KALLATTIIN, US fi Iraan hojjetaa jeettii rukutame keessaa achi buuten dhabame argachuuf dorgommiitti jiru

Haguuggii Tamsaasa Kallattii

1. Sa'aatii 7 duraHaleellaa Israa'el gamoo petrokeemikaalaa Iraan irratti raawwateen namoonni shan ajjeefamuu miidiyaan Iraan gabaase

   Miidiyaaleen mootummaa Iraan haleellaa dhaabbata petrokeemikaalaa Iraan irratti raawwatameen namoonni shan du'uusaanii gabaasaa jiru.

   Israa'el ammoo dhaabbatichi kan Iraan misaa'ela balistikii isheef "qaama murteessaa" ta'e kan ittiin omishtuudha jetteetti.

   Raayyaan Ittisa Israa'el (IDF) akka jedhutti, haleellaan kun, dhaabbata kibba dhiha Iraan Mahshahr keessatti argamu irratti Sambata har'aa ganama keessa kan raawwatameedha.

   Dhaabbilee kunis dhaabbilee giddu galeessaa lama kanneen Iraan keessatti meeshaalee dhoo'anii fi meeshaalee waraanaa biroo oomishuuf gargaaran keessaa tokko ta'uu hime.

   Iraaniitti qondaalli naannichaa tokko akka jedhanitti, haleellaa kanaan namoonni shan ajjeefamanii, kanneen biroo 170 ammoo miidhaa isaan mudateef yaalamaa jiru jedha dhaabbata oduu Faars kan Korporeeshinii Eegdota Warraaqsa Islaamaa waliin hidhata qabutti.

2. Sa'aatii 7 duraIraan horsiise bultoonni biyyattii helikooptaroota Ameerikaa 'Black Hawk' lama rukutuu himte

   

   Madda suuraa, Reuters

   Iraan gosoonni horsiisee bultootaa lama gaarreen Iraan keessa jiraatan helikooptaroota Ameerikaa 'Black Hawk' lama rukutan jette.

   Gareen Eegdota Warraaqsa Islaamaa iba baaseen, ''Horsiisee bultoonni bulchiinsa Kohgiluyeh Boyerahmad [bulchiinsa] fi Bakhtiaris'' keessa jiraatan bulchiinsoota naannoo gaarreen dhaqqabuuf rakkisaa ta'an kanneen humnoonni waraanaa Iraan itti argaman irraa fagoo ta'an keessatti haala milkaa'aa ta'een 'helikooptaroota 'Black Hawk' lama rukutan'' jedha.

   BBC'n yaada kana qulqulleeffachuuf US Centcom gaafatee jira.

   Horsiisee bultoonnii fi Bakhtiaris aadaadhaan akka ummatoota gosa Iraan jedhamuun kan beekaman yoo ta'u, godaansa waqtii cimaa ta'eetiin beekamu. Isaanis horii fi kaampiiwwan isaanii bineensota bosonaa fi hanna irraa eeguuf jecha qawwee hidhachuun beekamu.

   BBC Verify viidiyoo Jimaataa irraatti namoota hidhannoo qaban fakkaatan sadii yoo xiqqaate helikooptaroota 'Black Hawk' lamatti dhukaasaa jiran agarsiisu mirkaneessee jira.

   Michuu BBC US kan ta'e CBS akka gabaasetti, helikooptarri paayilatii xiyyaara F-15E irraa baraarame fe'ee ture tokko dhukaasa meeshaa xixiqqaatiin rukutamee miseensota hojjettoota xiyyaarichaa madaa'anis nagaan qubateera.

   Itti aanaan bulchaa bulchiinsa Kohgiluyeh fi Boyer-Ahmad, Jimaata darbe namoonni naannoo sanaa qawweedhaan ''helikooptaroota diinaa'' irratti dhukaasuun ''bulchiinsicha keessatti bakka kamiyyuu akka hin qubanne dhorkaniiru'' jedhan.

