsaron yankin.?

18. 24 Yuni 2026Gwamnatin Oyo ta saka dokar hana fita a ƙananan hukumomi 10

    Gwamnan jihar Oyo, Seyi Makinde, ya amince da sanya dokar hana fita na sa'o'i 16 a wasu ƙananan hukumomi 10 kan matsalar tsaro a jihar.

    Sanarwar da sakataren gwamnatin Jihar, Farfesa Musibau Babatunde ya fitar ta ce dokar za ta fara aiki daga yau, ranar Laraba, 24 ga watan Yuni, 2026, kuma za ta kasance tsakanin karfe 4 na yamma zuwa karfe 8 na safe na tsawon sa’o’i 16 a matakin farko.

    Ƙananan hukumomin da abin ya shafa sun hada da Oriire da Orelope da Irepo da Saki West da Saki East da Atisbo da Itesiwaju da Iseyin da Olorunsogo da kuma Atiba, musamman waɗanda ke kusa da gandun dajin Old Oyo National Park.

    Wannan mataki ya biyo bayan zanga-zangar da ta ɓarke a jihar sakamakon sace yara da malamai a yankin Oriire a watan Mayu, inda masu zanga-zangar suka buƙaci gwamnati ta ɗauki matakin gaggawa domin ceto waɗanda aka sace tare da kawo karshen matsalar tsaro a faɗin kasar.

    Yadda Majalisar Najeriya za ta fara muhawara kan samar da 'yansandan jihohi

    Yadda Boko Haram ‘ke horar’ da mayaƙan Bello Turji - Rahoto

19. 24 Yuni 2026'Amurka da Isra’ila na shirin bai wa sojojin Lebanon iko a kudancin ƙasar'

    Rahotanni sun ce Amurka da Isra’ila na nazarin wani shiri da zai bai wa sojojin Lebanon iko da wasu yankunan kudancin ƙasar, wanda a halin yanzu sojojin Isra’ila ke riƙe da su.

    Kamfanin dillancin labaran Reuters ya ruwaito cewa, bisa wannan tsari, sojojin Lebanon za su karɓi iko da yankunan ne bayan sun samu horo da kuma binciken tsaro daga Amurka domin tabbatar da cewa ba su da alaka da kungiyar Hezbollah.

    Majiyoyi sun kuma bayyana cewa Isra’ila za ta ci gaba da zama a yankunan har sai an tabbatar da cikakken tsaro kafin a miƙa su ga sojojin Lebanon.

    Sai dai kawo yanzu Amurka da Isra’ila ba su fito fili sun tabbatar da wannan shiri ba.

    A halin da ake ciki, tattaunawa tsakanin Isra’ila da Lebanon na ci gaba a birnin Washington.

    Batun janyewar sojoji da kuma dakatar da rikici a dukkan ɓangarori, ciki har da Lebanon, na daga cikin muhimman batutuwan da ke cikin yarjejeniyar fahimta tsakanin Amurka da Iran.

    Abubuwan da muka sani kan yarjejeniyar Iran da Amurka

    Sabbin hare-haren Iran kan Isra'ila: Wane saƙo hakan ke aikawa?

20. 24 Yuni 2026Daina yaƙi a Lebanon ginshiƙi ne wajen kawo ƙarshen yaƙi a ƙasarmu - Iran

    Shugaban Majalisar Dokokin Iran, Mohammad Baqer Qalibaf, ya ce kawo ƙarshen yaƙi a Lebanon abu ne mai muhimmanci ga gwamnatin Tehran saboda ginshiƙi ne na kawo ƙarshen yaƙi a Iran ne.

    Ya bayyana wannan matsayi ne yayin wani jawabi a taron ƙungiyar majalisun dokoki na ƙasashen Kungiyar Hadin Kan Musulunci (OIC) da aka gudanar a birnin Baku.

    A cewarsa, Iran a shirye take ta inganta hulɗa da sauran ƙasashen Musulmi bisa ginshiƙin girmama juna da kauce wa tsoma baki cikin harkokin cikin gida na kowace ƙasa.

    Haka kuma Qalibaf ya jaddada cewa tsaron yankin ya kamata ya fito daga cikin ƙasashen yankin kansu, ba tare da dogaro da karfin waje ba, yana mai nuni da cewa su ne suka fi dacewa wajen samar da tabbataccen tsaro.

    Yadda kawo ƙarshen yaƙin Iran ya fallasa raunin Amurka

    Wane zaɓi zai rage wa Isra'ila idan Amurka da Iran suka cimma yarjejeniya?