တိုက်ရိုက်ထုတ်လွှင့်မှု , အမေရိကန်သမ္မတသက်တမ်း၀က်ရွေးကောက်ပွဲ - ဒီမိုကရက်တွေ အထက်လွှတ်တော်မှာ မဲအများစုရ

တိုက်ရိုက် ထုတ်လွှင့်ချက်

1. လွန်ခဲ့သော တစ်မိနစ် ကအမေရိကန်မှာ ပထမဆုံး မွတ်ဆလင်အထက်လွှတ်တော်အမတ်ရှိလာမှာလား

   အမေရိကန်သမ္မတသက်တမ်း၀က် ရွေးကောက်ပွဲမှာ မီချီဂန်ပြည်နယ်အတွက် ဒီမိုကရက်တစ် အထက်လွှတ်တော်အမတ်လောင်း အယ်လ်-ဆာယက်ဒ်က မဲနိုင်မယ့်သူလို့ ကနဦး ရလဒ်တွေက ခန့်မှန်းလိုက်ပါတယ်။

   သူသာ အနိုင်ရရင် သူဟာ အမေရိကန်မှာ ပထမဆုံး မွတ်ဆလင် အထက်လွှတ်တော်အမတ်ဖြစ်လာမှာပါ။

   “အနိုင်ရဖို့ မဖြစ်နိုင်ဆုံးလို့ ထင်ရတဲ့ ကိုယ်စားလှယ်လောင်းတစ်ဦးကို ခင်ဗျားတို့ ယုံယုံကြည်ကြည် အခွင့်အရေးပေးခဲ့ကြပါတယ်” လို့ သူက သူ့ကိုထောက်ခံသူတွေကို စောစောပိုင်းကပဲ ကျေးဇူးတင်စကား ပြောလိုက်ပါတယ်။

   သူ့ရဲ့ကိုးကွယ် ယုံကြည်ကိုးကွယ်မှုကို အဓိကကိစ္စတစ်ခုအဖြစ် အသုံးချပြီး မဲဆွယ်ခဲ့တယ်ဆိုကာ သူ့ပြိုင်ဘက်ကို ဝေဖန်ခဲ့ပါတယ်။

   “သူတို့ဟာ အချိန်အတော်ကြာအတွင်း ကျွန်တော်တို့ မြင်ခဲ့ရသမျှထဲ အဆိုးရွားဆုံး မဲဆွယ်စည်းရုံးမှုတွေထဲက တစ်ခုကို အင်အားကုန် အသုံးပြုခဲ့ပါတယ်” လို့ သူက ပြောပြီး “ကျွန်တော့်ရဲ့ နာမည်နဲ့ ယုံကြည်ကိုးကွယ်မှုကြောင့်” သူ့ကို တိုက်ခိုက်ခဲ့ရတယ်လို့ စွပ်စွဲပါတယ်။

2. လွန်ခဲ့သော ၂ နာရီ ကအမေရိကန်နိုင်ငံရေးသမားတွေ သက်ကြီးပိုင်းတွေဘာကြောင့်များ

   အမေရိကန်နိုင်ငံရေးသမားတွေထဲမှာ ဟဲလ် ရော်ဂျာစ် လောက် နိုင်ငံရေးလောကမှာ ရေရှည်ရပ်တည်လာသူ အများကြီးမရှိပါဘူး။ သူဟာ အခု သက်တမ်း၀က် ရွေးကောက်ပွဲမှာ အောက်လွှတ်တော်အမတ်အဖြစ် ၂၄ ကြိမ်မြောက် သက်တမ်းအတွက် ဝင်ရောက်ယှဉ်ပြိုင်ဖို့ ပြင်ဆင်နေပါတယ်။

   အသက် ၈၈ နှစ်အရွယ် ရီပတ်ဘလီကန်ပါတီဝင် ဟဲလ် ရော်ဂျာစ် ဟာ ကန်တပ်ကီပြည်နယ်ရဲ့ ပဉ္စမမြောက် လွှတ်တော်မဲဆန္ဒနယ်ကို ၁၉၈၁ ခုနှစ်ကတည်းက ကိုယ်စားပြုလာခဲ့သူဖြစ်ပြီး အမေရိကန်အောက်လွှတ်တော်မှာ သက်တမ်းအရှည်ဆုံးအမတ် ဖြစ်ပါတယ်။

   သူ အရွေးခံရတဲ့ညမှာပဲ ရော်နယ်ရေဂင်ဟာ ပထမဆုံး သမ္မတသက်တမ်းအတွက် အနိုင်ရခဲ့ပါတယ်။ အဲဒီအချိန်က ရေဂင်ရဲ့ မဲဆွယ်စည်းရုံးရေးဆောင်ပုဒ်က "အမေရိကန်ကို ကြီးကျယ်ခမ်းနားတဲ့နိုင်ငံအဖြစ် ပြန်လည်တည်ဆောက်ကြစို့" ဆိုတာဖြစ်ပြီး နောက်ပိုင်းမှာ ဒေါ်နယ်ထရမ့်ကလည်း အဲဒီဆောင်ပုဒ်ကို ပြန်လည်အသုံးပြုခဲ့ပါတယ်။

   ဒီနှစ် ရီပတ်ဘလီကန်ပါတီရဲ့ကိုယ်စားလှယ်လောင်းရွေးချယ်ပွဲမှာ ရော်ဂျာစ် ရှုံးနိမ့်အောင် ယှဉ်ပြိုင်ခဲ့သူတွေထဲမှာ သူ့ထက် အသက် ၆၀ ငယ်သူတစ်ဦးလည်း ပါဝင်ပါတယ်။ ဒါပေမဲ့ ၁၉၃၀ ပြည့်လွန်နှစ်တွေမှာ မွေးဖွားခဲ့တဲ့ ရော်ဂျာစ် တစ်ဦးတည်းသာ အသက် ၈၀ ကျော်အထိ နိုင်ငံရေးတာဝန် ဆက်လက်ထမ်းဆောင်နေသူ မဟုတ်ပါဘူး။

   အသက် ၈၀ အရွယ် အမေရိကန်သမ္မတ ဒေါ်နယ်ထရမ့်၊ သမ္မတရာထူးကနေ အသက် ၈၂ နှစ်မှာ ထွက်ခွာခဲ့တဲ့ ထရမ့်ရဲ့ ရှေ့သမ္မတ ဂျိုးဘိုင်ဒင်နဲ့ အောက်လွှတ်တော် ဒီမိုကရက်တစ်ပါတီခေါင်းဆောင်ရာထူးကနေ အသက် ၈၂ နှစ်မှာ နုတ်ထွက်ခဲ့တဲ့ နန်စီ ပယ်လိုစီတို့လည်း ပါဝင်ပါတယ်။

   အမေရိကန် နိုင်ငံရေးသမားတွေ ဘာကြောင့် အသက်ကြီးကြတာလဲ။

   အပြည့်အစုံကို ဒီလင့်ခ် မှာ ၀င်ဖတ်နိုင်ပါတယ်။

3. လွန်ခဲ့သော ၂ နာရီ ကဒီမိုကရက်တွေ ကွန်ဂရက်ကို ပြန်ထိန်းချုပ်နိုင်တာ ဘာသဘောဆောင်လဲ

