ဦးမင်းအောင်လှိုင်ရဲ့ ထိုင်းခရီးမှာ ဖမ်းဆီးလွှဲပြောင်းနိုင်ရေး BROUK က အာဂျင်တီးနားတရားရေးကို တောင်းဆို
ယူကေအခြေစိုက် ရိုဟင်ဂျာအဖွဲ့အစည်း (BROUK) က ဦးမင်းအောင်လှိုင် ကိုသူ့ရဲ့ ထိုင်းခရီးစဥ်အတွင်း ဖမ်းဆီးပြီး အာဂျင်တီးနားတရားရုံးကို လွှဲပြောင်းနိုင်ရေး ထိုင်းနိုင်ငံနဲ့ ပူးပေါင်းဆောင်ရွက်ပေးဖို့ အာဂျင်တီးနားတရားရေးအာဏာပိုင်တွေကို တောင်းဆိုလိုက်ပါတယ်။
နေပြည်တော်သမ္မတ ဦးမင်းအောင်လှိုင်ဟာ ထိုင်းအစိုးရရဲ့ ဖိတ်ကြားချက်နဲ့ ဩဂုတ် ၆ ရက်နဲ့ ၇ ရက်မှာ ထိုင်းနိုင်ငံကို သွားရောက်ဖို့ စီစဉ်ထားချိန်မှာ ယူကေအခြေစိုက် ရိုဟင်ဂျာအရေး လှုပ်ရှားနေတဲ့ BROUK က အခုလို တောင်းဆိုလိုက်တာပါ။
မြန်မာစစ်တပ်ခေါင်းဆောင်တွေဟာ ရိုဟင်ဂျာတွေအပေါ် လူမျိုးတုံးသတ်ဖြတ်မှုကျူးလွန်ခဲ့တယ်ဆိုတဲ့ စွဲချက်ပြစ်မှုတွေနဲ့ ပတ်သက်ပြီး ကမ္ဘာလုံးဆိုင်ရာ တရားစီရင်ပိုင်ခွင့်ဥပဒေ - universal jurisdiction အမှုကို ၂၀၁၉ ခုနှစ်ကတည်းက BROUK က တိုင်ကြားထားတာဖြစ်ပါတယ်။
အဲဒီစွဲချက်တွေနဲ့ ဆက်စပ်ပြီး ၂၀၂၅ ခုနှစ် ဖေဖော်ဝါရီလမှာ အာဂျင်တီးနားတရားရုံးက ဦးမင်းအောင်လှိုင်နဲ့ မြန်မာစစ်တပ် ထိပ်တန်းအရာရှိတချို့အပေါ် နိုင်ငံတကာဖမ်းဝရမ်း ထုတ်ပြန်ခဲ့တယ်လို့ BROUK က ပြောပါတယ်။
BROUK ဥက္ကဋ္ဌ ဦးထွန်းခင် ကတော့ ဦးမင်းအောင်လှိုင်ဟာ ရိုဟင်ဂျာတွေအပေါ် ကျူးလွန်ခဲ့တဲ့ လူမျိုးတုံးသတ်ဖြတ်မှုမှာ အဓိက တာဝန်ရှိသူတစ်ဦးဖြစ်သလို၊ ၂၀၂၁ စစ်အာဏာသိမ်းပြီးနောက် မြန်မာပြည်သူတွေအပေါ် အကြမ်းဖက်ဖိနှိပ်မှုတွေကို ဦးဆောင်ခဲ့သူဖြစ်တယ်လို့ ပြောဆိုထားပါတယ်။
ဒါ့အပြင် ထိုင်းနဲ့ အာဂျင်တီးနားကြား တရားခံလွှဲပြောင်းရေးသဘောတူစာချုပ် မရှိပေမယ့် ထိုင်းရဲ့ ၂၀၀၈ ခုနှစ် တရားခံလွှဲပြောင်းရေးဥပဒေအရ သတ်မှတ်ချက်တွေနဲ့ ကိုက်ညီရင် လွှဲပြောင်းပေးနိုင်တယ်လို့ BROUK က ဆိုပါတယ်။
အာဂျင်တီးနားမှာ စတင်ထားတဲ့ ဒီအမှုဟာ ရိုဟင်ဂျာ လူမျိုးတုံးသတ်ဖြတ်မှုနဲ့ ပတ်သက်တဲ့ ပထမဆုံး universal jurisdiction အမှုဖြစ်တယ်လို့လည်း BROUK က ပြောထားပါတယ်။
ဒါပေမယ့် လက်ရှိအချိန်အထိ ဦးမင်းအောင်လှိုင်ကို ထိုင်းနိုင်ငံက ဖမ်းဆီးမယ်၊ ဒါမှမဟုတ် အာဂျင်တီးနားကို လွှဲပြောင်းပေးမယ်ဆိုတဲ့ ဆုံးဖြတ်ချက်မျိုး ထွက်ပေါ်ထားခြင်း မရှိသေးပါဘူး။
ထိုင်းနိုင်ငံက ဦးမင်းအောင်လှိုင်ကို ဘန်ကောက်မှာ လက်ခံတွေ့ဆုံဖို့ ရက်ပိုင်းအလိုမှာပဲ ထိုင်းဝန်ကြီးချုပ် အနုတင် ချန်ဝီရာကူးန်က မြန်မာနဲ့ ပြန်လည်ထိတွေ့ဆက်ဆံဖို့ အာဆီယံကို ထပ်မံတိုက်တွန်းထားသလို ထိုင်းအစိုးရအနေနဲ့လည်း မြန်မာနဲ့ ဆက်ဆံရေးမှာ 'အဆင့်လိုက် သုံးသပ်ပြီးလိုက်လျောညီထွေတဲ့ ပြန်လည်ထိတွေ့ဆက်ဆံရေး' (calibrated re-engagement) ချဉ်းကပ်မှုကို ထောက်ခံတယ်လို့ ပြောထားပါတယ်။