3. Sa'aatii 8 duraAmeerikaan firoota jeneraal Iraan bara 2020 ajjeefamanii to'atte

   

   Madda suuraa, Getty Images

   Ameerikaan ilma obboleettii fi akaakkayyuu Jeneraal Iraan Qaasem Soleimaanii kan bara 2020 haleellaa qilleensaa Ameerikaatiin Iraaq keessatti raawwateen ajjeefame to'annaa jala oolchite jedha Ministeerri Dhimma Alaa Ameerikaa.

   Firoonni janaraala kanaa kanneen US keessa jiraachaa kan turan yoo ta'u, mirgi seeraa biyyattii keessa dhaabbataan ittiin jiraatan haqamu ministirri Dhimma alaa Maarkoo Ruubiyoon dubbatan.

   Intalli obboleettii Soleemaanii "ifatti deeggartuu" sirna Iraan ta'uu itti fuftee jirti jedha. Akkasumas Ameerikaa keessatti "olola" sirnichaa babal'ifteetti jedhan.

   "Bulchiinsi Traamp biyyi keenya akka lammiilee alaa sirnoota shororkeessummaa farra Ameerikaa deeggaraniif mana akka taatu hin hayyamu" jedha ibsichi.

   Hoseen Salaamii: Dursaan garee eegdota Warraaqsa Iraan Israa'eliin ajjeefaman eenyu?

4. Sa'aatii 8 duraSuuraaleen miidhaa haleellaa Yunivarsiitii Teehraan irra gahe agarsiisan

   

   Madda suuraa, EPA

   Suuraaleen Iraan irraa argaman hammam miidhaa haleellaa qilleensaa Yunivarsiitii Tehraan Shaahid Beheeshti irratti Jimaata darbe qaqqabe jedhamee gabaafame agarsiisu.

   Ministirri Saayinsii Iraan, Hoseen Sima'ee Saaraaf har'a dura iddoo kana daawwataniiru.

   

   Madda suuraa, Reuters

   

   Madda suuraa, Reuters

5. Sa'aatii 8 duraTiraamp yeroo garagaraatti Iraaniif akeekkachiisa waliin sa'aatii kenneeraaf, tartiibni isaa kunooti

   

   Madda suuraa, Getty Images

   Tiraamp iraan yoo waliigalteerra gahuu baatte ykn yoo Ulaa Hoormuuz sa'aatii 48 keessatti banuu didde "abidda jaannabaa" irratti roobsuuf akeekkachiisan.

   Erga waraanni kun eegaleetti yeroon murtaa'e hedduun isaaf kennameera, doorsisni yeroo dhiyoo kana guyyoota 10'f haleellaa bu'uuraalee anniisaa irratti raawwatame kan inni Bitooteessa 27 labse waliin wal fakkaata.

   Tartiibiinni yeroon isaa kunooti:

   Bitooteessa 21: Tiraamp Iraan sa'aatii 48 keessatti Ulaa Hormuuz deebitee hin bantu yoo ta'e, "dursa warra gurguddoo irraa eegaluun dhaabbilee humna elektiriikaa adda addaa [Iraan] rukuteen dhabamsiisa," jedhan

   Bitooteessa 23: Sana booda biyyoonni lamaan ''haasawa baayyee gaarii fi bu'a qabeessoo ta'e'' akka taasisan ibsuun, haleellaa waraanaa bu'uuraalee anniisaa irratti raawwatamu kamiyyuu fi hunda guyyoota shaniif akka tursiisu dubbataniiru

   Bitootessa 27: Tiraamp gaaffii mootummaa Iraan irraa dhiyaateef deebii kennuudhaan guyyoota 10'f warshaalee anniisaa Iraan haleeluu akka dhaabuu ibsuun, yeroon xumuraasaa Ebla 6'tti ol guddiseera

   Har'a: Guyyaa xumuraa Sadaasa 27 irra deebi'ee, Iraan "abiddi jaannabaa/gaannam si'ool" irratti roobuuf sa'aatii 48 akka qabdu himeera.

6. 4 Ebla 2026Tiraamp yeroo xumuraatiif jechuun Iraanif yeroo qabe

   

   Madda suuraa, Getty Images

   Tiraamp Iraan hatattaamaan gara walii galteetti akka dhuftu, yoo sana hin taane balaa cimaan akka ishee mudatu akeekkachiisuun sa'aatii 48 kenne.