   ဆာ့ခ်ရှီ ဗင်ကတ်ရာမန်

   ဝါရှင်တန်ကနေ သတင်းပေးပို့ချက်

   ဒီမိုကရက်တစ်ပါတီအမတ်တွေဟာ အခုတစ်ခေါက် သမ္မတသက်တမ်း၀က် လွှတ်တော်ရွေးကောက်ပွဲမှာ အထက်လွှတ်တော်နဲ့ အောက်လွှတ်တော် နှစ်ရပ်စလုံးမှာ အမတ်နေရာအများစုရမယ်လို့ ခန့်မှန်းထားပါတယ်။

   ဒါကြောင့် ဇန်နဝါရီလရောက်ရင် နိုင်ငံရဲ့ဥပဒေတွေကို အတည်ပြုပေးဖို့ တာဝန်ရှိတဲ့ မဏ္ဍိုင်တစ်ခုဖြစ်တဲ့ကွန်ဂရက်ကို သူတို့ ပြန်လည်ထိန်းချုပ်နိုင်မှာ ဖြစ်ပါတယ်။

   လက်ရှိမှာတော့ ကွန်ဂရက်လွှတ်တော် နှစ်ရပ်စလုံးကို အများစုအမတ်နေရာ ရထားတဲ့ သမ္မတ ထရမ့်ရဲ့ ရီပတ်ဘလီကန်ပါတီက ထိန်းချုပ်ထားပါတယ်။

   ဒါပေမဲ့ ဒီမိုကရက်တွေ ကွန်ဂရက်ကို ပြန်လည်ထိန်းချုပ်တဲ့အခါ ဥပဒေတွေကို ပိုလွယ်လွယ်ကူကူ အတည်ပြုနိုင်မှာဖြစ်သလို သမ္မတရဲ့မူဝါဒအစီအစဉ်တွေကိုလည်း အရင်ကထက်ပိုပြီး စိစစ်မေးမြန်းတာတွေကို လွှတ်တော်က လုပ်လာနိုင်ပါတယ်။

   သမ္မတရဲ့အစိုးရအဖွဲ့ဝင်တွေနဲ့ပတ်သက်ပြီး စုံစမ်းစစ်ဆေးမှုတွေလည်း ဖြစ်လာနိုင်ပါတယ်။

   ဒါဟာ ကြီးမားတဲ့အပြောင်းအလဲတစ်ခုဖြစ်ပြီး ထရမ့်ရဲ့ သမ္မတသက်တမ်း နောက်ဆုံးနှစ်နှစ်ထဲ ဝင်ရောက်လာချိန်မှာ ဒီမိုကရက်တွေ မျှော်လင့်ခဲ့တဲ့ အနိုင်ရလဒ်လည်း ဖြစ်ပါတယ်။

4. လွန်ခဲ့သော ၃ နာရီ က“တော်ကြတယ်” လို့ ပြောပြီး ဒီမိုကရက်တွေကို ထရမ့် ဂုဏ်ပြု

   အမေရိကန် သမ္မတ ဒေါ်နယ်ထရမ့်က ရီပတ်ဘလီကန်တွေ အကြီးအကျယ် ရှုံးနိမ့်ခဲ့တဲ့ သမ္မတသက်တမ်း၀က် ရွေးကောက်ပွဲရလဒ်တွေနဲ့ပတ်သက်ပြီး သူ့ရဲ့တုံ့ပြန်ချက်ကို ဆွေးနွေးဖို့ ဖောက်စ်သတင်းဌာနကို ဖုန်းနဲ့ဖြေကြားခဲ့ပြီး ဒီမိုကရက်တွေက “အလုပ်ကောင်းကောင်း လုပ်ခဲ့ကြတယ်” လို့ ဝန်ခံပြောကြားပါတယ်။

   သူက အစီအစဉ်တင်ဆက်သူ Bret Baier ကို “ခံစားမိနေတာတော့ ရှိတယ်” လို့ ပြောပြီး ရလဒ်အပေါ် အံ့အားသင့်တယ်လို့ပြောပါတယ်။

   “ကျွန်တော်တို့ရဲ့လူထုစုဝေးပွဲတွေက အင်မတန် အားကောင်းခဲ့ပါတယ်” လို့ ထရမ့်က ပြောပါတယ်။ “ကျွန်တော် နည်းနည်းတော့ အံ့အားသင့်မိတယ်။”

   ကွန်ဂရက်ထဲက ဒီမိုကရက်တွေနဲ့လက်တွဲလုပ်နိုင်တဲ့ “အကြောင်းအရာ အများကြီး၊ အများကြီး” ရှိတယ်လို့လည်း သူက သဘောထားပျော့ပျောင်းတဲ့လေသံနဲ့ပြောပါတယ်။

   သမ္မတသက်တမ်း၀က် ရွေးကောက်ပွဲရလဒ်ကြောင့် သူ့အစိုးရအဖွဲ့ကို အပြောင်းအလဲတစ်စုံတစ်ရာ လုပ်မယ့်အလားအလာကိုတော့ သူက ပယ်ချခဲ့ပါတယ်။

5. လွန်ခဲ့သော ၃ နာရီ ကသတင်းထူး, အမေရိကန်အထက်လွှတ်တော်ကို ဒီမိုကရက်တွေ အများစုနဲ့ ထိန်းချုပ်နိုင်ပြီ - စီဘီအက်စ် ခန့်မှန်းချက်

   အမေရိကန် (ဆီးနိတ်)အထက်လွှတ်တော်မှာတော့ ရီပတ်ဘလီကန်တွေ အများစုဖြစ်နေရာကနေ ဒီမိုကရက်တွေက အနိုင်ရပြီး ထိန်းချုပ်ခွင့် ရယူနိုင်မယ်လို့ ဘီဘီစီရဲ့ အမေရိကန်မိတ်ဖက်သတင်းဌာန စီဘီအက်စ်(CBS)က ခန့်မှန်းလိုက်ပါတယ်။

   အောက်လွှတ်တော်ကိုလည်း ဒီမိုကရက်တွေ အများစုနဲ့ ထိန်းချုပ်နိုင်မယ်လို့ စီဘီအက်စ် က အစောပိုင်းမှာ ခန့်မှန်းထားတာကြောင့် အခုဆို ဒီမိုကရက်တွေဟာ လွှတ်တော်နှစ်ရပ်စလုံးကို ထိန်းချုပ်နိုင်မယ်လို့ ခန့်မှန်းလိုက်ပါတယ်။

6. လွန်ခဲ့သော ၄ နာရီ ကသက်တမ်းဝက် ရွေးကောက်ပွဲရလဒ်တွေကို လက်ခံဖို့ အသင့်ရှိတယ် - သမ္မတထရမ့်

