Arestio bachgen 14 oed ar amheuaeth o lofruddio ar ôl canfod corff mewn parc

Mae bachgen 14 oed wedi cael ei arestio ar amheuaeth o lofruddio ar ôl i gorff gael ei ganfod mewn parc ym Mlaenau Gwent nos Lun.

Dywedodd Heddlu Gwent fod corff menyw wedi ei ganfod yn ardal Parc Duffryn yn nhref Blaenau am 22:10.

Dywedodd y llu nad yw'r corff wedi cael ei adnabod yn swyddogol, ond bod teulu merch 14 oed o'r enw Lilly a oedd ar goll wedi cael gwybod.

Mae'r bachgen 14 oed, sydd o Flaenau Gwent, yn parhau yn y ddalfa, meddai'r llu.

Dywedodd yr Uwch Swyddog Ymchwilio, y Prif Arolygydd Ditectif Steven Thomas y bydd swyddogion yn bresennol yn ardal y parc wrth i ymholiadau barhau.

"Rydym yn deall y bydd hyn yn achosi gofid a phryder ymhlith ein cymunedau," meddai.

Ychwanegodd bod yr heddlu yn annog pobl i beidio â dyfalu am y digwyddiad ar-lein gan fod yr ymchwiliad yn un byw.

Mae'r llu hefyd yn apelio ar unrhyw un sydd â gwybodaeth am y digwyddiad i gysylltu â nhw.