   Iraan waliin lola keessa kan jiran Pirezidaantiin Ameerikaa Doonaald Tiraamp Iraan gara waligalteetti akka dhuftu fi ulaa Hormuz banuuf sa'aatii 48 kanne.

   Tiraamp Iraan yeroo kennameef keessatti yoo kana gochuu dadhabde ''adabbii cimaa'' akka ishee mudatu akeekkachiisaniiru.

   Tiraamp ergaa toora miidiyaa hawaasaa 'Truth' irratti akka maxxansetti Iraanif yeroo dhumaaf sa’aatii 48 qofti kennamuu eeran.

   Haa ta'uu malee erga waraanni kun jalqabee, Tiraamp ibsa akkanaa kana kennuun kun isa jalqabaa miti. Guyyoota darban keessa ibsa walfakkate hedduu kennus, marii eegaliinuu sababa jedhuun guyootaaf dheeressaa ture.

7. 4 Ebla 2026Baahireen erga waraanni Iraan jalqabee haleellaa meeqa akka qolatte beeksifteetti.

   

   Madda suuraa, Reuters

   Akka odeeffannoon miidiyaa hawaasaa irratti maxxanfame mul'isutti Baahireen, erga waraanni kun jalqabee kaasee misaa'ela 188 fi haleellaa diroonii 453 Iraan irraa itti ergaman ''qolachuun barbadeessiteetti''.

   Ministeerri Raayyaa Ittisa Biyyaa Yunaayitid Arab Emireet ammoo har’a qofa diroonii 56 fi misaa’ela balistikii 23 qolachuu beeksise.

   Ministeerichi ibsa miidiyaa hawaasaa irratti qoodeen torban shan dura erga waraanni kun jalqabee kaasee misaa’ela balistikii 498, misaa’ela kiruuzii 23, fi diroonii 2,141 qolachuu isaa beeksiseera.

   Erga waraanni kun jalqabee miseensonni waraana biyyattii lama, ogeessi biyya alaa tokko, fi namoonni nagaa 10 ajjeefamuun gabaafameera.

   Dabalataanis namoonni 217 madaa’aniiru.

   Gabaasni miidiyaalee akka mul'isantti haleellaa Iraan torban sadan jalqabaa irratti UAE xiyyeeffannoo olaanaa jala ta'uun haleellaan hedduun irratti raawwtameera.

8. 4 Ebla 2026Humni waraanaa Iraan Doonii Israa’el waliin hidhata qabdu Ulaa Hormuuz keessatti haleelu ibse.

   

   Madda suuraa, Getty Images

   Humni galaanaa Eegdota Warraaqsaa doonii Israa’eel waliin hidhata qabdu Ulaa Hormuz keessatti irratti xiyyeeffachuu isaa ibseera.

   Humni Iraan kun miidiyaa hawaasaa isaa irratti maqaa doonii kanaa 'MSC Ishika' jechuun beeksiseera.

   Dhaabbileen geejjiba doonii hordofan dooniin kun alaabaa Laayibeeriyaa kan qabdu ta'uu himan.

   Eegdonni Warraaqsaa doonii kana diroonii balleesitee badduun haleeluu hordofee ''ibiddi guddaan' akka mudate himaniiru.

   Haa ta'uu malee waa'ee haellaa kanaa ilaalchisee hanga yoonatti gama Israa'elii waanti jedhame hin jiru.

9. 4 Ebla 2026Iraan 'carallaan Nikuleraa biyyoota Galoo galaana lubbuu gaaga'uuf jira' jechuun akeekchiste

   

   Madda suuraa, EPA

   Dhaabbanni Annisaa Atoomikii Iraan erga waraanni kun jalqabee har’a yeroo 4ffaaf bakki warshaa niwukilaraa BushehEr haleelamuu beeksisera.

   Dhaabbatichi haleellaa kanaan eegdota warshichaa keessaa tokko ajjeefamuu ibsuun, Gocha kanaaf Ameerikaa fi Israa'el komatera.