   ရီပတ်ဘလစ်ကန်ပါတီ အားကောင်းတဲ့ နယ်မြေလို့ သတ်မှတ်ထားတဲ့ မဲဆန္ဒနယ်တချို့မှာ ဒီမိုကရက်တစ်ပါတီ ကိုယ်စားလှယ်လောင်းတွေ အနိုင်ရရှိထားချိန်မှာ သမ္မတ ဒေါ်နယ်ထရမ့်က New York Times သတင်းစာကို သူ့ရဲ့ သဘောထားအသစ်ကို ပြောကြားခဲ့ပါတယ်။

   ရွေးကောက်ပွဲရလဒ်တွေကို “လုံးဝ လက်ခံဖို့ အသင့်ရှိပါတယ်” လို့ ထရမ့်က ပြောပါတယ်။ အတိုက်အခံပါတီနဲ့လည်း ပူးပေါင်းလုပ်ဆောင်ဖို့ အသင့်ရှိကြောင်း ဆိုပါတယ်။

   “သူတို့နဲ့အတူ လက်တွဲလုပ်ဆောင်ဖို့ မျှော်လင့်ထားပါတယ်” လို့ သူက ပြောပါတယ်။ “တစ်နည်းနည်းနဲ့ သဘောတူညီမှုတစ်ခု ရအောင် လုပ်နိုင်မှာပါ” လို့လည်း ပြောပါတယ်။

7. လွန်ခဲ့သော ၄ နာရီ ကထရမ့်က သူ့ပါတီနဲ့ ခပ်ခွာခွာနေဖို့ ကြိုးစား

   သမ္မတ ဒေါ်နယ်ထရမ့်ရဲ့ ဒီည ပထမဆုံး လူသိရှင်ကြား မှတ်ချက်ဟာ နိုင်ငံတစ်ဝန်းက ရီပတ်ဘလစ်ကန်ပါတီဝင်တွေ သဘောကျကြမှာ မဟုတ်ပါဘူး။

   ထရမ့်က သူ့ရဲ့ Truth Social လူမှုကွန်ရက်မှာ ဒီည ရွေးကောက်ပွဲဝင်ပြိုင်တာ မဟုတ်ကြောင်းနဲ့ သူသာ ဝင်ပြိုင်ခဲ့ရင် “အပြတ်အသတ် အနိုင်ရခဲ့မှာ” လို့ ရေးသားခဲ့ပါတယ်။

   ဒီစကားတိုလေးတွေနဲ့ပဲ ထရမ့်ဟာ သူ့ပါတီနဲ့ ခပ်ခွာခွာနေပြီး ရွေးကောက်ပွဲမှာ ရီပတ်ဘလစ်ကန် ကိုယ်စားလှယ်လောင်းတွေ ဆက်တိုက်ရှုံးနိမ့်နေမှုအတွက် အပြစ်ကို သူတို့အပေါ် ပုံချလိုက်တဲ့သဘော ဖြစ်နေပါတယ်။

   ကြားဖြတ်ရွေးကောက်ပွဲအပေါ် ထရမ့်ရဲ့ ကိုင်တွယ်ပုံနဲ့ပတ်သက်ပြီး ရီပတ်ဘလစ်ကန်ပါတီဝင် အများအပြားက အရင်ကတည်းက စိတ်ပျက်နေကြတာပါ။

   အောက်လွှတ်တော်ကို လက်လွှတ်လိုက်ရပြီး အထက်လွှတ်တော်ကိုပါ ဆုံးရှုံးရဖွယ်ရှိနေတဲ့ အကျိုးဆက်တွေကို ရီပတ်ဘလစ်ကန်ပါတီက စတင်ရင်ဆိုင်နေရချိန်မှာ ထရမ့်ရဲ့ မှတ်ချက်ဟာ ပါတီတွင်း သဘောထားကွဲလွဲမှုတွေကို ပြေလည်စေမှာ မဟုတ်ပါဘူး။

8. လွန်ခဲ့သော ၄ နာရီ ကနိုင်ငံသားမဟုတ်သူတွေ မဲပေးခဲ့တယ်ဆိုတဲ့အထောက်အထား ဘယ်လောက်ရှိသလဲ

   အမေရိကန် လူဝင်မှုကြီးကြပ်ရေးနဲ့ အကောက်ခွန်ဦးစီးဌာန (ICE) နဲ့ တရားရေးဝန်ကြီးဌာန (DOJ) တို့ဟာ ဒီရွေးကောက်ပွဲနဲ့ အရင်ရွေးကောက်ပွဲတွေမှာ နိုင်ငံသားမဟုတ်သူတွေ တရားမဝင် မဲပေးဖို့ စာရင်းသွင်းတာနဲ့ မဲပေးတာတွေ လုပ်ခဲ့တယ်ဆိုပြီး ပြည်နယ်အတော်များများမှာ ဖမ်းဆီးမှုတွေ ပြုလုပ်ခဲ့ကြောင်း လူမှုကွန်ရက်တွေမှာပြောဆို နေကြပါတယ်။

   အခုသီတင်းပတ်တွေအတွင်း DOJ ကလည်း နိုင်ငံသားမဟုတ်သူတွေလို့ စွပ်စွဲခံရသူတွေကို အလားတူ စွဲချက်တွေနဲ့ အရေးယူထားကြောင်း ကြေညာခဲ့တာတွေနဲ့ ကိုက်ညီနေပါတယ်။ ဒါပေမဲ့ အဲဒီစွပ်စွဲချက်တွေကို သက်သေပြနိုင်ခဲ့ရင်တောင် အရေအတွက်က နည်းပါးပါတယ်။

   ဥပမာအားဖြင့် ကယ်လီဖိုးနီးယားပြည်နယ်မှာ နိုင်ငံသားမဟုတ်သူတွေလို့ ယူဆရတဲ့ မဲဆန္ဒရှင်စာရင်းဝင်သူတွေရဲ့ စာတိုက်ကနေ ပေးပို့တဲ့ မဲလက်မှတ် ၂၀,၀၀၀ ကို ရေတွက်တာမလုပ်ဖို့ DOJ က တောင်းဆိုခဲ့ပါတယ်။ ဒါပေမဲ့ အဲဒီထဲက လူ ၃၄ ဦးကိုသာ မဲပေးဖို့ တရားမဝင် စာရင်းသွင်းခြင်းနဲ့ မဲပေးခြင်းတို့အတွက် တရားစွဲဆိုခဲ့ပါတယ်။

   လေ့လာမှုအများအပြားအရ အရင်က အမေရိကန်ရွေးကောက်ပွဲတွေမှာ နိုင်ငံသားမဟုတ်သူတွေ မဲပေးခဲ့ကြောင်း သက်သေပြနိုင်တဲ့ ဖြစ်စဉ်တွေဟာ ရှားပါးတယ်လို့ ဖော်ပြပါတယ်။

