Pris gwlân ar ei uchaf ers degawd - 'teimlad neis o'r diwedd'

Mae ffermwyr wedi croesawu cynnydd mewn pris gwlân, gyda'r arian sy'n cael ei dalu ar ei uchaf ers degawd.

Dywedodd Gareth Jones, pennaeth ymgysylltu Gwlân Prydain fod y pris yn gynnydd o 70% ar bris llynedd.

Mae'n "deimlad neis o'r diwedd fod pris wedi mynd ar ei fyny," meddai Geraint Davies sy'n ffermio ger y Bala, a'i fod bellach yn "covero costau cneifio'r defaid".

Dywedodd Gwlân Prydain eu bod yn "obeithiol" y bydd y pris yn parhau i godi yn sgil y "galw a chyflenwad".

Wrth siarad â Cymru Fyw, dywedodd Gareth Jones o Wlân Prydain: "'Da ni wedi gweld sefyllfa yn y diwydiant prisiau gwlân ers sawl blwyddyn lle mae'r pris y mae'r ffermwr yn ei dderbyn wedi bod yn siomedig o isel.

"Ond be' 'da ni wedi gweld ers y ddwy flynedd diwethaf ydi arferiad yn y farchnad ac mae'r pris yna wedi bod yn cynyddu."

Aeth yn ei flaen i ddweud mai'r "prif reswm am hynny yw galw a chyflenwad".

Dywedodd fod y cyflenwad a'r nifer o ddefaid yng Nghymru a Phrydain yn "disgyn felly mae llai o wlân yn cael ei gynhyrchu" ond mae'r "galw wedi cynyddu".

"O ran y pris eleni, mae'r pris wedi codi 70% o'i gymharu â beth oedd o llynedd, ac mi fydd ffermwyr yn derbyn y pris uchaf ers degawd eleni," meddai.

Ond er gwaetha'r newyddion calonogol i rai ffermwyr, dywedodd Gareth: "Ma' gyda ni dal ffordd i fynd yn enwedig gyda rhai teip o wlân a bridiau, 'di o ddim am fod yn ddigon i dalu costau cneifio.

"'Da ni'n derbyn bod o'n lefel isel, ond roedd rhaid i'r arferiad gychwyn yn rhywle," meddai.

"Ein prif rôl ni yw cael y pris gorau gallwn ni i ffermwyr ac wrth reswm dwi a chydweithwyr yn y British Wool yn falch iawn o weld y cynnydd yma.

"Mae' 'na lawer iawn o ffactorau yn gwneud bywyd yn heriol i ffermwyr pan maen nhw'n trio cynhyrchu bwyd a thyfu cnydau ac yn y blaen, felly 'da ni'n gobeithio bod pris gwlân yn cynyddu yn rhywbeth sy'n cael ei groesawu.

"Dyma'r ail flwyddyn allan o 12 'da ni wedi gweld y pris yn codi a 'da ni'n obeithiol iawn neith hynny barhau yn ystod y tymor nesaf 'ma."

Dywedodd Geraint Davies, sy'n ffermio ger y Bala, ei fod yn "deimlad neis o'r diwedd fod y pris wedi mynd ar ei fyny".

Esboniodd fod ganddo ddefaid mynydd Cymreig ac mae wedi gweld y pris yn "mynd fyny tua 60c y cilogram," tra bod y "defaid a'r gwlania mwy ffein wedi mynd ar eu fyny i'r pwynt lle maen nhw'n covero'r costau cneifio".

Ond dywedodd fod "gennym ni dal le i fynd hefyd".

"'Da ni wedi cael blynyddoedd lawer o'r pris ar y ddaear a ddim yn dod yn agos at covero costau cneifio'r defaid."

Roedd o'r farn bod gwlân yn "gynnyrch anhygoel" gyda "cymaint o wahanol allu" iddo.

"Gobeithio neith y pris fynd i fyny fel ma' pobl yn deall pa mor bwysig ydi o iddyn nhw a'r amgylchedd yr un amser," meddai.

Dywedodd bod y cynnydd yn y pris yn "rywbeth mae rhywun yn ei groeso i giât y ffarm", a bod gobaith "iddo dal i fynd ar ei fyny a dal i chwilio am farchnadoedd newydd iddo fo a deud y gwir".

"Ma' na gymaint allith gwlân gyflawni i ofynion pobl fyd eang.

"Mae'n bleserus i wybod mae'r joban maen nhw'n neud er mwyn lles yr anifail ar yr un amser yn gallu troi mewn i fod yn helpu i roi pres yn ein poced ni hefyd a gymaint o dyfu gallith o wneud wrth i ni edrych ymlaen hefyd."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.