   Ibsichi itti dabaluudhaan qorannoon jalqabaa akka agarsiisutti haleellaa kanaan qaama warshichaa gurguddoo irratti ''miidhaa tokkollee hin geeenye''.

   Akkasumas miidhaan gahe hojii isaa irratti ''dhiibbaa tokkollee akka hin qabne'' ibseera.

   Haa ta'u malee, warshaan anniisaa niwukilaraa kun ''carallaa raadiyoo-aktiivii olaanaa'' waan of keessaa qabuuf haleellaan raawwatamu ''balaa niwukilaraa guddaa'' fiduu akka danda'u akeekkachiiseera.

   Bushehir warshaa tokkicha anniisaa niwukilaraa Iraan hojirra jiru yoo ta'u, deeggarsa Raashiyaatiin xumurame.

   Dhaabbanni Annisaa Atoomikaa Idil-addunyaa gabaasni haleellaa warshaa niwukilaraa Bushehir irratti raawwatame jedhu kan ''baay'ee yaaddoo'' qabu akka ta'e ibseera.

   Ejensichi ibsa baaseen ''hanga yoonaa sadarkaa raadiyaashinii daballii agarsiise hin galmoofnee jedheera''

   Itti dabaluudhaanis warshaalee anniisaa niwukilaraa fi naannoo isaanii irratti ''haleellaan tokkollee'' ta'uu akka hin qabne ibsuun balaa niwukilaraa ittisuuf ''of eeggannoo waraanaa olaanaa'' akka godhamu gaafateera.

   Ministirri dhimma alaa Iraan Abbaas Araaghchi carallaan raadiyoo-aktiivii kaanaan biyyoota Galoo Galaanaa guuttu keessatti ''lubbuu balleessaa'' jedhan

   Israa'el fi Ameerikaan warshaa Bushehr irratti yeroo afur boombii darbaniiru."

   ''Radiyeeshiniin raadiyoo'aktiiwii yoo ka'e Tehran keessatti osoo hin taane magaalota gurguddoo biyyoota Galoo Galaanaa keessatti lubbuu namaa gaaga'aa ' jedhan.

   Ameerikaanis ta’e Israa’el haleellaa naannoo iddoo niwukilaraa kanaatti raawwachuu fi dhiisuu isaanii hanga ammaatti hin dubbanne.

10. 4 Ebla 2026Iraan ammallee Tiraampiif mata dhukkubbii taati, Jowel Gaantar, Jerusaalemirraa

    

    Madda suuraa, Getty Images

    Guyyaadhuma afur dura ture Ministirri Ittisaa US daangaa qilleensaa Iraan irratti US olaantummaa horatteetti kan jedhan.

    Humna ittisa qilleensaa Iraan waan mancaasneef humni qilleensaa US gad-siqee yaaddoo malee balali'uu danda'a jechuun dubbatan.

    Garuu erga waraanni eegale Iraan jeettii US saffisaan imalu haleeluun milkaa'ina guddaashee galmeessite.

    Iraan akka dubbatanitti jeettiin rukutamuun mariin Iraan waliin adeemaa jiruurratti dhiibbaa homaatuu hin qabu.

    Haa ta'u malee, kuni keessumaa hojjetaan humna qilleensaa jeettii rukutamerraa oole yoo Iraaniin to'atame haala jiru jijjiira.

    Iraan hammamuu mancaatus ammallee gama siyaasaafi waraanaan Tiraampiif mata dhukkubbii taatee akka itti fuftu mul'isteetti.

11. 4 Ebla 2026Haleellaan Pirezidaantii Somaaliyaa irratti baname maali?

    

    Madda suuraa, Getty Images

    Pireezidaantii Somaaliyaa Hasan Sheek Mohaamuuditti Jimaata kaleessaa dhukaasa itti banamerraa lubbuun ooluun Biluumbarg gabaase.

    Pirezidantiichi magaalaa kallattii kibba Somaaliyaatti argamtu Baayidowwaa bakka jedhamu keessatti osoo imalaa jiranii, dhukaasni meeshaa waraanaa madfiin isaaniifi garee isaan waliin imalaa turan irratti banamuun gabaafameera.