   ကွန်ဆာဗေးတစ်အတွေးအခေါ်ပညာရှင်အဖွဲ့ Heritage Foundation က ထိန်းသိမ်းထားတဲ့ ရွေးကောက်ပွဲမသမာမှုဆိုင်ရာ မှတ်တမ်းဒေတာမှာ ၂၀၀၅ ခုနှစ်ကနေ ၂၀၂၅ ခုနှစ်အတွင်း နိုင်ငံသားမဟုတ်သူတွေ မဲပေးမှုကြောင့် ပြစ်မှုထင်ရှားစီရင်ခံရတဲ့ ဖြစ်စဉ် ၂၄ ခုကို မှတ်တမ်းတင်ထားပါတယ်။

   ဒါ့အပြင် ၂၀၂၆ ခုနှစ် ဇူလိုင်လမှာ Reuters က ပြုလုပ်ခဲ့တဲ့ လေ့လာဆန်းစစ်မှုအရ ပြီးခဲ့တဲ့ နှစ်ပေါင်း ၃၀ အတွင်း နိုင်ငံသားမဟုတ်သူတွေ မဲပေးမှုနဲ့ပတ်သက်ပြီး ဖက်ဒရယ်တရားရုံးတွေမှာ လူ ၁၂၉ ဦးကို ရာဇဝတ်မှုနဲ့ တရားစွဲဆိုခဲ့ပြီး အဲဒီထဲက ၇၃ မှုမှာ ပြစ်မှုထင်ရှားခဲ့ပါတယ်။

9. လွန်ခဲ့သော ၅ နာရီ ကသတင်းထူး, CBS ခန့်မှန်းချက်အရ အောက်လွှတ်တော်ကို ဒီမိုကရက်တွေ အများစုနဲ့ ထိန်းချုပ်နိုင်ပြီ

   အမေရိကန် အောက်လွှတ်တော်မှာ ဒီမိုကရက်တွေက ရီပတ်ဘလီကန် အများစုဖြစ်နေရာကနေ အနိုင်ရပြီး ထိန်းချုပ်ခွင့်ရမယ်လို့ စီဘီအက်စ်သတင်းက ခန့်မှန်းပါတယ်။

   ဒီမိုကရက်တွေက အနည်းဆုံး အမတ်နေရာ ၂၁၈ နေရာနဲ့ ရီပတ်ဘလီကန်တွေက အနည်းဆုံး ၁၆၀ နေရာ အနိုင်ရမယ်လို့ ခန့်မှန်းထားပါတယ်။

   နောက်ဆုံးရ ခန့်မှန်းချက်ဓာတ်ပုံမှာ ဆက်လက်ဖတ်ရှုနိုင်ပါတယ်။

10. လွန်ခဲ့သော ၆ နာရီ ကအမေရိကန်သမိုင်းမှာ ပထမဆုံးလူမည်းအမျိုးသမီး ပြည်နယ်အုပ်ချုပ်ရေးမှူးအဖြစ် ရွေးကောက်ခံရ

    ဒီမိုကရက်တစ်ပါတီက ကီရှာ လန်းစ် ဘော့တွမ်စ် ဟာ အမေရိကန်နိုင်ငံ ဂျော်ဂျီယာပြည်နယ် အုပ်ချုပ်ရေးမှူးရွေးကောက်ပွဲမှာ အနိုင်ရဖို့ သေချာနေပြီလို့ ခန့်မှန်းထားပါတယ်။

    သူဟာ အမေရိကန်သမိုင်းမှာ ပထမဆုံး ပြည်နယ်အုပ်ချုပ်ရေးမှူးအဖြစ် ရွေးကောက်ခံရတဲ့ လူမည်းအမျိုးသမီး ဖြစ်လာမှာပါ။

    ရီပတ်ဘလစ်ကန်ပါတီ ကိုယ်စားလှယ် ရစ်ခ် ဂျက်ဆင် ကို အနိုင်ရခဲ့တာကြောင့် ဂျော်ဂျီယာပြည်နယ် အုပ်ချုပ်ရေးမှူးနေရာကို ဒီမိုကရက်တစ်ပါတီက ပြန်လည်ရရှိခဲ့တာ ဖြစ်ပါတယ်။

    ကီရှာ လန်းစ် ဘော့တွမ်စ် ဟာ ၂၀၁၈ ခုနှစ်ကနေ ၂၀၂၂ ခုနှစ်အထိ အတ္တလန်တာမြို့တော်ဝန်အဖြစ် တာဝန်ထမ်းဆောင်ခဲ့ပြီးနောက် သမ္မတ ဂျိုးဘိုင်ဒင်အစိုးရအဖွဲ့မှာလည်း တာဝန်ထမ်းဆောင်ခဲ့သူ ဖြစ်ပါတယ်။

11. လွန်ခဲ့သော ၆ နာရီ က“အပြတ်အသတ်ရှုံးနိမ့်မယ့် အခြေအနေ” – ရီပတ်ဘလစ်ကန်တွေ စိုးရိမ်နေကြ

    တက္ကဆက်ပြည်နယ်က ရီပတ်ဘလစ်ကန်တစ်ဦး ပေးပို့တဲ့ စာတိုတစ်စောင်က ပါတီအတွင်း လက်ရှိအခြေအနေကို ထင်ဟပ်နေပါတယ်။

    တက္ကဆက်ပြည်နယ် အထက်လွှတ်တော်အမတ်နေရာအတွက် ရွေးကောက်ပွဲနဲ့ပတ်သက်ပြီး ရီပတ်ဘလစ်ကန်တွေ ဘယ်လိုခံစားနေရသလဲလို့ မေးမြန်းရာမှာ ပါတီအတွင်း နှစ်ပေါင်းများစွာ လုပ်ကိုင်လာတဲ့ အဲဒီပုဂ္ဂိုလ်က စကားလုံးတစ်လုံးတည်းနဲ့ ဖြေခဲ့ပါတယ်။ “အပြတ်အသတ်ရှုံးနိမ့်မယ့် အခြေအနေ” ဆိုပါတယ်။

    အဲဒီအထက်လွှတ်တော်ရွေးကောက်ပွဲမှာ မဲရေတွက်ပြီးစီးမှုက ၄၀ ရာခိုင်နှုန်းဝန်းကျင်သာ ရှိသေးပါတယ်။ ဒီမိုကရက်တစ်ပါတီ ကိုယ်စားလှယ်လောင်း ဂျိမ်းစ် တာလာရီကိုက ရီပတ်ဘလစ်ကန် ပြိုင်ဘက် ကန် ပါ့စ်တန်ကို မဲရာခိုင်နှုန်း ၂၀ နီးပါး အသာရနေပါတယ်။

    မဲတွေ ထပ်မံရေတွက်လာတာနဲ့အမျှ အဲဒီကွာဟချက် ကျဉ်းမြောင်းလာနိုင်ပေမဲ့ ရီပတ်ဘလစ်ကန်တွေဘက်မှာတော့ အခြေအနေ‌ကောင်းပုံမရပါဘူး။

12. လွန်ခဲ့သော ၆ နာရီ ကသက်တမ်း၀က်ရွေးကောက်ပွဲ ဒီမိုကရက်တွေမျှော်လင့်ထားတဲ့အတိုင်း မဲနိုင်မှာလား

