Cymru Feed

Stormydd Hydref

2013-10-25T11:34:59+00:00

Gyda’r Swyddfa Dywydd yn rhybuddio am stormydd mawr ddiwedd mis Hydref ai cyd-ddigwyddiad yw hi bod un o gorwyntoedd gwaethaf Prydain wedi digwydd yng Nghymru union 100 mlynedd yn ôl?

Ar Hydref 27 1913, fe ‘sgubodd corwynt drwy ardal Cwm Taf yn ne Cymru gan achosi difrod enfawr a lladd tri o bobl.

Mae’r lluniau yma yn dangos maint y difrod yn ardal Trefforest, Cilfynydd, Abercynon ac Edwardsville. Diolch i Archifau Morgannwg a gwefan Old Merthyr Tydfil am ganiatâd i’w dangos.

Digwyddodd cwta bythefnos ar ôl y ffrwydriad enfawr yng nglofa Senghennydd ac felly roedd nifer o ffotograffwyr yn dal yn ne Cymru wrth law i gofnodi’r llanast.

Ewch i wefan Wales Online i weld mwy o luniau, a darllen hanes prosiect ym Merthyr i greu archif ar-lein o luniau a straeon pobl leol o’r digwyddiad.

Ond nid dyma’r unig storm enwog ym mis Hydref: roedd llongddrylliad yr Hindlea mewn storm arswydus oddi ar arfordir Môn ar yr un dyddiad, Hydref 27, yn 1959 a suddodd y Royal Charter mewn storm debyg union 100 mlynedd cyn hynny, ac yn yr un lle, ar Hydref 26 1859.

Lluniau Patagonia Tom Griffiths

2013-05-14T13:42:08+00:00

"Unwaith mae gen i berthynas efo'r person, dwi'n tynnu lluniau gwell," meddai’r ffotograffydd Tom Griffiths sydd yn arddangos ei luniau o Batagonia ar hyn o bryd ar ôl byw yno am bron i chwe blynedd.

Rydyn ni’n gyfarwydd â gweld delweddau o olygfeydd a phobl Patagonia erbyn hyn. O Dai Jones Llanilar i Gruff a Matthew Rhys, ac o 4Wal i ffilm Marc Evans, rydyn ni wedi gweld dipyn o gymuned Gymraeg y Wladfa ar y teledu.

Don Perez Williams gan Tom Griffiths

Ond mae 'na rywbeth agos-atoch sy'n wahanol yn lluniau Tom Griffiths. Efallai mai'r ffaith ei fod wedi bod yn byw neu aros gyda’r bobl sydd yn ei luniau tra roedd yn crwydro Patagonia sy'n rhoi ryw elfen o adnabyddiaeth ac ymddiriedaeth iddyn nhw.

Roedd Tom eisiau tynnu lluniau o rai o’r teuluoedd yno oedd â chysylltiadau â’i ardal enedigol ym Meirionnydd. Aeth i’r Ariannin yn wreiddiol yn 2002 i dreulio tri mis yn gweithio ar brosiect ar gyfer cwrs ffotograffiaeth roedd yn ei ddilyn yn y coleg.

Ond aeth y tri mis yn chwe blynedd, ac mae'n dweud ei fod yn dal heb gyrraedd ei nod o gofnodi’r gymuned Gymreig yno.

Mae’n gobeitho mynd nôl i barhau gyda’i brosiect fis Hydref gan weithio fel bugail er mwyn ariannu’r daith.

Mae ei luniau yn cael eu harddangos yn ystafell Carneddau, Plas yn Dre, Llanrwst o 20 Mai 2013 am fis ac mae rhai hefyd i’w gweld am gyfnod yng nghaffi TH Roberts, Dolgellau.

Ewch i weld detholiad ohonyn nhw ar wefan Darganfod