    Haa ta'uu malee, Pireezidaanti Hasan Sheekiifi jilli isaanii dhukaasa kanaarraa baraaramuum ibsameera.

    Akka ragaa poolisii fi qondaaltota mootummaatti, meeshaaleen waraanaa guddoon kun kan dhukaafaman yeruma pirezidaantichi xiyyaara irraa bu’anii qondaaltota nagaa gaafachuu eegalanitti ture.

    Waraanni Somaaliyaa magaalaa loltoonni Itoophiyaa buufatan Baayidowaa maaliif to'ate?

12. 4 Ebla 2026Hayyama malee harka dubartii dhungachuun yakkaa?

    

    Madda suuraa, Alamy

    Hayyama malee harka dubartii dhungachuun yakkaa moo miti isa jedhu irratti seerri biyyoota biyyootatti gargarummaa qabaachuu danda'a ta'a.

    Waanti tibbana manni murtii olaanaa Ispeen irraa dhaga'ame dhiirri tokko fedhii ishee malee harka dubartii yoo dhungate akka haleellaa ykn miidhaa saalaatti akka ilaalamu murteessera.

    Murteen kun kan murtaa'e himata bara 2023, namni tokko harka dubartii buufata geejjibaa uummataa Maadriiditti dhungachuu hordofee falmii himataa ture booda manni murtichaa biyyatti keessatti gochi akkasii qoccolloo saalaa ta'e akka yakkatti akka ilaalamu kan murteese.

    Manni murtichaas namicha miidhaa saalaatiin yakkamaa ta'uu isaa mirkaneesse kana gara Yuuroo 1,620 adabara.

    Namichi kun dubartii kana irratti jeequmsas ta'e doorsisa tokkollee akka hin raawwanne falmatus murtee kanarraa hin oolle

    Biyyoota tokko tokkotti akka aadatti namootni yeroo nagaa wal fuudhan al tokko ykn lama harka wal dhungachuun baratamaadha.

    Dhimmi haleellaa saalaa waggoota dhiyoo asitti Ispeen keessatti bal'inaan falmii kaasaa tureera.

13. 4 Ebla 2026Qondaala jeettii waraanaa US qabachuun Iraaniif 'badhaasa guddaadha'

    

    Madda suuraa, Reuters

    Hojjetaa jeettii waraanaa US achi buuteen dhabame argachuun Iraaniif waan guddaadha jedhu qorataan.

    Dhaabbata Chaataam Haawusitti daarektarri US fi Kaaba Ameerikaa, Laawural Raap, hojjetaa US jeettii dhahame keessaa oolchuun Ameerikaaf ''ergama ijoodha'' jedhu.

    Nama kanammoo Iraan yoo argatte Iraaniif ''badhaasa guddaadha'' jedhu.

    Sababnimmoo, haalaan itti dhimma bahu jechuun himu.

    Yoo qabatanii suuraa isaa gadhiisan keessumaa sababa waraanaan qeeqa jabaa ummanni US dhiheessaa jiru ittuu hammeessa jedhu.

    ''Yoo suuraan qoodame, akkaataa Ameerikaatii waraanni kuni ilaalamu haalaan jijjiira.''

    Hojjetaan humna qilleensaa yoo qabame marii irratti Iraaniif carraa guddisa.

    Mariinis walitti bu'iinsa tasgabbeessurra hojjetaa kana gara hiiksisutti ce'uu mala jechuun himu.

    ''Galmi duula kanaa ifa miti... ammoo walxaxaa ta'aa jiru,'' jechuun dubbatan.

14. 4 Ebla 2026Labsiin haaraa baheefi mirga Oromiyaa eeru maaliif falmii kaase?

    

    Madda suuraa, Getty Images

    Labsii haaraa kana keessatti tumaan manneen murtii Oromiyaaf aangoo laate keewwatni 25 miseensota mana marichaarraa mormii keessummeesseera, gaafiiwwanis irratti ka'aniiru.