    ဒီမိုကရက်တစ်ပါတီဟာ အရေးကြီးတဲ့အမေရိကန်သမ္မတသက်တမ်း၀က် ရွေးကောက်ပွဲတွေ ၀င်ပြိုင်ဖို့ အားယူနေချိန်မှာပဲ ဒီရွေးကောက်ပွဲအတွက် မျှော်လင့်ချက် မြင့်မြင့်ထားနေပါတယ်။

    လူကြိုက်မများတဲ့ ရီပတ်ဘလီကန်သမ္မတ၊ မီးဖိုချောင်နဲ့ လူနေမှုစရိတ် မြင့်တက်တဲ့အပေါ် မကျေနပ်တဲ့အမေရိကန်လူထု၊ အမြင်သဘောထားစစ်တမ်းတွေမှာ ရလဒ်သိပ်မကောင်းတာတွေက အင်္ဂါနေ့ အမေရိကန်သမ္မတသက်တမ်း၀က်ရွေးကောက်ပွဲဟာ ဒီမိုကရက်တွေကို မျက်နှာသာပေးနေပါတယ်။

    ဒီမိုကရက်တစ်ပါတီ အမတ်လောင်းတွေဟာ အောက်လွှတ်တော်ကို ထိန်းချုပ်ဖို့ လိုအပ်တဲ့ ၂၁၈ နေရာထက် ပိုရနိုင်တယ်လို့ အမြင်သဘောထားစစ်တမ်းတွေမှာဖော်ပြပါတယ်။ အထက်လွှတ်တော်အတွက်တော့ သူတို့ဟာ သူတင်ကိုယ်တင် ဒါမှမဟုတ် ကပ်ပြီးနိုင်ခြေရှိတာကို ပြသပါတယ်။

    ဒီမိုကရက်တွေဟာ ဒေါ်နယ်ထရမ့်တစ်ယောက် ၂၀၂၄ ခုနှစ်တုန်းက ၁၈ ရာခိုင်နှုန်းအသာနဲ့ အနိုင်ရရှိခဲ့တဲ့ တောင်ကယ်ရိုလိုင်းနားပြည်နယ်မှာတော့ မဲအပြတ်နိုင်ဖို့ ခက်မယ်လို့ နယူးယောက်တိုင်းမ်သတင်းစာရဲ့ မကြာသေးခင်တုန်းကစစ်တမ်းမှာ ပြပါတယ်။

    စီအန်အန် သတင်းဌာနက မကြာသေးခင်တုန်းက ပြုလုပ်တဲ့စစ်တမ်းတွေမှာတော့ ဒီမိုကရက်တွေဟာ တက္ကဆက်၊ ကန်ဆက်စ်နဲ့ မိန်းပြည်နယ်တို့မှာ ဦးဆောင်နေပါတယ်။

    ဆိုတော့ ဒီစစ်တမ်းတွေက မှန်ကန်ရဲ့လား။

    အပြည့်အစုံကို ဒီလင့်ခ် မှာ ၀င်ရောက်ဖတ်ရှုနိုင်ပါတယ်။

13. လွန်ခဲ့သော ၆ နာရီ ကနောက်ထပ် အထက်လွှတ်တော် မဲဆန္ဒနယ် ငါးခုရဲ့ ရလဒ်တွေကို ခန့်မှန်းထုတ်ပြန်, အားလုံးမှာ ဒီမိုကရက်တွေ အနိုင်ရ

    အစောပိုင်းတုန်းက သတင်းဖော်ပြခဲ့သလို ရလဒ်တွေ မျှော်လင့်ထားပြီးသား မဲဆန္ဒနယ်တွေအတွက် နောက်ထပ် ခန့်မှန်းရလဒ်တွေ ထွက်ပေါ်လာပါတယ်။

    လက်ရှိအခြေအနေကို ကြည့်ရအောင်ပါ။

    • ဒလ၀ဲ မှာ ဒီမိုကရက်တစ်ပါတီက ခရစ်ကွန်းစ် ဟာ သူ့ရဲ့ အထက်လွှတ်တော်အမတ်နေရာကို ဆက်ထိန်းထားနိုင်မယ်လို့ ခန့်မှန်းထားပါတယ်။
    • အီလီနွိုက် မှာလည်း အလားတူပဲဖြစ်ပြီး ဒီမိုကရက်တစ်ပါတီ ကိုယ်စားလှယ်လောင်း ဂျူလီယားနား စထရာတန် က အထက်လွှတ်တော်အမတ်နေရာမှာ အနိုင်ရမယ်လို့ ခန့်မှန်းထားပါတယ်။
    • မက်ဆာချူးဆက် မှာ ဒီမိုကရက်တစ်ပါတီ အထက်လွှတ်တော်အမတ် အက်ဒွပ် ဂျေ မာကီက သူ့ရဲ့အမတ်နေရာကို ဆက်ထိန်းထားနိုင်ခဲ့ပါတယ်။
    • ရုတ် အိုင်းလန်း မှာ ဒီမိုကရက်တစ်ပါတီ အထက်လွှတ်တော်အမတ် ဂျက်ရိဒ် ကလည်း သူ့ရဲ့အမတ်နေရာကို ဆက်ထိန်းထားနိုင်ခဲ့ပါတယ်။
    • နယူးဂျာစီ ပြည်နယ်ရဲ့ ဒီမိုကရက်တစ် အထက်လွှတ်တော်အမတ် ကိုရီ ဘွတ်ကာ ကလည်း သူ့ရဲ့အမတ်နေရာကို ဆက်ထိန်းထားနိုင်မယ်လို့ ခန့်မှန်းထားပါတယ်။

14. လွန်ခဲ့သော ၆ နာရီ ကအမေရိကန် သမ္မတသက်တမ်း၀က်ရွေးကောက်ပွဲ သိသင့်တဲ့ ၇ ချက်

    ဒေါ်နယ်ထရမ့်ရဲ့ကျန်နေသေးတဲ့သမ္မတသက်တမ်း၀က် လက်ကျန် ၂ နှစ်ကို သက်ရောက်မှု ကြီးနိုင်မယ့် သမ္မတသက်တမ်း၀က် အမေရိကန်လွှတ်တော်ရွေးကောက်ပွဲ စတင်နေပြီဖြစ်ပါတယ်။

    ပြည်နယ် ၂၀ ခန့်မှာလည်း မဲရုံတွေ စပိတ်နေပြီဖြစ်ပါတယ်။​

    သမ္မတ ထရမ့်ကတော့ မဲထည့်ဖို့ တန်းစီနေသူတွေ ဆက်ပြီးတန်းစီကြဖို့ အစောပိုင်းတုန်းကပဲ တိုက်တွန်းသွားပါတယ်။

    ထရမ့်ကတော့ မဲစာရင်းမှာ သူမပါပေမဲ့ သူပါသလို မှတ်ယူပြီး မဲထည့်ဖို့ အစောပိုင်းကတည်းက မဲဆွယ်ခဲ့ပါတယ်။

    ကျန်နေသေးတဲ့ အခုတစ်ခေါက် သူ့ သမ္မတ သက်တမ်း ၂ နှစ်အတွက် လွှတ်တော် ၂ ရပ်မဲပေးပွဲတွေပြုလုပ်တဲ့ အမေရိကန် သမ္မတသက်တမ်း၀က် မဲပေးပွဲ ဘာကြောင့်အရေးကြီးလဲ။

    အပြည့်အစုံကို ဒီလင့်ခ် မှာ ၀င်ရောက်ဖတ်ရှုနိုင်ပါတယ်။

15. လွန်ခဲ့သော ၇ နာရီ ကမဲထည့်ဖို့ “တန်းစီနေပြီဆိုရင် ဆက်တန်းစီနေပါ” - ထရမ့်

    လက်ရှိ မဲပေးဖို့ တန်းစီစောင့်ဆိုင်းနေတဲ့ မဲဆန္ဒရှင်တွေကို မဲရုံတွေပိတ်သွားရင်တောင် ဆက်တန်းစီနေဖို့ တိုက်တွန်းထားတဲ့ ဗီဒီယိုအတိုတစ်ခုကို ထရမ့်က ရီပတ်ဘလီကန်တွေရဲ့ X(အရင်က တွစ်တာ) လူမှုကွန်ရက်စာမျက်နှာမှာ အခုလေးတင် ပြောလိုက်ပါတယ်။

    “ဟိုင်း ရီပတ်ဘလင်ကန်ပါတီ၀င်များ။ ကျွန်တော်တို့ အခြေအနေ အရမ်းကောင်းနေပါတယ်။ တန်းစီနေပြီဆိုရင် ဆက်တန်းစီနေပါ” လို့ဆိုပြီး ရုပ်သံထဲ ထရမ့်က ပြောပါတယ်။

    ပြည်နယ်တွေရဲ့မဲပေးစည်းကမ်းတွေအရ မဲရုံပိတ်ချိန်မှာ တန်းစီနေပြီးသား မဲဆန္ဒရှင်တွေဟာ ကိုယ့်အလှည့်ရောက်တဲ့အထိ စောင့်ဆိုင်းမယ်ဆိုရင် မဲပေးနိုင်မှာဖြစ်ပါတယ်။

    “ကျွန်တော်တို့ အပြတ်အသတ် အနိုင်ရတော့မှာပါ” လို့ ထရမ့်က ထပ်ပြောပါတယ်။

16. လွန်ခဲ့သော ၇ နာရီ ကဂျော်ဂျီယာပြည်နယ်မှာ ဒီမိုကရက်အမတ်လောင်း Ossoff နိုင်မယ်လို့တစ်ပြေး, မဲကပ်ပြီးနိုင်မယ်လို့ ရီပတ်ဘလီကန်တွေဘက်ကလည်း မှန်းထား

    ဒန်နီယယ် ဘုရှ်

    ၀ါရှင်တန်သတင်းထောက်

    ဂျော်ဂျီယာပြည်နယ်မှာ မဲရုံတွေ ပိတ်ပြီး တစ်နာရီတောင် မပြည့်ခင်မှာပဲ အနိုင်ရမယ့်သူကို အခု ခန့်မှန်းထုတ်ပြန်နိုင်ပါပြီ။ သူကတော့ ဒီမိုကရက်တစ်ပါတီ အထက်လွှတ်တော်အမတ် ဂျွန် အော့ဆော့ဖ် ဖြစ်ပါတယ်။

    သူ အနိုင်ရတာဟာ မမျှော်လင့်ထားတဲ့ရလဒ်တော့ မဟုတ်ပါဘူး။ ရွေးကောက်ပွဲနေ့အထိ စစ်တမ်းတွေမှာ အော့ဆော့ဟာ သူ့ရဲ့ ရီပတ်ဘလီကန်ပါတီ ပြိုင်ဘက် အောက်လွှတ်တော်အမတ် မိုက်ကောလင်းစ်ကို သာသာလေး ဦးဆောင်နေခဲ့တာပါ။

    ဒါပေမဲ့ ရီပတ်ဘလီကန်တွေကတော့ ဒီမဲပေးပွဲဟာ ဒီထက်ပိုပြီး အကြိတ်အနယ်ရှိမယ်လို့ မျှော်လင့်ခဲ့ကြပါတယ်။ ဂျော်ဂျီယာဟာ ရီပတ်ဘလီကန်ပါတီကို ဆယ်စုနှစ်ပေါင်းများစွာ တစိုက်မတ်မတ် မဲပေးခဲ့တဲ့ပြည်နယ်တစ်ခု ဖြစ်ပါတယ်။ ၂၀၂၀ ပြည့်နှစ်မှာ ဂျိုးဘိုင်ဒန် က ဒီပြည်နယ်မှာ မဲအနည်းငယ်အသာနဲ့ အနိုင်ရခဲ့ပြီးနောက် ၂၀၂၄ ခုနှစ်မှာ သမ္မတ ဒေါ်နယ်ထရမ့်က အနိုင်ရခဲ့ပါတယ်။

    ဂျော်ဂျီယာပြည်နယ်မှာ အော့ဆော့ဖ် လွယ်လွယ်ကူကူ အနိုင်ရတာဟာ ဒီည ဒီမိုကရက်တွေအတွက် အခြေအနေကောင်းမယ့် အရိပ်အယောင်တစ်ခု ဖြစ်နိုင်ပါတယ်။ ဒါပေမဲ့ အခုအချိန်မှာတော့ သိရဖို့ စောလွန်းနေသေးပါတယ်။

    အခု အော့ဆော့ဖ်က ပြန်လည်ရွေးကောက်ခံရပြီဖြစ်တာကြောင့် ၂၀၂၈ ခုနှစ်အတွက် သူ့ရဲ့အစီအစဉ်နဲ့ပတ်သက်တဲ့ ခန့်မှန်းပြောဆိုမှုတွေ အရှိန်မြင့်လာတော့မှာ ဖြစ်ပါတယ်။

    ဂျော်ဂျီယာက ဒီ ဒီမိုကရက်အမတ်ဟာ ၂၀၂၈ သမ္မတရွေးကောက်ပွဲ ဝင်ပြိုင်မယ်ဆိုရင် ထိပ်တန်းပြိုင်ဘက် ဖြစ်လာနိုင်သူတစ်ဦးအဖြစ် သတ်မှတ်ခံထားရပါတယ်။

    ဒီညမှာတော့ သူ့ရဲ့ အထက်လွှတ်တော်အမတ်နေရာ အနိုင်ရမှုကိုပဲ အာရုံစိုက်မှာ သေချာပါတယ်။ ဒါပေမဲ့ မကြာခင်မှာပဲ အိမ်ဖြူတော်ကို ရောက်လိုတဲ့ သူ့ရဲ့ရည်မှန်းချက်တွေနဲ့ပတ်သက်ပြီး မေးခွန်းတွေကို ရင်ဆိုင်ရတော့မှာ ဖြစ်ပါတယ်။