    Labsiin 'ijoo dubbii ta'e' paarlamaaan ragga'eefi naannoo Oromiyaa ilaallatu maal of keessaa qaba?

15. 4 Ebla 2026Hanga yoonaa loltoonni US waraana Iraaniin miidhaman hangami?

    

    Madda suuraa, Getty Images

    The death toll remains at 13, according to the figures.

    Ministeerr Ittisaa US akka beeksisetti, erga waraanni eegalee walumaagala loltoonni US 365 madaa'aniiru.

    Kunneenis:

    • Waraana keessaa 247
    • Humna galaanaa keessaa 63
    • Humna galaanaa leenjii addaa qaban 19 akkasumas
    • Humna qilleensaa 36

    Loltoonni hanga ammaa du'animmoo 13 ta'u ibseera.

16. 4 Ebla 2026Daawwadhaa! Sochii US kibba Iraanitti hojjetaa ishee achi buuteen dhabame argachuuf taasisaa jirtu

    Sochii waraanni US hojjetaa achi buuteen dhabame baraaruuf bobba'e mul'isu.

    BBC'n viidiyoo kanarratti xiyyaara waraanaa bira helokoftarri lamas ni mul'atu.

    Viidiyoon kuni bulchiinsa Kuzestaan jedhamutti waraabamuu BBC'n mirkanesseera. Daawwadhaa!

17. 4 Ebla 2026WBO'n Obbo Shimallisiif deebii kenne

    

    Pirezidantiin Naannoo Oromiyaa Obbo Shimallis Abdiisaa Oromiyaa keessatti nagaa waaraa buusuuf Ajajaa Waraana Bilisummaa Oromoo waliin mari'achuuf qophii ta'uu dhihoo dubbataniiru.

    Walitti bu'iinsa humnoota mootummaafi hidhattoota parlaamaan tarree shororkeessaa jala kaa'e gidduu adeemaa jiruun miidhaan guddaa dhaqqabeera.

    Marrroon Obbo Shimallis waliin marii taa'uf jedhaa?

18. 4 Ebla 2026US fi Iraan qondaala jeettii waraanaa US achi buuteen dhabame barbaadaa jiru

    

    Madda suuraa, Miidiyaa mootummaa

    Hojjetaa jeettii waraanaa US achi buuteen dhabame argachuuf barbaachi cimeera.

    Guyyaa Jimaataa erga jeettiin Ameerikaa F-15 jedhamu rukutame booda barbaachi itti fufeera.

    Dhimma kanaan walqabatee wantoonni haaraa jiran kanneeni:

    • Balaliisaan xiyyaararra ture tokko baraarameera.
    • Qondaalonni Iraan nama achi buuteen dhabame bakka jiru hime dolaara 66,100 akka badhaasan himuu miidiyaan mootummaa biyyattii gabaaseera.
    • Xiyyaara Ameerikaa biraa A-10 Warthog jedhamuufi xiyyaara kufe keessa warra jiran baraaruf bobba'ee Iraan lafaan dhahe jette.
    • Balaliisaan xiyyaara A-10 Galoo Galaanaa Galfitti of baraaruufi eegasi baraaramuu US'tti michuun BBC, CBS gabaaseera.
    • Pirezidantiin Ameerikaa Donaald Tiraamp xiyyaarota waraanaa lama rukutamanii caccaban jedhamee gabaafameerratti ammatti ifatti wanti jedhan hin jiru.
    • Waa'ee xiyyaarota kanneen garuu pirezidantiin akka beeku taasifamuu masaraan isaanii Waayit Haawus gabaaseera.
    • Gama kaaniin, US erga waraanni eegale loltoonni 365 madaa'uu beeksisteetti.

19. 4 Ebla 2026Ashamaa!

    Tamsaasni kallattii BBC Afaan Oromoo eegale.

    Waraana Giddugala Bahaatti cimee itti fufeefi dhimmoota Itoophiyaafi kaanirraa arganne jala jalaan isin biraan geenya.

    Isinis karaa WhatsApp, Facebook, YouTube fi marsaritii keenyarratti nu hordofaa.

    Lafa nagaa oolaa!