17. လွန်ခဲ့သော ၇ နာရီ ကနို၀င်ဘာ ၃ ရက်ည စောင့်ကြည့်ရမယ့် အရိပ်အယောင်တွေ

    ဒန်နီယယ် ဘုရှ်

    ၀ါရှင်တန် သတင်းထောက်

    အမေရိကန်အစိုးရရုံးစိုက်တဲ့ ၀ါရှင်တန်မှာတော့ ဒေသစံတော်ချိန် နို၀င်ဘာလ ၃ ရက် ည ၈ နာရီကျော်ပါပြီ။

    ထရမ့်ခေတ်ရဲ့ထင်ရှားတဲ့ လက္ခဏာတွေထဲက တစ်ခုက ဒေါ်နယ်ထရမ့် ကိုယ်တိုင် မဲစာရင်းမှာ မပါဝင်တဲ့အခါ မဲပေးသူအရေအတွက် မလျော့ကျအောင် ထိန်းထားဖို့ ရီပတ်ဘလီကန် ပါတီ ရုန်းကန်နေရတာ ဖြစ်ပါတယ်။

    အခု ရွေးကောက်ပွဲညက တကယ်စတင်နေပြီဖြစ်တာကြောင့် ၂၀၂၄ ခုနှစ်မှာ ထရမ့် ထောက်ခံမှု ပိုရခဲ့တဲ့ အဓိကမဲဆန္ဒရှင်အုပ်စုတချို့ဖြစ်တဲ့ လက်တင်အမေရိကနွယ်ဖွားတွေနဲ့ အမျိုးသမီးတွေဆီက ရီပတ်ဘလီကန်အမတ်လောင်းတွေ ဘယ်လောက်ထောက်ခံမှုရမလဲဆိုတာ ကျွန်တော် စောင့်ကြည့်သွားမှာ ဖြစ်ပါတယ်။

    ရီပတ်ဘလီကန်တွေက ထရမ့်ရဲ့ မဲဆန္ဒရှင် မဟာမိတ်အုပ်စုကို စည်းလုံးမှုမပျက် ဆက်မထိန်းထားနိုင်ရင် အင်္ဂါနေ့ သက်တမ်း၀က်ရွေးကောက်ပွဲမှာ အမတ်နေရာ အများအပြား ဆုံးရှုံးနိုင်ခြေရှိပါတယ်။ ဒါဟာ ၂၀၂၈ ခုနှစ် သမ္မတရွေးကောက်ပွဲမတိုင်ခင် သတိပေးလက္ခဏာတစ်ခုလည်း ဖြစ်လာမှာပါ။

    ဒီမိုကရက်တစ်ပါတီဘက်မှာတော့ ပြောင်းပြန်ဖြစ်ပါတယ်။ ပါတီအနေနဲ့ လက်တင်အမေရိကနွယ်ဖွား မဲဆန္ဒရှင်တွေဆီက အစဉ်အလာအရ ရရှိခဲ့တဲ့ ထောက်ခံမဲအချိုးအစားကို ပြန်ရယူနိုင်ပြီး အမျိုးသမီးတွေနဲ့ တက္ကသိုလ်ပညာတတ် မဲဆန္ဒရှင်တွေဆီက ထောက်ခံမဲတွေ သိသိသာသာ တိုးရလာမယ်ဆိုရင် နောက်လာမယ့် သမ္မတရွေးကောက်ပွဲမှာ သူတို့ရဲ့ အလားအလာအတွက် ကောင်းမွန်တဲ့လက္ခဏာဖြစ်မှာပါ။

    နိုင်ငံရေး မဟာမိတ်အုပ်စုတွေဟာ အချိန်ကြာလာတာနဲ့အမျှ ပြောင်းလဲတတ်ပါတယ်။ မဲပေးသူအရေအတွက် ပုံမှန်အားဖြင့် လျော့နည်းတတ်တဲ့ သမ္မတသက်တမ်း၀က် ရွေးကောက်ပွဲတစ်ခုရဲ့ ရလဒ်တွေနဲ့ မဲရုံအထွက် စစ်တမ်းတွေကို အခြေခံပြီး ကောက်ချက်ချနိုင်တာကလည်း အကန့်အသတ်ရှိပါတယ်။

    ဒါပေမဲ့ ဒီည ဆက်လက်ကုန်ဆုံးလာတာနဲ့အမျှ လာမယ့်နှစ်နှစ်အတွင်း ပါတီနှစ်ရပ်စလုံး ဘယ်ကို ဦးတည်နေတယ်ဆိုတာ ခန့်မှန်းနိုင်မယ့်အရိပ်အယောင်တွေကို ကျွန်တော် စောင့်ကြည့်သွားမှာ ဖြစ်ပါတယ်။

18. လွန်ခဲ့သော ၈ နာရီ ကမဲစာရင်းမှာ သူပါတယ်လို့မှတ်ယူပြီး မဲပေးဖို့ ထရမ့်ပြော

    သီတင်းပတ်တွေ၊ လတွေကြာအောင် သမ္မတကြားဖြတ်ရွေးကောက်ပွဲ မဲဆွယ်စည်းရုံးမှုတွေ လုပ်ဆောင်လာတဲ့အချိန်တလျှောက် သမ္မတ ဒေါ်နယ်ထရမ့်က မဲဆန္ဒရှင်တွေကို သူ့ရဲ့ မဲဆွယ်ပွဲအများစုမှာ ထပ်ခါတလဲလဲ တောင်းဆိုလာတဲ့စကားတစ်ခွန်း ရှိပါတယ်။

    “ကျွန်တော်ကိုယ်တိုင် မဲစာရင်းမှာပါသလို သဘောထားပြီး မဲပေးကြပါ။” လို့ ထရမ့်က ပြောပါတယ်။

    ၂၀၂၄ သမ္မတရွေးကောက်ပွဲ ရလဒ်မျိုး ပြန်လည်ဖြစ်ပေါ်လာဖို့ ထရမ့်က မျှော်လင့်နေတာ ဖြစ်ပါတယ်။

    အဲဒီရွေးကောက်ပွဲမှာ ထရမ့်အပေါ် ကိုယ်ရေးကိုယ်တာ သစ္စာရှိမှု ပြသခဲ့တဲ့ မဲဆန္ဒရှင် သန်းပေါင်းများစွာနဲ့ သမ္မတ ဂျိုးဘိုင်ဒန်နဲ့ ဒီမိုကရက်တစ်ပါတီအပေါ် မကျေနပ်မှုတွေ ပေါင်းစပ်ပြီး ထရမ့်နဲ့ ရီပတ်ဘလီကန်ပါတီကို မဲထည့်ခဲ့ကြတာပါ။ ဒါကြောင့်ပဲ ထရမ့်က အိမ်ဖြူတော်နဲ့ ရီပတ်ဘလီကန်အမတ်တွေက ကွန်ဂရက် လွှတ်တော်ကို ထိန်းချုပ်ခွင့် ပြန်လည်ရရှိစေခဲ့ပါတယ်။

    ဒါပေမဲ့ လက်ရှိ သမ္မတ သက်တမ်း၀က်ရွေးကောက်ပွဲမှာ ထရမ့်ကိုယ်တိုင်က မဲစာရင်းမှာ မပါဝင်ပါဘူး။ နောက်ပြီး သူ့ရဲ့ဒုတိယသက်တမ်း ကုန်ဆုံးချိန်မှာလည်း တရားဝင်နိုင်ငံရေးသမားဘ၀ အဆုံးသတ်သွားမှာ ဖြစ်ပါတယ်။

    ဒါကြောင့် ပြည်နယ်နဲ့ ဒေသအလိုက် ကျင်းပနေတဲ့ ရွေးကောက်ပွဲထောင်ပေါင်းများစွာကို "ထရမ့်အပေါ် ထောက်ခံမှု စမ်းသပ်ပွဲ" တစ်ခုလို ပြောင်းလဲဖို့ သူကြိုးစားနေတဲ့ မဟာဗျူဟာဟာ ပုံမှန်မဟုတ်တဲ့လုပ်ဆောင်ချက်တစ်ခုလို့ ဆိုနိုင်ပါတယ်။

    ထရမ့်ကတော့ သူ့အပေါ် မဲဆန္ဒရှင်တွေရဲ့စိတ်အားထက်သန်မှုနဲ့ ထောက်ခံမှုက ရီပတ်ဘလီကန် ကိုယ်စားလှယ်လောင်းတွေကို အနိုင်ရအောင် ကူညီပေးမယ်လို့ ယုံကြည်နေပုံရပါတယ်။

    ဒါ့အပြင် လက်ရှိ အာဏာရပါတီဟာ ကြားဖြတ်ရွေးကောက်ပွဲမှာ အကြီးအကျယ် အရှုံးကြုံရတတ်တဲ့ အမေရိကန်နိုင်ငံရေး သမိုင်းအစဉ်အလာကိုလည်း ကျော်လွှားနိုင်မယ်လို့ ထရမ့်က မျှော်လင့်နေပါတယ်။

19. လွန်ခဲ့သော ၈ နာရီ ကစစ်တမ်းအရ မဲဆန္ဒရှင်အများစုက ထရမ့်ရဲ့ မူဝါဒတွေကြောင့် “စီးပွားရေးအခြေအနေ ပိုဆိုးလာတယ်” လို့ ပြော

    ခရစ် ဂျာဗန်စ်

    အချက်အလက်ဆိုင်ရာ သတင်းထောက်

    သက်တမ်း၀က်ရွေးကောက်ပွဲ အမေရိကန်မဲဆန္ဒရှင်စစ်တမ်းက ပထမအသုတ် အချက်အလက်တွေအရဆိုရင် သမ္မတ ထရမ့်ရဲ့မူဝါဒတွေကြောင့် နိုင်ငံ့စီးပွားရေးအခြေအနေ ပိုဆိုးလာတယ်လို့ မဲဆန္ဒရှင် သုံးပုံနှစ်ပုံနီးပါးဖြစ်တဲ့ ၆၅ ရာခိုင်နှုန်းက ပြောပါတယ်။

    ထရမ့်ရဲ့ မူဝါဒတွေကြောင့် အခြေအနေ တိုးတက်ကောင်းမွန်လာတယ်လို့ ၂၈ ရာခိုင်နှုန်းက ပြောပြီး သမ္မတကြောင့် ဘာသက်ရောက်မှုမှ မရှိဘူးလို့ ပြောသူက ၈ ရာခိုင်နှုန်းပဲ ရှိပါတယ်။

    သမ္မတ ထရမ့်ကို ထောက်ခံကြောင်း ဒါမှမဟုတ် ဆန့်ကျင်ကြောင်း ဖော်ပြလိုတာက အခု သက်တမ်း၀က်ရွေးကောက်ပွဲမှာ သူတို့ မဲပေးရတဲ့အကြောင်းရင်းတစ်ခု ဟုတ်၊ မဟုတ်ကိုလည်း လူတွေကို မေးမြန်းခဲ့ပါတယ်။

    သမ္မတကို ဆန့်ကျင်ကြောင်း ဖော်ပြလိုတာက သူတို့ မဲပေးရတဲ့ အကြောင်းရင်းတစ်ခုဖြစ်တယ်လို့ ၄၃ ရာခိုင်နှုန်းက ပြောပါတယ်။ ဒါပေမဲ့ အလားတူ ၄၁ ရာခိုင်နှုန်းကတော့ ထရမ့် ဟာ သူတို့ မဲပေးရာမှာ ထည့်သွင်းစဉ်းစားရတဲ့ အချက်တစ်ခု မဟုတ်ဘူးလို့ ပြောပါတယ်။

    မေးမြန်းခံရသူတွေထဲက ၁၆ ရာခိုင်နှုန်းကပဲ Trump ကို ထောက်ခံကြောင်း ဖော်ပြလိုတာက သူတို့ မဲပေးရတဲ့အကြောင်းရင်းတစ်ခုဖြစ်တယ်လို့ ပြောပါတယ်။

20. လွန်ခဲ့သော ၈ နာရီ ကအမေရိကန် သမ္မတ သက်တမ်း၀က်ရွေးကောက်ပွဲမှာ ပထမဆုံး မဲရုံတွေ ပိတ်ပြီ

    မြန်မာစံတော်ချိန် နို၀င်ဘာလ ၄ ရက်၊ ၆ နာရီ မိနစ် ၅၀ ခန့်ရှိပါပြီ။

    အမေရိကန်ပြည်ထောင်စုမှာတော့ နို၀င်ဘာ ၃ ရက် အရှေ့ကမ်းရိုးတန်း ဒေသစံတော်ချိန် ည ၇ နာရီကျော်ရှိပါပြီ။

    ပြည်နယ်အချို့မှာ မဲရုံတွေ စပြီး ပိတ်နေပါပြီ။

    ကင်တပ်ကီ နဲ့ အင်ဒီယားနား ပြည်နယ်တွေမှာ ပထမဆုံး မဲရုံတွေ ပိတ်ခဲ့ပါတယ်။

    နိုင်ငံအရှေ့ကမ်းရိုးတန်းက ဖလော်ရီဒါ၊ ဂျော်ဂျီယာ၊ တောင်ကယ်ရိုလိုင်းနား၊ ဗားမောင့်၊ ဗာဂျီးနီးယားနဲ့ နယူး ဟမ်ရှိုင်းယား ပြည်နယ်တွေမှာလည်း မဲရုံတွေ အခုပဲ ပိတ်လိုက်ပါပြီ။

    လာမယ့် နာရီတွေအတွင်း တခြားပြည်နယ်တွေမှာလည်း မဲရုံတွေ ဆက်လက်ပိတ်သွားမှာဖြစ်ပြီး ရလဒ်တွေ စတင်ထွက်ပေါ်လာမှာ ဖြစ်ပါတယ်။